Hulda Mixose Wonshidhino

INDONEEZHIYAHO Sangiiri Besaari yinannite shiima giddichora sase Kiristaana ikkino roduuwi heeꞌranno; boodu diri albaanni insa sasenti lagu qaccera mitteenni loosanno. Insa mannu Qullaawa Maxaafa afanno gede kaaꞌlanno daafira, hatte giddichora soqqanshonsanni egennaminoreeti. Ikkirono insa hatte yannara mito woyite mitto baxxino looso loosanno.

Umo insa wayi giddora eꞌꞌe wayi giddonni jajjabba kinna fushshanno. Mite kinna jajjabba kaase geeshshite. Hakkunni gedensaanni insa barcimaho ofolle kinna madooshshunni cancane shiimaadda assanno. Hakkiinni cancanino kinna baaldete wore gooddo gooddiꞌre fule qaera adhe haꞌranno. Insa tenne kinna jajjabba ogorrara wore makeenaho hogowanno; tenne kinnanni doogo loonsanni.

Kuri roduuwi giddo mitte Huldaati. Ise konne looso ledose loosanno roduuwinni roore seeda saate loosa dandiitanno. Ise duucha woyite, loosse afidhanno woxe maatesera hasiisannore wonshate horoonsidhanno. Ikkirono xa loossanni noohu woxe codhite mitto uduunnichono hidhate heddeeti. Ise JW Layibirere horoonsiꞌrate taabileete hidha hasidhino. Hulda tenne appilikeeshiinera noo viidiyubbanna borruwa soqqanshote kaaꞌlitannosetanna Qullaawa Maxaafa roore huwattanno gede assitannoseta affino.

Hulda mitto agananna darate ikkitanno yanna soodo soodo lame saate loossino; ise konni garinni loosse boode makeena woꞌmitannota shiimaadda kinna qixxeessitino. Jeefote ise taabileete hidhate ikkannose geeshshi woxe afiꞌra dandiitino.

Hulda togo yitino: “Tenne haaro taabileete horoonsiꞌre dancha gede soqqama dandoommatanna songote gambooshshira qixxaawa shota ikkitinoe gara hedeemma woyite hattenne xissoꞌyanna daafuroꞌya bayichonkonni haweemma.” Qoleno ise tini taabileete Koroonu fayya yannara soqqamatenna gambooshshe assiꞌrate kaaꞌlitinoseta coyidhino. Hulda mixose wonshiꞌrase lowo geeshsha hagiirsiissannote.