Yaaqoobira Halaꞌlado Maate Noosi

TENNE halaꞌlado maate lai. Kuri 12 Yaaqoobi oosooti. Qoleno, isi seenneno ilino. Oososi giddo suꞌmasi afoottohu no? Oososi giddo hanni gamu ayeeootiro ronso.

Liya Roobeeli, Simiooni, Leewinna Yihuda iltu. Raaheeli mitto qaaqqo nafa ila hoogasenni lowo geeshsha xissiisidhu. Konni daafira, soqqamaanchose Baalla Yaaqoobira galte assite uyitu; Baalla Daaninna Niftaaleemi yinannire lame labballo ooso iltu. Hakkunni gedensaanni, Liyano soqqamaanchose Zelefa Yaaqoobira galte assite uyiteenna, Zelefa Gaadinna Aseeri iltu. Gedensaanni, Liya Yisaakoorinna Zaabilooni ledde iltu.

Yannate gedensaanni Raaheeli qaaqqo iltu. Suꞌmasino Yooseefi yitu. Albaange Yooseefi lainohunni lowori ronseemmori no; korkaatuno isi lophphe macca mancho ikkino. Yaaqoobi kore 11 ooso ilinohu Raaheeli anniwa Laabawa heeꞌreeti.

Yaaqoobi seenneno ilino; kayinni Qullaawu Maxaafi mittete suꞌmalla kulanno. Suꞌmise Diinaati.

Yaaqoobi Laaba qaenni fule Kanaꞌꞌaani higanno yanna iillitu. Konni daafira halaꞌlado maatesinna hoshsha gereewosi hattono saadasi woꞌmanta gamba assire Kanaꞌꞌaani higi.

Yaaqoobinna maatesi Kanaꞌꞌaani gobbara shiima yanna heedhu gedensaanni, Raaheeli wole qaaqqo iltu. Iltinohu doogo hadhanni heedheeti. Raaheeli iltanni lowo geeshsha qarrantu; ilate aanano reyitu. Ikkollana ilamino qaaqqi mittore diꞌꞌikkino. Yaaqoobi qaaqqoho suꞌma Biiniyaami yee fushshi.

Yaaqoobire 12 labballo ooso suꞌma hawa hooganke hasiissannote; korkaatuno woꞌma Isiraeelete daga insa giddonni fultinoreeti. Tonaalame Isiraeelete gaꞌrera suꞌma fushshinoonnihu Yaaqoobiri 10 oosonna Yooseefiti lame ooso ilantu gedensaanniiti. Tini ooso woꞌmanti ilantu gedensaanni, Yisaaqi lowo diro heeꞌrino; lowo oosora ahaaho ikkasinni hagiidhikki digatino. Yisaaqi ahaaho ikkannotera Diinara mayi iillinosero hanni laꞌno.