Lame Worbuulle Meento

ISIRAEELE qarru aana ubbuti, Yihowawa higge raartu. Yihowano worbuulle massagaano oyeensa raarensa macciishshi. Qullaawu Maxaafi tenne massagaano mesaafintete yaanno. Umi mesaafintichchi Iyyaasuuti; isi gedensaanni kaꞌino mesaafinte kayinni Gotooniyaali, Naoodinna Semegaari yinannireeti. Ikkollana Isiraeele kaaꞌlino manni mereero Dibooranna Iyyaeeli yinanni meentino no.

Diboora masaalaanchote. Yihowa isera albaage ikkannore kulannose; iseno Yihowa yiinore mannaho kultanno. Qolteno Diboora mesaafintichchote. Ise ilaalaame gobbara noote mitte saattichchu haqqichcho hunda ofoltanno; mannuno qarra tidhate isewa haꞌranno.

Hakkawaro Kanaꞌꞌaani gobba nugusi, Iyyaabisi yinanniho. Isira 900 olu saragalli noosi. Wottaaddarisi lowo geeshsha wolqaataamma ikkinohura, Isiraeele Iyyaabisi soqqamaano ikkitanno gede giddeessi. Iyyaabisi wottaaddari roorrichchi Sisaara yinanniho.

Mitto barra Diboora mesaafintichchu Baarqiwa manna sokke togo yitu: ‘Yihowa togo yiino: “Taaboori Ilaala 10,000 manna haadhe haꞌri. Hakkono Sisaari atewa hige daanno gede asseemmo. Hakkiinnino isinna wottaaddarisi aana qeelle eemmohe.”’

Baarqi Diboora, ‘Ati ledoꞌya haꞌrittaro haꞌreemmo’ yii. Diboorano ledosi hadhu; kayinni togo yitusi: ‘Yihowa Sisaara meyaate angara sayise aanno daafira, tenne qeellenni ati afiꞌratto ayirrinynyi diheeꞌranno.’ Gedensaannino ise yitunte gede ikki.

Baarqino Sisaari wottaaddari ledo qasamate, Taaboori Ilaalinni dirri. Hedeweelcho Yihowa lolaho dirriseenna, lowohu diinu wottaaddari lolahunni goofi. Sisaari kayinni saragallisinni dirre xooqi.

Hakkiinnino Sisaara xooqanni Iyyaeeli dunkaana mari. Iseno dunkaana eessite, ado uyitusi. Ado mugichcho naqqeennasi, mulenni goxi. Hakkiinnino Iyyaeeli dunkaanu ura adhite, konni bushu manchi umira qassu. Gedensaanni Baarqi dayita, Sisaari reeshsha leellishshusi! Diboora coyidhuri halaale ikkino gara wodanchi.

Gedensaanni Nugusa Iyyaabisino shini; hakkiinnino Isiraeele shiima yanna keere afidhu.