Salamooni Maganu Mine Mini

DAAWITI reyara albaanni, Yihowa minesi minnanni gara kulinosire Salamoonira kulisi. Salamooni nugusa ikkihunni shoolki diro, Maganu mine mina hanafi; konne mine lamalu dirinninna daratunni mine gudino. Maganu mine tonnu kuminni kiiramanno manni minino; konni loosira lowo woxi fulino. Korkaatuno konne mine minate lowo worqenna birra fushshinoonni.

Xaadooshshu dunkaaninte gede kuni Maganu minino lame kifile afiꞌrino. Ikkollana tini kifilla xaadooshshu dunkaani kifillanni lame ero ikkitanno. Salamooni gondooru taawoota giddiidi kifilera wori; xaadooshshu dunkaanira nooha wole uduunne kayinni layinki kifilera wori.

Maganu mini miname goofita maassiꞌni. Misilete aana laꞌꞌattonte gede, Salamooni Maganu minira albaanni guluphphe huuccatto assi. Isino togo yee Yihowa huucciꞌri: ‘Iimi nafa gudisire ate haarate ajannoha ikkiro, kuni shiimu mini isinni ate haarate lowo geeshsha ajanno. Ikkeennano Maganoꞌya, mannikki alba konni miniwa hige huucciꞌrannohe wote eeggatena macciishshi.’

Salamooni huuccatto asse kaita, iiminni giira dirritu. Dirriteno kakkalloonnita saadate kakkalo ittu. Qoleno Yihowawiinni waraꞌa yiino xawaabbi daye Maganu mine woꞌmi. Tini ikkito, Yihowa macciishshanni nootanna minnoonni minenna Salamooni huuccatto baxinota leellishshanno. Maganu mini xaadooshshu dunkaaninni roore mannu Yihowa magansiꞌrate daanno base ikki.

Salamooni seeda diro danchu garinni gashshi; mannuno hagiidhi. Ikkollana Salamooni Yihowa magaꞌnannokkiha batinynye meento wole gobbanni adhi. Hakko meenti giddonni mitte kakkalo magansidhanna kuneeti laitto? Yannate gedensaanni, adhino meenti Salamoonino wole maganna magaꞌnanno gede assisi. Salamooni wole maganna magaꞌnita mayi kalaqiminoro afootto? Manna danchu garinni gashsha aguri. Kaajjado mancho ikki; mannu hagiirrino bai.

Konni daafira Yihowa Salamoonira hanqe, ‘Gashshoote atewiinni haare, woleho eemmo. Tenne asseemmohu ati lubbote heedheenna ikkikkinni beettikki gashshooti yannaraati. Ikkirono beettikki gashshootira noo manna gudise haare dihooleemmo’ yiisi. Kuni ikkinohu hiittoonniitiro hanni laꞌno.