Maganu Nugusa Hiziqiyaasi Kaaꞌlisi

KUNI manchi Yihowa huucciꞌranni noohu mayiraatiro afootto? Isi tenne borrote sokka Yihowahu kakkalote bayichchi albaanni faninohu mayiraati? Kuni manchi Hiziqiyaasi yinanniho. Hiziqiyaasi, lame gaꞌre amadinohura wodiidi Isiraeelete gashshootira nugusaho. Isi buuto mitiiꞌmino. Mitiiꞌminohu mayiraati?

Asoori gobba wottaaddari konni albaanni aliyyeta 10 gaꞌre qase kaino. Yihowa hakko manni lowo bunshe assino daafira baꞌara agurino. Asoori gobba wottaaddari xaano lame gaꞌre gashshoote qasara dayino.

Asooru nugusi Hiziqiyaasira sokka borreesse soyi. Hiziqiyaasi Maganoho albaanni fanino borro iseeti. Asooru nugusi sokkate giddo Yihowa qacifate borreessino; Hiziqiyaasino waajjanno gede assannore borreessino. Konni daafira Hiziqiyaasi togo yee huuccatto assiri: ‘Yihowa, Asoori nugusinni gatisinke. Gosa duuchchanti ati callu Magano ikkoottota affannona.’ Yihowa Hiziqiyaasi huuccatto macciishshikka?

Hiziqiyaasi dancha nugusaati. Tonne Isiraeelete gaꞌre gashshooti nugussa gedee busha diꞌꞌikkino; annisi Akaazi gedee bushano diꞌꞌikkino. Hiziqiyaasi Yihowa seera baalanka qorophphotenni agadhannoho. Konni daafira Hiziqiyaasi huucciꞌre kaita, masaalaanchu Isayyaasi Yihowawiinni daggino sokka soyisi. Sokkano togo yitanno: ‘Asooru nugusi Yerusaalame didaanno. Wottaaddarisi giddo mittuno qooxo nafa dishiqanno. Insa mitte qalacco nafa katama qolte dioltanno.’

Konni qooli aana noo misile lai. Kuni reyino wottaaddari baalu ayeehoro afootto? Asooru wottaaddaraati. Yihowa sokkaanchosi soyeenna, sokkaanchu mittu hashshinni 185,000 Asooru wottaaddara shii. Konni daafira Asooru nugusi wolqa bae qaera higi.

Konni garinni lame gaꞌre gashshooti diinu anganni gati; mannuno shiima yanna keere afiꞌre heeꞌri. Hiziqiyaasi reyita beettisi Minaase moohi. Minaasenna isi gedensaanni nugusa ikkinohu beettisi Amooni lowo geeshsha bushuulleho. Konni daafira gobba galagalte jaddotenninna finqilletenni woꞌmitu. Nugusa Amooni soqqamaanosi shituta, beettisi Iyyoosiyaasi lame gaꞌre gashshootira nugusa ikki.