Baabiloonete Qafadonni Kayise Yerusaalamete Huxxa Galagalle Huxxate Geeshsha

Isiraeele qafadante Baabiloonete noo waro ammanansa lowori fonqolino. Sidiraaqi, Misaaqinna Abidinaago wala yitanno giirara tungooni; Maganu kayinni giirate giddonni gatise fushshinonsa. Hakkiinnino, Meedooninna Faarsi yinanni gosa Baabiloone qeeltu gedensaanni, Daanieeli doobbiyu balera tungi; Maganu kayinni doobbiyu afoo cufe gatisinosi.

Goofimarchoho Faarsi nugusi Qiroosi, Isiraeele qafadotenni fushshi. Insano qafadante Baabiloone hadhuhunni 70 diri gedensaanni gobbansa higgu. Yerusaalame higganni heedhenni balaxxe assitinori giddo mittu, Yihowa mine minate. Ikkollana kayinni Diinnansa hakkawotenni konne looso loossannota hooltu. Konni daafira, Isiraeelete gosa Maganu mine minte guddinohu Yerusaalame higguhunni 22 diri gedensaanniiti.

Aanchine Izira Yerusaalame hige Maganu mine biifisino gara ronseemmo. Kuni ikkinohu Maganu mini miname goofihunni 47 diri gedensaanniiti. Hakkiinnino Izira Yerusaalame higihunni 13 diri gedensaanni, Nehimiya diigaminoha Yerusaalamete huxxa layinkimeeshsho huxxa kaaꞌlino. ONTIKKI Gafi 152 diri xagge amadino.