Yesuusi Lowo Manna Itisi

LOWO geeshsha masisannori ikke kaino. Cuuaancho Yohaannisi shine kaꞌnoonni. Heroodiyaada yinanniti nugusu galte iso dibaxxanno. Konni daafira nugusu Yohaannisi goowa muranno gede assiissu.

Yesuusi tenne macciishshiti, lowo geeshsha dadilli. Isi callisi mannu nookki bayichcho haꞌri. Mannu kayinni hoodesi haꞌri. Yesuusi lowo manna laiti, lowo geeshsha mararinsa. Konni daafira Maganu mangistere kulinsa; qoleno xiwamino manna hursi.

Hattee hawarro rosaanosi isiwa shiqqi yite togo yitusi: ‘Yanna hashshitino; qoleno kuni mannu nookki bayichchooti. Qooxeessaho noo qachchinni sagale hidhanno gede manna haꞌrisi.’

Yesuusi togo yee qoli: ‘Haꞌra dihasiissannonsa. Sagale kiꞌne uyiyyensa.’ Yesuusi alba Filiphphoosiwa hige, ‘Konni baalunku mannira ikkitanno sagale hiikkiinni hirrokka?’ yee xaꞌmisi.

Filiphphoosi togo yee qoli: ‘Konni baalu mannira shiima shiima sagale nafa iillishate lowo woxi hasiisanno.’ Indiriyaasi qole togo yii: ‘Konni beettira ontu timinna lame qulxuꞌme noosi. Kayinni konni baalu mannira diꞌꞌikkanno.’

Yesuusino, ‘Manna hayissote ofollanno gede asse’ yii. Hakkiinnino sagalete Magano galate, tima hiiqqaqqi. Hakkunni gedensaanni, rosaanosi timanna qulxuꞌme manna baalaho uyitu. Hakkiichcho 5,000 labballi no; qoleno lowo meentinna ooso no. Kuni manni baalunku duuwa geeshsha iti. Rosaanosi gattino sagale gamba assituta, 12 saffe woꞌmitu!

Hakkunni gedensaanni, Yesuusi rosaanosi Galiilu Baara widoogge fultara howolo eꞌanno gede kulinsa. Hashsha wolqaataame hombobalatte kaꞌe, howolo kawanna kaꞌa doyissa hanaffu. Rosaano lowo geeshsha waajjitino. Hakkiinnino hashshu taaloote, mitturichchi wayi aana haꞌranni insawa hige daanna laꞌu. Insano maatiro affinokki daafira, waajjite raartu.

Yesuusino, ‘Aneetina waajjitinoonte!’ yiinsa. Insa kayinni iso ikkinota diammantino. Konni daafira Pheexiroosi, ‘Addinta ati Mootichchahoro, waa kaxxanni atewa hige dayeemmo gede assie’ yiisi. Yesuusino, ‘Amoxa!’ yee qoli. Hakkiinnino Pheexiroosi dirre waa kaxxanni haꞌri! Shiima geeshsha haꞌri gedensaanni kayinni waajji; wayino itasira kai; Yesuusi kayinni gatisisi.

Yannate gedensaannino Yesuusi kumunni kiirranni manna itisino. Hakkawote kayinni lamalu timinninna shiima qulxuꞌmenni itisino. Xaano baalunku manni duuwe itino. Yesuusi manna towaatanno gari dancha diꞌꞌikkino? Isi Maganu doorino nugusa ikke moohanno wote, ninke mittu coyirano horonta diyaandeemmo!