Maganu Jaalasi Ikkattora Koyisinohe

Maganu jaalasi ikkattora hasiꞌranno. Kalaqama baalante aleenni ikkinohu ledo jaalooꞌma dandaattota hedde egennootto? Seeda yanna albaanni heeꞌrinohu Abirahaami, Maganu jaala yaamame woshshamino. (Yaaqoobi 2:23) Wolootuno Qullaawu Maxaafi giddo Maganu jaalla yaamantinori batinye doogonni maassantinonna hagiidhitino. Yannankerano, Uullate aana raga baalaho heeꞌranno manni Maganu ledo jaalooma kalaqiꞌrino. Atino Maganu ledo jaalooma kalaqiꞌra dandaatto.

Maganu ledo jaalooꞌma ayee manchi ledo jaalooꞌmatenni roorete. Maganu ammanantino jaallasi diagurannonsa. (Ibiraawuyaani 13:5) Maganu jaala ikka dureessa ikkante roorete. Dureessu manchi reyiro, jirosi wolu mannira ikkitanno. Maganu ledo jaalooma kalaqidhinorira kayinni ayino adhannokki jiro noonsa.—Maatewoosi 6:19.

Mitu manni Maganunnire rosa aguratto gede assate woꞌnaalara dandaanno. Jaallakkinna maatekki nafa togo assitara dandiitanno. (Maatewoosi 10:36, 37) Mannu buseessiheronna waajjishiishihero, ateneeto togo yite xaꞌmi: ‘Mannanso Magano hagiirsiisa hasiissannoe?’ Hanni wodanchi: Mittu manchi sagale ittooti yiihero maahoyye yaatto? Horonta diyaatto! Heeꞌrate sagaꞌla hasiissannohe. Maganu kayinni hegerera heeꞌratto gede assa dandaanno! Ikkinohura Maganu jaala ikkate rosatto roso ayino uurrisahera fajjitooti.—Yohaannisi 17:3.