Maganu Baxillinni Fulittokki Heeꞌri

1, 2. Xaa yannara beꞌe yineemmokki mine ikkankera dandaannohu ayeeti?

XEENA ganara gordu tunse noo barra doogo hadhanni nootto gede assite hedi. Gordu lowo geeshsha tunsanni haꞌri. Banqo beleqanna xadha jammartu, hakkiinnino biite xeena gani. Xeeꞌnattowa afiꞌrate caaqulantanni wiinama jammaritto. Hakkiinnino doogote qaccera minu nooha laitto. Kuni mini milli diyaannoho, dixissannoho, hattono eate baxisannoho. Xeeꞌnate konne dancha mine afiꞌrakkinni lowo geeshsha hagiidhatto!

² Heeꞌnoommo yanna buutote qarrinni hembeelantanni noote. Alamete ikkito roore bushshanni hadhino. Ikkollana hegere gawajjo iillitannonkekki gede golo ikkannonkehu mittu beꞌe yineemmokki mini noonke. Hakku mini maati? Hanni Qullaawu Maxaafi yaannore wodanchi: “Yihowa togo yeemmo: ‘Ati irkoꞌyaatinna goloꞌyaati, qoleno addaxxeemmohe Maganoꞌyaati.’”—Faarso 91:2.

3. Yihowa irkonke assiꞌra dandiineemmohu hiittoonniiti?

³ Tini mayyaatero hanni hedi! Kalqete alame Kalaqaanchinna Aliidi Gashshaanchi Yihowa gawajjotenni agarannonke mine ikkankera dandaanno. Gawajjannonke coyi baalunkunni lowo geeshsha roortino wolqa noosi daafira, gawajjotenni agarannonke. Gawajjo iillitunkero nafa, Yihowa dhaawa dandaanno. Yihowa irkonke assiꞌra dandiineemmohu hiittoonniiti? Umihunni, iso addaxxa hasiissannonke. Hakkiinni saeno Maganu Qaali, “Maganu baxillinni fultinikki heedhe” yee amaalannonke. (Yihuda 21, NW) Addaho, Maganu baxillinni fullummokki heeꞌra hasiissannonke; qoleno iimi Anninke ledo noonkehu danchu jaaloomi lexxanni haꞌranno gede assiꞌra hasiissannonke. Hatto assineemmoha ikkiro, isi irkonke ikkannota mittore dihuluullammeemmo. Ikkina togoo fiixooma kalaqiꞌra dandiineemmohu hiittoonniiti?

MAGANU BAXILLE HUWATANNA GALATA QOLA

4, 5. Yihowa baxillesi ninkera leellishino doogo giddo gama hiitteeti?

⁴ Maganu baxillinni fullummokki heeꞌrate, Yihowa ninkera baxillesi leellishino doogo huwata hasiissannonke. Konni maxaafi kaaꞌlonni rosoottoha mito mito Qullaawu Maxaafi roso hanni qaagi. Yihowa Kalaqaancho ikkinohura, uulla ninkera hagiirsiissanno qae asse uyinonke. Uullate aana lowo sagalenna wayi, kalaqamu jironna laꞌꞌate baxissanno saada heedhanno gede, hattono uulla babbaxxino garinni biiffe ofoltanno gede assino. Isi Qaalisi widoonni suꞌmasinna akatasi ninkera kulinonke. Duuchchunkunni roore, baxannoha mitto Beettosi Yesuusa uullara soyinota, hattono ninkera yee qarramanno gedenna reyanno gede faqqadinota Qaalisi kulannonke. (Yohaannisi 3:16) Yihowa Beettosi sayise aasi ninkera mayi horo uyitanno? Konni kaꞌira hexxo heedhannonke gede assitanno.

⁵ Konni kaꞌira hexxo heedhannonke gede Maganu wolereno assino. Yihowa iimi gashshoote yaano Mesihichchu Mangiste uurrisino. Tini Mangiste muli yanna giddo qarra baalanka hooltanno, hattono uulla gannate assitanno. Tini mayyaatero hanni hedi! Gannatete giddo keerunninna hagiirrunni hegerera heeꞌra dandiineemmo yaate. (Faarso 37:29) Hakka geeshsha kayinni, Maganu xa nafanni dancha heeshsho heeꞌneemmo gede kaaꞌlannonke biddishsha uyinonke. Qoleno huuccattote kaayyo uyinonke; konni daafira ayee yannarano ikko ayeewano heeꞌne iso huucciꞌra dandiineemmo. Yihowa mannu ooso woꞌmatenna atera gillete deerrinni baxillesi leellishino doogo giddo gama kuriiti.

6. Yihowa baxillira galata qola dandaattohu hiittoonniiti?

⁶ Xa assaawa hasiissannoheti qara xaꞌmo, Yihowa baxillira galata qola dandeemmohu hiittoonniiti? yitannote. Tenne xaꞌmora duuchchu manni, “Anino qole Yihowa baxa hasiissannoe” yee qolanno. Atino hatto yite hedatto? Yesuusi, ‘[Yihowa] Maganokki woꞌmu wodanikkinni, woꞌma lubbokkinninna woꞌma hedokkinni baxi’ yitanno hajajo baalante hajajonni roore ikkitinota xawisino. (Maatewoosi 22:37) Addaho, Magano Yihowa baxatto gede assannohehu batinynyu korkaati no. Ikkina, Yihowara dancha lao noonke daafira calla iso woꞌmu wodaninni, woꞌma lubbonninna woꞌma hedonni banxeemmo yaa dandiineemmo?

7. Magano woꞌmunni woꞌma baxeemmo yaate, isira baxillu lao noonkere ikkanke calla baqe ikkitannoni? Xawisi.

⁷ Qullaawu Maxaafi xawisannonte gede, Maganoho dancha lao noonkehura calla, iso banxeemmo yaa diꞌꞌikkino. Yihowara baxillu lao noonkere ikkanke dancha ikkiturono, tini isira noonkehura addu baxillira hanafotella. Mitte intanni haqqichcho kaase fushshirate hatte haqqichcho gumi hasiisanno. Laalose ita hasiꞌrittoro kayinni, mittu manchi haqqichchonniha guma calla uyihero hagiidhatto? Horonta dihagiidhatto! Hatteente gede, Maganoho baxillu lao noonkere ikkanke hanafotella. Qullaawu Maxaafi togo yaanno: “Magano baxa hajajosi agadhate, hajajosino diqarrissannote.” (1 Yohaannisi 5:3) Magano addinta banxeemmo yaate, baxillinke dancha guma laala hasiissannosi. Yaano baxillenke loosunni leellisha hasiissannonke.—Maatewoosi 7:16-20.

8, 9. Magano banxeemmota leellishanna galata qola dandiineemmohu hiittoonniiti?

⁸ Maganu hajajo ayirrisatenninna seerasi loosu aana hosiisatenni iso banxeemmota leellisha dandiineemmo. Hajajosi ayirrisa duha diꞌꞌikkitino. Yihowa higge duha diꞌꞌikkitino; hatteentenni, hagiirsiissannotanna geꞌino heeshsho heeꞌneemmo gede ninke kaaꞌlate qixxaabbinote. (Isayyaasi 48:17, 18) Yihowa biddishshi garinni heeꞌneemmoha ikkiro, iimi Anninke assinonke coyi baalunkura galatu noonketa leellisha dandiineemmo. Xaa yannara togoo galati noonsata leellishannohu shiima mannaatilla; tini dadillissannote. Yesuusi warihu mitu manni gede galatu noonkekkire ikka dihasiissannonke. Yesuusi tonne laanshaawino manna hursita, iso galatate galagale higinohu kayinni mitto callaho. (Luqaasi 17:12-17) Galata baꞌuri honsu mannooti gede ikkikkinni galata qoli manchi gede ikka hasiꞌneemmo!

⁹ Ikkina, ayirrisa hasiissannonketi Yihowa hajajo hiitteeti? Konni maxaafi giddo duuchcha hajajo ronsoommo; ikkeennano hanni gama galagalle laꞌno. Maganu hajajo ayirrisa isi baxillinni fullummokki heeꞌneemmo gede kaaꞌlitannonke.

BASHSHONNI ROORE YIHOWAWA SHIQI

10. Maganinke Yihoware lende anfanni haꞌra hasiissannonkehu mayiraatiro xawisi.

¹⁰ Yihoware rosa isiwa shiqate lowo kaaꞌlo afidhino. Isire rosa uurrannore diꞌꞌikkino. Qorru uwe noo yannara mitto hashsha gobba giira giwaadhanni nootto yino; hakkawote giira xoꞌara sammi yite laꞌꞌattoni? Dilaꞌꞌatto. Giira xoꞌannokki gedenna iibbitanno gede haqqe woratto. Hattee yannara qorrunni reyattokki gede giira xoꞌannota gargadha lowo geeshsha hasiissannohe! Haqqe, giira bubbanno gede assitannonte gede, ‘Magano seekke afanke’ Yihowara noonke baxilli lexxanni haꞌranno gede assitanno.—Lawishsha 2:1-5.

11. Yesuusi harunsaanosi rosiisinori maaho kaaꞌlinonsa?

¹¹ Yesuusi, rosaanosi Yihowaranna muxxe ikkino Qaalisira noonsa baxilli qiidannokki gedenna lexxanni haꞌranno gede assidhara hasiꞌrino. Yesuusi reyotenni kai gedensaanni, lame rosaanosira Ibirayisxete Qullaawa Borro giddonni isi aana woꞌmitinota mite mite masaalo xawise kulinsa. Tenne assasi maaho kaaꞌlitinonsa? Gedensaanni higge rosaanosi togo yitino: ‘Doogote aana coyishiishannankenna [Qullaawa] borro [xawise] kulannanke wodaninke lowo hagiirrinni iibbi.’—Luqaasi 24:32.

12, 13. (a) Xaa yannara rooru mannira Maganohonna Qullaawu Maxaafira noonsa baxilli hiikkino? (b) Baxillinke qiidannokki gede assa dandiineemmohu hiittoonniiti?

¹² Qullaawu Maxaafi addinta mayyee rosiisannoro afitto wote wodanikki hagiirrunninna Maganoho noohe baxillinni woꞌmino? Hatte yannara halaale woleho kulate quqquxammootto? Tini dihulullissannote. Batinynyu manni hattonni quqquxamino. Xa kabbaadannohu, hakkoye iibbino baxille baꞌꞌannokki gedenna lexxanni haꞌranno gede assate. Tenne alame lawa dihasiissannonke. Yesuusi togo yee masaalino: “Bunshete batinynyinni kainohunni [lowo mannihu] baxillu qiidanno.” (Maatewoosi 24:12) Yihowaranna Qullaawu Maxaafi halaalira noohe baxilli qiidannota hooꞌla dandaattohu hiittoonniiti?

¹³ Yihowarenna Yesuusi Kiristoosire rosakki agurtooti. (Yohaannisi 17:3) Maganu Qaalinni rosootto coye hiinci woyi heeshshi gotti assite hedi. Hiincatto wote ateneeto togo yite xaꞌmi: ‘Tini assaawe Yihowa lainohunni maa rosiissannoe? Tenne assaawe giddo Yihowa woꞌmu wodaniꞌyanni, woꞌma hedoꞌyanninna lubboꞌyanni baxeemmo gede assannoehu hiikku baxxino korkaati no?’ (Faarso 77:12) Konni garinni hiincattoha ikkiro, Yihowara noohe baxilli iibbino gedeenni heeꞌranno.

14. Huuccatto Yihowara noonke baxilli iibbino gedee heeꞌranno gede kaaꞌlitannohu hiittoonniiti?

¹⁴ Yihowara noonke baxilli iibbino gedee heeꞌranno gede assa dandiineemmoti wole doogo ganynyine iso huucciꞌrate. (1 Teselonqe 5:17) Konni maxaafira 17⁠^ki fooliishshora, huuccatto Maganu uyinonketa muxxete kaayyo ikkitinota ronsoommo. Mittu manchi ledo barru baala giddota hasaawa jaalooma kaajjishshannonte gede, Yihowa ganynyine huucciꞌneemmoha ikkiro isira noonke baxilli iibbanninna lexxanni haꞌranno. Huuccattonke goowi alita ikkitannokki gede qorophpha hasiissannonke; hatto yaano giddonke hedo xawissannokkita rosantino qaalla dira dihasiissannonke yaate. Yihowa huucciꞌneemmo wote, mittu qaaqqi baxillaancho annasi coyishiishanno garinni huucciꞌra hasiissannonke. Yihowa ayirrinynyunni coyishiisha hasiissannonke; ikkeennano hedonke xawinse, giddonkenni huucciꞌra hasiissannonke. (Faarso 62:8) Addaho, gilletenni Qullaawa Maxaafa xiinxallanna giddonkenni huuccatto assiꞌra Yihowa magansiꞌrate hasiissannote; qolteno Maganu baxillinni fullummokki heeꞌneemmo gede kaaꞌlitannonke.

MAGANO MAGANSIꞌRAKKINNI HAGIIDHI

15, 16. Maganu Mangisteha dancha duduwo sabbakate looso kaayyotenna jirote gede asse laꞌꞌa hasiissannonkehu mayiraati?

¹⁵ Gilletenni Qullaawa Maxaafa xiinxallanna huuccatto assiꞌra gilletenni Magano magansiꞌneemmo doogooti. Xa kayinni faajjete Magano magansiꞌneemmota mitte doogo laꞌno. Hattino ammannoommo coye wolu mannira kulate. Ati mito mito Qullaawu Maxaafi halaale mannaho kula jammarootto? Jammaroottoha ikkiro dancha kaayyo afiꞌrootto yaate. Yihoware ronsoommo halaale mannaho kulleemmo wote, addu Kiristaani baalunkura uyinoonnita baxxitino hajajo wonshinanni heeꞌnoommo; yaano Maganu Mangisteha dancha duduwo dudumbanni heeꞌnoommo yaate.—Maatewoosi 24:14; 28:19, 20.

¹⁶ Hawaariya Phaawuloosi soqqanshosi muxxete coyi gede asse laꞌꞌanno daafira jirote yiino. (2 Qorontoosi 4:7) Maganinke Yihowarenna alaamisire mannaho kulanke duuchchunku loosinni roorino loosooti. Tini soqqansho duuchchunkura alee ikkino Mootichchira soqqammeemmote; qoleno tenne assankenni duchchunku atootinni roorino atoote afiꞌneemmo. Konne looso loossanni noottoha ikkiro, wodana suwino manni iimi Anninkewa shiqanno gedenna hegere heeshsho afiꞌnanni doogo aana haꞌranno gede kaaꞌlitanni nootto yaate! Konninni sae hagiirsiisannohu wolu loosi mama no? Qoleno Yihowarenna Qaalisire wolu mannira farciꞌra, ammanakki lexxitanno gedenna isira noohe baxilli iibbanno gede assitanno. Hakkii saeno Yihowa assatto sharro naadanno. (Ibiraawuyaani 6:10) Konne looso diinaggaambenna ganynyine loosanke, Maganu baxillinni fullummokki heeꞌneemmo gede kaaꞌlitannonke.—1 Qorontoosi 15:58.

17. Kiristaanu soqqansho xaa yannara wiinamme soqqammannita ikkitinohu mayiraati?

¹⁷ Maganu Mangiste sabbakate loosi xaa yannara wiinamme loonsanniha ikkinota wodancha hasiissanno. Mayira? Maganu Qaali togo yee kulannonke: “Bayiru Yihowa barri mule no. Shiqqi yee dayino, lowo geeshshano muddamanni no.” (Sofooniyaasi 1:14) Addaho, Yihowa tenne busha alame hunanno yanna rakke dagganni no. Konnira manna qorophphe yaa hasiissanno! Mannu, Yihowa Aliidi Gashshannchonsa asse doodhanno yanna tenne ikkitinota kula hasiissanno. Goofimarchu “dikeeshshanno.”—Imbaaqoomi 2:3.

18. Addu Kiristaani ledo gamba yine Yihowa faajjete magansiꞌra hasiissannonkehu mayiraati?

¹⁸ Yihowa addu Kiristaani ledo gamba yine faajjete magansiꞌnammosira hasiꞌranno. Qaalisi togo yaannonkehu iseraati: ‘Baxillehonna danchu loosira baqqi yine heeꞌneemmo gede [kuꞌu kuꞌuyira assaambo]. Duuchcha yannara xaandanni ninke ninkeneewa mimmito kaajjinsho ikkinnina mitu mitu rossino gede gamba yaanke agurroonke. Roorenkanni Mootichchu barri gamba yiinota qaagginanni konne roorsitine asse.’ (Ibiraawuyaani 10:24, 25) Ammanate roduuwinke ledo Kiristaanu gambooshshiwa gamba yineemmo wote, baxillaancho Maganonke galaxxatenna magansiꞌrate kaayyo afiꞌneemmo. Qoleno mimmitonke kaajjinsheemmo, hattono jawaachchinsheemmo.

19. Kiristaanu songo giddo noo baxilli iibbanno gede assa dandiineemmohu hiittoonniiti?

¹⁹ Yihowa magansidhannori ledo gamba yineemmoha ikkiro, songote giddo noo baxillinna jaaloomi iibbanno gede assa dandiineemmo. Yihowa ninketa danchummanke laꞌꞌannonte gede, ninkeno mimmitinke danchumma laꞌꞌa hasiissannonke. Kiristaana roduuwakki guuta ikkitino gede assite laꞌooti. Duuchchunku ayyaanaamittete lophphonni addi addi deerrira nootanna ninke baalinke soꞌneemmore ikkinoommota qaagi. (Qolasiyaasi 3:13) Yihowa woꞌmu wodaninsanni baxxannori ledo jaalooꞌmi; hatto assittoro ayyaanaamittetenni lophpha dandaatto. Addaho, Kiristaanu roduuwikki ledo Yihowa magansiꞌrakki, Maganu baxillinni fulittokki heeꞌratto gede kaaꞌlitannohe. Yihowa ammanante magansidhannosirenna baxillisinni fultukki heedhannore kiisannonsahu hiittoonniiti?

“HALAALAANCHO HEESHSHO” AFIꞌRATE JAWAATI

20, 21. “Halaalaancho heeshsho” maati? Tini hagiirsiissanno hexxooti yineemmohu mayiraati?

²⁰ Yihowa ammanantino soqqamaanosi heeshsho oye kiisannonsa; ikkina hiittoo heeshsho aannonsa? Maahoyyena xa nootto heeshsho heeshsho labbannohe? Tennera rooru manni, xa heeshshote heeꞌnoommoti dileeltanni no? yaara dandaanno. Qoleno foolleemmo, inteemmonna angeemmo daafira lubbote heeꞌnoommoti dihuluullissanno. Hagiirsiisannori tuncu yaannonke wote isinni, “Heeshshote yaa tenneeti!” yinammora dandiineemmo. Qullaawu Maxaafi kayinni, xaa yannara ayee manchino gari heeshsho heeꞌranni nookkita xawisanno; konnira ikkadu korkaati noosi.

²¹ Maganu Qaali, “halaalaancho heeshsho seekkine cuꞌmiꞌneemmo” gede amaalannonke. (1 Ximootewosi 6:19, NW) “Halaalaancho heeshsho,” konni albira afiꞌrate halchineemmo coye ikkinota tini xiqise xawissanno. Addaho, konni kaꞌa guuta ikkineemmo wote hunda Maganu hedino garinni heeꞌneemmo daafira, halaalaancho heeshsho heeꞌneemmo yaate. Konni kaꞌa gannate ikkitanno uullara woꞌma fayyimma, keerenna hagiirre afiꞌne heeꞌneemmo wote, “halaalaancho heeshsho” afiꞌneemmo; hatto yaano hegerera hagiidhinanni heeꞌneemmo yaate. (1 Ximootewosi 6:12) Tini hagiirsiissanno hexxo diꞌꞌikkitino?

22. ‘Halaalaancho heeshsho seekkite cuꞌmira’ dandaattohu hiittoonniiti?

²² “Halaalaancho heeshsho seekkine cuꞌmira” dandiineemmohu hiittoonniiti? Phaawuloosi tennera, Kiristaanu ‘danchare assanno’ gedenna ‘danchu loosinni dureeyye ikkanno gede’ amaalino. (1 Ximootewosi 6:18) Tini xiqise xawissannonte gede, halaalaancho heeshsho seekke cuꞌmirate Qullaawu Maxaafinni ronsoommo halaale loosu aana hosiisanke lowo irko afidhino. Ikkina Phaawuloosi “halaalaancho heeshsho,” dancha looso loonsoommohura baantanninke baatooshsheeti yaasiitini? Deeꞌni; korkaatuno tenne hagiirsiissanno kaayyo afiꞌneemmohu Maganu ‘eltonniiti.’ (Roomu Sokka 5:15) Ikkeennano Yihowa isira ammanante soqqantannosire kiisa baxanno. Ati “halaalaancho heeshsho” heedhanna laꞌꞌa hasiꞌranno. Maganu baxillinni fultukki heedhannori konni kaꞌa togoota hagiirrunna keeru woꞌminota hegere heeshsho afidhanno.

23. Maganu baxillinni fullummokki heeꞌra lowo geeshsha hasiissannohu mayiraati?

²³ Mitti mittinke ninkeneeto togo yine xaꞌma hasiissannonke: ‘Magano Qullaawu Maxaafi yaanno garinni magansiꞌranni noommo?’ Barru baala ninkeneeto hatto yine xaꞌmineenna, dawaronke ee yitannota ikkituro, halaalu doogo aana heeꞌnoommo yaate. Hatto ikkiro, Yihowa irkonke ikkinota addaxxa dandiineemmo. Qarru woꞌminoti jeefote yanna tenne alame aana dagganno wote, isi ammanamino mannasi keerunni sayisanno. Qoleno Yihowa muli yanna giddo biiffinota haaro alame eessannonke. Hatti yanna dagganno wote lowo geeshsha hagiidhineemmo! Qoleno tenne goofimarchu yannara dancha wussaane wossaꞌnankenni konni kaꞌa lowo geeshsha tashshi yaannonke! Xaa yannara togoo wussaane wossaꞌnattoha ikkiro, “halaalaancho heeshsho” afidhe hagiidhatto; hatto yaano hunda Yihowa hedino garinni hegerete hegerera heeꞌratto yaate!