Maganu Suꞌmi Afiꞌrino Horonna Tirosi

QULLAAWU MAXAAFIKKIRA Faarso 83:18 mayine tirroonni? Qullaawa Borroti Haaro Alame Tiro tenne xiqise, “Suꞌmakki Yihowa yinannihu ati callu uulla woꞌmate aana Ayirrado ikkoottota mannu afona” yite tirtino. Wole haammata Qullaawu Maxaafi tirono tenne xiqise konni garinni tirtino. Ikkollana batinynye Qullaawu Maxaafi tiro Yihowa yinanni suꞌma fushshite hoolte “Mootichcha” woyi “Magano” yite maaragete suꞌminni riqibbino. Tenne xiqise aana heeꞌra hasiissannosihu hiikkonne suꞌmaati? Maaragete suꞌmaatinso Yihowa yinanni suꞌmaati?

Tini xiqise coyidhanni noohu suꞌmunnireeti. Qullaawu Maxaafiti batinynye maxaaffa umo borreessantinohu Ibirayisxete afiinniiti; konni afiinni borreessini wote tenne xiqise aana baxxinohu gillete suꞌmi no. Kuni suꞌmi Ibirayisxete fidalenni יהוה (YHWH) yaamame borreessamino. Sidaamu afiinni konne suꞌma “Yihowa” yine woshshinanni. Kuni suꞌmi Qullaawu Maxaafi giddo mitto bayichcho calla no? Deeꞌni. Umo borreessinoonnitera Ibirayisxete Qullaawa Borro giddo kuni suꞌmi 7,000 meddi yitanno basera no!

Maganu suꞌmi mageeshshi geeshsha hasiisanno? Hanni Yesuusi Kiristoosi rosiisino huuccatto laꞌno. Tini huuccatto togo yite jammartanno: ‘Iima heeꞌratto Annanke, suꞌmikki maassamo.’ (Maatewoosi 6:9) Yannate gedensaanni Yesuusi togo yee huucciꞌrino: “Annaꞌya suꞌmakki ayirrisi.” Maganuno iiminni, “Ayirrisoommo xaano ayirriseemmo” yee qolino. (Yohaannisi 12:28) Maganu suꞌmi lowo geeshsha hasiisannoha ikkinota konninni buuxa dandiinanni. Ikkina mitu mitu Qullaawa Maxaafa tirtinori konne suꞌma fushshite hoolte bayichchoho maaragete suꞌma eessitinohu mayiraati?

Konnira lame qara korkaata shiqishshanno. Umihunni, batinynyu manni hunda konne suꞌma woshshinanni gara xa anfoonnikki daafira horoonsiꞌra dihasiissanno yaanno. Biꞌreeha Ibirayisxete qaale coyishiishaano nookkiha borreessinanni. Konni daafira YHWH yitanno fidale hakkawaro mayine nabbambanniro xa seekke afinohu dino. Ikkina tini Maganu suꞌma gana hooltannonke? Yesuusi yannara isi suꞌma Yeshuwa woyi Yehoshuwa yinanniha ikkara dandaanno. Xaa yannara tenne bade afinohu dino. Ikkeennano, yannankera alamete doyichchora heeꞌranno manni qaalinsanni rosamino garinni Yesuusa yinanni suꞌma babbaxxino garinni woshshanno. Kuni manni umi sanira Yesuusi suꞌma woshshinanni gara afa hooginohura calla konne suꞌma gana diagurino. Hatteente gede, baara widira haꞌrittoro ate umikki suꞌma wolu qaalinni baxxino garinni woshshinanna macciishshattora dandaatto. Konni daafira, hunda Maganu suꞌma woshshinanni gara afa hooganke suꞌmasi woshshineemmota dihooltannonke.

Maganu suꞌma Qullaawu Maxaafi giddonni fushshate korkaata assine kullannihu layinki coyi, lowo diro heeꞌrinohu Yihudootu budi ledo xaado afiꞌrinoho. Batinynyu Yihudooti Maganu suꞌma gana dihasiissanno yite ammantanno. Insa hatto yite ammantinohu mitte Qullaawu Maxaafi higge doogimale horoonsidhino daafiraati. Hatti higge togo yitanno: “Maganikki Yihowa suꞌma doogimale gantooti; korkaatuno Yihowa suꞌmasi doogimale ganannoha qorichchishanno.”—Wolaphpho 20:7.

Tini higge Maganu suꞌma doogimale gana hooltannote. Ikkollana ayirrinynyunni konne suꞌma gana hooltannoni? Horonta dihooltanno. Ibirayisxennita Qullaawa Borro (“Akkala Gondooro”) borreessitinori baalunku, Maganu biꞌre Isiraeelete uyino Higge garinni heedhannoreetinna ammanantinoreeti. Ikkeennano Maganu suꞌma ganynyite gantanno. Lawishshaho kuri borreessaano, ammanaano gamba yite lowo qoonqonni faarsitannote batinynye faarso giddo Maganu suꞌma eessitino. Qoleno Maganu Yihowa, magansidhannosiri suꞌmasi gantanno gede hajajino; ammanantino soqqamaanosino hajajante suꞌmasi gantino. (Iyyueeli 2:32; Soqqamaanote Looso 2:21) Konni daafira, yannankera noo Kiristaanino Yesuusinte gede Maganu suꞌma ayirrinynyunni gana diwaajjanno.—Yohaannisi 17:26.

Qullaawa Maxaafa tirturi Maganu suꞌma maaragete suꞌminni soorransa lowo soꞌrooti. Insa Magano shinqara dandiinannikkihanna dadillano ikko hagiidha dandaannokkiha lawissino. Qullaawu Maxaafi kayinni mannu ooso “Yihowa ledo jaaloontanno gede” amaalanno. (Faarso 25:14) Hanni lubbora baxatto jaalikkire hedi. Suꞌmasi afoottokkiha ikkoommero isi ledo mageeshsha jaalooꞌmatto? Hatteente gede, mannu Yihowa yinanniha Maganu suꞌma afa hoogiro isi ledo hiitto ikke jaaꞌloomanno? Qoleno mannu Maganu suꞌma gana hoogiro xagge ikkitinota suꞌmisi tiro afikki gatanno. Maganu suꞌmi mayi tiro afiꞌrino?

Maganu suꞌmisi tiro ammanamino soqqamaanchisira Musera kulino. Muse Maganu suꞌma xaꞌmi wote Yihowa, “Ikka hasiissannoere baala ikkeemmo” yee qolinosi. (Wolaphpho 3:14) Rozerhaami yinanni tiro konne qaale, “Ikka hasiꞌreemmore baala ikkeemmo” yite tirtino. Konni daafira Yihowa alaamasi wonshate ikka hasiissannosire baala ikkanno.

Hanni ikka hasiꞌrattore baala ikka dandaatto yine hendo. Hatto ikkoommero jaallakkira maa assatto? Jaallakki giddo mittu lowo geeshsha xiwamiro fullahino doktora ikkite hursattosi. Wolu jaalikki kayinni buxiro dureessa ikkite buximatenni fushshattosira dandaatto. Ikkollana, baalankare ikkate wolqakki shiimate. Ninke baalinketi wolqa shiimate. Qullaawa Maxaafa xiinxallitanni haꞌritto kiiro, Yihowa qaale einore wonshate ikka hasiissannosire baala hiittoonni ikkinoro huwatatto daafira lowo geeshsha xaggeessiꞌratto. Qoleno Yihowa wolqasi horoonsiꞌre baxxannosire kaaꞌlanno wote tashshi yaannosi. (2 Zeena 16:9) Suꞌmasi afinokki manni tenne dancha akattasi huwatikki gatanno.

Kageeshsha laꞌnummonte gede, Yihowa yinanni suꞌmi Qullaawu Maxaafi giddo heeꞌra hasiissannosi. Konni suꞌmi tiro afankenna magansiꞌneemmo wote horoonsiꞌranke iimi anninkewa Yihowawa shiqate lowo geeshsha kaaꞌlitannonke.a