FOOLIISHSHO 4
Silxaane Ayirrisa Hasiissannonkehu Mayiraati?
“Manna duuchcha ayirrisse.” —1 PHEEXIROOSI 2:17.
1, 2. (a) Silxaane ayirrisa mito wote ma ikkitankera dandiitanno? (b) Xa hiittee xaꞌmo laꞌneemmo?
MITTU qaaqqi assate baxannokkire assi yiniro ikkanno gara laꞌe egennootto? Assonso aguro yaanni giddosiinni sharramanno gara albisi aana laꞌꞌa dandaatto. Bashshoonku annisinna amasi yitannore macciishshannoho; qoleno insa silxaane ayirrisa hasiissannosita afino. Xa baxannokkire assi yinisita kayinni hajajama dihasiꞌrino. Kuni qaaqqi togo sharramasi ninke baalinkera tuncu yaankera dandaannoha mitto coye leellishshanno.
2 Silxaane ayirrisa duuchcha wote ninkera shota diꞌꞌikkitino. Mito wote ate aana silxaane afidhinorira hajajama qarrissannohe? Hatto ikkiro, tini qarrissannohu ate calla diꞌꞌikkootto. Xa heeꞌnoommohu silxaane ayirrisa lowo geeshsha ajjanni hadhino yanna giddooti. Ikkollana Qullaawu Maxaafi ninke aana silxaane afidhinore ayirrisa hasiissannonketa kulanno. (Lawishsha 24:21) Isinni Maganu baxillinni fullummokki heeꞌra hasiꞌnummoro hatto assa hasiissannonke. Duuchcha wote kayinni tenne hajo lainohunni mite mite xaꞌmo kaꞌanno. Silxaane ayirrisa togo qarrissannonkehu mayiraati? Yihowa silxaane ayirrinsammora hasiꞌrannohu mayiraati? Isi hasiꞌrannore wonshate mayi kaaꞌlannonke? Silxaane ayirrinseemmota leellisha dandiineemmohu hiittoonniiti?
SILXAANE AYIRRISA QARRISSANNOHU MAYIRAATI?
3, 4. Cubbunna guuntete xeꞌne jammartinohu hiittoonniiti? Guunte xeꞌinonkere ikkanke silxaane ayirrisa qarrissannonke gede assitannohu mayiraati?
3 Silxaane noonsare ayirrisa lowo geeshsha qarrissannota ikkitinoha lame korkaata hanni laꞌno. Umihunni, ninke guunte xeꞌinonkereeti; layinkihunni, silxaane noonsarino guuta diꞌꞌikkitino. Mannu ooso cubbinna guuntete xeꞌne jammartinohu, seeda yannara albaanni Addaaminna Heewani Edenete kaashshu basera Maganu silxaanera finqiltu woteeti. Konni daafira cubbu jammarinohu finqilletenniiti. Xaa yannara nafa, adhine ilammoommoti finqilate hedo giddonke no.—Kalaqo 2:15-17; 3:1-7; Faarso 51:5; Roomu Sokka 5:12.
4 Ninke mannu ooso giddo rooriidi manni, naaxxannoho hattono booꞌnannoho; meessaneeto heeshshi assa kayinni duuchchawa leeltannokkitenna sharro xaꞌmitannote. Maganoho lowo diro ammanamme soqqammummo gedensaanni nafa, naaxxineemmorenna ani yoommoti calla ikkito yineemmore ikkinammora dandiineemmo. Lawishshaho, lowo qarri yannara Yihowa manni ledo quraanynyame keeshshinoha Qore lai. Gedensaanni Qore lede silxaane afiꞌrate yogora jammari; hattono hatte yannara noo manni baalunkunni rambaꞌꞌa ikkinohu Muse aana mittore saalfatikki mannu finqilanno gede assi. (Zehulqu 12:3; 16:1-3) Hattono, naaxxate batinynyinni Yihowa beetemeqidese einohanna kakkalaano calla loossara uyinoonni looso loosinoha Nugusa Ooziya heda dandaatto. (2 Zeena 26:16-21) Togoo manni finqillensara lowo qorichcha adhino. Konni mannihu bushu lawishshi ninke baalinkera dancha qorowishsha ikkannonke. Silxaane ayirrisa qarrissannonke gede assitannonke naaxxa gargadha hasiissannonke.
5. Guunte xeꞌinonsa mannooti silxaanensa doogimale horoonsidhinohu hiittoonniiti?
5 Wole widoonni kayinni, guuta ikkitinokkiri silxaane noonsa mannooti, silxaane ayirrisa mannaho kabbaaddanno gede assitanni keeshshitino. Silxaane noonsari batinynyu mannooti kaajjaddaho, amanynyoote baꞌinoreeti hattono coqqontannoreeti. Isinni mannu ooso xagge roore anga, silxaane doogimale horoonsiꞌnoonnita kultannote. (Mekibibi 8:9) Lawishshaho, Yihowa Saaooli nugusa ikkara doorisi yannara Saaooli danchahonna rambaꞌꞌa manchooti. Ikkollana naaxxaleessanna hinaasaancho ikka jammari; hakkiinnino ammanamino mancho Daawiti shaara shorra jammari. (1 Saamueeli 9:20, 21; 10:20-22; 18:7-11) Gedensaanni Daawiti danchuullu Isiraeelete nugussa ledo kiiraminoha ikkirono, Keexiyaawichchu Ooriyo galte moore konne beebbaataamo mancho reyara olu basera albaanni sayinsanni gede soyino daafira silxaanesi doogimale horoonsiꞌrino. (2 Saamueeli 11:1-17) Addaho, guuntete xeꞌne silxaane noonsari silxaanensa garunni horoonsidhannokki gede assitanno. Silxaane noonsari hakko iso Yihowa ayirrissannokkire ikkituro, silxaanensa roorenka doogimale horoonsidhanno. Biritaaniyu gobbahu mittu poletiku manchi Kaatolikete qeesooti duuchcha manna daramanno gede assitino gara xawisi gedensaanni togo yiino: “Silxaane maaeelsitanno; danna saꞌino silxaane isinni danna saꞌe maaeelsitanno.” Tenne assaawe surrenkera amande, ‘Silxaane ayirrisa hasiissannonkehu mayiraati?’ yitanno xaꞌmo laꞌno.
SILXAANE AYIRRISA HASIISSANNONKEHU MAYIRAATI?
6, 7. (a) Yihowara noonke baxilli ma assineemmo gede kakkayisannonke? Mayira? (b) Maahoyye yee gala yaa mayyaate? Maahoyye yine galleemmore ikkinoommota leellinsheemmohu hiittoonniiti?
6 Silxaane ayirrinseemmo gede assannonkehu qaru korkaati Yihowara, wolu mannira, wole agurina uminkera noonke baxilleeti. Duuchchunkunni roorsine Yihowa banxeemmo daafira, wodanasi tashshi assa hasiꞌneemmo. (Lawishsha 27:11; Maarqoosi 12:29, 30) Edenete kaashshu basera finqille kaꞌunku jammare, hattono rooriiditi mannu ooso Sheexaaneho haꞌlite Yihowa gashshootira badhe wodhitunku kayise Yihowa aliidimmara yaano kalqete alame gashshate mabtesira kisse kalaqantinota anfoommo. Yihowa aliidimma hagiirrunni dagganfeemmo. Ajuuja 4:11 nooha kaajja qaale nabbambeemmo wote, giddiidinke hagiirrunni woꞌmanno. Kalqete alame gashshate gabbaꞌꞌannosihu Yihowa ikkinota seekkine huwantoommo! Heeshshonke giddo barru baali millimmonke Yihowa marraꞌꞌannonke gede faqqadatenni, aliidimmasi dagganfeemmota leellinsheemmo.
7 Silxaane konni garinni ayirrisa, hajajamanna maahoyye yee gala xaꞌmitanno. Yihowa banxeemmo daafira, mittore xiixammummokki hajajammeemmosi. Ikkollana hajajama qarrissannonke yanna no. Tenne fooliishshora hanafote kulli qaaqqi gede, ninkeno togoo yannara maahoyye yee gala rosa hasiissannonke. Yesuusi hajajama kabbaade ikkitusi yannara nafa Annisira hajajaminota qaangeemmo. Isi Annasi, “Ati hasiꞌratto gede ikko ikkinnina ani hasiꞌreemmo gede ikkoonke” yiino.—Luqaasi 22:42.
8. (a) Xaa yannara Yihowa silxaanera maahoyye yee gala ma assa xaꞌmitanno? Tenne hajo lainohunni Yihowara mayi macciishshamannosi? (b) Amaale macciishshineemmo gedenna seejjo adhineemmo gede mayi kaaꞌlannonke? (Qoola 52-53 noo saaxine lai.)
8 Yihowa xaa yannara mitto mittonke gilletenni coyishiishannonkekkita anfoommo; hatteentenni Qaalesinna iso riqiwanno manna horoonsiꞌranno. Konni daafira roore wote Yihowa silxaanera maahoyye yine galleemmota leellinsheemmohu Yihowa shoominore woyi silxaanete aana keeshshitara faqqadinore ayirrisatenniiti. Konni mannira finqilleemmoha ikkiro, lawishshaho insa uyitannonketa Qullaawa Borro aana xintantino amaalenna seejjo adha gimbeemmoha ikkiro, Magano taqawwammanni heeꞌnoommo yaate. Isiraeele Muse aana gunguntunna finqiltu yannara, Yihowa isi aana finqiltinohu gede asse laino.—Zehulqu 14:26, 27.
9. Wolootaho noonke baxilli silxaane noonsare ayirrinseemmo gede assannonkehu mayiraati? Tenne lawishshunni kuli.
9 Qoleno silxaane noonsarira hajajammeemmohu manna banxeemmohuraati. Hatto yineemmohu mayiraati? Hanni ateneeto olu saraawite giddo noo wottaaddarchi gede assite hedi. Tini saraawite qeeltannohunna billaallatenni gattannohu mittu mittunku wottaaddarchi kaaꞌlamiro, qoleno hajajamirootinna olu murrooti biddishsha ayirrisirooti. Murrootaho hajajama giwittoro ledokki noo wottaaddari danote aana uwanno. Addaho yannankera mannu ooso wottaaddari alamete aana lowo dano iillishino. Yihowara kayinni mannu oosora horo aannore calla assanno wottaaddari noosi. Qullaawu Maxaafi xibbunni kiirranni basera Magano “Saraawitete [mootichchi] Yihowa” yee xawisanno. (1 Saamueeli 1:3) Isi wolqaataamma ikkitinorenna kiirre tunqannikkite ayyaanaame kalaqo Murrichchaati. Yihowa uulla soqqamaanosi, saraawitete gede asse coyiꞌrino yanna no. (Faarso 68:11; Hiziqeeli 37:1-10) Yihowa silxaane uyinonsarira finqillummoro ayyaanaamo wottaaddara qarru aana ditungeemmo? Kiristaanu shoomantino cimeeyyera finqiliro songote giddo noori wolootu qarru aana ubbara dandiitanno. (1 Qorontoosi 12:14, 25, 26) Maatete giddo mittu qaaqqi finqiliro woꞌma maate qarrantara dandiitanno. Konni daafira woloota ayirrisatenninna insa ledo sumuu yaatenni banxeemmonsata leellinsheemmo.
10, 11. Silxaane ayirrisa uminkera xiqime uyitannonketa afanke, silxaanete hajajammeemmo gede kaaꞌlitannonkehu hiittoonniiti?
10 Qoleno silxaane ayirrinseemmohu uminkeraati. Yihowa silxaane ayirrinseemmo gede kulannonke wote silxaane ayirrisanke afidhino xiqimeno ledo kulannonke. Lawishshaho, seeda dironna hagiirraame heeshsho heeꞌrate ooso annahonna amate hajajantanno gede kulinonsa. (Marro 5:16; Efesooni 6:2, 3) Hattono isi ledo noonke fiixoomi baꞌꞌannonkekki gede songote cimeeyyera hajajammeemmo gede kulino. (Ibiraawuyaani 13:7, 17) Hakkii saeno keerinkera yine uulla gashshaanora hajajama hasiissannonke.—Roomu Sokka 13:4.
11 Yihowa hajajammammora hasiꞌranno korkaata afanke silxaane ayirrisate kaaꞌlitannonke yiniro sumuu diyaatto? Hanni heeshshonke giddo silxaane ayirrinseemmota sase qara doogo laꞌno.
MAATETE GIDDO SILXAANE AYIRRISA
12. Yihowa annaho woyi minaannira maatete giddo mayi silxaane uyino? Tenne silxaanesi horoonsiꞌra hasiissannosihu hiittoonniiti?
12 Maate xintinohu Yihowa umosiiti. Ayeewoteno siraatu Magano ikkinohu Yihowa maate qinaabbe heedhanno garinni kalaqino. (1 Qorontoosi 14:33) Annaho woyi minaannira maatete umo ikkanno gede silxaane uyino. Minaanni Kiristoosi Yesuusi umimma ayirrisannota leellishannohu Yesuusi songo gashshanno gara laꞌꞌatenniiti. (Efesooni 5:23) Konni daafira minaanni uyinoonnisi halaafinate dunqulli assate woꞌnaala dihasiissannosi, hatteentenni jawaantetenni halaafinatesi wonsha hasiissannosi. Qoleno mootooꞌmannoha woyi coqqonannoha ikkikki baxannoha, ani yuummoti calla ikkito yaannokkihanna shaqqado ikka hasiissannosi. Uyinoonnisi silxaane deerra afidhinotanna isi silxaanera aleenni Yihowa silxaane noota wodancha hasiissannosi.
Kiristaana ikkino anni umimmate silxaanesi horoonsiꞌrannohu Kiristoosi umimmasi horoonsiꞌranno garinniiti
13. Minaama woyi ama maatese giddo noose halaafinate Yihowa hagiirsiisanno garinni wonsha dandiitannohu hiittoonniiti?
13 Minaama woyi ama minaanni kaaꞌlaanchooti. Qullaawu Maxaafi, “Amakki higge agurtooti” yaannohura iserano maatete giddo uyinoonnise silxaane no. (Lawishsha 1:8) Addaho ise silxaane minaannise silxaanera woroo noote. Kiristaancho minaama minaannise umimmara ayirrinynyu nooseta leellishshannohu halaafinatesi wonshanno gede kaaꞌlatenniiti. Iso diqata dihasiissannose, qoleno isira aliidita ikkanna isi base amada dihasiissannose. Hatteentenni minaannase kaaꞌlanna buusama hasiissannose. Isi mitte wussaane wossanino gari baxisa hoogisero, hedose ayirrinynyunni kultannosi; ikkeennano wossanino wussaanera maahoyye yite galtanno. Minaannise Yihowa Farciꞌraasincho ikka hoogiro minaamara qarru iillasera dandaanno, ikkollana maahoyye yite galatenni leellishshanno akatinni minaannise Yihowa ammanara dandaanno.—1 Pheexiroosi 3:1.
14. Ooso annansanna amansa, hattono Yihowa hagiirsiisa dandiitannohu hiittoonniiti?
14 Ooso anninsaranna amansara hajajantannoha ikkiro Yihowa wodana tashshi assitanno. Qolteno anninsaranna amansara ayirrinynyenna hagiirre abbitanno. (Lawishsha 10:1) Annu woyi ama calla lossitanno oosono annansa woyi amansa lowo geeshsha irkisanna kaaꞌla hasiissannonsata affe, ooso hajajantara uyinoonni seera ayirrissanno. Maatete miilla baalanti Maganu uyinonsa halaafinate wonshitannoha ikkiro, hatti maate lowo keerenna hagiirre afidhanno. Tini qolte baalanta maate xintinohura Yihowara ayirrinynye abbitanno.—Efesooni 3:14, 15.
SONGOTE GIDDO SILXAANE AYIRRISA
15. (a) Yihowa silxaane ayirrinseemmota songote giddo ma assine leellisha dandiineemmo? (b) Sooreeyyenkera hajajammeemmo gede kaaꞌlannonkehu mitu mitu xintu seeri hiikkonneeti? (Qoola 54-55 noo saaxine lai.)
15 Yihowa Beettosi Kiristaanu songora Gashshaancho asse shoominosi. (Qolasiyaasi 1:13) Yesuusi qole uullate aana noohu Maganu manni Yihowa magansiꞌranno gede kaaꞌlate “ammanaminohanna wodanaamo borojjichcho” shoomino. (Maatewoosi 24:45-47, NW) Yihowa Farciꞌraasinehu Aliidi Bisi konni borojjichchi booso riqiwanno. Umi sanira Kiristaanu songo giddo noo cimeeyye gede, xa noo cimeeyyeno Aliidi Bisiwiinni biddishshanna amaale adhitanno; adhitannohuno xaaddotenni woyi Aliidi Biso riqibbannori widoonni lawishshaho towaataano aliidi laꞌꞌaanowiinniiti. Ninke mitti mittinke Kiristaanu cimeeyye silxaane ayirrinseemmoha ikkiro, Yihowara hajajammanni heeꞌnoommo yaate.—Ibiraawuyaani 13:17.
16. Cimeeyye shoomantannohu qullaawu ayyaaninniiti yineemmohu mayiraati?
16 Cimeeyyenna songote soqqamaano guuta diꞌꞌikkitino. Insano ninkente gede sodhannoreeti. Ikkeennano cimeeyye songo ayyaanaamittetenni jawaattanno gede kaaꞌlate uyinoonni ‘eltooti.’ (Efesooni 4:8) Cimeeyye shoomantannohu qullaawu ayyaaninniiti. (Soqqamaanote Looso 20:28) Hiitto? Korkaatuno kuri labballi shoomantara albaanni qullaawu ayyaaninni borreessaminohu Maganu Qaali giddo noo guunte wonsha hasiissannonsa daafiraati. (1 Ximootewosi 3:1-7, 12; Titoosi 1:5-9) Hakkiinni saeno, cimeeyye mittu rodii guunte wonshinotanna teꞌee buuxxanno wote, Yihowa qullaawu ayyaanisinni marraꞌꞌannonsa gede seekkite huuccatto assidhanno.
17. Kiristaanu meenti songote looso loosanno wote, mite yannara umonsa gugguꞌla hasiissannonsahu mayiraati?
17 Mito wote cimeeyyetenna songote soqqamaanora uyinanni looso loosanno labballi, lawishshaho simirriitete gambooshshe marraꞌꞌanno labballi songote giddo hoogara dandaanno. Togoo yannara, wolu cuuamino rodii konne looso loosara dandaanno. Cuuamino rodii hoogiro kayinni, cuuantinoti ikkado rodoo loossara dandiitanno. Ikkollana, mitte meyaati cuuamino rodii loosanno looso loossanno wote, umose gugguꞌla hasiissannose.a (1 Qorontoosi 11:3-10) Meyaati hatto assase ise ajishshannota diꞌꞌikkitino. Hatteentenni, togo assase Yihowa maatete giddo ikko songote giddo worinota aliidimmate silxaane ayirrissannota leellishate kaayyo uyitannose.
UULLATE GASHSHAANO AYIRRISA
18, 19. (a) Roomu Sokka 13:1-7 aana nooha xintu seera xawisattohu hiittoonniiti? (b) Uullate gashshaano ayirrinseemmota leellinsheemmohu hiittoonniiti?
18 Addu Kiristaani Roomu Sokka 13:1-7 nooha xintu seera seekke harunsanno. Tenne xiqise gudisse nabbawittoro, “alee higge noo gashshaano” yinoonniri uullate gashshaano ikkitinota huwatatto. Yihowa tini gashshaano heedhara faqqadino yanna geeshsha, jilbunnino ikkiro amanynyootu heeꞌranno gede assatenni, hattono addi addi looso loosatenni dancha coye assitanno. Higgete hajajamatenni tenne gashshaano ayirrinseemmota leellinsheemmo. Xaꞌminanninke qaraxo garunni baanteemmo, mangiste xaꞌmitanno forme woyi sanade garunni wonshineemmo; ninke, maatenke, loosonke woyi noonke jajja lainohunni higge xaꞌmitannonkere garunni wonshineemmo. Ikkollana uullate gashshaano Maganoho hajajammeemmokki gede assate hasidhuro maahoyye diyineemmo. Hatteentenni, biꞌree hawaariyaate yitu gede yine qolleemmo: “Ninke mannunkunni [roore] Maganoho hajajammeemmo.”—Soqqamaanote Looso 5:28, 29; qoola 48 noota, “Hajajama Hasiissannoehu Ayee Silxaaneraati?” yitanno saaxine lai.
19 Uullate gashshaanora ayirrinynye leellinsheemmoti wole doogo, akatinkenniiti. Mito wote, gashshaanote ledo xaandeemmo gede assannonke coyi heeꞌrara dandaanno. Hawaariya Phaawuloosi, Heroodiisi Agiriphpha yinanni Nugusa, hattono Gashshaancho Fisxoosi coyishiishino. Tini nugussa amanynyoote baꞌinoreeti; ikkeennano Phaawuloosi ayirrinynyunni coyishiishinonsa. (Soqqamaanote Looso 26:2, 25) Coyishiinsheemmohu lowo silxaane afiꞌrino gashshaanchono ikko olluu taaxxaaqe, Phaawuloosi lawishsha harunsine ayirrinynyunni coyishiinsheemmo. Kiristaanu wedellooti, rosu mine rosiisaanonsa, rosu mini sooreeyyenna hakko loossannore baala ayirrissanno. Ikkollana ayirrinseemmohu, ammananke gibbannokkire calla diꞌꞌikkino; hatteentenni, Yihowa Farciꞌraasine gibbannoreno ayirrinseemmo. Addaho, xaphphoomunni Yihowa Farciꞌraasine ikkitinokkiri, manna ayirrinseemmore ikkinoommota huwattanno gede assa hasiissannonke.—Roomu Sokka 12:17, 18; 1 Pheexiroosi 3:15.
20, 21. Silxaane garunni ayirrisanke abbitanno atooti giddo gamu hiikkonneeti?
20 Manna ayirrinseemmo wote, gama ayirrinsanni wole agurreemmore ikka dihasiissannonke. Hawaariya Pheexiroosi, “Manna duuchcha ayirrisse” yee borreessino. (1 Pheexiroosi 2:17) Mannootu giddonkenni ayirrinseemmonsata laꞌuro, lowo geeshsha xagge assidhara dandiitanno. Xaa yannara manna ayirrisa lowo geeshsha ajjanni hadhinota habbooti. Yesuusi togo yee hajajinonke: “Mannu dancha loosoꞌne lae iimi Annaꞌne galatanno gede, caabbichchiꞌne mannu albaanni xawona.” Tenne hajajo agadhineemmota leellinsheemmo doogga giddo mitte manna ayirrisate.—Maatewoosi 5:16.
21 Tenne xiꞌmote tunsichchi amadino alame giddo, danchu wodani noonsa manni ayyaanaamu caabbichchiwa daanni no. Konni daafira, maatetenna songote giddo noo silxaane, hattono uullate gashshaano ayirrinseemmoha ikkiro, hatto assanke mito manna ninke ledo xawaabbunni haꞌranno gede goshooshshansara dandiitanno. Tini ninkera lowo kaayyooti! Kuni ikka hoogiro nafa, mittu huluullammeemmokki coyi no. Manna ayirrisanke Maganonke Yihowa tashshi assitannosi, hattono baxillisinni fullummokki heeꞌneemmo gede kaaꞌlitannonke. Addaho, konninni rooranno atooti dino.
a Qoola 239-242 noo Guwuurshi, konne xintu seera loosu aana hosiisa dandiinannita mite mite doogo kulanno.