Adhanna Adhama Baxillaanchu Magani Uyino Eltooti

1, 2. (a) Haarote adhamanno manna laꞌneemmo wote mayine huluullammeemmo? Mayira? (b) Tenne fooliishsho giddo dawaro afiꞌneemmo xaꞌmuwa hiikkuriiti?

SARGE haꞌra baxisannohe? Hattoowi lowonta hagiirsiisanno daafira, batinynyu manni sarge haꞌra baxanno. Sargete barra mushurrootu lowo geeshsha biiffe leeltanno. Hakkii saeno albinsara lowo hagiirri leellanno! Hakko barra lamunku lowo geeshsha hagiidhanno; hattono albillittete heeshshonsa hexxo woꞌmitinota labbanno.

² Ikkeennano xaa yannara adhama duuchchu garinni laꞌniro mitiimmatenni woꞌmitinoti dikaandannite. Haarote adhamanno manna laꞌneemmo wote albillittete heeshshonsa seekkara halchineemmoha ikkirono, ‘Tini maate hagiirraame ikkitakka? Qolteno geedonnita ikkitakka?’ yine huluullammeemmo. Tenne xaꞌmuwara qollanni dawaro, minaanninna minaama adhama lainohunni Maganu uyino amaale addaxxitannorenna harunsitannore ikkansanna hoogansa garinni babbaxxitinote. (Lawishsha 3:5, 6) Lamunku Maganu baxillinni fultukki heeꞌrate tenne assa hasiissannonsa. Hanni Qullaawu Maxaafi tenne shoole xaꞌmora qolanno dawaro laꞌno: Mannu adhannohunna adhamannohu mayiraati? Adhate wossaꞌnittoro, hiittoo meyaata doodha hasiissannohe?a Adhate qixxaawa dandaattohu ma garinniiti? Minaanninna minaama maatensa hagiirraame assiꞌre heeꞌra dandaannohu hiittoonniiti?

MANNU ADHANNOHUNNA ADHAMANNOHU MAYIRAATI?

3. Baqete korkaati nookkiha adha woyi adhama hayyo ikkitinokkihu mayiraati?

³ Mitu manni, mittu manchi galte adha hoogiro horonta dancha heeshsho diheeꞌranno woyi hagiirre diafiꞌranno yee hedanno. Tini kayinni adda diꞌꞌikkitino! Seenne adhikki heeꞌrinohu Yesuusi, adhinikki heeꞌra elto ikkitinota coyiꞌrino; qoleno dandiitannori hatto ikkite heedhara amaalino. (Maatewoosi 19:11, 12) Hawaariya Phaawuloosino adhinikki heeꞌra uyitanno xiqime tittire kulino. (1 Qorontoosi 7:32-38) Yesuusino ikko Phaawuloosi tenne hajora higge difushshitino; isinni ‘adhanna adhama hoola’ ‘Sheexaanu rosi’ ledo gaammoonni. (1 Ximootewosi 4:1-3) Hakkoyeno ikkiro, adhinikki heeꞌra hedonsa bebbeehantukki Yihowara soqqama hasidhannorira lowo xiqime uyitanno. Konni daafira baqete korkaati nookkiha, lawishshaho darawo xixxiibbeenna adha woyi adhama hayyo diꞌꞌikkitino.

4. Qinaabbino adhama ooso ille lossiꞌrate hiittoo xinta ikkitanno?

⁴ Wole widoonni laꞌniro kayinni, adhate woyi adhamate baqete korkaati heeꞌranno. Adhanna adhamano baxillaanchu Magani uyino eltooti. (Kalaqo 2:18) Konni daafira adhanna adhama uyitanno xiqime no; qoleno atoote abbitara dandiitanno. Lawishshaho, qinaabbino adhama maatete heeshshora dancha xinta ikkitanno. Ooso ille lossiꞌrate, insara baxille leellishate, hattono amaalenna biddishsha aate annunna ama hasiissanno. (Faarso 127:3; Efesooni 6:1-4) Ikkollana adhinannihunna adhammannihu ooso ille lossiꞌrate yine calla diꞌꞌikkino.

5, 6. (a) Mekibibi 4:9-12 kultanno garinni muli jaaloomi abbanno atooti hiikkonneeti? (b) Adhanna adhama sasu ganaasinchi siiwo gede ikkitannohu hiittoonniiti?

⁵ Tini fooliishsho xintantino xiqisenna qooxeessaho noo assaawe lai: “Loosinsanni dancha guma afidhanno gede, mittunni lamu woyyanno. Lamunku giddo mittu uwiro, gatinohu uwinoha kayisanno. Kayisannosihu wolu nookkiha callasi heeꞌre uwannohu kayinni hiikkannokka? Qoleno lamunku mitteenni goxxuro iibbannonsa; mitto callaho hiitto ikke iibbannosi? Hattono mittu manchi mitto gadachchiro, lamunku kaaꞌlante qeeltannosi. Qoleno sasu ganaasinchinni gannoonni siiwo rakke ditaꞌanno.”—Mekibibi 4:9-12.

⁶ Tini xiqise roorenka coyidhanni noohu jaaloomu afiꞌrino waagireeti. Lamu manni duuchchunkunni roore jaaloomannohu adhamirooti. Tini xiqise kultannonte gede, togoo mittimma minaanninna minaama mimmito kaaꞌlanno, jawaachchishannonna agaranno gede assitanno. Adhanna adhama lowonta jawaata ikkitanno gede lamu manni mittimma calla ikka dihasiissannose. Tini xiqise kultannonte gede, lamu ganaasinchi siiwo taꞌara dandiitanno. Sasu ganaasinchi siiwo kayinni tayisate qarrissanno. Minaanniranna minaamara qara hasattonsa Yihowa hagiirsiisa ikkituro, adhamansa sasu ganaasinchi siiwo gedeeta ikkitanno. Lamunku gilletenni Yihowara galinore ikkiro, mittimmansa lowo geeshsha jawaata ikkitanno.

7, 8. (a) Siimu xaadi yorto ledo sharramannoha adhinokki manna Phaawuloosi mayyee amaalino? (b) Qullaawu Maxaafi adhanna adhama lainohunni hiittooti garu lao heedhannonke gede kulannonke?

⁷ Hakkii saeno, labbaahunna meyaati siimu xaado assatenni hagiidhannoti garu doogo adhama callate. Tenne qixxaawo giddo assinanniha siimu xaado hagiirru buichcho assine laꞌꞌa garaho. (Lawishsha 5:18) Adhinokkihu mittu manchi siimu xaadi hasatto kabbaade ikkitannota qeedhimmate yanna saihu gedensaanni nafa siimu xaadi yorto ledo sharramannoha ikkara dandaanno. Togoo yorto seekkine gargadha hoongiro, batte ikkinore woyi gariweelo coye assate widira massitara dandiitanno. Phaawuloosi ayyaanu marraeennasi, adhinokki manna togo yee amaalino: “Yortotenni giiramantenni adhama woyyitannona. Umonsa [qeeꞌla] hoogguro, adhama woyyitannonsa.”—1 Qorontoosi 7:9; Yaaqoobi 1:15.

⁸ Mittu manchi adhate kaꞌꞌanno korkaati baxihano ikkiro, noore ikka hasiissannosi. Phaawuloosi yiinonte gede, “[adhamanno] mannira qarru iillannonsa.” (1 Qorontoosi 7:28) Adhamino mannira adhinokkihura iillannokki qarri iillannonsa. Ati adhate wossaꞌnittoro kayinni, mitiimma ajishanna adhatenni afiꞌnanni atoote roore afiꞌra dandaattohu hiittoonniiti? Tenne assattoti mitte doogo adhatto meyaata hayyotenni doodhate.

DANCHA GALTE IKKITANNO MEYAATI HIITTOOTE?

9, 10. (a) Phaawuloosi ammaninokki manni ledo danna sae jaalooꞌma abbitanno gawajjo lawishshunni xawisinohu hiittoonniiti? (b) Ammantinokkiri ledo adhammannikki gede Maganu uyino amaale lashshi assa duuchcha wote maa abbitanno?

⁹ Phaawuloosi galte ikkanno mancho doodhinanni wote harunsinanniha qara xintu seera ayyaanu marraeennasi borreessino: ‘Ammaꞌnitinokkiri ledo injaannokki garinni amadantinoonte [“waaxantinoonte,” NW].’ (2 Qorontoosi 6:14) Phaawuloosi koye horoonsiꞌrino lawishshi gibirinnu loosi yannara ikkannoreeti. Geeshshano ikko wolqa lowonta babbaxxitinore lame saada waanxiro, lamunku gawajjantanno. Hatteente gede, ammaninohunna ammaninokkihu adhamiro, lowo geeshsha mitiiꞌmannoti dihuluullissanno. Insa giddo mittu Yihowa baxillinni fulikki heeꞌra hasiꞌranna kuꞌu kayinni togoori mittoreno xiwannosikkiha ikkiro, heeshshonsa giddo balaxisiissannori xaadannokki daafira lowo shetto kalaqantara dandiitanno. Konni daafira Phaawuloosi Kiristaanu ‘ammaꞌnitinore [“Mootichchunni,” NW]’ calla adhanno gede amaalino.—1 Qorontoosi 7:39.

¹⁰ Mito widoo laꞌniro, mitu adhinokki Kiristaani injaannokki garinni waaxama xaa callimmanni woyyitanno yee wossaꞌnate geeshsha iillino. Mitootu Qullaawu Maxaafi amaale lashshi assite, Yihowa Farciꞌraasine ikkinokki manni ledo adhantino. Duuchcha wote togoo adhama qarra abbitanno. Konni garinni adhantinori heeshshote giddo lowonta hasiissanno hajore galtensa ledo hasaawa didandiitanno. Konninni kainohunni adhantara albaanni callattinohunni roore callattanno. Wole ragaanni, Maganu tenne hajo lainohunni uyino amaale addaxxitannorinna seekkite harunsitannori kumunni kiirranniri adhantinokki Kiristaanooti no; tini hagiirsiissannote. (Faarso 32:8) Kuri Kiristaanooti konni kaꞌa adhate hexxo assidhurono, Magano Yihowa magansidhannori mereerinni woyyannonsaha afidha geeshsha adhitukki keeshshitanno.

11. Adhatto meyaata hayyotenni doodhate mayi kaaꞌlahera dandaanno? (Qoola 130 noo saaxineno lai.)

¹¹ Yihowara soqqamannohu baalunku dancha galte ikkanno yaa diꞌꞌikkitino. Adhate assaabbanni noottoha ikkiro, atehu gedee akatinna ayyaanaamittete giwe nooseta hattono atente gede Magano baxxannota hasiꞌri. Tenne hajo lainohunni ammanamino borojjichchi batinynye borro qixxeessino; konnira tenne hasiissanno hajora wossaꞌnate kaaꞌlitannohe gede, Qullaawa Borro amaale seekkite xiinxallanna huuccattotenni assaawa hayyote.b—Faarso 119:105.

12. Adhanna adhama lainohunni duuchcha gobbara hiittoo budi no? Tennera biddishsha ikkannohu Qullaawu Maxaafi lawishshi hiikkonneeti?

¹² Batinynye gobbara oosote galte doortannori annahonna amate. Togoo budira annanna ama konne hasiisanno doorsha doorate roore hayyonna egenno noonsa gede assine laꞌnanni. Togoo adhama biꞌree warinte gede roore wote qinaabbinota ikkitanno. Yisaaqira seenne hasate Abirahaami soqqamaanchosi soyinota kultanno xagge, xaa yannara konni garinni oosote galte doortanno annuwiranna amuwira biddishsha ikkitanno. Abirahaami illachcha tuginohu woxeho woyi dagoomu giddo noo ayirrinynyira diꞌꞌikkino. Hatteentenni, beettisira Yihowa magansiꞌranno manni giddonni seenne haaꞌrate lowo sharro assino.c—Kalaqo 24:3, 67.

ADHATE QIXXAAWA DANDAATTOHU HIITTOONNIITI?

13-15. (a) Lawishsha 24:27 noohu xintu seeri seenne adhate assaawino beetto kaaꞌlasira dandaannohu hiittoonniiti? (b) Mitte beetto adhamate qixxaabbanno wote maa assa dandiitanno?

¹³ Adhate lowo geeshsha assaabbanni noottoha ikkiro, ‘Addinta qixxaawoommo?’ yite ateneeto xaꞌma hasiissannohe. Tennera qolatto dawaro, baxilleho, siimu xaadira, jaaloomaho woyi ooso ilate noohe hedo aana calla xintantinota diꞌꞌikkitino. Adhamate assaawino beettino ikko beetto seekke assaawa hasiissannonsahu addi addi halaafinati no.

¹⁴ Seenne adhate assaawannohu mittu beetti aane nooha xintu seera seekke heda hasiissannosi: “Gobbaanni noo loosokki biddi assiꞌri; irshaho noohano qixxeessiꞌri. Hakkiinnino mine miꞌni.” (Lawishsha 24:27) Tini xiqise mayi sokka sayissanno? Biꞌree waro, mittu manchi mine miꞌna hasiꞌriro woyi seenne adhe maate xintiꞌra hasiꞌriro, ‘Adheemmo galtenna ilantanno ooso towaatatenna irkisate qixxaawoommo?’ yee isonooto xaꞌma hasiissannosi. Kuni manchi balaxe irshasi loosiꞌranna gide wixiꞌra hasiissannosi. Xaa yannarano kuni xintu seeri loosanno. Seenne adha hasiꞌranno manchi halaafinateho qixxaawa hasiissannosi. Loosa dandaannoha ikki geeshsha loosa hasiissannosi. Qullaawu Maxaafi maatesira mannimmate, simmeetetenna ayyaanaamittete hasiisannore shiqishannokki manchi ammana noosikki manchinni roore busha ikkinota kulanno!—1 Ximootewosi 5:8.

¹⁵ Mine assiꞌrate wossaꞌnitino beetto batinynye kabbaade halaafinate duqqate sumuu yitino yaate. Minaama minaannase kaaꞌlitanno wotenna maatese towaattanno wote hasiissannose ogimmanna akatta Qullaawu Maxaafi giddo xawinsoonni. (Lawishsha 31:10-31) Halaafinate duqqate qixxaabbukki muddante adhantanno labballino ikko seenni, galtensara assitannore mittoreno assaabbinokki daafira umonsa baxxannoreeti. Adhamate assaabbannori duuchchunkunni roore ayyaanaamittetenni qixxaawa hasiissannonsa.

16, 17. Adhamate qixxaabbanni noori hiincitara hasiissannoti Qullaawa Borroti xintu seerubba hiikkuriiti?

¹⁶ Adhamate qixxaawa, Maganu minaanniranna minaamara maatete giddo uyino bayichchire hiincano mitteenni amaddanno. Adhanno beetti Kiristaanu maatera umo ikkate yaa mayyaatero huwata hasiissannosi. Maatete umo ikka coqqone gashshate fiqaade afiꞌra diꞌꞌikkitino. Kuni beetti Yesuusi umimmate silxaanesi horoonsiꞌrino gara harunsa hasiissannosi. (Efesooni 5:23) Hatteente gede, Kiristaancho meyaati Maganu minaamara uyinoha ayirrado halaafinate huwata hasiissannose. “Minaannise higgera” maahoyye yite galate hasatto noose? (Roomu Sokka 7:2, NW) Ise wonanni Yihowanna Kiristoosi higgera woroonni noote. (Galatiya 6:2) Minaannise maatete giddo afiꞌrino silxaane qolte wole higge riqibbanno. Tini beetto adhanturo guunte noosikki manchi silxaanera hajajantanno? Qolteno silxaanesira maahoyye yite galtanno? Tini dirra gibbannoseha ikkiro, mine assiꞌra hooga woyyitannose.

¹⁷ Hakkiinni saeno minaannino ikko minaama kuꞌu kuꞌuyi hasatto wonshate qixxaawinore ikka hasiissannonsa. (Filiphphisiyusi 2:4) Phaawuloosi togo yee borreessino: ‘Kiꞌne [giddo] mittu mittunku umisi minaama hattonni umisi gede asse baxose; minaamano minaannase ayirrisso.’ Labbaahu galtesi lubbora ayirrissannasi laꞌꞌate baxxitino hasatto noosita Phaawuloosi Maganu ayyaaninni huwatino. Meyaati qolte minaannise baxasera lowo geeshsha hasidhanno.—Efesooni 5:21-33.

18. Adhamate kaꞌinori mimmitoho injiitannotanna teꞌee afate xaaddanno wote, insaneeto qeeꞌla hasiissannonsahu mayiraati?

¹⁸ Konni daafira, mittu beettinna mitte beetto mimmitoho galte ikkate injaannotanna teꞌee wossaꞌnate xaadanno yanna godoꞌlennita calla ikka dihasiissannose. Tini yanna lamunku mimmito garunni amada dandaanno gara rosannote; konni garinni, adhamiro woyyannotanna teꞌee afa dandaanno. Qolteno tini yanna meessaneeto qeeꞌla hasiissannote! Mimmitoho baxille leellishate hasatto kalaqamunni noota ikkitino daafira kabbaade fatana ikkitansara dandiitanno. Ikkollana mimmito addinta baxxannori, baxxanno manna ayyaanaamittetenni gawajjannore mittoreno diassitanno. (1 Teselonqe 4:6) Konnira galte ikkitannohetanna teꞌee wossaꞌnate mitte beetto ledo xaada jammarte noottoha ikkiro, ateneeto qeeꞌli; kuni akati seenne adhittorono hoogittorono, heeshshokki woꞌmate xaqqamannoheho.

ADHAMAꞌNE GEEDONNITA ASSIꞌRA DANDAATTOHU HIITTOONNIITI?

19, 20. Adhanna adhama lainohunni Kiristaanaho noonsa lao tenne alamera noohu batinynyu manni laonni baxxa hasiissannosehu hiittoonniiti? Lawishshunni kuli.

¹⁹ Minaannino ikko minaama adhamansa geedonnita ikkitara hasiꞌriro, mimmitoho qaale ea lainohunni gara ikkitino lao heedhansara hasiisanno. Qalote borronna filme duuchcha wote mannu halchanno garinni yaano lamu manni baxame, adhame hagiidhanna jeefantanno. Mannu ooso heeshsho giddo kayinni, adhanna adhama hanafote ikkinnina jeefo diꞌꞌikkitino; tinino Yihowa geedonnita ikkitara qixxeessinote. (Kalaqo 2:24) Ikkollana alamete aana togoo lao hakkeeshshi geeshshaatilla; tini dadillissannote. Mitu budi giddo mannu adhanna adhama “siiwo gurdate” gedeeti yaanno. Kuni manni yaattonsa adhanna adhama lainohunni noota rosantino lao kultannota dihuwatino. Hiitto? Dancha gede assine gurdinoonni siiwo hasiꞌni geeshsha keeshshitanno; ikkirono togoo siiwo mittore qarrammikki usuranna tira dandiinannita ikka hasiissannose.

²⁰ Batinynyu manni xaa yannara adhanna adhama yannate geeshshita ikkitino gede asse laꞌꞌanno. Kuni manni, adhanna adhama hasattonsa wonshitannoha lawinsaro rahe adhamanno; qarru woꞌminota labbannonsa wote kayinni agure xooqa dandaannohu gede asse hedanno. Ikkeennano Qullaawu Maxaafi giddo adhanna adhama xawisate horoonsiꞌnoonni lawishsha qaagi; hakkuno siiwote. Daddalu markaawera gannanni siiwo woyi siwaago kabbaade hambabalatte yannara nafa taꞌannokki gede qixxeessinoonnite. Hatteente gede, adhanna adhama qixxeessinoonnihu kaajjite heedhanno gedeeti. Yesuusi yiinore qaagi: “Maganu mitto assinonsare mannu badoonkensa.” (Maatewoosi 19:6) Seenne adhittoro, togoo lao heedhahera hasiisanno. Konni garinni heeꞌrate qaale ea, adhanna adhama duha ikkitanno gede assitannoni? Deeꞌni.

21. Minaannino ikko minaama mimmito hiittoo illenni laꞌꞌa hasiissannonsa? Tenne assate mayi kaaꞌlansara dandaanno?

²¹ Minaannino ikko minaama mimmitinsara gara ikkitino lao lossiꞌra hasiisannonsa. Mittu mittunku kuꞌu koꞌonniha dancha akatanna assanno sharro illachchishe laꞌꞌate woꞌnaalannoha ikkiro, adhanna adhama hagiirrenna harshammo afiꞌrannota ikkitannonsa. Mitto guunte noosikki mancho dancha illenni laꞌꞌa nookkireetini? Yihowa horonta nookkire diassanno; ikkeennano dancha illenni laꞌꞌannonke gede addaxxineemmo. Faarsaanchu togo yee xaꞌmino: “Yihowa, ati soꞌro illaallisattoha ikkoommero, ballo Yahi, ayi uurrara dandaanno?” (Faarso 130:3) Minaannino ikko minaama konni garinni mimmito dancha illenni laꞌꞌanna gatona yaa hasiissannonsa.—Qolasiyaasi 3:13.

22, 23. Abirahaaminna Saara xaa minaanniranna minaamara dancha lawishsha ikkannohu hiittoonniiti?

²² Adhama haammata diro keeshshitu kiiro roore hagiirrenna harshammo abbitara dandiitanno. Qullaawu Maxaafi Abirahaaminna Saarati adhamansa akkallete yannara hiittootero xawisanno. Hakkawaro heeshshonsa qarrunna mitiimma nookkita diꞌꞌikkitino. Leya diro aleeginoseti Saara qawaaxxote katami Uuri giddo noosehu iibbino minisenni fulte hakkunni gedensaanni noo heeshshose woꞌma dunkaanaho heeꞌra mageeshsha kabbaaddinosero hanni hedi. Ikkeennano minaannise silxaanera maahoyye yite galtino. Abirahaamira dancha kaaꞌlaancho ikkite, wussaanesi qinaabbanno gede irkissinosi. Qolteno maahoyye yite galtinohu yinoomme geeshsha diꞌꞌikkino. “Giddosenni” nafa minaannase mootichchaꞌya yitino. (Kalaqo 18:12; 1 Pheexiroosi 3:6) Ise Abirahaami ayirrissannohu wodanisenniiti.

²³ Ikkollana Abirahaaminna Saara coye baala mittu garinni laꞌꞌanno yaa diꞌꞌikkino. Mitte yannara Saara Abirahaami “lowonta dadillissanno” assaawe coyidhino. Ikkeennano Abirahaami Yihowa hajajeennasi galtesi yitinore rambaꞌnetenni macciishshino; tinino maatensara atoote abbitino. (Kalaqo 21:9-13) Xaa minaanninna minaama, wole agurina adhante haammata diro keeshshitinori nafa, Magano waajjannorinni kuri minaanninna minaamanni lowo roso afiꞌra dandaanno.

24. Yihowara ayirrinynye abbitannoti hiittoo adhamaati? Mayira?

²⁴ Kiristaanu songo giddo adhame hagiirrunni heeꞌrannohu kumunni kiirranni manni no; togoo maate giddo minaama minaannase lubbora ayirrissanno, minaannino minaamasi baxanno hattono kaffi asse laꞌꞌanno, qoleno lamunku Yihowa fajjo heeshshonsa giddo balaxisiisate kaaꞌlame loosanno. Adhate wossaꞌnittoro, adhatto meyaata hayyotenni doodhi; adhate balaxxe seekkite qixxaawi; hattono adhamaꞌne keerunna baxillu woꞌminotanna Yihowara ayirrinynye abbitannota ikkitanno gede assiꞌrate jawaati. Hatto assattoha ikkiro, adhamakki Maganu baxillinni fulittokki heeꞌrate kaaꞌlitannohe.