Qullaawu Maxaafi Adhama Diiganna Babbaxxe Heeꞌra Lainohunni Mayyaanno?

Yihowa adhamino manni adhami wote eino qaalira ammaname heeꞌrara hasiꞌranno. Isi umi labbaahanna meyaata adhamanno gede assi wote togo yiino: “Manchu . . . galtesi ledo quraanynyamanno; hakkiinnino lamunku mitto maala ikkanno.” Yannate gedensaanni Yesuusi Kiristoosino konne qaale coyiꞌre kae lede togo yiino: “Maganu mitto assinonsare mannu badoonkensa.” (Kalaqo 2:24; Maatewoosi 19:3-6) Konni daafira, Yihowanna Yesuusi adhama heeshshote diro woꞌma heedhannota ikkitino gedenna adhama diigantannohu minaanninna minaama giddo mittu reyiro calla ikkino gede assite laꞌanno. (1 Qorontoosi 7:39) Adhanna adhama qullaawa ikkitino daafira, adhama diiga shotinse laꞌnannita diꞌꞌikkitino. Isinni Qullaawa Borro daggaffanno korkaati nookkiha adhama diingannita Yihowa effire giwanno.—Milkiyaasi 2:15, 16.

Qullaawa Borro yitanno garinni adhama diigate korkaata ikkannori maati? Yihowa soorronna foorre effire giwanno. (Kalaqo 39:9; 2 Saamueeli 11:26, 27; Faarso 51:4) Isi foorre horonta tiyyire giwanno daafira adhama diigate baqete korkaata ikkitinota xawisino. (Foorrete widira gaamamanno cubbi hiittoohoro huwatate, foorrennire kultannota Fooliishsho 9, gufo 7 lai.) Yihowa foortinokki minaama foorino minaannise ledo heeꞌrate woyi adhama diigate wossaꞌnitanno gede qoosso uyinose.a (Maatewoosi 19:9) Konni daafira, mitte baddalantino minaama adhama diigate wossaꞌnituro, hatto assase Yihowa digiwanno. Ikkollana Kiristaanu songo ayee manchino adhama diiganno gede dixixxiibbanno. Isinni foorino minaannise giddosinni maaro eiro, minaama isi ledo heedhanno gede assitannoti mite mite ikkito heedhara dandiitanno. Ikkihano ikkiro, adhama diigate Qullaawa Borro daggaffanno korkaati noonsari ma assitannoro uminsanni wossaꞌnanna hatti wussaanensa abbitannore baala duqqa hasiissannonsa.—Galatiya 6:5.

Mitu Kiristaani galtensa foortinokkiha ikkirono, lowo geeshsha baxxino coyi tuncu yiinonsa daafira adhamansa diigate woyi baxxe heeꞌrate wossaꞌnino. Qullaawu Maxaafi togoo yannara galtensawiinni baxxino Kiristaani ‘mine assiꞌrikki heeꞌranno gede woyi minaanninsa ledo araaramanno’ gede kaajjishe amaalanno. (1 Qorontoosi 7:10) Konni garinni baxxino Kiristaanchi wolu ledo adhamate wolaphpho diafiꞌrino. (Maatewoosi 5:32) Mitootaho galtensawiinni baxxe heeꞌrate korkaata ikkinoha mito mito baxxino coye hanni laꞌno.

Afanni heeꞌrenni maatete hasiisannore assa giwa. Mitte maate, minaanni assa dandee heeꞌrenni hasiisannoha maalu coye shiqisha giweenna lowonta qarrantara dandiitanno. Qullaawu Maxaafi togo yaanno: “Mittu manchi . . . minisi mannira hasiisannore shiqishannokkiha ikkiro ammana kaadinoho; qoleno ammana noosikki manchinni roore bushaho.” (1 Ximootewosi 5:8, NW) Togoo minaanni haꞌrinshosi biddi assiꞌra giwiro, minaamasi isiwiinni baxxite umisehano ikko qaaqquullise keere agadha woyyitannosetanna teꞌee wossaꞌnitara dandiitanno. Songote cimeeyye mittu Kiristaanchi maatesi towaata giwino yitanno kisse shiqquro tenne seekkite buuxa hasiissannonsa. Mittu Kiristaanchi maatesi towaata giwasi songotenni bohamanno gede assitasira dandiitanno.

Mannimma lowonta goddaasa. Gibbo roso assiꞌrino minaanni galtesi mararro nookkiha ganannoha ikkiro, fayyimmase goddaasara, hakkiinni saeno lubbose nafa daneessara dandaanno. Galtesi gananno minaanni Kiristaancho ikkiro, songote cimeeyye togoo kisse marammara hasiissannonsa. Hanqunni hufe kaꞌꞌanna mararro nookkiha wole gawajja songotenni bohammanni gede assitanno.—Galatiya 5:19-21.

Yihowa magansiꞌrate coyi lowonta kabbaade ikkanno wote. Mittu minaanni galtesi halaalu magansiꞌra harunsitannokki gede yannate kiiro wotto woranni qarrisannoha woyi galtesi mitu garinni Maganu hajajo diigganno gede giddeessannoha ikkara dandaanno. Togoo wote minaama, ‘mannunni roore Maganoho hajajamate’ woyyitanno doogo minaannisewiinni baxxateronna teꞌee wossaꞌnitara dandiitanno.—Soqqamaanote Looso 5:29.

Kageeshsha laꞌnummohu gedeehu baxxino coyi mitte Kiristaanchora iilliro, tini rodoo minaannisewiinni baxxitanno gede woyi ledosi heedhanno gede ayino xixxiiwa dihasiissannosi. Ayyaanaamittetenni gikki yitino jaallanna cimeeyye togoori iillino rodoo kaaꞌlitaranna Qullaawu Maxaafi aana xintantino amaale uyitara dandiitannoha ikkirono, minaanninna minaama mereero noo coye gudisse afa didandiitanno. Noore gudise afa dandaannohu Yihowa callaati. Mitte minaama woyi minaanni galtensawiinni baxxe heeꞌrate yee calla mininsa giddo noo mitiimma lowo asse coyiꞌrannoha ikkiro, hatti Maganono adhamano shotisate. Mittu manchi ayee geeshshano maaxiro galtesiwiinni baxxate gananno gano baalanti Yihowara xabbe leeltanno. Addaho, ‘Isi ille albaanni duuchchunku coyi xawoho noohonna mulqame leellannoho; ninkeno dawaro qolleemmohu isi albaanniiti.’ (Ibiraawuyaani 4:13) Ikkollana kalaqaminohu baxxino qarri hatte gedee keeshshiro, assannore baala gude hoogihu gedensaanni galtesiwiinni baxxate wossaꞌnanno Kiristaancho ayiino bushiisha dihasiissannosi. Goofimarchoho baalinke ‘Maganunnihu yoote barcimi albaanni uurrineemmo.’—Roomu Sokka 14:10-12.