Maganunniwa Shiqa Dandaattohu Hiittoonniiti?

1. Maganu baalanta huuccatto macciishshanno?

Maganu duuchunku gari manni iso huucciꞌranno gede koyisino. (Faarso 65:2) Ikkollana, isi baalanta huuccatto macciishshanno yaa diꞌꞌikkino. Lawishshaho, galtesi miicanno manchi huuccatto Maganunniwa diꞌꞌiillitanno. (1 Pheexiroosi 3:7) Isiraeelete gosano busha assootensa agura gibbu yannara, Maganu huuccattonsa macciishsha giwino. Tini lawishshuwa, huuccatto shotinse laꞌnanni coye ikkitinokkita leellishshanno. Ikkirono, Maganu shota ikkinokki cubbo loossannori nafa maaro eꞌe higguro huuccattonsa macciishshanno.​—Isayyaasi 1:15; 55:7 nabbawi.

Maganu Baalanta Huuccatto Macciishshanno? yitanno viidiyo lai.

2. Huucciꞌra hasiissannonkehu hiittoonniiti?

Huuccatto Magano magansiꞌrate widira kiirantanno; konni daafira, huucciꞌra hasiissannonkehu Kalaqaanchonke Yihowa callaati. (Maatewoosi 4:10; 6:9) Qoleno guunte xeꞌinonkere ikkinoommo daafira, huucciꞌra hasiissannonkehu Yesuusi suꞌminniiti; korkaatuno cubbinkera reyinohu isooti. (Yohaannisi 14:6) Yihowa, huucciꞌnummo kiiro yinoommota yinammora woy borreessinoonni huuccatto assiꞌnammora dihasiꞌranno. Isi giddonkenni huucciꞌnammora hasiꞌranno.​—Maatewoosi 6:7; Filiphisiyusi 4:6, 7 nabbawi.

Kalaqaanchinke qoonqonke macciishshantukki huucciꞌneemmo huuccatto nafa macciishshanno. (1 Saamueeli 1:12, 13) Isi hasiꞌnummo yanna baalantera huucciꞌneemmo gede koyisinonke; lawishshaho, soodo guto, hawarro, sagale inteemmo yannaranna qarrammeemmo woyite huucciꞌra dandiineemmo.​—Faarso 55:22; Maatewoosi 15:36 nabbawi.

3. Kiristaanu mitteenni gamba yaannohu mayiraati?

Heeꞌnoommohu Magano ammanannokkinna isi uullate aana keere abbeemmo yee uyino hexxo qacifatanno manni mereero ikkino daafira, Maganunniwa shiqa shota diꞌꞌikkitino. (2 Ximootewosi 3:1, 4; 2 Pheexiroosi 3:3, 13) Konni daafira ammanate roduuwinke ledo gamba yine mimmito jawaachisha hasiissannonke.​—Ibiraawuyaani 10:24, 25 nabbawi.

Magano baxanno manniwa aananke isiwa shinqeemmo gede kaaꞌlitannonke. Yihowa Farciꞌraasine gambooshshi, wolootu ammananni jawaante afiꞌrate dancha faro fananno.​—Roomu Sokka 1:11, 12 nabbawi.

4. Ati Maganunniwa shiqa dandaattohu hiittoonniiti?

Qaalisi giddonni rosoottore heeshshi gotti assite heda Yihowawa shiqatto gede kaaꞌlitannohe. Isi assinori, amaalesinna uyino hexxo maa rosiissannohero hedi. Togoore huuccattote ledo seekkine hiincanke Maganu baxillenna hayyosi dhaggeeffanteemmo gede assitannonke.​—Iyyaasu 1:8; Faarso 1:1-3 nabbawi.

Maganunniwa shiqa dandaattohu, iso addaxxattohanna ammanattoha ikkiro callaati. Ammana qolte lubbote noo kalaqo gedeeti; togoo kalaqora sagale hasiissanno. Ammanakkira xinta ikkinore yannate kiiro haaro ikkite heeshshi gotti assite hedde, lawishshu yaattonni ammanakki sagale itisa hasiissannohe.​—Maatewoosi 4:4; Ibiraawuyaani 11:1, 6 nabbawi.

5. Maganunniwa shiqittoro afiꞌratto atooti maati?

Yihowa iso baxxannorira hedanno. Ammanansanna hegere heeshsho hexxonsa daafanno coyi baalunkunni agaransara dandaanno. (Faarso 91:1, 2, 7-10) Fayyimmanke gawajjitannotanna hagiirrenke huntanno heeshsho heeꞌneemmokki gede balaxe qorowisiisannonke. Yihowa duuchantenni woyyitino heeshsho heeꞌneemmo gara rosiisannonke.​—Faarso 73:27, 28; Yaaqoobi 4:4, 8 nabbawi.