Daawiti Diwaajjino

Mitiri waajjishihero hiikkatto?— Annikkiwa woy amakkiwa xooqattora dandaatto. Ikkollana kaaꞌlahera dandaannohu woluno no. Isi baalunku manninni roore wolqa afiꞌrinoho. Isi ayetiro afootto?— Ee, Yihowaati. Xa hanni Qullaawu Maxaafi giddo kulloonnihu wedellichu Daawiti xagge ronso. Isi Yihowa ayewoteno kaaꞌlannosita afino; konni daafira diwaajjino.

Daawiti anje qaaqqu heeꞌreenna, annisinna amasi isi Yihowa baxanno gede assite rosiissinosi. Tini waajjishannori iillisi wote nafa waajjannokki gede kaaꞌlitinosi. Isi Yihowa Jaalasi ikkinotanna kaaꞌlannosita afino. Mitte hige Daawiti geꞌreewo allaale heeꞌreenna, lowo doobbiichi daye geꞌrecho amadi! Hakkawote Daawiti ma assinoro afootto? Doobbiicho mulla anganni shorrino, shaa nafa shiikki digatino! Qoleno, dibi yinanni moyichi daye geꞌreewo amadi yannara isono shiino! Daawiti ayi kaaꞌlinoha lawannohe?— Ee Yihowa kaaꞌlinosi.

Daawiti roorenka worba ikkinoti wole yannano no. Isiraeelete manni Filisxeemete yinanni manni ledo olamino yanna no. Filisxeemete wottaaddarooti giddo mittu jigeessu manchi no! Suꞌmisi Goliyaadiiti. Kuni jigeessu manchi Isiraeelenna Yihowa mishino. Goliyaadi Isiraeele, hanni worbitinoonniro amme ane ledo olamme yiinsa. Isiraeelete manni kayinni isi ledo olama lowo geeshsha waajjino. Daawiti tenne afiti Goliyaadi togo yii: ‘Ani ate ledo olameemmo! Yihowa kaaꞌlannoe daafira, qeeleemmohe!’ Daawiti worba beetto dilawannohe?— Ee, worbaho. Hakkiinni aane mayi ikkinoro afootto?

Daawiti corqaayyesinna onte qunqumadda kinna adhe jigeessu manchi ledo olamara haꞌri. Corqaayye kincho worre olate kaaꞌlitannote. Goliyaadi Daawiti shiinqa ikkinota laiti, iso horo mishi. Daawiti kayinni iso togo yii: ‘Ati ane ledo olamate bise adhite dawootto, ani kayinni Yihowa suꞌminni dawoommohe!’ Hakkiinnino corqaayyete mitto kincho wodhe, Goliyaadiwa hige dodi, wodhino kinchono wijji asse oli. Kinchu Goliyaadira albaho taalo gani! Jigeessu manchi hakkawontenni kaate uwe reyi! Filisxeeme waajjite huxidhe gudisante xooqqu. Daawiti shiima ikke heeꞌrenni kageeshshi jigeessa hiitto ikke shaa dandii?— Iso kaaꞌlinohu Yihowaati, Yihowa hakkoye jigeessa mancho lowo geeshsha rooranno!

Daawiti xaggenni maa rosatto?— Yihowara mannu baalunkutenni roore wolqa noosi. Isi atera Jaalaho. Hakko daafira mitiri waajjishihero, Yihowa kaaꞌlahera dandaannota habbooti!