Woxe Amaxxinanni Gara

Maatenkera hasiisannore shiqishate ninke baalunkura woxu hasiisannonke. (Lawishsha 30:8) Qoleno, “woxu agarooshshe ikkanno.” (Mekibibi 7:12) Galteꞌne ledo woxu daafira hasaawa shota ikka hooggaꞌnera dandiitanno; ikkirono, woxu mereeroꞌne qarra kalaqara wodhitinoonte. (Efesooni 4:32) Minaanninna minaama woxensa ma garinni horoonsiꞌrannoro muranno wote mimmito ammananna buusama hasiissannonsa.

1 SEEKKITINE HEDDINE SOMA FUSHSHIDHE

QULLAAWU MAXAAFI MAYYAANNO? “Kiꞌne giddo gimbe miꞌnara kae gudate ikkanno woxi noosironna teꞌee afate balaxe ofolle fulanno woxe shallaqqannokkihu ayi no?” (Luqaasi 14:28) Woxeꞌne hiittoonni horoonsidhinanniro mitteenni hasaawaꞌne lowonta hasiissinote. (Amootsi 3:3) Maa hidha hasiissannoꞌneronna mageeshshi woxe fushsha dandiitinanniro hasaabbine xaadisidhe. (Lawishsha 31:16) Mitto coye woxu nooꞌne daafira calla hidha hasiissannoꞌne yaa diꞌꞌikkino. Asalu giddora eꞌinannikki gede qorophe. Angaꞌne noo woxi aleenni ikkino coye hidhitinoonte.—Lawishsha 21:5; 22:7.

MAA ASSA DANDIITINANNI?

• Hasiisannoꞌnere baala hidhitinihu gedensaanni gatanno woxe hiissitinoro woyyannoro mitteenni hasaabbe

• Fushshitinoonni woxi afidhinanni woxinni rooriha ikkiro, fulanno woxe ajishate soma fushshidhe. Lawishshaho, sagale hidhe itantenni mine qishiꞌra dandiitinanni

2 HEDOꞌNE XAWISSINE COYIDHE, QUWANO SAꞌINOONTE

QULLAAWU MAXAAFI MAYYAANNO? ‘Assitinannire baala Yihowa albaanni calla ikkikkinni mannu albaannino ammanantine asse.’ (2 Qorontoosi 8:21) Mageeshshi woxe afiꞌrattoronna fushshattoro galtekkira maaxittokki kuli.

Woxu ledo xaado afidhinota jajjabba coyibba assatto yannara duuchanka wote galtekki ledo amaalami. (Lawishsha 13:10) Woxu daafira hasaawaꞌne maateꞌne giddo salaame heedhanno gede assitanno. Afiꞌratto woxe umikkihu gede ikkikkinni maatete woxi gede assite hedi.—1 Ximootewosi 5:8.

MAA ASSA DANDIITINANNI?

• Mimmitoho kultinikki mageeshshi woxe fushsha dandiitinanniro hasaabbine xaadisidhe

• Woxu daafira hasaawate qarru kalaqama geeshsha agartinoonte