FOOLIISHSHO MITE
Maganu Ayeti?
1, 2. Mannu duucha wote hiittoo xaꞌmo xaꞌmanno?
QAAQQUULLU duucha xaꞌmo xaꞌmitanno. Mitto coye kullanninsa wote, ‘Mayira?’ yitanno. Dawaro qolle kaꞌniro xaano ‘Mayira?’ yite ledde xaꞌmitara dandiitanno.
2 Mannu baalunku, ajuno akkaluno xaꞌmo xaꞌmanno. Lawishshaho, doogo afate woy saate meꞌꞌetero xaꞌminammora dandiineemmo. Woy heeshshotenna albillittete yanna daafira roore hasiissanno xaꞌmo xaꞌminammora dandiineemmo. Kayinni togoo xaꞌmora gari dawaro afiꞌra hoongummoro, dawaro hasiꞌra agurrammora dandiineemmo.
3. Lowo manni huluullitannonsa xaꞌmora dawaro afiꞌrannokkihu gede asse hedannohu mayiraati?
3 Xaꞌmuwankera Qullaawu Maxaafi giddonni dawaro afiꞌra dandiineemmo? Mitu manni tennera sumuu yaannoha ikkirono, Qullaawu Maxaafi huwatate qarrisannoha lawannonsa. Insa xaꞌmonke qola dandiitannori rosiisaano woy qeesoota callaho yite heddanno. Wolu manni qole saalfatanno daafira afinokkita anfara dihasiꞌranno. Atera kuni coyi ma lawannohe?
4, 5. Hiikkuri hasiissanno xaꞌmuwara dawaro afiꞌra hasiꞌratto? Xaꞌmuwakkira dawaro hasiꞌra agura hasiissannohekkihu mayiraati?
4 Aante noo xaꞌmuwara dawaro afiꞌra hasiꞌrattoha ikkara dandaanno: Kalaqammoommohu isi mayiraati? Reyineemmo wote hiikkineemmo? Maganu isi hiittooho? Egennamino Rosiisaanchi Yesuusi togo yiino: “Huuccidhe, uyinanniꞌnena; hasidhe, afidhinannina; woshshidhe fannanniꞌnena.” (Maatewoosi 7:7) Xaꞌmuwakkira ammansiissanno dawaro afiꞌratto geeshsha, hasiꞌra agurtooti.
5 ‘Hasiꞌra’ agura hoogittoro, huluullitannohe xaꞌmuwara Qullaawu Maxaafi giddo dawaro afiꞌratto. (Lawishsha 2:1-5) Qullaawu Maxaafi qolanno dawaro huwatate diqarrissannote. Rosatto rosi xa hagiirru noo heeshsho heeꞌratto gedenna konni kaꞌira kaajja hexxo heedhannohe gede kaaꞌlannohe. Hanni batinyu mannira huluullitannota mitte xaꞌmo laꞌno.
MAGANU NINKE DAAFIRA HEDANNOHONSO KAAJJADOHO?
6. Mitu manni, iillannonke qarri Maganoho didhiwannosi yee hedannohu mayiraati?
6 Batinyu mannira, Maganu ninke daafira hedannokkiha lawannonsa. Kuni manni, ‘Maganu mannu daafira hedannoha ikkoommero, alame togoota diꞌꞌikkitanno’ yaanno. Alamete aana olu, mimmito giwanna qarru woꞌmino. Mannu xiwamanno, shetanno, hattono reyanno. Mitu manni, ‘Maganu ninke daafira hedannoha ikkiro, konne baala qarra hoolannokkihu mayiraati?’ yee hedanno.
7. (a) Ammaꞌnote murrooti, mannu Magano kaajjadoho yaanno gede assitinohu hiittoonniiti? (b) Bushu coyira Magano bushiisha gara ikkitinokkihu mayiraati?
7 Mito wote ammaꞌnote murrooti mannu Maganu kaajjadoho yaanno gede assitanno. Insa dadillisanno coyi ikkanno wote, Maganu abbinoreeti yitanno. Qoleno, isi afe assinoreeti yitanno. Insa, tennera bushiinshannihu Maganoho yitinohu gedeeti. Qullaawu Maxaafi kayinni bushu coyira kaimu horonta Magano ikkinokkita kulanno. Yaiqoobi 1:13 Maganu ayeno bushu coyinni fonqolannokkita kultanno. Togo yitanno: “Ayino jifamanno yannara, ‘Maganu jifinoe [woy, fonqolinoe]’ yoonke. Maganu bushu coyinni dijifanno; horontanni isi ayeno dijifanno.” Togo yaa, Maganu bushu coyi ikkannota hoolinokkiha ikkirono, togoo coye assannohu iso diꞌꞌikkino yaate. (Iyyoobi 34:10-12 nabbawi.) Hanni mitto lawishsha laꞌno.
8, 9. Iillannonke qarrira Magano bushiisha gara ikkitinokkihu mayiraati? Lawishsha kuli.
8 Hanni annisinna amasi ledo heeꞌrannoha mitto wedellicha hedi. Konne beetto annisi lubbora baxannosi; qoleno danchare doodhanno gara rosiisinosi. Gedensaanni, kuni beetti annisira finqile qaetenni fule bai. Hakkiinni bushare assanni heeꞌra hanafi, qoleno qarru giddora ei. Annu beettosi qaetenni fule haꞌrannota hoolinokki daafira, beettoho iillino qarrira anna bushiisha garaho? Digaraho! (Luqaasi 15:11-13) Hakko anninte gede, Maganu mannu ooso finqilanna busha coye assa doodhituta dihoolino. Konni daafira bushuri ikkanno wote, konne assinohu Magano ikkinokkita qaaga hasiissannonke. Tennera Magano bushiisha gara diꞌꞌikkitino.
9 Maganu xaa yannara bushuri ikkannota hoolinokkihu korkaatu noosi daafiraati. Tenne hajo daafira Qullaawu Maxaafi mayyaannoro Fooliishsho 11 rosatto. Xa kayinni Maganu lowo geeshsha baxannonketanna qarru iillannonke gede assannohu iso ikkinokkita huwati. Isinni, qarranke tirannohu Iso callaati.—Isayaasi 33:2.
10. Maganu bushu manni abbino gawajjo baala hoolannota mayinni anfeemmo?
10 Maganu qullaawaho. (Isayaasi 6:3) Isi assannori baalunku xalalaho, danchahonnna minshannire afiꞌrinokkiho. Hakko daafira, iso addaxxa dandiineemmo. Mannu ooso kayinni hattoore diꞌꞌikkitino. Mito wote gara ikkinokkire assitanno. Qoleno danchu gashshaanchi nafa bushu manni abbino gawajjo baala hoole diafanno. Maganu wolqa kayinni taalle dinoote. Isi bushu manni abbino gawajjo baala hoola dandaanno; qoleno hoolanno. Maganu bunshe baalanta hegerera hunanno.—Faarso 37:9-11 nabbawi.
QARRU IILLANNONKE WOTE MAGANOHO MAYI MACCIISHSHAMANNOSI?
11. Qarru iillannohe wote Maganoho mayi macciishshamannosi?
11 Alamete aana ikkanni noorenna atera iillanni noohe qarra laꞌꞌanno wote Maganoho mayi macciishshamannosi? Qullaawu Maxaafi Maganu ‘halaale’ woy ‘taashsho baxannota’ kulanno. (Faarso 37:28) Konni daafira Maganu alamete aana bunshenna miico ikkikkinni danchumma woꞌmitara hasiꞌranno. Isi mannaho qarru iillannota dibaxanno. Qullaawu Maxaafi, Maganu alba alamete aana bunshe batidhinota lai wote ‘wodanisi dadillino’ yaanno. (Kalaqama 6:5, 6) Maganu xaano disoorramino. (Milkiyaasi 3:6) Qullaawu Maxaafi Maganu ninke daafira addinta hedannota kulanno.—1 Pheexiroosi 5:7 nabbawi.
Qullaawu Maxaafi, Yihowa shaqqado kalqete alame Kalaqaancho ikkinota kulanno
12, 13. (a) Manna banxeemmohunna mararreemmohu mayiraati? Alamete aana noo qarra laꞌneemmo wote mayi macciishshamannonke? (b) Maganu qarranna gadado baalanka hunannota addaxxa dandiineemmohu mayiraati?
12 Qoleno, Qullaawu Maxaafi Maganu danisinni kalaqinonketa kulanno. (Kalaqama 1:26) Hatto yaa Maganu isira noositi dancha akatta ninkerano heedhannonke gede asse kalaqinonke yaate. Konni daafira, ati beebbaataamu mannira qarru iillanna laꞌe dadillattoha ikkiro, Maganu hakkiinni roore dadillanno! Tenne mayinni anfeemmo?
13 Qullaawu Maxaafi, “Maganu baxilleho” yaanno. (1 Yohaannisi 4:8) Maganu baalankare assannohu baxillunniiti. Ninkera baxillu noonkehu Maganu baxillaancho ikkinohuraati. Hanni tenne hedi: Wolqa heedhoommehero, alamete aana noo qarranna gadado baala hoolatto? Manna baxatto daafira, hoolattoti egennantinote. Maganuna? Isira wolqa noosihuranna ninke baxanno daafira qarranna gadado baalanka hoolanno. Konni maxaafira bitimaho qummi assinoonnihu Maganu abbeemmo yiino atooti baalunku daannota addaxxa dandaatto! Tenne addaxxate kayinni, Magano seekkite afa hasiissannohe.
MAGANU ISO AFATTORA HASIꞌRANNO
Mittu manchira jaala ikka hasiꞌrittoro, suꞌmakki kulattosi. Maganu suꞌmasi Qullaawu Maxaafi giddo kulinonke
14. Maganu suꞌmi ayeti? Konne suꞌma woshsha hasiissannonkehu mayiraati?
14 Mittu manchira jaala ikka hasiꞌrittoro, balaxxe kulattosi coyi maati? Suꞌmakki kulattosira dandaatto. Maganoho suꞌmu noosi? Batinye ammaꞌno suꞌmisi Maganoho, woy Mootichaho yitanno; kuni kayinni suꞌma diꞌꞌikkino. “Moote” woy “gashshaancho” yitanno qaalla gede, kurino maaragetella. Maganu suꞌmisi Yihowa ikkinota kulinonke. Faarso 83:18 (NW) togo yitanno: “Suꞌmakki Yihowa yinannihu ati callu uulla woꞌmate aana Woꞌmunkura Aliidiha ikkoottota mannu afona.” Mite Qullaawu Maxaafi tiro Maganu suꞌma ‘Yahiwe’ yitanno. (Fulo 6:3, lekkaalliidi qaagiishsha lai.) Wole Qullaawu Maxaafi tiro, lawishshaho Haaro Alame Tiro, Maganu suꞌma “Yihowa” yitanno. Qullaawa Maxaafa borreessitinori Maganu suꞌma lowo kume ikkanno bayicho borreessitino. Yihowa suꞌmasi afattoranna woshshattora hasiꞌranno. Isi suꞌmasi kulinohehu jaalasi ikkattora hasiꞌranno daafiraati.
15. Yihowa yinanni suꞌmi mayi tiro afiꞌrino?
15 Yihowa yinannihu Maganu suꞌmi lowo tiro afiꞌrinoho. Kuni suꞌmi Maganu coyiꞌrino qaale baalankanna hedinore wonshannota leellishanno. Maganu hedinore assannota hoolannosiri dino. Yihowa yinanni suꞌmi isira calla malinoho.a
16, 17. (a) “Woꞌmanka Dandaattohu” (b) “Hegeri Moote” (c) “Kalaqaancho” yaa mayyaate?
16 Aleenni laꞌnummonte gede, Faarso 83:18 (NW) Yihowa daafira, “Ati callu uulla woꞌmate aana Woꞌmunkura [Aliidiho]” yitanno. Qoleno Yohaannisi Ajuuja 15:3 togo yitanno: “Woꞌmanka Dandaattohu, Mooticha Magano! Loosikki dhaggetenna maalalete! Gosa baalate [“hegeri,” NW] Moote, dooggakki taalotenna halaaleho!” “Woꞌmanka Dandaattohu” yaannohu maaragete suꞌmi mayi tiro afiꞌrino? Hatto yaa kalqete alame giddo baalanka roortino wolqa noosihu Yihowaati yaate. “Hegeri Moote” yaa kayinni isi woꞌmanka wote heeꞌrannoho yaate. Faarso 90:2 isi hegerenni hegere geeshsha heeꞌrannoha ikkinota kultanno. Tini dhagge diꞌꞌikkitino?
17 Kalaqaanchu Yihowa callaati. Yohaannisi Ajuuja 4:11 togo yitanno: “Mootichankenna Maganonke! Baalanka kalaqoottona, kalaqamanno gede assoottohunna, heeshsho oottohu ateetina, atera ayirrinyu, guweenyunna wolqa ikkitohe!” Ee, iimi sokkaasine, gordu beeddahe, haqqe, baaru giddo noo qulxuꞌme, hattono wole baalankare kalaqinohu Yihowaati!
YIHOWA JAALA IKKA DANDIINANNI?
18. Mitu manni Maganu jaala ikka didandiineemmo yee hedannohu mayiraati? Qullaawu Maxaafi tennera mayyaanno?
18 Mitu manni Yihowata dhaggete akatta hedanno wote waajjanno daafira, ‘Lowo wolqanna roorreenyu noosihu xeertote noo Magani ane caaqqi yee nafa dilaꞌꞌannoe’ yee hedanno. Kayinni Maganu hatto yine hendammora hasiꞌrannoni? Dihasiꞌranno. Yihowa ninkewa shiqa hasiꞌranno. Qullaawu Maxaafi Maganu “ninkewiinni [dixeertiꞌrinoho]” yaanno. (Soqqamaasinete Looso 17:27) Maganu ati isiwa shiqattora hasiꞌranno; ‘isino atewa shiqeemmo’ yiino.—Yaiqoobi 4:8.
19. (a) Maganu jaala ikka dandaattohu hiittoonniiti? (b) Maganu akatta giddo ate roore baxisannohehu hiikkonneeti?
19 Maganu jaala ikka dandaattohu hiittoonniiti? Yesuusi togo yiino: ‘Hegere heeshshono, ati callu halaalaancho Magano ikkoottoha atenna soottoha Yesuusa Kiristoosa afate.’ (Yohaannisi 17:3) Yihowanna Yesuusire rosakki agura hoogittoro, insa seekkite afatto. Tenne assittoro, hegere heeshsho afiꞌratto. Lawishshaho, “Maganu baxille” ikkinota albaanni ronsoommo. (1 Yohaannisi 4:16) Ikkirono Maganoho woleno batinye kaajja akatta noosi. Qullaawu Maxaafi Yihowa ‘maarannohanna hanqoho muddamannokkiha, mararannoha, ammanamasinna bagamannokki baxillisi batiꞌrinoha’ ikkinota kulanno. (Fulo 34:6) Yihowa ‘shaqqadohonna cubbo agurannoho.’ (Faarso 86:5) Maganu cincahonna ammanaminoho. (2 Pheexiroosi 3:9; Faarso 18:25) Qullaawa Maxaafa nabbawitto kiiro kaajja akattasi daafira lowore rosatto.
20-22. (a) Magano laꞌꞌa dandiineemmokkiha ikkina isiwa shiqa dandiineemmohu hiittoonniiti? (b) Mannu Qullaawa Maxaafa xiinxalla aguri yiihero ma assa hasiissannohe?
20 Magano laꞌꞌa dandaattokkiha ikkina isiwa shiqa dandaattohu ma garinniiti? (Yohaannisi 1:18; 4:24; 1 Ximootewoosi 1:17) Qullaawu Maxaafi Yihowa daafira kulannore nabbawatto wote, Iso seekkite afatto daafira xawe leellannohe. (Faarso 27:4; Roomu Sokka 1:20) Yihoware rositto kiiro, iso roore baxxanni haꞌratto; qoleno isiwa albinni roore shiqatto.
Annu oososi baxanno; iimi Anninke kayinni hakkiinni roore baxannonke
21 Hakkawote Yihowa Annanke ikkinota huwatatto. (Maatewoosi 6:9) Heeshsho uyinonkehu isooti; qoleno dancha heeshsho heeꞌnammora hasiꞌranno. Baxillaanchu anni oososira halchannoti togoo heeshshooti. (Faarso 36:9) Ee, Qullaawu Maxaafi Yihowa jaala ikka dandiinannita kulanno. (Yaiqoobi 2:23) Hanni konne coye hedi. Kalqe woꞌmate Kalaqaanchi Yihowa jaalasi ikkattora hasiꞌranno yaate!
22 Mitu manni Qullaawa Maxaafa xiinxalla aguri yaahera dandaanno. Insa wole ammaꞌnowa higatto yee huluullamara dandaanno. Ikkirono, aye manchino Yihowa jaala ikkattokki gede guficho ikkahera wodhitooti. Yihowa gedee Jaala horonta diafiꞌnanni.
23, 24. (a) Xaꞌmo xaꞌma agura hasiissannohekkihu mayiraati? (b) Aantanno fooliishshora maa ronseemmo?
23 Qullaawa Maxaafa xiinxallatto wote, leellannohekki coyi heeꞌrara dandaanno. Leellinohekki coye xaꞌma horo saalfattooti. Yesuusi, qaaqquullu gede shooshaqoota ikka hasiissannonketa rosiisino. (Maatewoosi 18:2-4) Qaaqquullu duucha xaꞌmo xaꞌmitanno. Maganu xaꞌmuwakkira dawaro afiꞌrattora hasiꞌranno. Hakko daafira, rossanni nootto rosi halaale ikkasi buuxate Qullaawa Maxaafa seekkite xiinxalli.—Soqqamaasinete Looso 17:11 nabbawi.
24 Yihoware rosate baalunkunni roore kaaꞌlitannoti Qullaawa Maxaafa xiinxallate. Aantanno fooliishshora, Qullaawu Maxaafi wole baalante maxaaffanni baxxinoha ikkinohu hiittoonniitiro ronseemmo.
a Qullaawu Maxaafikki giddo Yihowa yinanni suꞌmi nookkiha ikkiro woy Maganu suꞌmi tironna konne suꞌma woshshinanni gara ledde afa hasiꞌrittoro, Jeefote Hedo 1 lai.