Addaaminna Heewani Maganoho Hajajama Giwi

Mitto barra Heewani calla heedheenna hamashshu coyishiishise. ‘Maganu kaashshu basera noo haqqe laalo baala ittinoonte yiinoꞌneni?’ yiise. Hakkiinni Heewani togo yitu: ‘Deeꞌni, mitte haqqicho laalo agurranna, baalante haqqe laalo ita dandiineemmo. Hattee haqqicho laalo intummoro kayinni reyineemmo.’ Hamashshu qole togo yii: ‘Reya nafa direyitinanni. Hatte haqqicho laalo ittiniro Maganu gedeere ikkitinanni.’ Hamashshu coyiꞌrinori addaho? Deeꞌni, kaphoho. Heewani kayinni isi yiinore adda assidhino. Ise haqqichote laalo laꞌe laꞌe yite, hattee laalo yortino. Hakkiinni ise hattee laalo ittu; Addaamirano uyitu. Addaami, insa Maganoho hajajama giwiro reyannota afino. Isi tenne afinoha ikkirono, hattee laalo itino.

Hakko barranni Yihowa Addaaminna Heewani coyishiishi. Yihowa insa Isira hajajama gibbinohu mayiraatiro xaꞌminsa. Hatte yannara Heewani hamashshoho wortu, Addaami kayinni Heewanira worino. Yihowa Addaaminna Heewani isira hajajama giwino daafira kaashshu basenni fushshe hoolinonsa. Insa galagalte kaashshu base eꞌannota hooltanno gede xullote sokkaasinenna giirate bise worino.

Yihowa Heewani doginohano qorichisheemmo yiino. Heewani coyishiishinohu addanka hamashshohoni? Deeꞌni. Yihowa hamashsho coyiꞌra dandaanno gede asse dikalaqino. Hamashshu coyiꞌranno gede assinohu busha sokkaasinchooti. Isi hatto assinohu Heewani dogateeti. Kuni bushu sokkaasinchi Sheexaane Daawuloosiiti. Sheexaanu manna dogannota hoolate, Yihowa iso hunanno.