Izira Maganu Seera Rosiisi

Lowohu Israeelete manni gobbansa Yerusaalame higinku 70 diro meddi yiino; ikkollana xaano Faarsi gobbara heedhanno Israeele no. Insa giddo mittu kakkalaancho Iziraati; isi Yihowa Seera rosiisannoho. Izira Yerusaalamete heeꞌranno manni Yihowa Seera harunsanni nookkita afi; konni daafira haꞌre insa rosiisate hedi. Faarsi Moote Arxekisisi, Izira togo yii: ‘Maganu Seerasi rosiisatto gede, hayyicha assinohe. Xa ledokki haꞌra hasiꞌranno manna adhite haꞌri.’ Izira Yerusaalame higa hasiꞌranno manna baala gamba assi. Insa seeda doogo hadhanno woyite kaaꞌlannonsa gede mitteenni Yihowa huuccidhu gedensaanni kaꞌe hadhu.

Insa shoolu agani gedensaanni Yerusaalame iillitino. Hakko heedhanno sooreeyye Izira togo yitu: ‘Israeele Yihowara hajajama gibbino, hattono kaphu maganna magansiꞌranno seenne adhitino.’ Izira ma assiyya? Isi mannu albaanni guluphe Yihowa togo yee huucci: ‘Yihowa! Ati ninkera lowo coye assoottonke; ninke kayinni cubbo loonsoommo.’ Mannu maaro einoha ikkirono, busha coye assa diagurino. Izira konne coye biddi assitanno gede cimeeyyenna daanyoota doori. Sasu agani giddo Yihowa magansiꞌrannokki manna hattee gobbanni haꞌrinsi.

Israeele Yerusaalame higgunku 12 diro ikki. Hatte yanna giddo Yerusaalamete katami huxxa galagalle huxxinoonni. Konni daafira Izira manna gudumaaleho gamba asse Maganu Seera nabbawi. Izira maxaafa fanita mannu ofollinowiinni kae uurri. Isi Yihowa galatita mannu anga kayise ‘Hamiiꞌni’ yee sumuu yiinota leellishi. Hakkiinni Izira mannaho Maganu Seera kulanna mannu seekke macciishshi. Insa cubbo loossinota ammantino daafira wiꞌlitino. Layinki barra Izira Maganu Seera lede nabbawinsa. Insa Daasu Ayyaana ayirrisa hasiissannonsata huwattu. Insa bayichonko ayyaana ayirrisate qixxaawa hanaffu.

Mannu lowo geeshsha hagiidhanninna dancha laalcho uyinonsa daafira Yihowa galaxxanni lamala barra keeshshi. Iyyaasu diri kawa, hattooha Daasu Ayyaana ayirrinse diegenninoonni. Daasu Ayyaana ayirrinsi gedensaanni mannu gamba yee togo yee huucciꞌri: ‘Yihowa! Ati borojjimmatenni fushshoottonke; halalla heeꞌneenna itisoottonke, hattono tenne dancha baatto oottonke. Ninke kayinni duucha hinge atera hajajama gimboommo. Qorowisiissannonke gede masaalaano sootto, ninke kayinni insa dimacciishshinoommo. Ati kayinni maaroottonke. Ati Abirihaamira coyiꞌrootto qaale wonshootto. Xaate ninke atera hajajammeemmo.’ Insa eꞌino qaale borreessitu gedensaanni, roorrootu, Leewaawootunna kakkalaano furma gantino.