Yesuusi Maganu Mangiste Daafira Sabbakino

Yesuusi cuuamihunni shiima yanna gedensaanni, ‘Maganu Mangiste gambissino’ yaanni sabbaka hanafi. Isi Galiilunna Yihudu qooxeessira sabbakara haꞌri yannara rosaanosino ledosi hadhino. Yesuusi ilamino katama Naazireete higi woyite xaadu minira haꞌri; hakkiicho isi Isayaasi maxaafa fane togo yee huurosi naggi asse nabbawi: ‘Dancha duduwo duduweemmo gede, Yihowa qullaawa ayyaana uyinoe.’ Hatto yaa mayyaate? Mannu Yesuusi maalale loosara hasiꞌrinoha ikkirono, isi kayinni qullaawa ayyaana adhinohu dancha duduwo duduwate ikkinota coyiꞌrino. Hakkiinni isi mannaho, ‘Tini masaalo techo woꞌmitino’ yii.

Hakkunni gedensaanni Yesuusi Galiilu Baariwa haꞌri. Hakkiicho qulxuꞌme woshshaadannohu shoolu manninni xaadino; insa gedensoonni rosaanosi ikkitino. Isi togo yiinsa: ‘Ane hoode amme! Ani manna woshshaaddinannire asseemmoꞌnena.’ Insa suꞌmi Pheexiroosi, Indiriyaasi, Yaiqoobinna Yohaannisiiti. Insa hakkawoyintenni qulxuꞌme woshshaada agurte Yesuusi hoode hadhino. Insa Galiilaho Maganu Mangiste daafira sabbakkino. Xaadu mine, dikkotenna dooggate sabbakkino. Martuwa baalawa lowo manni harunsinonsa. Yesuusi duduwi gobba baala woꞌmi; wole agurina Sooriyaho heeꞌranno manni nafa isi duduwo macciishshino.

Yannate gedensaanni, Yesuusi mite rosaanosira xiwantinore hursitannonna busha ayyaana fushshitanno wolqa uyinonsa. Wole rosaanosi isi ledo katamunni katama, hattono qachunni qacha hadhe sabbakkino. Megidelitte Maariyaami, Yohaana, Soosinnanna wolu ammanamino meenti Yesuusanna rosaanosi towaatino.

Yesuusi rosaanosi qajeelsi gedensaanni, sabbakkara soyino. Insa Galiilaho sabbakku yannara, wolu lowo mannino rosaano ikke cuuamino. Lowo manni Yesuusi rosaano ikka hasiꞌrino; konni daafira Yesuusi insa midote iillino gidi gede ikkitinota coyiꞌrino. Togo yiino: ‘Gide gamba assannoha lowo manna soyanno gede Yihowa huuccidhe.’ Yannate gedensaanni, Yesuusi rosaanosi giddonni 70 doore, lame lame asse Yihudu gobba baala soyino. Insa baalunku mannira Maganu Mangiste daafira rosiissino. Rosaano Yesuusiwa higgu woyite, assitinore isira kulate quqquxantino. Daawuloosi insa sabbakkannota hoola didandiino.

Yesuusi iimira haꞌri gedensaannino rosaanosi sabbaka agurtannokki gede kulinonsa. Togo yiinonsa: ‘Uulla woꞌmate dancha duduwo dudubbe. Mannaho Maganu Qaale rosiisse, hattono cuuꞌe.’