Heeshsho Hanaffinohu Hiittoonniiti?

“[Maganu] heeshshote buichooti.” (Faarso 36:9) Ati tenne ammanatto? Mitu manni heeshsho kalaqinonku dino yaanno. Hatto ikkiro, heeꞌra hananfoommohu mulla hedeweelchooti yaate. Kayinni heeshsho kalaqinohu Magano Yihowa ikkiro, isi kalaqinonkehu dimullaati.a Hanni Qullaawu Maxaafi heeshshote kaimi daafira mayyaannoronna kulannori garaho yineemmohu mayiraatiro laꞌno.

1. Gordonna baatto kalaqinohu ayeti?

Qullaawu Maxaafi, “Maganu umo asse gordonna baatto kalaqino” yaanno. (Kalaqama 1:1) Rooru sayinsete egennaammi, kalqete alamera hanafo noota ammantanno. Maganu kalqete alame kalaqinohu hiittoonniiti? Isi kalqete alamera noore baalankare lawishshaho, gaalaakse, beeddahenna pilaaneetta kalaqinohu ‘qullaawu ayyaanisinniiti.’—Kalaqama 1:2.

2. Maganu baatto kalaqinohu mayiraati?

Yihowa baatto “[kalaqinohu] fano heedhara ikkikkinni, mannu heeꞌranno gedeeti.” (Isayaasi 45:18) Isi baatto kalaqinohu mannu oosora injiitannota hegere qae ikkitara yeeti. (Isayaasi 40:28; 42:5 nabbawi.) Sayinse baattonke wole pilaaneete baalantenni baxxitinota ikkitinota buuxxino. Baatto agurranna mannu oosora heeꞌrate maltinota wole pilaaneete dianfoonni.

3. Mannu ooso saadatewiinni baxxitannohu mayinniiti?

Yihowa baatto kalaqihu gedensaanni, ise aana heeshshote kalaqama kalaqino. Umo, addi addi muꞌronna saada kalaqino. Hakkiinni, “Maganu manna umisi daninni [kalaqino].” (Kalaqama 1:27 nabbawi.) Mannu ooso baxxitinore ikkitinohu mayinniiti? Maganu daninni kalaqammoommore ikkinoommo daafira, akattasi lawishshaho baxillenna taashsho leellisha dandiineemmo. Qoleno Maganu addi addi qaale rosa, biifinore laꞌne dhagge assiꞌranna muuziiqunni hagiidha dandiineemmo gede asse kalaqinonke. Hakkiinni saeno, ninke Kalaqaanchonke magansiꞌra dandiineemmo; saada kayinni horo hatto diassitanno.

LEDDE XIINXALLI

Heeshsho kalaqinohu nootanna Qullaawu Maxaafi kalaqamu daafira kulannori halaale ikkinota leellishshanno taje huwati. Mannunnihu danchu akati Maganu daafira maa rosiisannonkero rosi.

4. Heeshsho noore kalaqinohu no

Mannu ooso kalaqama laꞌe loossino coyira mannu ayirrisannonsa. Ikkina insa laꞌu kalaqami daafira ayirrinye adha hasiissannosihu ayetiyya? VIIDIYO laꞌe; hakkiinni aante noo xaꞌmo hasaabbe.

VIIDIYO: Maganu Noota Ammana (2:43)

• Mannu kalaqama lae maa maa seekkino?

Baalanka mine safinohunna mininohu no. Ikkina kalaqamu aana laꞌneemmo coyibba xintinohunna seekkinohu ayeti? Ibiraawoota 3:4 nabbabbe; hakkiinni aante noo xaꞌmuwa hasaabbe:

• Kalaqamu giddo atera roore dhagge ikkannoheri maati?

• Kalqe woꞌmanna giddose noore baalankare kalaqinohu no yaa gara dilabbannohe? Mayira?

Ati tenne afootto?

Tenne hajo daafira kultanno borronna viidiyo jw.org aana “Kalaqinohu No?” yaannohu aante aantete fulanno birxichi hundanna “Heeshshote Kaimi Daafira Noonsa Lao” yaannohu hunda afiꞌra dandaatto.

“Baalunku mini minannoha afiꞌrino. Baalankare loosinohu kayinni Maganoho”

5. Qullaawu Maxaafi kalaqamu daafira kulannori garaho

VIIDIYO: Kalqe Kalaqinohu No?—Murre Haaꞌnoonnita (3:51)

• Qullaawu Maxaafi baattonna aanase noori baalu 24 saate afiꞌrinohu lewu barri giddo kalaqamino yaannoni?

• Qullaawu Maxaafi kalaqamu daafira kulanno xagge ammansiissannota labbannohe? Mayira?

Kalaqama 1:1 nabbabbe; hakkiinni aante noo xaꞌmo hasaabbe:

• Sayinsete egennaammi kalqete alamera hanafo no yitanno. Insa huwattinori xa Qullaawu Maxaafi giddo nabbambummo hedo ledo sumuu yaannohu hiittoonniiti?

Mitu manni, ‘Maganu heeshshote kalaqama kalaqinohu suutu soorronniitikka?’ yaanno. Kalaqama 1:21, 25, 27 nabbabbe; hakkiinni aante noo xaꞌmuwa hasaabbe:

• Qullaawu Maxaafi Maganu qulxuꞌme, qansidhanno saadanna manna kalaqinohu suutu soorronniiti yaannonso, heeshshote kalaqama “danu danunkunni” woy gari garinsanni kalaqino yaanno?

6. Mannu baxxinoho Maganu kalaqooti

Mannano saadano kalaqinohu Yihowaati. Ikkollana, mannu saadatewiinni baxxinoho. Kalaqama 1:26 nabbabbe; hakkiinni aante noo xaꞌmo hasaabbe:

• Maganu daninni kalaqammoommo daafira, baxillenna shooshanqe leellisha dandaanke Maganuno hiittooha ikkinota leellishshanno?

XAPHISHSHA

Kalqenna heeshshote kalaqama baalanka kalaqinohu Yihowaati.

Kageeshsha Rosoottore

• Qullaawu Maxaafi gordonna baatto ayi kalaqino yaanno?

• Maganu addi addi kalaqami heeꞌranno gede assinohu suutu soorronniitinso, baalankare isi kalaqino?

• Mannu ooso baxxitinore ikkitinohu mayinniiti?

EGENNO LEXXI

Kalaqaanchu noota leellishannohu mitu kalaqami daafira rosi.

“Kalaqamu Maa Rosiisannonke?” (Baqqi Yiiyye!, Wocawaaro 2006)

Mittu anni Qullaawu Maxaafi kalaqamu daafira kulannore qaaqqisira rosiisanno gara wodanchi.

Yihowa ‘Baalankare Kalaqino’ (2:37)

Suutu soorronna Qullaawu Maxaafi sumuu yaannoronna teꞌee rosi.

“Maganu Addi Addiha Heeshshote Kalaqama Kalaqinohu Suutu Soorronniiti?” (Webisayitenkera fultino borro)

Biꞌree miqqanna sayinsetenni buunxoonni coyi Kalaqaanchu noota buuxisannoronna heeshsho umisenni dagginota leellishannoro xiinxalli.

Heeshshote Kaima—Dawaronsa Afa Hasiissannota Onte Xaꞌmuwa (biroshere)