Mannu Huuccatto Assiꞌrannohu Mayiraati?

Ati ganyite huuccatto assiꞌratto? Lowo manni, wole agurina Maganu dino yee ammananno manni nafa huuccatto duucha hige assiꞌranno. Ikkina mannu huuccatto assiꞌrannohu isi mayiraati? Faransayete gobbara assinoonni xiinxallo garinni, hatte gobba qansooti giddo darate ikkanno manni huucciꞌrannohu woy sae sae hiincannohu “mulla dancha simmeete macciishshantansara yeeti.” Wolu Awuroppu manni assannonte gede, insa huuccatto assidhannohu Magano maganinsiꞌrate hedde diꞌꞌikkino. Insa hasidhannoti “huuccatto assiꞌneenna macciishshantannote dancha simmeete” callate. Wole widoonni kayinni, mite ammanaano Magano huuccidhannohu qarrantanno wote huuccattonsara rahe dawaro qolansara hasidheeti.—Isayyaasi 26:16.

Atina, huuccatto assiꞌrattohu mayiraati? Mulla dancha simmeete macciishshantannohe gede callaati? Magano ammanoottoha ikkiro, huuccatto assiꞌrakki kaaꞌlitanni nooheha lawannohenso, mulla huuccidhanni daafurattoha lawannohe? Qullaawu Maxaafi, huuccatto dancha simmeete macciishshantannonke gede assitannota calla ikkitukkinni, Maganunniwa shiqate kaaꞌlitannonketa kulannonke.