AANIIDI QOOLIHA COYI UMO
Huuccatto Assiꞌra Hasiissannohe?
Miteekkite, ‘Maganu baalankare, hedoꞌyanna hasiisannoere nafa afinoha ikkina, mayira huucciꞌreemmoyya?’ yite hedattoha ikkara dandaanno. Hatto yite hedakki minshannire diafidhino. Yesuusi, Maganu “kuꞌlitinikki nafa hasiisannoꞌneri maatiro afino” yiino. (Maatewoosi 6:8) Biꞌre Nugusu Daawitino tenne huwatinohura togo yee borreessino: “Afiiꞌyanni mittu qaali nafa fulikki, Yihowa, yaammora hedoommore ati balaxxe afootto.” (Faarso 139:4) Hatto ikkina, Magano huucciꞌra hasiissannonkehu mayiraatiyya? Tenne xaꞌmora dawaro qolate, hanni Qullaawu Maxaafi huuccattote daafira mayyaannoro laꞌno.a
“Maganunniwa shiqqe, isino kiꞌnewa shiqannona.”—Yaaqoobi 4:8
HUUCCATTO MAGANUNNIWA SHIQATE KAAꞌLITANNONKE
Qullaawu Maxaafi Maganu Yihowab baalankare afinota kulannonkeha ikkirono, isi soqqamaanosiha mitto mittonka coye qonqolche afa hasiꞌranno diyaanno. (Faarso 139:6; Roomu Sokka 11:33) Maganunniti gawalo afidhinokkiti qaagate dandoo kompiyuterete gede diꞌꞌikkitino; kompiyutere mannunnire kultanno taje amada dandiitannoha ikkirono hakko manni daafira heda didandiitanno. Maganu ninke isiwa shinqammora hasiꞌranno daafira giddonke hedo afa lowo geeshsha hasiꞌranno. (Faarso 139:23, 24; Yaaqoobi 4:8) Yesuusi Annisi hasiisannonkere afinoha ikkirono, harunsaanosi huuccidhanno gede rosiisinohu iseraati. (Maatewoosi 6:6-8) Kalaqaanchinkera giddonketa hasaambummo kiiro albinni roore isiwa shinqeemmo.
Mito wote mayi daafira huucciꞌneemmoro xawe leella hoogankera dandaanno. Togoo wote, Maganu coyiꞌne kuꞌla hoongummoro nafa hendoommore afanno; hattono guuta egennosi horoonsiꞌre heeꞌnoommo gara lae hasiisannonkere wonshannonke. (Roomu Sokka 8:26, 27; Efesooni 3:20) Maganu huuccattonke macciishshe kaaꞌlinonketa huwanteemmo wote, kaaꞌlinonkehu ninke hendoommokki garinni ikkiro nafa, isiwa albinni roore shinqeemmo.
MAGANU BAALANTA HUUCCATTO MACCIISHSHANNO?
Qullaawu Maxaafi Duuchanka Dandaanno Magani ammanantino soqqamaanosi huuccatto macciishshannota kulannonke; mite huuccatto macciishshannokkihu mayiraatirono kulannonke. Lawishshaho, biꞌre Isiraeelete finqille batidhino yannara Maganu masaalaanchu Isayyaasi widoonni togo yiinonsa: “Duucha higgine huuccidhinirono dimacciishsheemmoꞌne; angaꞌne mundeetenni battaabbino.” (Isayyaasi 1:15) Ee, Maganu higge mulluri gede assite laꞌannorinna gariweelo hedo wodaninsara heedheenna huuccidhannori, Maganu huuccattonke macciishshanno yite agadha didandiitanno.—Lawishsha 28:9; Yaaqoobi 4:3.
Qullaawu Maxaafi togono yaanno: “Aye coyeno fajjosi ledo sumuu yaanno garinni huucciꞌnummoro isi macciishshannonke.” (1 Yohaannisi 5:14) Hatto yaa kayinni Maganu soqqamaanosi huuccidhannore baala bayichonko aannonsa yaateni? Hatto ikka hoogara dandaanno. Hanni hawaariya Phaawuloosi xagge laꞌno; isi “maalasi qasanno uticho” hoolasira Magano sase hige huucciꞌrino. (2 Qorontoosi 12:7, 8) Miteekke Phaawuloosira bayicho assiꞌrinohu illete xibbi noosiha ikkara dandaanno. Kuni xibbi iso kawoote lowo geeshsha waadinosi! Phaawuloosira xibba hursate wolqa uyinoonnisi, wole agurina isi reyino manna nafa kayisino; ikkirono umisi xibba dandee heeꞌra hasiissinosi. (Hawaariyaatete Looso 19:11, 12; 20:9, 10) Phaawuloosi Maganu huuccattosira dawaro qolino gari isi hedino gede ikka hoogirono, qolinosi dawaro maahoyye yee adhino.—2 Qorontoosi 12:9, 10.
“Aye coyeno fajjosi ledo sumuu yaanno garinni huucciꞌnummoro isi macciishshannonketa dihuluullammeemmo.” —1 Yohaannisi 5:14
Qullaawu Maxaafi giddo kulloonnihu mitu manni huuccattonsara maalaletenni dawaro afiꞌrinoti dikaandannite. (2 Negesti 20:1-7) Ikkollana hakkawaro nafa togoori duucha wote ikkannore diꞌꞌikkino. Mitu ammanino manni Maganu huuccattonsara dawaro qolinokkiha lawinonsa daafira cannaqamino woti no. Nugusu Daawiti togo yiino: “Yihowa, habbe agurattoehu mamooti geeshshaati? Hegere geeshshaati?” (Faarso 13:1) Ikkollana ammanamino manchi Daawiti Yihowa duucha hige golo ikkinosita huwatiti, Magano addaxxannota galagale coyiꞌrino. Isi lede togo yiino: “Ani kayinni baꞌꞌannokki baxillekki addaxxeemmo.” (Faarso 13:5) Daawitinte gede yannanketi Maganu soqqamaano, Isi huuccattonsara dawaro qolinota huwatta geeshsha agurtukkinni huucciꞌra hasiissannonsa woti heeꞌranno.—Roomu Sokka 12:12.
MAGANU HUUCCATTONKERA DAWARO QOLANNO GARA
Maganu addinta hasiisannonke coyira huucciꞌneemmo huuccatto macciishshanno.
Baxillaanchu anni ayewoteno oososi huuccidhanno coye insa hasidhanno wote aannonsa yaa diꞌꞌikkino; hatto assannohu baqete korkaati heeꞌreennasiiti. Hatteente gede, Maganu huuccattonkera dawaro ninke hasiꞌneemmo garinni woy ninke hasiꞌneemmo yannara qola hoogara dandaanno. Ikkollana shaqqadu anni assannonte gede Kalaqaanchinke addinta hasiisinonke coye, gara ikkitino yannaranna hasiisanno garinni aannonketa dihuluullammeemmo.—Luqaasi 11:11-13.
Maganu huuccattonkera dawaro qolannohu Qullaawu Maxaafi widoonni ikkara dandaanno
Maganu huucciꞌnoommo coye ninke hendoommokki garinni qolankera dandaanno.
Qarrunni furgaꞌꞌate huucciꞌnanni heeꞌneennanni qarrinke hoꞌlalla hoogi? Maalaletenni dawaro afiꞌra hoongoommo daafira, Yihowa dawaro horonta diqolinoe yee heda hasiissannonke? Hatteentenni, Maganu hendoommokki garinni kaaꞌlinonkeronna teꞌee afate seekkine heda hasiissannonke. Lawishshaho, mittu muli jaalinke kaaꞌlo hasiisse noonke yannara dandaamisi deerrinni kaaꞌlinonkeha ikkara dandaanno. (Lawishsha 17:17) Kuni muli jaalinke kaaꞌlannonke gede kakkayisinohu Yihowa ikkara dandaanno. Qoleno, Maganu kaaꞌlankera huucciꞌnoommo huuccattora dawaro Qullaawu Maxaafi widoonni qolankera dandaanno. Qullaawu Maxaafi giddonni, iillinonke qarra dandee saꞌꞌate kaaꞌlitannonke wodancha afiꞌnammora dandiineemmo.—2 Ximootewosi 3:16, 17.
Maganu, kaaꞌlo hasiisse noonke yannara muli jaalinke kaaꞌlannonke gede assara dandaanno
Maganu duucha wote dagasira iillinonsa qarra hoola agure, qarra dandiite saꞌꞌate kaaꞌlitanno jawaante aannonsa. (2 Qorontoosi 4:7) Lawishshaho, Yesuusi iillannosi qarri Maganu suꞌmira mishsho abbanno yee waajje qarra hoolasira huucciꞌri yannara Beettosi jawaachishanno gede sokkaancho soyino. (Luqaasi 22:42, 43) Hattonni, Maganu muli jaalinke shesho roorenka hasiisse noonke yannara jawaachishannonkere coyiꞌranno gede assara dandaanno. (Lawishsha 12:25) Togoo dawaro xabbe leella hooggara dandiitanno daafira, Maganu huuccattonkera dawaro qolannohu hiittoonniitiro afate baqqi yine agadha hasiissannonke.
Maganu mite huuccattora dawaro qolannohu isi hedino yannaraati.
Qullaawu Maxaafi, Duuchanka Dandaanno Magani shooshaqootaho “hasiissanno yannara” danchummasi leellishannota kulanno. (1 Pheexiroosi 5:6) Konni daafira xiwinonke coyira huucciꞌnoommo huuccattora dawaro keeshshitinoha lawinkero, Yihowa dawara hooginohu ninkera assaawannokkihuraati yine heda dihasiissannonke. Shaqqadu Kalaqaanchinke egennosi bayira ikkitino daafira eeggifanteemmo coye lae ninkera woyyannore afino garinni dawaro qolannonketa dihuluullammeemmo.
“Yannasira gotti gotti assannoꞌne gede bayira Maganu anga woroonni umoꞌne heeshshi asse.” —1 Pheexiroosi 5:6
Lawishshaho, shiimu beettikki biskilliite hirie yiihero, mittoreno assaawittokki hakkawontenni kaꞌe hirattosi? Isi biskilliite kadate diꞌꞌiillino yite hedattoha ikkiro, keeshshite wole wote hirattosira wossanattoha ikkanno. Yannate gedensaanni kayinni, huucciꞌrinohere afiꞌrasi roore xaqqantannosi yite hedatto yannara hirattosira dandaatto. Hatteente gede, huucciꞌralla agura hoongummoro Maganu gara ikkitinota ‘wodaninke halcho’ hasiissanno yannara wonshannonke.—Faarso 37:4.
YIHOWA HUUCCATTOKKI MACCIISHSHANNOTA HULUULLANTOOTI
Qullaawu Maxaafi addu Kiristaani huuccatto afidhino wolqa ajishe laꞌꞌannokki gede amaalanno. Mitu manni miteekke, ‘Tenne assa coyiꞌrate geeshsha shota diꞌꞌikkitino’ yaara dandaanno. Addaho, buutote qarri woy miico iillitanni noonkeha ikkiro, Maganu dawaro qola geeshsha agadha kabbaade ikkitankera dandiitanno. Ikkirono, Yesuusi agurrummokkinni huucciꞌneemmo gede rosiisinota qaaga hasiissannonke.
Yesuusi mitte buxicho gunnitte bushu daanyiwa yoo yaannose gede ganyite hadhinota kulanno lawishsha coyiꞌrino. (Luqaasi 18:1-3) Daanyu umi qara huuccidhinore wonsha hasiꞌrinokkiha ikkirono gedensaanni hige, “Ise barru baala dagganni wotto wortannoekki gede taashsho afidhanno gede asseemmo” yiino. (Luqaasi 18:4, 5) Tenne xiqise umo borreessini afiinni kulloonni garinni, daanyu gunnitte kaaꞌlinohu “suꞌmisi baꞌꞌannokki” gedeeti.c Bushu daanyi nafa suꞌmisira yee buxicho mancho kaaꞌlannoha ikkiro, ninkera assaawanno Magani “hashshanna barra isiwa higge raartannori” hakkiinni roore taashsho afidhanno gede diassanno? Yesuusi yiinonte gede Maganu “taashsho mulenni afidhanno gede assanno.”—Luqaasi 18:6-8.
“Agurtinikki huuccidhe, uyinanniꞌnena.”—Luqaasi 11:9
Maganu kaaꞌlankera duucha hinge huucciꞌra hasiissannonke wote nafa, hexxo mudhine huucciꞌra agura dihasiissannonke. Agurrummokkinni huucciꞌranke Maganu kaaꞌlankera addinta hasiꞌneemmota leellishshanno. Qoleno, Maganu huuccattonkera dawaro qolanno gara huwanteemmo; tini qolte isiwa albinni roore shinqeemmo gede assitannonke. Ee, gara ikkino coye ammanatenni huucciꞌra agurreemmokkiha ikkiro, Yihowa huuccattonke macciishshe qolannota dihuluullammeemmo.—Luqaasi 11:9.
a Maganu huuccattonke macciishshanno gede, isi hasiꞌrannore wonsha hasiissannonke. Hatto assinummoro, konni birxichira xawinsoonninte gede huuccatto afidhino wolqa uminke heeshshonni laꞌneemmo. Ledde afate, Yihowa Farciꞌraasine qixxeessitinoha Qullaawu Maxaafi Addinta Mayyee Rosiisanno? yaanno maxaafa, fooliishsho 17 lai; woy www.pr418.com/sid daaꞌꞌati.
b Qullaawu Maxaafi Maganu suꞌmi Yihowa ikkinota kulanno.
c Hundi yannara Maganu Isiraeelete daanyooti gunnootu hajo, hattono anniweelonna amiweelo ooso hajo seekkite laꞌara hasiꞌrannota kulinonsa.—Marro 1:16, 17; 24:17; Faarso 68:5.