Qullaawu Maxaafi Xaꞌmonna Dawaro
Yesuusi reyino manna addinta kayisino?
Yesuusi reye shoole barra keeshshinoha Alaazaari reyotenni kayisino
Qullaawu Maxaafi Yesuusi reyino manna kayisinota kulanno. Tenne kultanno xagge kalanqe coyiꞌnoonnita diꞌꞌikkitino; Yesuusi reyitinore kayisino bayichono yannano kulloonni. Lawishshaho 31 M.D., arri woggara lowo manni Yesuusi ledo Qifrinahoominni kae Nayini haꞌranni no. Insa katama iillituti wolu lowo manni katamunni fulanna xaaddu. Hakkawote Yesuusi reyinoha aja beetto kayisinota kultanno xagge ammana dandaatto; korkaatuno, tenne xagge kulloonnihu Qullaawu Maxaafi yaano Maganu Qaali giddooti; qoleno kayisinota illensanni laino manni no.—Luqaasi 7:11-15 nabbawi.
Yesuusi reye shoole barra keeshshinoha jaalasi Alaazaarino kayisino. Yesuusi tenne maalale loosi woteno lainohu lowo manni noo daafira tenne xaggeno ammana dandiineemmo.—Yohaannisi 11:39-45 nabbawi.
Yesuusi reyino manna kayisinohu mayiraati?
Yesuusi reyino manna kayisinohu manna mararannoha ikkino daafiraati. Qoleno tenne assinohu, heeshshote Kalaqaancho ikkinohu Annisi reyote aana silxaane uyinosita leellishateeti.—Yohaannisi 5:21, 28, 29 nabbawi.
Yesuusi reyino manna kayisasi, isi albillitte asseemmo yiinore ammanneemmo gede assitannonke. Isi albillitte kiirre tunqannikki manna reyotenni kayisanno; kuri giddo gamu halaalaancho Magano affukkinni reyitino cubbaatammaati. Insara Magano Yihowa affannonna iso baxxanno faro uyinanninsa.—Hawaariyaatete Looso 24:15 nabbawi.