Sheexaanu Ledo Olantine Qeela Dandiitinanni!

1. (a) Roorenkanni yannankera Sheexaanu ledo gaarama hasiissinohu mayiraati? (b) Sheexaanu ledo olamme qeela dandiineemmota mayinni anfeemmo?

SHEEXAANU uullate aana gatte noo buuramaasinenna “wolu geꞌreewi” ledo gaaramanni no. (Yoh. 10:16) Daawuloosi dandaamisi deerrinni gattinosite shiima yanna giddo batinye Yihowa soqqamaano egammate mixiꞌre kaino. (Aju. 12:9; Ajuuja 12:12 nabbawi.a) Ikkina Sheexaanu ledo olamme qeela dandiineemmo? Ee, dandiineemmo! Qullaawu Maxaafi togo yaanno: “Daawuloosi kayinni gibbe, kiꞌnewiinni xooqannona.”—Yaq. 4:7.

2, 3. (a) Sheexaanu dino yee ammana isi hedo woꞌmitanno gede assitannohu hiittoonniiti? (b) Sheexaanu nooha ikkinota leellishannori maati?

² Batinyu mannira Sheexaanu no yaa umise haariimo labbannonsa. Kuni manni Sheexaanenna agaaninte qalote borro giddo, waajjishshanno filmuwanna viidiyote godoꞌle giddo noori qalote misilaano gede asse calla kiiranno. Kuri mannooti busha ayyaanna no yee ammana gowwimmate yite heddanno. Ikkina mannu Sheexaanenna agaaninte dino yee ammaniro, tini isira dhibbannosi? Didhibbannosi! Isinni Sheexaanu noota huluullamanno manni surre ballisa isira shotate. (2 Qor. 4:4) Sheexaanu manna soꞌrisiisanno doogga giddo mitte ayyaanna dino yitanno hedo tareessate.

³ Yihowa soqqamaasine ikkinoommo daafira, ninke sodhinori wido diꞌꞌikkinoommo. Daawuloosi nooha ikkinota anfoommo; korkaatuno hamashshu widoonni Heewani coyishiishinohu isooti. (Kal. 3:1-5) Sheexaanu Iyyoobi daafira coyiꞌri wote Yihowa xonino. (Iyo. 1:9-12) Yesuusa fatanate woꞌnaalihuno Sheexaaneho. (Mat. 4:1-10) Qoleno, 1914⁠nni Maganu Mangiste xintantu gedensaanni, buuramaasinete giddo uullate aana gattinore “qasa” jammarihu Sheexaaneho. (Aju. 12:17) Sheexaanu 144,000 giddo uullate aana gatino Kiristaaninna wolu geꞌreewi ammana huna hasiꞌranno daafira hakku oli xaano noolla. Konne ola qeelate Sheexaane feexiꞌne giwanna ammanatenni kaajjine uurra hasiissannonke. Konni birxichira, tenne assa dandiineemmota sase doogga laꞌneemmo.

NAAXXATEWIINNI XEERTIDHE

4. Sheexaanu naaxxaleessa ikkinota leellishinohu hiittoonniiti?

⁴ Sheexaanu geeshsha naaxxannohu dino yaa dandiinanni. Kuni bushu sokkaanchi Yihowa aliidimma seyatasinna wolootu Yihowa agurte iso magansidhanno gede assate woꞌnaalasi mageeshshi geeshsha naaxxaleessa ikkinoro leellishshannote. Konni daafira, Sheexaane gimbeemmoti mitte doogo naaxxatewiinni xeertiꞌne shooshaqoota ikkate.—1 Pheexiroosi 5:5⁠b nabbawi.b

5, 6. (a) Fenjeejja ayewoteno soꞌrote? Xawisi. (b) Naaxxa busha ikkitinota leellishshannoti Qullaawu Maxaafi lawishshuwa hiikkuriiti?

⁵ Ninke uminke woy ninkewa gamba yaanno manni danchare assanno wote woy danchare afiꞌranno wote fenjeejjanke woy hagiidhanke gimbannire diafidhino. Hawaariya Phaawuloosi Teselonqe Kiristaanira togo yee borreessino: “Iillanni nooꞌne dartenna qarra dandiitine, jawaanteꞌnenna ammanaꞌne leellishshinoonni daafira ninke uminke Maganu songuwa mereero kiꞌnenni kainohunni fenjeejjine coyiꞌneemmo.” (2 Tes. 1:4) Konni daafira, wolootu danchare assitinohura hagiidha woy uminke assinoommorinni mito geeshsha fenjeejja busha ikka hooggara dandiitanno. Ilammoommo maate, budinke woy lophinoommo qooxeessi saalfanteemmo coye diꞌꞌikkino.—Looso 21:39.

⁶ Ikkollana, naaxxa wolu manninna Yihowa ledo noonke aante huntara dandiitanno. Togoo naaxxa hasiissannonke amaale uyinanninke wote koffi yineemmo gedenna adha gimbeemmo gede assitankera dandiitanno. (Far. 141:5) Naaxxa “meessaneeto quwa saꞌne kaffi kaffi assate” woy “ani wole manna rooreemmo yee hedanno manni leellishannoho booꞌnate akataati.” Yihowa togoo naaxxa noonsare tiyyire giwanno. (Hiz. 33:28; Amo. 6:8) Ikkollana, Sheexaanu naaxxaleessa ikkino daafira mannu naaxxannonna booꞌnanno wote hagiidhanno. Lawishshaho Naamiruudi, Feriooni, hattono Abeseloomi booꞌni yannara Sheexaaneho kawoote lowo geeshsha tashshi yiinosi! (Kal. 10:8, 9; Wol. 5:1, 2; 2 Sam. 15:4-6) Qaaeelino Maganu ledo noosi fiixooma huꞌnanno gede assitinoti naaxxate. Isi lowo geeshsha naaxxino daafira Maganu umisi amaalinosi amaale diadhino. Mokkookke Yihowa seejjo lashshi asse agure cubbo loosino.—Kal. 4:6-8.

7, 8. (a) Sircho babbadate yaa mayyaate? Kuni akati naaxxate ledo mayi xaado afiꞌrino? (b) Naaxxa songote salaame daaffara dandiitanno gara xawisi.

⁷ Yannankera mannu naaxxannota leellishannoti duucha gawajjitanno doogga no. Naaxxa sircho babbadate ledo xaado afidhanno woti no. Mittu qaallate tiro kulanno maxaafi sircho babbadate yaa, “manna beebba giwa woy wolu sirchi wido ikkino manna giwa” hattono “mitte gaꞌre wolete nookki akatanna dandoo afidhino woy kalaqamunni wole gaꞌre roortanno yee ammana” ikkitinota xawisino. Sircho babbada gaaronna ola kayisate hattono manna buujje gudate geeshsha massitino woti no.

⁸ Togoo akatta Kiristaanu songo mereero heeꞌra hasiissannokkiti egennantinote. Ikkollana, naaxxa roduuwu mereero gibbo kayissaranna hatti gibbo halaꞌlitanno gede assitara dandiitanno. Umi xibbi diro mitu roduuwi mereero togoori kalaqamino; Yaaqoobi togo yee kaajjado xaꞌmo xaꞌminonsahu iseraati: “Mereeroꞌne noo olinna gibbo mamiinni dagginote?” (Yaq. 4:1) Ee, woloota giwanna ane ikkannohu dino yitanno hedo giddonke heedhuro, woloota xissiisannore coyiꞌnammoranna assinammora dandiineemmo. (Law. 12:18) Addaho, naaxxa songote salaame daaffara dandiitanno.

9. Qullaawu Maxaafi sircho babbadanna wolu gari naaxxawiinni xeertiꞌneemmo gede kaaꞌlannonkehu hiittoonniiti? (Umi misile lai.)

⁹ Mannaho aliidire ikkinoommohu gede ikke macciishshamannonkeha ikkiro, “Yihowa naaxxaleessu wodani noonsare baalanka effire [giwannota]” qaaga hasiissannonke. (Law. 16:5) Qoleno wolu sirchi, daga woy budi manna ma garinni laꞌneemmoro ninkeneeto layiꞌra hasiissannonke. Sirchinkenni woy dagankenni naaxxineemmoha ikkiro, Maganu “mannu gaꞌre baalanta mittu manchiwiinni kalaqinota” deꞌnoommo yaate. (Looso 17:26) Mannu ooso baalanti mittu annire yaano Addaamire ikkitino daafira mannu sirchi mitto callaho yaate. Konni daafira, mittu sirchi kalaqamunni wolu sirchinni rooranno woy ajanno yee heda gowwimmate. Hattoo hedo heedhunkero, Sheexaanu Kiristaanu baxillenkenna mittimmanke booreessara dandaanno. (Yoh. 13:35) Sheexaanu ledo olamme qeelate naaxxatewiinni xeertiꞌra hasiissannonke.—Law. 16:18.

MAALAAMITTETE COYENNA ALAME BAXXINOONTE

10, 11. (a) Alame baxa shota ikkitara dandiitannohu mayiraati? (b) Deemaasi alame baxannota leellishinohu hiittoonniiti?

¹⁰ “Tenne alame gashshaanchi” Sheexaaneho; qoleno alame gudisidhe angasi no. (Yoh. 12:31; 1 Yoh. 5:19) Hakko daafira, tini alame tareessitannohu batinyu coyi Qullaawu Maxaafi seeri ledo sumuu diyaannoho. Hige alame shiqishshanno coyi baalunku bushaho yaa diꞌꞌikkino. Ikkollana, Sheexaanu alamesi horoonsiꞌre hasattonke widoonni ninke cubbu widira qole xixxiiwankera dandaannota heda hasiissannonke. Woy alame banxe Yihowa magansiꞌra lashshi assineemmo gede assankera dandaanno.—1 Yohaannisi 2:15, 16 nabbawi.c

¹¹ Umi xibbi diro heeꞌrinohu mitu Kiristaani alame baxino. Lawishshaho, Phaawuloosi togo yee borreessino: “Deemaasi tenne alame baxino daafira ane agure haꞌrino.” (2 Xim. 4:10) Deemaasi Phaawuloosi agure haꞌrinohu alamete aana maa baxeetiro Qullaawu Maxaafi bade dikulanno. Isi Yihowara soqqamantenni roorse maalaamittete coye baxa jammarinoha ikkara dandaanno. Hatto ikkiro, Deemaasi kaajja ayyaanaamittete qoosso afiꞌranno faro huꞌnino. Isi tenne qoosso roorannore afiꞌrannoni? Deemaasi Phaawuloosi miila ikke Yihowawiinni afiꞌranno atoote roorannore alametewiinni horonta diafiꞌranno!—Law. 10:22.

12. “Jironniti dogate wolqa” kartankera dandiitannohu hiittee doogganniiti?

¹² Ninkerano hattoori tuncu yaankera dandaanno. Kiristaana ikkinoommo daafira, uminkeranna maatenkera maalaamittete hasiisannore wonshate hasiꞌranke nooreentilla. (1 Xim. 5:8) Yihowa Addaamiranna Heewanira biifado gannate kalaqe aasi isi dancha heeshsho heeꞌnammora hasiꞌrannota leellishshannote. (Kal. 2:9) Ikkollana, Sheexaanu “jironnita dogate wolqa” horoonsiꞌre hasattonke umisi horora horoonsiꞌrara dandaanno. (Mat. 13:22) Batinyu manni, woxu hagiirre aanno woy jiro nookkiha seekkino heeshsho heeꞌne dianfanni yee hedanno. Togoo hedo heedhunkero, wolu baalunku coyinni roore muxxe jironke yaano Yihowa ledo noonke jaalooma huꞌninammora dandiineemmo. Yesuusi harunsaanosi togo yee qorowisiisino: “Lamu mootichira borojjicho ikka dandaannohu dino; mitto giwe layinkiha baxanno; woy mitto seekke cuꞌmire, koꞌee mishanno. Maganohono Jiroteno mitteenni borojjoota ikka didandiitinanni.” (Mat. 6:24) Maalaamittete coyira borojjoota ikkinummoro, Yihowara soqqama agurroommo yaate; Sheexaanu hasatto qolte tenneeti! Woxu woy woxunni hirranni coyibba Yihowa ledo noonke jaalooma roortankera horonta wodhinoonke. Sheexaanu ledo olamme qeelate, maalaamittete coyira quwa saꞌinokki hedo hasiissannonke.—1 Xim. 6:6-8; 1 Ximootewosi 6:9, 10 nabbawi.d

FOORRETEWIINNI XEERTIDHE

13. Tini alame adhanna adhama lainohunni gara ikkitinokki lao gobba tuqqanno gede assitinohu hiittoonniiti?

¹³ Sheexaanu alame horoonsidhannoti wole woshshaado foorrete. Yannankera batinyu manni galtete ammanama woy adhanna adhama umise yanna saꞌinotanna kuttubbannota ikkitinohu gede asse hedanno. Lawishshaho, filmete loosira maccata ikkitinoti mitte mancho togo yitino: “Mitte galte ledo calla heeꞌra labbaahurano meyaaterano dandaamannokkireeti. Galtesira ammanaminohu woy ammanama hasiꞌrannohu mittuno afoommahu dino.” Filme loosannohu wolu manchi qole togo yiino: “Heeshshonke diro woꞌma mittete ledo calla heeꞌra kalaqaminkera noore dilawannoe.” Macca manni Maganu qixxeessinota adhatenna adhamate elto togo orte hunanno wote Sheexaaneho tashshi yaannosi. Daawuloosi amanyootunni adhammannita woy tini qixxaawo seekkanna laꞌꞌa dibaxanno. Konni daafira, Sheexaanu ledo olamme qeelate Maganu adhanna adhamate daafira fushshino seera ayirrisa hasiissannonke.

14, 15. Foorretewiinni xeertiꞌra dandiineemmohu hiittoonniiti?

¹⁴ Galte noonkerino adhammoommokkirino, duuchunku gari foorrewiinni xeertiꞌrate sharrama hasiissannonke. Togoo sharro shotateni? Deeꞌni! Lawishshaho wedellu roduuwi, ledonsa rossanno ooso xaadduhu baalu ledo siimu xaado assitinota woy mobayilensanni teeda baꞌino misilla woy viidiyo mimmitoho sokkinota coyidhanna macciishshitara dandiitanno. Silketenni togoo misilla woy sokka woleho soya higge qaaqquulle horoonsiꞌne qixxeessinoonnita teeda baꞌino misilla tareessate gede assite laꞌanno. Qullaawu Maxaafi togo yaanno: “Fooranno manchi . . . umisi mannimma aana cubbo loosanni no.” (1 Qor. 6:18) Siimu xaadinni taraawanno dhibbi qarranna reyo abbino. Qoleno, seemimmansa huꞌninohu rooru adhaminokki wedellooti assinorinni gedensaanni hige gaabbinota coyiꞌrino. Alamete boohaarsha shiqishshannori Maganu higge diingiro mittoreno diꞌꞌikkinanni yine ammannammora hasidhanno. Togoo kapho ammana, “cubbunniti dogate wolqa” kartannonke gede assitanno.—Ibi. 3:13.

¹⁵ Amanyoote bainore assatto gede xixxiibbanno hedo heedhuhero, maa assa dandaatto? Laanfe nooheta ammani. (Rom. 7:22, 23) Jawaante afiꞌrate Magano huucciꞌri. (Fil. 4:6, 7, 13) Foorrete widira qole massanno coyiwiinni xeertiꞌri. (Law. 22:3) Fatana ikkannori daanno wote, bayichonko gimbi yii.—Kal. 39:12.

16. Yesuusi Sheexaanu fatanisi yannara ma assino? Ninke isi lawishshinni maa ronseemmo?

¹⁶ Fatana ikkannore gargadhate Yesuusi kaajja lawishsha ikkinonke. Isi Sheexaanu oyeemmohe yiinosirinni didogamino; qoleno shiima geeshsha assaawe kae qolate dihedino. Hatteentenni isi bayichonko, “Yine borreessinoonni” yee qolino. (Maatewoosi 4:4, 7, 10 nabbawi;e Mat. 4:5, 6, 8, 9) Yesuusi Maganu Qaali yaannore seekke afino; hatti egennosi fatanu tuncu yiisi yannara bayichonko Qullaawa Borro horoonsiꞌre dawaro qolanno gede kaaꞌlitinosi. Addaho, Sheexaanu ledo olamme qeelate, fooratewiinni xeertiꞌra hasiissannonke.—1 Qor. 6:9, 10.

OLA QEELATE KAAJJITINE UURRE

17, 18. (a) Sheexaanu horoonsiꞌrannoti wole hayyo hiitteeti? Tini dhagge ikkitannonkekkihu mayiraati? (b) Sheexaanu albillitte ma ikkanno? Tenne afakki kaajjite uurratto gede jawaachishshannohehu hiittoonniiti?

¹⁷ Sheexaanu horoonsiꞌranno woshshaado giddo xa sasella laꞌnoommo; insano naaxxa, maalaamittete coyibba baxanna, foorrete. Isi horoonsiꞌrannoti woleno batinye hayyo no. Lawishshaho, mito Kiristaana mininsa manni giwannonsa, hattono ledonsa rossannori qacifattannonsa; woy mangistete gashshaano sabbakkannota nafa hooltannonsa. Togoo qarri dhagge diꞌꞌikkannonke; korkaatuno Yesuusi harunsaanosi togo yiino: “Suꞌmiꞌya daafira mannu baalu giwannoꞌne; goofimarchu geeshsha kaajje uurrannohu kayinni gatanno.”—Mat. 10:22.

¹⁸ Sheexaanu ledo olamme qeela dandiineemmohu hiittoonniiti? Yesuusi rosaanosi togo yiino: “Kaajjitine uurritiniro heeshshoꞌne gatisidhinanni.” (Luq. 21:19) Aye manchino hegeri gawajjo iillitannonke gede asse diafanno. Ninke sammi yine wodhinummoro ikkinnina Maganu ledo noonkeha muxxe jaaloomanke ayino hune diafanno. (Rom. 8:38, 39) Yihowa soqqamaano reyituro nafa qeelle Sheexaanunnita diꞌꞌikkitanno; korkaatuno Yihowa soqqamaanosi reyotenni kayisanno! (Yoh. 5:28, 29) Sheexaaneho kayinni hexxo dinosi. Isi Maganiweelo alamesi baꞌu gedensaanni 1,000 diro qilete usuramanno. (Aju. 20:1-3) Kiristoosihu Kumu Diri Gashshooti jeefora, Sheexaanu guuta ikkitinota mannu ooso soꞌrisiisate gumulote fatana abbanno gede shiima yanna “usurunni tidhamanno.” Hakkuyi gedensaanni, Daawuloosi baꞌꞌanno. (Aju. 20:7-10) Daawuloosira hili hexxono dinosi; kiꞌnera kayinni heeshsho afiꞌrate hexxo nooꞌne! Konnira ammanatenni kaajjitine uurritine Sheexaane gibbe. Ee, Sheexaanu ledo olantine qeela dandiitinanni!