Dano Iillitanno Yine Yaada

Aloona togo yitino: “Danote yanna dowwoli qoonqo macciishsheemma wote, lowo geeshsha masisannoe daafira bombu xoohanno wote maaxammanniwa xooqeemma. Hakkira mare heeꞌre nafa yaadeemma. Goꞌlinanniwi nookkiwa doogote noomma wote isinni roore yaachishannoe. Mitte hige doogote haꞌranni heeꞌre, raara hanafumma, hakkiinni foolu taie. Masillu higinoehu lowo saate gedensaanniiti. Hakkiinni dowwolu galagale raara hanafi.”

Dano iillitanno gede assannohu batinyu coyi giddo olu mittoholla. Lawishshaho, ate woy minikki manna buutote dhibbi amadinota kulleennahe lowo geeshsha masoottoha ikkara dandaanno. Mitootu kayinni albillitte mayi ikkakka yite yaaddanno. ‘Oosoꞌya, woy oosoꞌya ooso heedhanno alame olu, jaddo, ayyarete daafamanna lawaawe gudanno dhibbi woꞌminota ikkitakka?’ yite yaaddanno. Togoo yaaddo dandiine heeꞌnannihu hiittoonniiti?

Xiinxallu manchi gawajjo iillitannosita afino daafira, “dano laꞌꞌanno wote gaaꞌlannowa hasiꞌranno.” (Lawishsha 27:12) Ordu keerenke agadhate sharrammeemmonte gede, surrenke fayyimmano agadha hasiissannonke. Finqille noo boohaarshi, wole agurina odoo kullanni wote leellinshanniti waajjishshanno misilla nafa ninkerano ikko qaaqquullinkera yaaddo leddannote. Togoo coyiwiinni xeertiꞌranke, noo coye ammana giwa diꞌꞌikkitino. Maganu surrenke kalaqinohu busha coye heddara diꞌꞌikkino. Hatteentenni, surrenke “adda ikkino coye, . . . keeraancho ikkino coye, . . . xalala ikkino coye, . . . hattono banxanni coye” heddanno gede assiꞌra hasiissannonke. Konne assinummoro, “salaamete Magani” surretenna wodanu salaame aannonke.—Filiphisiyusi 4:8, 9.

HUUCCATTO UYITANNO KAAꞌLO

Addu ammana yaachishannore dandee heeꞌrate kaaꞌlitanno. Qullaawu Maxaafi ‘huuccatto assiꞌrate baqqi yinoommore’ ikkineemmo gede amaalanno. (1 Pheexiroosi 4:7) Maganu “huucciꞌneemmo coye baalanka aannonketa” addaxxine, tuncu yiinonkere woyyino garinni amadate hasiissannonke kaaꞌlo, hayyonna jawaante afiꞌrate iso huucciꞌra dandiineemmo.—1 Yohaannisi 5:15.

Qullaawu Maxaafi “tenne alame gashshaanchi” Magano ikkikkinni Sheexaane ikkinota, hattono “alame gudisidhe mittu bushu anga” noota kulanno. (Yohaannisi 12:31; 1 Yohaannisi 5:19) Konni daafira, Yesuusi “Bushuwiinni gatisinke” yine huucciꞌnammora rosiisi wote lawishsha coyiꞌranni nooha diꞌꞌikkino. (Maatewoosi 6:13) Aloona togo yitino: “Danote yanna dowwoli qoonqo macciishshantu kiiro, masilleꞌya qeeꞌla dandeemma gede kaaꞌlaera Yihowa huucciꞌreemma. Muxxe minaanniꞌyano silke bilbileennae mitteenni huucciꞌneemmo. Huuccatto lowo geeshsha kaaꞌlitinoe.” Qullaawu Maxaafi, “Yihowa woshshidhannosirira baalaho, halaalunni woshshidhannosirira baalaho muleeti” yaasi garankolla.—Faarso 145:18.

KONNI KAꞌIRA NOONKE HEXXO

Yesuusi Ilaalu Sibikatesi yannara harunsaanosi, “Mangistekki daggo” yite huuccidhara rosiisino. (Maatewoosi 6:10) Maganu Mangiste gawajjitanno yaaddo baalanta hegerera huntanno. Maganu, “Salaamete Biilo” ikkinohu Yesuusi widoonni “uulla woꞌmate aaninni ola hunanno.” (Isayyaasi 9:6; Faarso 46:9) “[Maganu] lowo daga mereero yoo yaanno . . . Daga dagate aana bise dikayissanno; hattono layinkita ola dirossanno. . . . Waajjishannonsahu mittuno diheeꞌranno.” (Mikkiyaasi 4:3, 4) Hagiirraame maate ‘mine miꞌnitanno, hatte minnarano heedhanno; qoleno woyinete haqqe kaasidhe gumase ittanno.’ (Isayyaasi 65:21) “Hakko heeꞌrannohu, ‘Xiwamoommo’ diyaanno.”—Isayyaasi 33:24.

Xaa yannara, aye geeshshano qorophinummoro, “hendoonnikki ikkito” woy busha yannara busha bayicho heeꞌrankenni iillannonke coye hooꞌla duuchanka wote dandaamannore diꞌꞌikkino. (Mekibibi 9:11) Olu, finqillenna dhibbu lowo diro dancha manna shaanni keeshshino; xaano shaasi digattanno. Konni garinni reyinohu beebbaataamu mannira hexxo noonsa?

Kiirre tunqannikkihu lowo manni galagale heeshshote heeꞌranno; konni manni kiiro afinohu Magano callaho. Insa “qaagooshshu waamma giddo noori baalunku” fulta geeshsha kayinni fooliishshidhe agadhitanno; Maganu guuta qaagate dandoo noosihura insa horonta dihawanno. (Yohaannisi 5:28, 29) Qullaawu Maxaafi kaote daafira togo yaanno: “Lubbonkera tuuqu gede ikkitinoti, huluullammannikkitinna kaajjado tini hexxo noonke.” (Ibiraawuyaani 6:19) Qoleno, Maganu “[Yesuusa] reyotenni kayise mannu baalunkura taje ikkannore uyino.”—Hawaariyaatete Looso 17:31.

Xa kayinni, Magano hagiirsiisate sharrantannorira nafa yaachishannori iillannonsa. Pooli, Jaaneetinna Aloona hayyo harunsansanni, huuccattotenni Maganunniwa shiqansanni, hattono konni kaꞌira Qullaawu Maxaafi aanno hexxo addaxxansanni yaaddonsa dandiite heedhanni no. “Hexxo aanno Magani” insara assinonte gede, “iso addaxxaꞌnenni hagiirrenna salaame batise ooꞌne.”—Roomu Sokka 15:13.