Kiristoosi Gede Ikkite Gikki Yaate Sharrantanni Nootto?

1, 2. Baalunku Kiristaani hiittoo lopho lophate sharrama hasiissannonsa? Lawishshunni kuli.

MITTE busule mancho dikkote muuze woy burtukaane hidhitanno wote, laalo jajjabba ikkitinohura woy rakassino daafira calla dihidhitanno. Hatteentenni, leꞌinota doodhitanno. Ise coommitannota, suꞌniitannotanna keeraanchimmate kaaꞌlitannota hidhitanno. Ee, tini mancho wortinotanna seekke leꞌino laalo doodhitanno.

² Mittu manchi heeshshosi Yihowara sayise uyihunna cuuamihu gedensaannino lopha diaguranno. Konni manchi mixo gikki yiino Kiristaancho ikkate. Koye gikki yaate yinihu mittu manchi dirunni lophanni haꞌrannota kulate ikkikkinni ayyaanaamittetenni gikki yaannote. Hawaariya Phaawuloosi Efesooni Kiristaanira ayyaanaamittetenni lopha hasiissannonsata kulinonsa. Isi, ‘baalunku ammanatenninna Maganu Beetti daafira gara ikkitino egenno afiꞌneenna heedhanno mittimmawa iillita geeshsha, hattono gikki yiino mancho ikkate yaano Kiristoosi gede woꞌmunni woꞌma gikki yaate widira’ martanno gede jawaachishinonsa.—Efe. 4:13.

3. Biꞌre Efesooni songora noo Kiristaaninna yannankera noori Yihowa soqqamaano gari mitto ikkinohu hiittoonniiti?

³ Phaawuloosi Efesooni songora sokka borreessi yannara hatti songo xintantunku mito geeshshi diri sae no. Hakko heedhannori batinyu roduuwi ayyaanaamittetenni baasa lophitinoreeti. Mitootu kayinni hakkawote gikki yaa hasiissannonsareeti. Yannankera, Yihowa Farciꞌraasine mereero noo garino hattooti. Batinyu labballunna meya roduuwinke Yihowara lowo diro soqqantinoreetinna ayyaanaamittetenni gikki yitinoreeti. Ikkollana hakko deerra martinori baalanka diꞌꞌikkitino. Lawishshaho, diru kiiro lowo kume ikkitannori haaruuddu cuuantanno; hakko daafira mitootu gikki yaate sharrama hasiissannonsa yaate. Atina hiittooti?—Qol. 2:6, 7.

AYYAANAAMITTETE LOPHO

4, 5. Gikki yiino Kiristaani kuꞌu kuꞌuyiwiinni babbaxxannohu hiitte doogganniiti? Ikkollana mitto assannonsari maati? (Umi misile lai.)

⁴ Dikkote laalo doodhatto wote, leꞌinoti baalanti laalo mitto suude afidhinokkita huwatatto. Ikkollana baalantera leꞌinota leellishannori heeꞌrannonsa. Hatteente gede, gikki yiino Kiristaani, gobbansa, lophino gari, fayyimmansa gari, dirinsanna dandoonsa babbaxxitinota ikkitara dandiitanno. Wole agurina akatinsa woy budinsa nafa addi addiho. Ikkirono, gikki yiino Kiristaana baalanka mitto assitanno akatta noonsa. Tini akatta hiikkuriiti?

⁵ Mittu gikki yiinohu Yihowa soqqamaanchi Yesuusi heeꞌrino garinni heeꞌrate woꞌnaalanno; hattono ‘haꞌrumasi seekke harunsanno.’ (1 Phe. 2:21) Yesuusi lowo geeshsha hasiisanno coyi maati yiino? Yihowa woꞌmu wodaninni, woꞌma lubbonni, woꞌma surrenni baxatenna olliichonke uminke gede assine baxate. (Mat. 22:37-39) Gikki yiino Kiristaanchi tenne amaale garinni heeꞌrate sharramanno. Togoo Kiristaanchi heeꞌranno heeshshonni Yihowa ledo noosi jaalooma balaxisiisannotanna wole manna addinta baxannota leellishanno.

6, 7. (a) Gikki yiino Kiristaanchira heedhannoti mite akatta hiikkuriiti? (b) Kawiinni aanchine hiittee xaꞌmora dawaro afiꞌneemmo?

⁶ Ikkollana, mittu gikki yiino Kiristaanchi laalannohu ayyaanu gumi wido ikkino akati baxille calla ikkinokkita anfoommo. (Gal. 5:22, 23) Joongillu, meessaneeto qeeꞌlanna cincano lowo geeshsha hasiissanno akattaati. Tini akatta koffi assanno coyi tuncu yaannosi wote caaccaawikki cince saꞌꞌanno gedenna dadillisanno coyi iillannosi wote hexxo mudhannokki gede kaaꞌlitannosi. Gillete xiinxallosi yannara gara ikkino coye gara ikkinokkihuwiinni badate kaaꞌlitannosita Qullaawa Borrota xintu seerubba afate ganye xiinxallanno. Hakkiinni, mitto coye assate woy assa hoogate doodhanno wote ayyaanaamittetenni gikki yiinoha ikkinota leellishannore doodhanno. Lawishshaho mitto coye assanno yannara Qullaawu Maxaafinni qajeelino tiiasi harunsanno. Gikki yiino Kiristaanchi duuchanka wote umisi hedonni roore Yihowa biddishshinna seeri roorannota ammane shooshaqa ikkinota leellishanno.a Qoleno dancha duduwo diinaggaawe sabbakanno, hattono songote giddo mittimma heedhanno gede kaaꞌlanno.

⁷ Yihowara soqqammoommo diri ikki geeshshihano ikkiro, ninkeneeto togo yine xaꞌma hasiissannonke: ‘Yesuusa albinni roore harunsanna ayyaanaamittetenni lede lopha dandeemmo gede woyyeessiꞌra hasiissannoeri nookka?’

“KAAJJADO SAGALE HASIISSANNOHU GIKKI YIINO MANNIRAATI”

8. Yesuusi Maganu Qaale mageeshshi geeshsha afinonna wodanchino?

⁸ Yesuusi Kiristoosi Maganu Qaale seekke afino. Wole agurina 12 dirihu heeꞌre nafa beetemeqidesete giddo rosiisaanote ledo Qullaawa Borrore hasaawino. “Macciishshanni noo manni baalu wodanchasinna qolanno dawaro dhagge assiꞌrino.” (Luq. 2:46, 47) Gedensaanni soqqanshosi yannara, giwannosi mannira Maganu Qaali giddonni qummi assanni yitannori baꞌꞌannonsa gede assino.—Mat. 22:41-46.

9. (a) Ayyaanaamittetenni lopha hasiꞌranno Kiristaanchi Qullaawa Maxaafa ma garinni xiinxallanno? (b) Qullaawa Maxaafa xiinxallineemmohu mayiraati?

⁹ Kiristoosi lawishsha harunse ayyaanaamittetenni lopha hasiꞌrannohu mittu Kiristaanchi iimi addi egennonni kassi yee diofollanno. “Kaajjado sagale hasiissannohu gikki yiino mannira” ikkinota wodanche Qullaawa Maxaafa ganye seekke xiinxallanno. (Ibi. 5:14) Ee, gikki yiino Kiristaanchi “Maganu Beetti daafira gara ikkitino egenno” afiꞌrate sharramanno. (Efe. 4:13) Qullaawa Maxaafa barru baala nabbawatto pirogiraame noohe? Lamalate kiiro gillete xiinxallo woy maatete magansiꞌra assiꞌrate gaaꞌmootto yanna gatte baꞌannohekki gede sharramatto? Maganu Qaale xiinxallatto wote, Yihowa hedonna isira mayi macciishshamannosiro seekke afate kaaꞌlitannoheta xintu seerubba wodanchate woꞌnaali. Hakkiinni mitto coye assatto yannara tini xintu seerubba kaaꞌlitannoheta addaxxite harunsi; tini qolte Yihowawa albinni roore shiqatto gede kaaꞌlitannohe.

10. Gikki yiino Kiristaanchi Maganu doogonna xintu seerubbasi ma garinni laꞌꞌanno?

¹⁰ Gikki yiino Kiristaanchi egenno calla baqe ikkitinokkita huwatanno. Maganu doogonna xintu seerubbasi afa calla ikkikkinni tenne seerubba baxanno. Baxillesi leellishannoti mitte doogo, heeshshosi giddo umisi hasattonni roorse Maganu fajjo balaxisiisate. Hakkiinni saeno, kuni Kiristaanchi albi akatasinna amanyootesi “fushshe huꞌnate” sharramanno. Konne assihu gedensaanni, “Maganu fajjo garinni kalaqantinotanna halaalaancho keeraanchimmanna ammanama ledo sumuu yitannota” Kiristoosite gedeeta haaro mannimma uddiꞌranno. (Efesooni 4:22-24 nabbawi.b) Qullaawa Maxaafa borreessinohu Maganunnihu qullaawu ayyaani massagino mannaati. Mittu Kiristaanchi Qullaawu Maxaafi egennosinna Maganu seerira noosi baxilli lexxanno gede assiꞌrannoha ikkiro, wodanasinna surresi qullaawu ayyaanira faꞌnantinota ikkitanno. Tini qolte ayyaanaamittetenni lophanno gede kaaꞌlitannosi.

MITTIMMA HEEDHANNO GEDE KAAꞌLI

11. Yesuusi uullate aana noo waro hiittoo coye dandee heeꞌrino?

¹¹ Yesuusi guuta mancho ikke uullate aana noo waro guuta ikkinokki manni ledo heeꞌrino. Guuta ikkitinokki amanna anni lossinosi; hattono qaete guuta ikkinokki fiixisi ledo heeꞌrino. Wole agurina muli harunsaanosi nafa naaxxatenna meessira roorsiꞌrate akata leellishshino. Lawishshaho, Yesuusi reyara albaanni noo hashsha rosaanosi insa insanaawa “ninke mereero roorannohu ayeti yitanni lowo geeshsha heewisantino.” (Luq. 22:24) Ikkollana, Yesuusi harunsaanosi guuntete xeꞌne noonsare ikkiturono, ayyaanaamittetenni lophitannotanna mittimma noo songo ikkitannota dihuluullamino. Hakko hashshanni isi hawaariyaatesi mereero baxillunna mittimma heedhanno gede Magano togo yee huuccino: ‘Atera ane ledo mittimma noohenna anerano ate ledo mittimma nooente gede, insarano ninke ledo mittimma heedhannonsa gedeeti; hattono ninke mitto ikkinoommonte gede insano mitto ikkitanno gedeeti.’—Yoh. 17:21, 22.

12, 13. (a) Efesooni 4:15, 16 songote giddo mittimma heedhanno gede assate daafira ma kultanno? (b) Mitto rodoo songote giddo mittimma heedhanno gede assate kaꞌꞌanno gede kaaꞌlinosiri maati?

¹² Gikki yiinohu Yihowa soqqamaanchi songote giddo mittimma heedhanno gede kaaꞌlanno. (Efe. 4:1, 2, 6, 15; Efesooni 4:3-5, 16 nabbawi.c) Maganu manni “insa insanaawa sumuu yee mitteenni [quraanyamara]” hasiꞌneemmo. Yihowa Qaali, tenne mittimma afiꞌrate shooshaqoota ikka hasiissannonketa kulanno. Gikki yiino Kiristaanchi wolootu roduuwi koffi assitannosi wote nafa songote mittimmara yee shooshanqe leellishanno. Songote giddo noohu mittu rodii woy mitte rodoo soꞌro loossuro ma assatto? Woy mittu rodii baddalihella? Hakkoye baddalinohe rodoo coyishiisha agurte mereeroꞌne boonu kalaqamanno gede assattonso, mereeroꞌne buusa karate woꞌnaalatto? Gikki yiino Kiristaanchi buusa karate sharramanno ikkinnina boono dikalaqanno.

¹³ Hanni Uuwe yinanni rodii lawishsha lai. Konni rodiira alba songote giddo roduuwunnita guuntete xeꞌne laꞌꞌanno wote koffi yaa rakkannosi. Hakkiinni, Qullaawa Maxaafanna Qullaawa Borro Seekke Huwata (Ingilizete Afoo) yinanni maxaafa horoonsiꞌre Daawiti heeshshore xiinxallate kai. Daawiti xagge doodhinohu mayiraati? Uuwe togo yiino: “Daawiti mite Maganu soqqamaano gara ikkinokkire assitanna laino. Lawishshaho, Nugusu Saaooli shaasira woꞌnaalino, mitu manni qole iso kinchunni ganara kaino; wole agurina umisi minaama nafa qacifattinosi. (1 Sam. 19:9-11; 30:1-6; 2 Sam. 6:14-22) Ikkollana Daawiti kuri mannooti assitinosiri Yihowa ledo noosi baxille hunasira diwodhino. Qoleno isi godowinni gatona yaannoho; konne akata anino lossiꞌra hasiissinoe. Xiinxalloꞌyanni rosoommori roduuwiꞌyata guuntete xeꞌne laeemmo gara biddi assiꞌreemmo gede kaaꞌlinoe. Xa koma godowaho diwodheemmo. Hatteentenni songo mittimma noota ikkitanno gede kaaꞌlate sharrameemmo.” Atina songote giddo mittimma heedhanno gede assate woꞌnaalatto?

MAGANU FAJJO ASSITANNORI MEREERO AFIꞌNANNI JAALLA

14. Yesuusi jaallasi asse doodhinohu hiittoo mannaati?

¹⁴ Yesuusi Kiristoosi mannunniwa gambo digiwannoho. Labballuno meentuno, ajuno akkaluno, wole agurina qaaqquullu nafa Yesuusiwa shiqa diwaajjitino. Ikkollana, isi muli jaallasi assiꞌrinohu duuchanka manna diꞌꞌikkino. Isi ammanantino hawaariyaatesira togo yiino: “Hajajanni noommoꞌnere assitinanniha ikkiro kiꞌne jaallaꞌyaati.” (Yoh. 15:14) Yesuusi jaalla doodhinohu, ammanante iso harunsitannorinna Yihowara woꞌmu wodaninni soqqantannori mereerinniiti. Atino isinte gede jaallakki Yihowara woꞌmu wodaninni soqqantannori mereerinni doodhatto? Tini maaho kaaꞌlitanno?

15. Wedellootu gikki yiino Kiristaaniwa aanansa kaaꞌlitansara dandiitannohu hiittoonniiti?

¹⁵ Batinye laalo roore leꞌannohu arrishshote xawaabba afidhurooti. Hatteente gede, roduuwinke mereero afiꞌrattohu iibbadu baxilli gikki yaatto gede kaaꞌlahera dandaanno. Miteekkite heeshshokki giddo maa assattoro heddanni nootto wedellicha ikkattora dandaatto. Hatto ikkiro, Yihowara soqqante woꞌnaalsha afidhinorinna songote giddo mittimma heedhanno gede kaaꞌlitanni noo roduuwi ledo jaalooꞌmakki busullete! Kuri roduuwi heeshshonsa giddo addi addi qarri iillinonsarenna Maganoho soqqantanni guficho ikkannore dandiite saꞌinore ikkitara dandiitanno. Insa woyyino coye doodhatto gede kaaꞌlitahera dandiitanno. Insawa ganyite aanattoha ikkiro, danchare assate kaꞌꞌatto gedenna gikki yaate widira higge haꞌratto gede kaaꞌlitannohe.—Ibiraawuyaani 5:14 nabbawi.d

16. Mitte wedellitte rodoo songote giddo noori jajjabbu roduuwi kaaꞌlitinosehu hiittoonniiti?

¹⁶ Lawishshaho Helga yinanni rodoo, roso guddara kaꞌu taaera kifilete ledose rossanno rosaano albillitte maa ikka hasidhannoro mimmitu ledo hasaabbinota coyidhino. Hakkawote roore rosaano dancha looso afiꞌrate yuniversitete roso rosa hasidhannota kultino. Helga kayinni tenne hajore songote giddo noo jaallase ledo hasaabbino. Ise togo yitino: “Kuri jaallaꞌya giddo rooriidi anera bayiruuddeho, hakko daafira lowore kaaꞌlinoe. Woꞌma yanna soqqansho soqqameemma gede jawaachishshinoe. Hakkunni gedensaanni onte diro suwisaancho ikke soqqamoomma. Wedellimmaꞌyaha lowo diro Yihowara soqqamate horoonsiꞌroomma daafira xa lowo geeshsha tashshi yaannoe. Togo assaꞌyanni gaabbisannoeri mitturino dino.”

17, 18. Ayyaanaamittetenni gikki yaanke Yihowara woyyino garinni soqqameemmo gede kaaꞌlitannonkehu hiittoonniiti?

¹⁷ Heeshshonkenni Yesuusi lawishsha harunsate woꞌnaalanke ayyaanaamittetenni lophineemmo gede kaaꞌlitannonke. Yihowawa albinni roore shinqeemmo; hattono isira woꞌma lubbonkenni soqqamate noonke hasattono lexxitanno. Mittu Kiristaanchi ayyaanaamittetenni lophironna gikki yiiro, Yihowara woyyino garinni soqqamate kaꞌꞌanno. Yesuusi harunsaanosi togo yee jawaachishino: “Mannu dancha loosoꞌne lae iima noo Annaꞌne ayirrisanno gede, xawaabbiꞌne mannu albaanni xawo.”—Mat. 5:16.

¹⁸ Aleenni ronsummonte gede, gikki yiino Kiristaanchi songote giddo lowore kaaꞌlara dandaanno. Qoleno gikki yiino Kiristaanchi Maganu uyinosi tiia horoonsiꞌranno gari ayyaanaamittete lophosi leellishanno. Tiiꞌꞌinke dancha muro mudhineemmo gede kaaꞌlannonkehu hiittoonniiti? Roduuwinke tiiansa horoonsidhe doodhitanno doorsha ayirrisa dandiineemmohu hiittoonniiti? Aananno birxichira tenne hajore ronseemmo.