Barru Baala “Mimmitoꞌne Jawaachishshe”

1, 2. Jawaachisha lowo geeshsha hasiissannohu mayiraatiro xawisi.

KIRISTIINA^[1] yinanniti 18 diri beetto togo yitino: “Anniꞌyanna amaꞌya horo jawaachishe diegenninoe, hatteentenni duucha wote boroorannoe. Insa coyiꞌranno gari madiissannoho. Insa ani busule ikkoommakkihu, horo seyemmakkihunna duꞌma ikkoommahu gede asse coyiꞌranno. Konnira barru baala wiꞌleemma; qoleno insa coyishiisha dihasiꞌreemma. Hattono waagiweelo ikkoommahu gede asse hedeemma.” Ee, jawaachishannohu hoogiro heeshsho lowo geeshsha giwissanno!

² Jawaachisha kayinni lowo geeshsha kaaꞌlitanno. Rubeni yinanni beetti togo yee coyiꞌrino: “Lowo diro aneneeto ajishe laꞌꞌate hedo hooꞌlate sharramanni keeshshoommo. Mitte hige songote cimeessi ledo soqqammanni heeꞌneenna isi ani kolossi yoommota afi. Isi giddoꞌyata fushshe coyiꞌranna seekke macciishshinoe. Hakkiinni isi ani danchare assanni noommota wodancheemmo gede assie. Qoleno, Yesuusi batinye gurrae lowo geeshsha roortinoonni yee coyiꞌrino qaale qaageemmo gede assie. Konne qummeeshsha qaageemmo kiiro wodaniꞌya harshammi yaanno. Kuni cimeessi coyiꞌrinori lowo geeshsha jawaachishinoe.”—Mat. 10:31.

3. (a) Soqqaamaasinchu Phaawuloosi woloota jawaachishate daafira mayyee coyiꞌrino? (b) Konni birxichira maa ronseemmo?

³ Qullaawu Maxaafi ayewoteno mimmitonke jawaachisha hasiissannonketa kulanno. Soqqamaasinchu Phaawuloosi Ibiraawootu Kiristaanira togo yee borreessino: “Roduuwaꞌya! Kiꞌne mereero ayino heeshshote Maganiwiinni badannohu bushunna ammanannokki wodani heeꞌrannosikki gede qoropho. Kiꞌne giddonni ayeno cubbunni dogame wodana dillaawannokki gede, . . . barru barrunku mimmitoꞌne jawaachishshe.” (Ibi. 3:12, 13) Ati wolu manni jawaachishannore coyiꞌre diggi assinohe yanna hedittoro, mimmito jawaachinsheemmo gede uyinoonni amaale lowo geeshsha hasiissannota huwatatto. Konnira hanni aante noo xaꞌmuwa laꞌno: Jawaachisha lowo geeshsha hasiissannohu mayiraati? Yihowa, Yesuusinna Phaawuloosi woloota jawaachishshino doogganni maa ronseemmo? Danchu garinni jawaachisha dandiineemmohu hiittoonniiti?

NINKE BAALUNKURA JAWAANTE HASIISSANNONKE

4. Jaawaante hasiissannori ayeooti? Yannankera jawaante afiꞌra qarra ikkitinohu mayiraati?

⁴ Baalunkura jawaante hasiissannonke. Hakko iso lophinanni haꞌneemmo wote roore hasiissannonke. Timooti Evaanzi yinanni rosiisaanchi togo yiino: “Muꞌrote wayi hasiisannonte gede qaaqqullehono jawaante hasiissanno. Mittu qaaqqi jawaachinshannisiha ikkiro, isi worbanna naandannisiha ikkinota huwatanno.” Ikkollana, heeꞌnoommohu lowo geeshsha qarrissanno yanna giddo ikkino daafira, mannu umonsa baxannoho, kalaqamu baxilli dinoonsareeti; qoleno jawaante afiꞌra qarra ikkitino. (2 Xim. 3:1-5) Mitu annuwinna amuuwi oosonsa digalatanno; korkaatuno insa umonsa annuwansanna amuuwinsa jawachishinsakkinni lophino. Batinye loosaasine loosu basera galantanninsakki daafira lowo geeshsha caaccaabbanno.

5. Manna jawaachisha dandiinanni doogga giddo mite hiikkuriiti?

⁵ Manna jawaachinsheemmo doogga giddo mitte assinoha dancha coye kulle galatate. Qoleno, noonsata dancha akatta kulle, hattono “waajjaleeyye” woy hexxo mudhitinore dhaawannore coyiꞌne jawaachisha dandiineemmo. (1 Tes. 5:14) “Jawaachisha” yine tirroonnihu Giriikete qaali noo gedeenni tirriro “anewiinni faffooti” yitanno tiro afiꞌrino. Roduuwinke ledo soqqammeemmo wote, insa jawaachishannore coyiꞌrate faro afiꞌneemmo. (Rosiisaancho 4:9, 10 nabbawi.) Roduuwanke banxeemmotanna naandeemmota kulate injiitanno yanna doorreemmo? Tenne xaꞌmo dawaro laꞌnammora albaanni, “Labbino dawaro qola hagiirsiissanno; yannasira coyiꞌnoonni coyi hiittoo danchaati!” yitanno amaale hedanke danchate.—Law. 15:23.

6. Daawuloosi hexxo mudhineemmo gede assa hasiꞌrannohu mayiraati? Lawishsha kuli.

⁶ Sheexaanu Daawuloosi hexxo mudhinammora hasiꞌranno; korkaatuno hexxo mudha ayyaanaamittenke shoshshoggitanno gede assitannota woy wole garinni gawajjitannonketa afino. Lawishsha 24:10, “Qarru barra wolqiweelittoro, jawaatte diafatto” yitanno. Sheexaanu keeraanchu manchi Iyyoobi hexxo mudhanno gede assate addi addi qarri iillannosi gedenna bushiinshannisi gede assino; ikkollana isi hedinori diwoꞌmino. (Iyo. 2:3; 22:3; 27:5) Maatenkenna songonke miilla jawaachishannore coyiꞌne Daawuloosi looso diiga dandiineemmo. Togo assineemmoha ikkiro, mininkenna Mangistete Addaraashe hagiirru noohanna teense heeꞌnanni bayicho ikkanno.

JAWAACHISHATE LAWISHSHA IKKITANNONKERE

7, 8. (a) Yihowa woloota jawaachinshara hasiꞌrannota leellishshannoti Qullaawu Maxaafi lawishshuwa hiikkuriiti? (b) Annuwunna amuuwu Yihowa lawishsha harunsa dandaannohu hiittoonniiti? (Hanafote noo misile lai.)

⁷ Yihowa. Faarsaasinchu togo yee faarsino: “Kaaliiqi [“Yihowa”, NW] dadillunni hiiqqantinorira mule noonsa; hexxo hoogginore gatisannonsa.” (Far. 34:18) Yihowa ammanamino masaalaanchi Ermiyaasi waajje hexxo mudhi yannara, beꞌe yaannokkiha ikkanno gede kaaꞌlinosi. (Erm. 1:6-10) Jawimma amaddinohu masaalaanchu Daanieeli, Maganu sokkaanchosi soye jawaachishisi yannara isi mageeshshi geeshsha hagiidhinoro hanni hedde. Kuni sokkaanchi Daanieeli “Maganu lowo geeshsha baxannohehu” woy naadannohehu yee woshshinosi. (Dan. 10:8, 11, 18, 19) Hatteente gede, kiꞌneno halashshaano, suwisaanonna dhuka hooggino roduuwa jawaachisha dandiitinanni?

⁸ Maganu, Beettisi Yesuusi isi ledo lowo diro loosinohura isi uullara daye soqqami yannara iso galatanna jawaachisha hasiissannokkihu gede asse dihedino. Yesuusi Annisi iima heeꞌre, “Hagiirsiisannoehu baxeemmo Beettiꞌya isooti” yee lame hige coyiꞌranna macciishshino. (Mat. 3:17; 17:5) Konni garinni Maganu Yesuusa galatinosi, hattono isi danchare assanni noota huwatanno gede assinosi. Yesuusi soqqansho hanafi yannaranna uullate aana heeꞌrinohu jeefote diro Maganu lame hige togo yee coyiꞌranna macciishshasi, lowo geeshsha jawaatanno gede assitinositi dihulluullissannote. Qoleno, Yihowa Yesuusi reyara albaanni noo hashsha baasa yaadi yannara sokkaancho soye jawaachishinosi. (Luq. 22:43) Kiꞌnera ooso nooꞌneha ikkiro, oosoꞌne danchare assitanno wote ganyitine galattinenna jawaachishshine Yihowa lawishsha harunse. Qoleno, oosoꞌnera ammanansa fonqolannori rosu mine barru baala tuncu yaannonsaha ikkiro, fonqolo qeeltanno gede kaaꞌlannore assa hasiissannoꞌne.

9. Yesuusi soqqamaasinesi amadino garinni maa ronseemmo?

⁹ Yesuusi. Yesuusi Qaagooshshu Ayyaana xinti hashsha, soqqamaasinesi aana lainote busha akatta giddo mitte naaxxate. Yesuusi umosi heeshshi asse lekkansa hayishshinoha ikkirono, insa kayinni ninke giddo roorannohu ayeti yitanni heewisantino; qoleno Pheexiroosi quwa sae umosi addaxxino. (Luq. 22:24, 33, 34) Ikkirono, Yesuusi soqqamaasinesi qarru yannara isiwiinni faffinosikkita kule galatinonsa. Isi albillitte soqqamaasinesi isi loosinohunni rooranno looso loossannota coyiꞌrino; qoleno Maganu lowo geeshsha baxannonsata huluullantannokki gede assinonsa. (Luq. 22:28; Yoh. 14:12; 16:27) Ninkeneeto togo yine xaꞌma dandiineemmo, ‘Oosoꞌyanna wolootu loossanno soꞌro aana illachishantenni insa assitannohu danchu coyiꞌra galatensa, Yesuusi lawishsha harunsa dihasiissannoe?’

10, 11. Soqqamaasinchu Phaawuloosi manna jawaachisha hasiissannota leellishinohu hiittoonniiti?

¹⁰ Soqqamaasinchu Phaawuloosi. Phaawuloosi borreessinote addi addi sokka giddo, ayyaanaamittete roduuwasi naade coyiꞌrino. Isi insa giddo mitu ledo lowo diro soqqamino daafira, insa soꞌro loossannota laikki digatino; ikkirono insa daafira danchare coyiꞌrino. Lawishshaho, Phaawuloosi Ximootewoosi, ‘baxeemmohanna Mootichaho ammanamino beettoꞌya’ yiinosi; qoleno isi Ximootewoosi wolu Kiristaanira addinta hedannoha ikkinota coyiꞌrino.’ (1 Qor. 4:17; Fil. 2:19, 20) Qoleno soqqamaasinchu Phaawuloosi Qorontoosi songora borreessino sokkara, Tiito “kiꞌne daafira ane ledo” soqqamannoho yee galatinosi. (2 Qor. 8:23) Ximootewosinna Tiito, Phaawuloosi insara noosi lao afansa lowo geeshsha jawaachishshinonsati dihuluullissannote!

¹¹ Phaawuloosinna Barnabaasi heeshshonsa marara agurte albaanni baasa gawajjinoonninsa base galagalte hadhino. Lawishshaho, insa albaanni Lisxiraho lowo qarri iillisinosaha ikkirono hakko heedhannota haaro rosaano jawaachishate wirro hakkira hadhino. (Soq. 14:19-22) Efesooni giddo Phaawuloosi lowo manni hanqe shaate woꞌnaalino. Soqqamaasinete Looso 20:1, 2 togo yitanno: “Cancu hawacci yiita, Phaawuloosi ammanaano gamba asse jawaachishshanno amaale amaalinsahu gedensaanni, insa keerunni yee Meqedooniya haꞌri. Giddoonni hige saꞌꞌanno gobba baalate ammanaano gamba asse lowo amaalenni jawaachishanni sae Giriike haꞌri.” Ee, Phaawuloosi manna jawaachisha lowo geeshsha hasiissannota afino.

MIMMITOꞌNE JAWAACHISHSHE

12. Gambooshshu mimmitonke jawaachishate faro fanannonkehu hiittoonniiti?

¹² Iimi Anninke ganyine gambooshshe haꞌneemmo gede qixxaawo qixxeessino korkaati giddo mittu mimmitonke jawaachishate. (Ibiraawoota 10:24, 25 nabbawi.) Albiti Yesuusi harunsaano assitunte gede, ninkeno gamba yineemmohu rosateetinna mimmitonke jawaachishateeti. (1 Qor. 14:31) Konni birxichira hanafote qummi assiniti Kiristiina gambooshshe haꞌra baxxannohu, hakko roduuwu baxannosenna jawaachishshannose daafira ikkinota coyidhino. Ise ledde togo yitino: “Mangistete Addaraashe mareemma wote mito wote kolossi yeemma. Kayinni roduuwu anewa shiqqi yee rimmi asse daae yaannoe, hattono biifoommata kulannoe. Insa ane baxannoetanna ani ayyaanaamittete lophanni noommati insa hagiirsiissinonsata kulannoe. Insa coyiꞌrannohu jawaachishshanno qaali duhu shaalannoe gede assanno!” Ninke baalunku ‘mimmitonke jawaachishate’ dandiineemmore baala assineemmoha ikkiro, tini woloota jawaachishshanno.—Rom. 1:11, 12.

13. Ayyaanaamittete gikki yiino Kiristaanano jawaachisha hasiissannohu mayiraati?

¹³ Ayyaanaamittetenni gikki yitinota Maganu soqqamaano nafa jawaachisha hasiissanno. Hanni Iyyaasure laꞌno. Isi lowo diro Maganoho ammaname soqqamino. Ikkirono, Yihowa Muse Iyyaasu jawaachishanno gede kulino; togo yiino: “Mannaho albisanni tenne laꞌꞌatto baatto ragidhanno gede assannonsaha ikkino daafira, Iyyaasura assannore kulisi; jawaatannonna kaajjanno gede irkisisi.” (Mar. 3:27, 28) Yihowa, Iyyaasu Israeele massaganni Hexxote Gobba eessanno gede doore lowo looso uyinosi. Isira hexxo mudhanno gede assannori iillannosi; hattono ajayi ajeenna mitte higge olunniwa qeelantanno. (Iya. 7:1-9) Hatte yannara Iyyaasura jawaantenna irko hasiissinositi dihuluullissannote! Konni daafira, Maganu hoshsha agarate jawaatte loossanno cimeeyyenna woradu aliidi laꞌꞌaasine jawaachisha hasiissannonke. (1 Teselonqe 5:12, 13 nabbawi.) Mittu woradu aliidi laꞌꞌaanchi togo yiino: “Roduuwu towaanyo baxissinonsata kule mito wote galatu sokka borreessa aannonke. Tenne borrote sokka maaxiꞌne wodhine, hexxo mudhineemmo wote nabbambeemmo. Tini lowo geeshsha jawaachishshannonke.”

14. Galatanna jawaachisha dancha gede amaalate kaaꞌlitannota leellishannori maati?

¹⁴ Songote cimeeyye, hattono annuwunna amuuwu woloota galatanna jawaachisha Qullaawu Maxaafi amaale harunsa afidhino horo xawisate kaaꞌlitannota huwattino. Phaawuloosi Qorontoosi heeꞌranno Kiristaani uyinonsa amaale harunsinohura galatinonsa; tini insa gara ikkinore assa agurannokki gede jawaachishshinonsati dihuluullissannote. (2 Qor. 7:8-11) Andiriyaasi yinannihu lame ooso noosi anni togo yiino: “Jawaachishannore coyiꞌra, oosonke ayyaanaamittetenni lophitannonna huxuxxi yitannore ikkitannokki gede kaaꞌlitannonsa. Jawaachishshinanninsaha ikkiro, insa amaaltinanninsa amaale adha digibbanno. Oosonke gara ikkinore affinoha ikkirono, ganyine jawaachisha gara ikkinore assa roso assidhanno gede assitanno.”

DANCHU GARINNI JAWAACHISHA DANDIINEEMMOHU HIITTOONNIITI?

15. Woloota jawaachisha dandiineemmo doogga giddo mitte hiitteeti?

¹⁵ Ayyaanaamittete roduuwiꞌne assannoha dancha loosonna akattansa naaddinannita leellishshe. (2 Dud. 16:9; Iyo. 1:8) Yihowanna Yesuusi, Maganu Mangiste loosira loonseemmore baala baasa naaddanno; insa heeshshonke garinni kainohunni assineemmori shiimare ikkiro nafa ajishe dilaꞌanno. (Luqaasi 21:1-4; 2 Qorontoosi 8:12 nabbawi.) Lawishshaho, mitu geedhino roduuwinke ganye gambooshshe daatenna soqqansho fulate baasa sharramanno. Tennera insa galatanna jawaachisha dihasiissannonke?

16. Manna jawaachinsheemmo faro saꞌe baꞌankera wodha hasiissannonkekkihu mayiraati?

¹⁶ Woloota jawaachishshinanni faro saꞌe baꞌoonkeꞌne. Roduuwinke galantanninsa gede assannore assitanna laꞌnummoro sammi yaa dihasiissannonke. Phaawuloosinna Baarnaabaasi Phisidiyu giddo Antsookiyaho soqqantu yannara ikkinore laꞌno. Mukuraabete sooreeyye insa togo yitinonsa: “Roduuwa, jawaachishshanno seejjo nooꞌnero, mannaho kulle!” Phaawuloosi tenne faro horoonsiꞌre dancha gede rosiisino. (Soq. 13:13-16, 42-44) Ninkeno manna galanteemmo gede assannore laꞌnummoro, tini faro saꞌe baꞌankera wodha hasiissannonkeni? Woloota ganyine jawaachinsheemmoha ikkiro, insano ninke jawaachishshanno.—Luq. 6:38.

17. Coyiꞌneemmori roore jawaachishannohu maa assinummorooti?

¹⁷ Assitinore baddine kultine godowinta galatte. Jawaachishannore coyiꞌne galata dancha ikkiturono, Yesuusi Tiyaxiroosi Songora kulino sokka assinoonnire bande kulle galata roore jawaachishshannota leellishshanno. (Yohaannis Ajuuja 2:18, 19 nabbawi.) Ooso nooꞌneha ikkiro, insa ayyaanaamittetenni lophate assitanni noore baddine kultine galata dandiitinanni. Ooso callase lossidhanno ama nooha ikkiro, ise tuncu yaannose qarra dandiite oosose lossiꞌrate assitannore kulle galata dandiineemmo. Konni garinni galatanna jawaachisha lowore kaaꞌlitanno!

18, 19. Jawaante hasiissannonsare dhaawa dandiineemmohu hiittoonniiti?

¹⁸ Yihowa, Muse Iyyaasu jawaachisharanna kaajjishara kuli gede, yannankera mitto mancho mayine jawaachinsheemmoro xaaddote dikulannonke. Ikkirono, ayyaanaamittete roduuwinkeranna wolu mannira jawaachishannore coyiꞌnummoro Maganu hagiidhanno. (Law. 19:17; Ibi. 12:12) Lawishshaho, lallawo shiqishino rodiira shiqishino lallawo ninkera maltino amaale afiꞌrate woy mitto qummeeshsha huwatate kaaꞌlitinonketa kulle galata dandiineemmo. Mitte rodoo songonsa towaatara dayino rodiira togo yite borreessitino: “Hasaamboommohu boode daqiiqa calla ikkirono, lowo geeshsha dadilloommota laꞌe sheshifachishoottoe hattono jawaachishoottoe. Madirakete heedhe rosiisittonna ane shiqqe hasaawisittoe yannara danchu garinni coyiꞌritto gari, tini Yihowa uyinoe eltooti yee hedeemma gede assinoeta afattora hasiꞌreemma.”

¹⁹ Phaawuloosi amaalino amaale harunsate sharrammeemmoha ikkiro, manna ayyaanaamittetenni jawaachinsheemmoti duucha faro no: isi togo yiino: “Xa assitinanni heedhinoonte gede, mimmitoꞌne jawaachishenna dhaabbe.” (1 Tes. 5:11) Baalunku ‘barru barrunku mimmitonke jawaachisha’ agurreemmokkiha ikkiro, Yihowa hagiidhanno.