Gambooshshe Haꞌranke Hiitti Akatta Noonketa Leellishshanno?

1-2. (a) Lowo miliyoone ikkanno manni Mootichu Hurbaate ayirrisate gamba yaanno woyite Yihowa maa laꞌꞌanno? (Aaniidi qoolira noo misile lai.) (b) Konni birxichira maa xiinxallineemmo?

HANNI alamete doyichora noohu lowo miliyoone ikkanno manni Mootichu Hurbaate ayirrisate gamba yaanno woyite Yihowara mayi macciishshamannosiro hedi. Isi baalanka manna xaphoomunni calla ikkikkinni, konne gambooshshe dayinoha mitto mittonka mancho laꞌꞌanno. Lawishshaho isi ammanante diru kiiro konne ayyaana ayirrisate daggannore laꞌꞌanno. Insa giddo mitootu konne ayyaana ayirrissannohu buutote darti giddo heedhe ikkara dandaanno. Mitootu wole gambooshshe ganyite daggannokkiha ikkirono, Qaagooshshu Ayyaana gata hasiissannonsakki gambooshshi gede assite laꞌanno. Konni albaanni Qaagooshshu Ayyaana dagge egentinokkiri konni ayyaani daafira afate quqquxante dagganno woyite Yihowa insano laꞌꞌanno.

² Yihowa batinyu manni Qaagooshshu Ayyaana daanno woyite hagiidhannoti egennantinote. (Luq. 22:19) Ikkollana, Yihowa roore illachishannohu konne ayyaana ayirrisate daanno manni batinyi aana diꞌꞌikkino. Hatteentenni Yihowa konne ayyaana dagganno gede assinonsa korkaati aana illachishanno. Konni birxichira, aante noo xaꞌmora dawaro afiꞌneemmo: Qaagooshshu Ayyaana calla ikkikkinni Yihowa baxxannosirira qixxeessinoha lamalate gambooshshe haꞌneemmohu mayiraati?

UMO HEESHSHI ASSATE AKATI GAMBOOSHSHE HAꞌNEEMMO GEDE ASSANNONKE

3-4. (a) Gambooshshe haꞌneemmohu mayiraati? (b) Gambooshshe haꞌranke hiikku akati noonketa leellishshanno? (c) Umi Qorontoosi 11:23-26 kultanno garinni, Qaagooshshu Ayyaana gata hasiissannonkekkihu mayiraati?

³ Gambooshshe haꞌneemmo gede assannonkehu qaru korkaati, togo assa magansiꞌranke kifile ikkaseeti. Qoleno gambooshshunniwa Yihowa rosiisannonke. Naaxxaleessu manni rosa hasiissannonsata diammananno. (3 Yoh. 9) Ninke kayinni Yihowawiinninna isi horoonsiꞌranni noo dirijjitewiinni rosate quqquxammeemmo.—Isa. 30:20; Yoh. 6:45.

⁴ Gambooshshe haꞌranke umonke heeshshi assineemmore ikkinoommota yaano rosate qixxaamboommore ikkinoommota leellishshanno. Qaagooshshu Ayyaana haꞌneemmohu kuni gata hasiissannonkekki ayyaana ikkino daafira calla ikkikkinni Yesuusi “Kunninni ane qaagge” yee hajajinonke hajajora umonke heeshshi assine hajajammeemmo daafiraati. (1 Qorontoosi 11:23-26 nabbawi.) Kuni gambooshshi, albillittete daafira noonke hexxo kaajjishanno; hattono Yihowa mageeshshi geeshsha baxannonkero qaangeemmo gede assannonke. Ikkollana Yihowa jawaantenna shesho afiꞌnammora hasiꞌrannohu dirunni mitte hinge assinannihu konni gambooshshi widoonni calla diꞌꞌikkino. Konnira isi lamalate kiiro gambooshshe qixxeessinonke; hattono konne gambooshshe haꞌneemmo gede hajajinonke. Umonke heeshshi assa kuri gambooshshuwa haꞌneemmo gede kakkayissannonke. Lamalate kiiro kuri gambooshshuwa haꞌratenna gambooshsheho qixxaawate lowo saate sayinseemmo.

5. Umonsa heeshshi assanno manni Yihowa koyisinonsa koyishsha adhannohu mayiraati?

⁵ Diru kiiro, batinyu umonsa heeshshi assanno manni Yihowa koyisinonsa koyishsha adhe isiwiinni rosate daanno. (Isa. 50:4) Insa umo Qaagooshshu Ayyaana daggu gedensaanni wole gambooshshuwano daa hanaffanno. (Zak. 8:20-23) Ninke insa ledo ‘kaaꞌlaanchinkenna gatisaanchinke’ Yihowa rosonna biddishsha rosanke tashshi assitannonke. (Far. 40:17) Ee, Yihowanna lowo geeshsha baxannonkehu Beettisi Yesuusi koyissinonke koyishsha adhine insawiinni rosa sainori dino!—Mat. 17:5; 18:20; 28:20.

6. Mitto mancho umosi heeshshi assasi Qaagooshshu Ayyaana daanno gede kaaꞌlitinosihu hiittoonniiti?

⁶ Diru kiiro, Yesuusi Reyo Qaagooshshira dandaaminke deerrinni batinye manna koyisate woꞌnaaleemmo. Batinyu manni konne koyishsha adhansanni lowo horo afiꞌrino. Hanni mitto lawishsha laꞌno. Lowo diri albaanni, mittu manchi Qaagooshshu Ayyaaniha koyishshu woraqata adhinoha ikkirono, koyisisi rodiira konne ayyaana daa dandaannokkita kulinosi. Ikkollana Qaagooshshu Ayyaana ayirrinsanni hawarro, hakku rodii koyisi mancho Gambooshshu Addaraashe eanna laino. Konni manchira wosinsinoonnisi gari dhagge ikkinosi; konnira isi lamalate gambooshshenke haꞌra hanafino. Isinni kuni manchi hakko diro gambooshshe sase hige calla hosino. Isi baalanka gambooshshe haꞌrate murciꞌranno gede assinosiri maati? Umosi heeshshi asse hedosi biddi assiꞌrasiiti. Hakko mancho koyisi rodii “isi lowo geeshsha umosi heeshshi assannoho” yee coyiꞌrino. Konne mancho minisira abbinohu Yihowa ikkinoti dihuluullissannote; isi xa cuuamino rodooti.—2 Sam. 22:28; Yoh. 6:44.

7. Gambooshshunniwa ronseemmorinna Qullaawu Maxaafi giddo nabbambeemmori umonke heeshshi assate kaaꞌlannonkehu hiittoonniiti?

⁷ Gambooshshunniwa ronseemmorinna Qullaawu Maxaafi giddo nabbambeemmori umonke heeshshi assineemmo gede kaaꞌlannonke. Qaagooshshu Ayyaanira albaanni noo lamallara, duucha woyite gambooshshuwanke Yesuusi lawishshanna isi heeshshosi wodote kakkalo asse oye umosi heeshshi assino gara xawissanno. Qoleno Qaagooshshu Ayyaanira albaanni noo barruwa giddo, Yesuusi reyonna kao daafira kultannota Qullaawu Maxaafi xagge nabbambeemmo gede jawaachinshoonninke. Kuri gambooshshuwawa ronseemmori, hattono tenne xagge giddo nabbambeemmori Yesuusita wodote kakkalo albinni roore naandeemmo gede assannonke. Tini, Yesuusi lawishsha harunsine umonke heeshshi assineemmo gedenna shota ikka hooggunkerono nafa Yihowa fajjo assate kaaꞌlitannonke.—Luq. 22:41, 42.

WORBIMMA GAMBOOSHSHE HAꞌNEEMMO GEDE ASSITANNONKE

8. Yesuusi worbimma leellishinohu hiittoonniiti?

⁸ Yesuusi lawishsha harunsine worbuulle ikkate sharrammeemmo. Hanni Yesuusi reyara albaanni noo barruwa giddo worbimma leellishino gara hedi. Isi shiima yanna gedensaanni diinnasi shollishshannosita, gantannositanna shitannosita afino. (Mat. 20:17-19) Ikkirono, isi reyo diwaajjino. Yesuusi amandannisi yanna iillituta, Geetesemaane yinannite kaashshu basera ledosi noo soqqamaasinera “Kaꞌe haꞌnona; sayise aannoehu kuneeti dayino” yiinonsa. (Mat. 26:36, 46) Olu uduunne adhino manni amadasira dayi yannara, Yesuusi albansaanni sae uurre ayimmasi xawisino; hattono olamaasine soqqamaasinesi agurtanno gede kulinonsa. (Yoh. 18:3-8) Addaho, Yesuusi kaajja worbimma leellishino! Yannankerano buuramino Kiristaanino ikko wolu geꞌreewi wido ikkitinori Yesuusi gede worbimma leellishshanno. Hiittoonni?

9. (a) Gambooshshe ganye haꞌrate worbimma hasiissannonkeha ikkara dandaanno yineemmohu mayiraati? (b) Ninke lawishshi ammanansanni kainohunni usuramino roduuwanke jawaachishara dandaannohu hiittoonniiti?

⁹ Ganyine gambooshshe haꞌrate, fonqolo ikkannori iillinkerono worbimma leellisha hasiissannonkeha ikkara dandaanno. Mitu roduuwinke dadillisannori, hexxo mudhitanno gede assannori woy fayyimmate qarri iillinsarono gambooshshe hadhanno. Woloota kayinni maatensa woy gashshaano darte iillishshunsarono gambooshshe haꞌratenni worbuulle ikkitinota leellishshanno. Ninke lawishshi ammanansanni kainohunni usurante noo roduuwanke mageeshsha jawaachishannonsaro hanni hedi. (Ibi. 13:3) Ninke fonqolo ikkannori iillanni heeꞌreennanke Yihowara soqqammanni heeꞌnoommota macciishshitanno woyite, ammanansa, worbimmansanna ammanamansa kaajjitanno. Soqqamaasinchu Phaawuloosi tenne huwatino. Isi Roomaho usurame noo yanna baalantera, roduuwisi Maganoho ammanante soqqantanni noota afasi tashshi assitinosi. (Fil. 1:3-5, 12-14) Phaawuloosi usurunni tidhamara albaanni woy tidhamihu gedensaanni Ibiraawootu Kiristaanira sokka borreessino. Isi hatte sokka giddo, ammanamino Kiristaani ‘roduuwu gede ikke baxamanna’ mitteenni gamba yaa agurannokki gede jawaachishinonsa.—Ibi. 10:24, 25; 13:1.

10-11. (a) Qaagooshshu Ayyaanira ayeoo koyisa hasiissannonke? (b) Efesooni Sokka 1:7 togo assineemmo gede kakkayisannonkeha hiikkonne korkaata kultannonke?

¹⁰ Fiixanke, ledonke loossannorenna olliichonke Qaagooshshu Ayyaanira koyinseemmo woyite worbimma leellinsheemmo. Konne manna koyinseemmohu mayiraati? Yihowanna Yesuusi assitinonkerira galata qoꞌla hasiꞌneemmo daafira, woloota Qaagooshshu Ayyaanira koyinseemmo. Insano Yihowa wodote kakkalo widoonni uyinonke ‘eltonni’ horo afiꞌra dandiitanno gara rossara hasiꞌneemmo.—Efesooni Sokka 1:7 nabbawi; Aju. 22:17.

¹¹ Mitteenni gamba yine worbimma leellinsheemmo woyite, Yihowanna Yesuusi leellishshinoha mitto muxxe akata leellinshanni heeꞌnoommo.

BAXILLU GAMBOOSHSHE HAꞌNEEMMO GEDE ASSANNONKE

12. (a) Gambooshshuwanke Yihowaranna Yesuusira noonke baxilli lexxanno gede assitannohu hiittoonniiti? (b) Layinki Qorontoosi 5:14, 15 Yesuusi lawishsha harunsine maa assineemmo gede jawaachishshannonke?

¹² Yihowaranna Yesuusira noonke baxilli gambooshshe haꞌneemmo gede assannonke. Gambooshshunniwa ronseemmori qole Yihowaranna Beettisira noonke baxilli lexxanno gede assanno. Duucha woyite gambooshshunniwa insa ninkera assitinonkere ronseemmo. (Rom. 5:8) Roorenkanni Qaagooshshu Ayyaani Yihowanna Yesuusi wodo naaddannokkirira nafa taalle nookki baxille leellishshinota qaangeemmo gede assannonke. Insa leellishshinonke baxillira galata qoꞌlate, barru baala heeshshonkenni Yesuusi lawishsha harunsate sharrammeemmo. (2 Qorontoosi 5:14, 15 nabbawi.) Qoleno wodaninke Yihowa wodo uyinonke daafira iso guwisiꞌneemmo gede kakkayisannonke. Yihowa guwisiꞌra dandiineemmo doogga giddo mitte, gambooshshunniwa giddonkenni kaꞌne dawaro qolate.

13. Yihowanna Yesuusira noonke baxilli mageeshshihoro leellisha dandiineemmohu hiittoonniiti? Xawisi.

¹³ Yihowaranna Yesuusira yine mite coyibba facci asse aguratenni insa mageeshshi geeshsha banxeemmoro leellisha dandiineemmo. Gambooshshe haꞌrate yine duucha woyite babbaxxitino coyibba facci assine agurreemmo. Mite songuwa gambooshshe assidhannohu loosu saate gedensaanni hawarrooti; tenne yannara qole daafursankera dandaanno. Wole gambooshshe assiꞌneemmohu qole wolu manni fooliishshirannohu Qidaame woy Sambatu barraati. Yihowa daafurre heeꞌne nafa gambooshshe haꞌneemmo woyite laꞌꞌanno? Ee laꞌꞌanno! Isinni Yihowa fonqolo ikkannore qeelle gambooshshe haꞌrate sharrameemmo woyite, isira leellinsheemmo baxille roore naadanno.—Maq. 12:41-44.

14. Yesuusi umisi horo agure baxille leellishatenni dancha lawishsha ikkinonkehu hiittoonniiti?

¹⁴ Yesuusi umisi horo agure baxille leellishe dancha lawishsha ikkinonke. Isi rosaanosira yee reyate calla ikkikkinni, heeshshote noo yannarano umisi injonni roore insa horo balaxisiisate maahoyye yiino. Lawishshaho isi daafure woy baasa yaade noo yannara nafa harunsaanosi hasaawisino. (Luq. 22:39-46) Hattono Yesuusi harunsaanosi assitannosiri aana ikkikkinni, isi insara assa dandaanno coyi aana illachishino. (Mat. 20:28) Yesuusi gede, Yihowaranna roduuwinkera noonke baxilli kaajjado ikkiro, Qaagooshshu Ayyaananna wole duuchanta songote gambooshshuwa haꞌrate dandaaminkere baala assineemmo.

15. Roorenkanni ayeoo kaaꞌlate aana illachisha hasiissannonke?

¹⁵ Ninke addu Kiristaani maamari miilla ikkate qoosso afiꞌnoommo; qoleno wolootuno konni maamari miilla ikkitanno gede koyisate dandaaminkere baala assineemmo. Ikkirono roorenkanni ‘ammanate’ roduuwanke ikke heeꞌrenni ayyaanaamittensa shoshshoggitino roduuwanke kaaꞌlate aana illachinsheemmo. (Gal. 6:10) Kuri roduuwa gambooshshuwanke roorenkanni Qaagooshshu Ayyaana daanno gede jawaachinshe banxeemmonsata leellinsheemmo. Yihowanna Yesuusi gede, ayyaanaamittetenni shoshshoggitinori baxillaanchu Anninkenna Allaalaanchinke Yihowawa higganno woyite tashshi yaannonke.—Mat. 18:14.

16. (a) Mimmito jawaachisha dandiineemmohu hiittoonniiti? (b) Tini Yesuusi Yohaannisi 3:16te coyiꞌrinore qaagate dancha yannaati yineemmohu mayiraati?

¹⁶ Dagganno lamallara, dandaamiꞌne deerrinni Dotteessa 19, 2019nni Arbete hawarro ayirrinseemmohu Qaagooshshu Ayyaanira lowo manna koyisate sharramme. (“Manna Koyisatto?” yitanno saaxine lai.) Woꞌmante yannara baalanta Yihowa qixxeessinonke gambooshshuwa ganyine haꞌrate mimmito jawaachinsho. Tenne alame goofimarchi gambisanni daanno woyite, umonke heeshshi assate, hattono worbimmanna baxille leellishate gambooshshe haꞌra hasiissannonke. (1 Tes. 5:8-11) Yihowanna Yesuusi leellishinonkeha taalle nookki baxille mageeshshi geeshsha naandeemmoro woꞌmu wodaninkenni leellinsho!—Yohaannisi 3:16 nabbawi.