Sheexaanu Woshshaado Qorophe!

HUNDITI Israeelete daga Yordaanoosi Laga tayisse Hexxote Gobba eꞌara rakke heedheenna wole gobba manni insawa dayino. Kuni Yihowa magansidhannokki daga wido ikkino meentooti; insa Israeelete labballo jilaho koyisara dayino. Kuni dancha jila lawara dandaanno. Haaro jaalla kalaqiꞌra, sirbanna dancha sagale ita Israeele halchishshansara dandiitanno. Hakku meenti harunsanno budinna amanyooti Maganu Israeelete uyino Seeri ledo sumuu diyaannoho; ikkirono mitu Israeelete labballi ‘Bushanna dancha bande anfoommoreeti. Qoleno qorophineemmo’ yite heddinoha ikkara dandaanno.

Hakkiinni mayi ikkiyya? Qullaawu Maxaafi “Manninsa Moaabi meenti ledo foori” yaanno. Meentu mixo, Israeelete labballi kaphu maganna magansiꞌranno gede assate. Qoleno qiniinonsa! Konni daafira, Yihowa “lowo geeshsha hanqi.”—Kir. 25:1-3.

Israeele Yihowa Seera diigginohu lame doogonniiti: Umihunni, kaphu magannara kumbuultino, layinkihunni, foortino. Maganoho finqilansanni, lowo kume ikkano manni goofino. (Ful. 20:4, 5, 14; Mar. 13:6-9) Kuni assooti gaabbote hunannoho yineemmohu mayiraati? Korkaatuno hatte yannara, Israeele Maganu Seera diiga hooggoommero lowo kume ikkanno manni shiima yanna gedensaanni Yordaanoosi Laga tayise sae Hexxote Gobba eannohu baino!—Kir. 25:5, 9.

Soqqamaasinchu Phaawuloosi hatte yanna daafira coyiꞌranni togo yiino: “Kuni coyi insa aana ikkinohu, ninke jiilleemmo gedeeti. Borreessinoonnihuno diru goofimarchira heeꞌnoommorira ninkera seejjo ikkankeraati.” (1 Qor. 10:7-11) Mitu Israeelete manni shota ikkinokki cubbo loose Hexxote Gobba eikki gatino daafira, Sheexaanu lowo geeshsha hagiidhinoti egennantinote. Ninke konne qorowishsha wodanchanke hayyote! Korkaatuno xaa yannarano Sheexaanu Maganu qixxeessinota haaro alame eꞌnammora dihasiꞌranno.

GAWAJJITANNO WOSHSHAADO

Sheexaanu Kiristaana woshshaadate, konni albaanni lowo manna soꞌrisiisino hayyo horoonsiꞌranno. Aleenni laꞌnummonte gede, Sheexaanu Israeele woshshaadate foorre horoonsiꞌrino. Xaa yannarano Sheexaanu woshshaado giddo mitte foorrete. Sheexaanu tini woshshaado amaddannonke gede assate horoonsiꞌranno coyi giddo mittu teeda baꞌino misillaati.

Xaa yannara, mittu manchi teeda baꞌino misilla wolu afisikkinni laꞌꞌara dandaanno. Bashsho mittu manchi teeda baꞌino misilla laꞌꞌa hasiꞌriro, maaeelare leellishshanno filme laꞌꞌate tiyatirete minira woy togoo borro hirranni suuqqa haꞌranno. Togoore leellinshanniwa qooxo hige nafa mara saalsiissannota ikkitino daafira, batinyu manni qorophanno. Xa kayinni mittu manchi minesi heeꞌre woy makeenu giddo interneetete widoonni teeda baꞌino misilla laꞌꞌara dandaanno. Batinye gobbara labballuno meentuno hasiꞌriro minensa heeꞌre teeda baꞌino misilla afiꞌrara dandaanno.

Qoleno mobayile woy taabileete teeda baꞌino misilla afiꞌra shota ikkitanno gede assitino. Mannu lekkatenni haꞌranno woyite, otobisete woy baaburu giddo heeꞌre angansa noo uduunnichinni teeda baꞌino misilla laꞌꞌara dandaanno.

Teeda baꞌino misilla mannu afikkinni laꞌꞌa shota ikkitino daafira, tini woshshaado albinni roore lowo manna gawajjitino. Teeda baꞌino misilla laꞌꞌannohu batinyu mannira adhamansa gawajjantino, insaneetira noonsa ayirrinyi baino, hattono tiiꞌꞌinsa xurino. Bushate busha, konni mannira Maganu ledo noonsa jaaloomi baꞌꞌara dandaanno. Teeda baꞌino misilla laꞌꞌanno manchi umosi gawajjannoti egennantinote. Togoo assooti wodana madiissanno. Tini mada galte hosse hurtara dandiitannoha ikkirono, bassu kayinni dibaꞌꞌanno.

Ikkollana, Yihowa tenne Sheexaanu woshshaadonni agareemmoꞌne yiinonke. Yihowa agarankera hasiꞌnummoro, isira ‘hajajama’ hasiissannonke; hundi Israeele woshshaadotenni amadantinohu hatto assa hooggino daafiraati. (Ful. 19:5) Maganu teeda baino misilla effire giwannota huwata hasiissannonke. Hatto yineemmohu mayiraati?

YIHOWA GEDE ATINO TEEDA BAꞌINO MISILLA EFFIDHE GIWI

Yihowa Israeelete uyino seeri iso magansidhannokki daga harunsitanno seeriwiinni baxxinoha ikkinota qaaga hasiissannonke. Golu gede, kuni seeri Israeele qooxeessinsara noo manninna mancau assootinsawiinni agarannonsa. (Mar. 4:6-8) Kuni seeri, Yihowa foorre giwannota leellishanno.

Yihowa, Israeele qooxeessinsara heedhanno daga assitannohu bushu assooti daafira coyiꞌranni togo yiino: “Haare masseemmoꞌne gobbahu Kanaꞌꞌaani manni assannore assitinoonte; . . . Baatto nafa gattukkinni battaabbino; anino cubbisera yee qorichishoommose.” Qullaawa ikkinohu Israeelete Magani, Kanaani manni heeꞌranno heeshsho battaabbinota ikkasenni kainohunni, baattonsa nafa battaabbinota coyiꞌrino.—Lew. 18:3, 25.

Yihowa Kanaani manna qorichishinoha ikkirono, wolu manni foora diagurino. Phaawuloosi 1,500 saꞌꞌanno diri gedensaanni Kiristaanu waro heedhino daga ‘saala hoogginore’ ikkitinota coyiꞌrino. Isinni tini daga, “addi addi batte assate umonsa sarmitannokki hamaandera [woy macca ceeꞌmitanno assootira] sayisse uyitino. Yortonsarano gawalo dino.” (Efe. 4:17-19) Yannankerano saalimale coye assitannori woꞌmitino. Maganunniti ammanantino soqqamaano tenne alamera noo manni assannoha mancaꞌꞌa coye laꞌꞌa hoogate dandaaminsare baala assa hasiissannonsa.

Teeda baꞌino misilla Maganu ayirrannokki gede assitanno. Maganu manna danisinni kalaqino; hattono kawajjo afiꞌrino coye badate dandoo uyinonke. Maganu siimu xaadooshshe lainohunni quwa sainokki biddishsha uyino. Yihowa siimu xaadooshshe kalaqinohu, adhantinori amanyoote afiꞌrino garinni hagiidhitanno gedeeti. (Kal. 1:26-28; Law. 5:18, 19) Ikkina teeda baꞌino misilla qixxeessitannorinna boohaarshu gede assite shiqishshannori maa assitanni no? Insa Yihowaha amanyootu seera mishshanni no. Addanko, togoo manni Yihowa ayirrannokki gede assanno. Yihowa, seerasi diige teeda baino coye qixxeessannonna tuqisanno mannira yoo yaanno.—Rom. 1:24-27.

Afanni heeꞌre teeda baino coye laꞌꞌanno woy nabbawanno mannina? Mitu manni teeda bainore laꞌꞌa gawajjannokki boohaarshaati yee hedannoha ikkara dandaanno. Ikkollana, togo assanno manni Yihowa seera mishshannorira kaaꞌlamanni no. Insa teeda baꞌino misilla laꞌꞌa hanaffinohu tenne hedde ikka hoogara dandaanno. Ikkihano ikkiro, halaalaanchu Magani soqqamaasine teeda baꞌino misilla effidhe giwa hasiissannonsa. Qullaawu Maxaafi Yihowa “Bunshe gibbannore baala baxanno” yaanno.—Far. 97:10.

Teeda baꞌino misilla laꞌꞌa agura hasidhannorira nafa, hatto assa qarra ikkitansara dandiitanno. Guuntete xeꞌne noonkere ikkinoommo daafira, busha yorto qeeꞌlate sharrama hasiissannonke. Qoleno guuta ikkinokki wodaninke Maganu seera diigate faro hasiꞌneemmo gede assankera dandaanno. (Erm. 17:9) Ikkollana Kiristaana ikkinohu batinyu manni, tenne yorto sharrame qeeꞌla dandiino. Aterano tini fonqolo ikkitinoheha ikkiro, qeeꞌlino manni noota afakki jawaachishshahera dandiitanno. Maganu Qaali, tenne Sheexaanu woshshaadonni amadamattokki gede kaaꞌlannohe gara hanni laꞌno.

MAAEELA COYE HIINCITOOTI

Aleenni laꞌnummonte gede, busha yorto batinye Israeelete manna balete huntino. Xaa yannarano hattooti. Yesuusi rodii Yaiqoobi tenne daafira xawisanni togo yiino: “Mittu mittunku manchi jifamannohu umisi yortonni goshooshamanninna dogamanniiti. Hakkunni gedensaanni yorto gadobbe cubbo iltanno; cubbu lophiro reyo qalanno.” (Yai. 1:14, 15) Mittu manchi giddosi busha yorto lophitanni hadhara wodhe aguriro, gale hose cubbo loosasi digattanno. Hakko daafira busha yorto hiinca agurre, wodaninke giddonni buqqinse huna hasiissannonke.

Busha yorto dagganni qarrissuhero, Yesuusi amaalino amaale harunsi; isi togo yiino: “Angakki woy lekkakki cubboho massitannoheha ikkiro murte huni! . . . Illekki cubboho eessitannoheha ikkiro fushshite huni!” (Mat. 18:8, 9) Yesuusi angankenna lekkanke murre hunneemmo gede, woy illenke fushshine hunneemmo gede kulanni noonkeha diꞌꞌikkino. Hatteentenni fonqolo ikkannonkere hobbi ruxxi yinummokki ranke huna hasiissannonketa lawishshunni kulanni no. Ikkina teeda baꞌino misilla lainohunni tenne amaale harunsa dandiineemmohu hiittoonniiti?

Teeda baꞌino misilla hedeweelcho dagguhero ‘Ane digawajjitannoe’ yite heddooti. Bayichonko shawwu yii. Televizhiine rakke cufi. Kompiyutere woy mobayile bayichonko cufi. Hakkiinni wole dancha coye hedi. Hatto assakki, hedokki eemadhatto gedenna busha yorto qeeltannohekki gede kaaꞌlitannohe.

BASHSHO LAOOTTOTI TEEDA BAꞌINO MISILLA QULLI YITANNILLA WAADDUHE?

Teeda baꞌino misilla laꞌꞌa aguroottoha ikkirono, bashsho laoottoti qulli yitanni qarrissuhero maa assa dandaatto? Teeda baꞌino misilla woy hedo surretenni baꞌukki lowo yanna keeshshitara dandiitanno. Qoleno hedeweelcho qulli yitanni qarrissara dandiitanno. Hatto ikkiro, batte ikkinore assate lawishshaho maasterbeeshiine assa rakkahera dandiitanno. Hakko daafira, togoo hedo hedeweelcho daggahera dandiitannota hedde gargadhate balaxxe qixxaawi.

Hedokkinna assootikki Maganu fajjo ledo sumuu yaanno gede assiꞌrate murciꞌri. Soqqamaasinchu Phaawuloosi gede, ‘manninatekki gadadisse miirannohe (woy borojjichokki ikkanno) gede assiꞌri.’ (1 Qor. 9:27) Busha yortora borojjicho ikkattokki gede qorophi! “Maganu hedo dancha, hagiirsiissannotanna guuta ikkitinota affinanni gede, wodaniꞌne haarooꞌmo ikkinnina tenne gobba mannita busha doogo hadhinoonte” yitanno amaale harunsi. (Rom. 12:2) Harshammo afiꞌnanni gede assitannoti Maganu fajjo ledo sumuu yitanno hedootinna assooteeti ikkinnina, cubbu yortora hajajama ikkitinokkita deꞌooti.

Mite Qullaawu Maxaafi qummeeshshuwa qaagate woꞌnaali. Hakkiinni busha hedo daggannohe woyite, kuri qummeeshshuwa hiinci. Faarso 119:37, Isayaasi 52:11, Maatewoosi 5:28, Efesooni Sokka 5:3 Qolasiyaasi Sokka 3:5 nna 1 Teselonqe 4:4-8 teeda baꞌino misilla daafira Yihowate gedee lao heedhannohenna isi maa assattora hasiꞌrannoro huwatatto gede kaaꞌlitannohe.

Teeda bainore laꞌꞌa woy heda agura wolqakkira aleenni ikkitinoheha lawannohe woyite maa assa dandaatto? Yesuusi lawishsha seekkite harunsi. (1 Phe. 2:21) Isi cuuami gedensaanni Sheexaanu jifanni waadinosi. Yesuusi maa assiyya? Sheexaane gargadha diagurino. Isi duucha qummeeshsha horoonsiꞌre, Sheexaanu abbinosi fonqolo qeelino. Yesuusi “Ati Sheexaanu anewiinni fafi!” yiino; Sheexaanuno agure haꞌrino. Yesuusi Sheexaaneho anga diuyino; atino hexxo mudha dihasiissannohe. (Mat. 4:1-11) Sheexaanunna alamesi surrekkira maaeela hedo woꞌmitanno gede assate woꞌnaala diagurtanno; ikkirono hexxo mudhite sharrama agurtooti. Sharramittoro teeda baꞌino misilla laꞌꞌate hasatto qeela dandaatto. Yihowa diinakki qeelatto gede kaaꞌlannohe!

YIHOWA HUUCCIꞌRI, HATTONO ISIRA HAJAJAMI

Yihowa kaaꞌlannohe gede ganyite huucciꞌri. Phaawuloosi togo yiino: “Hasidhinoonni coye Maganoho kuꞌle. . . . Mannu hedora aleenni ikkinohu Maganu keeri, Kiristoosi Yesuusinni wodanaꞌnenna hedoꞌne agaranno.” (Fil. 4:6, 7) Maganu cubbu ledo sharrante qeelatto gede giddiidi keere aannohe. Yihowawa shiqqi yiittoro “isino [atewa] shiqqi yaanno.”—Yai. 4:8.

Baalante Sheexaanu woshshaadonni agarooshshe ikkannonkehu qaru coyi Woꞌmanka Dandaanno Magani ledo kalaqiꞌnoommo jaaloomaati. Yesuusi “Tenne gobba gashshaanchi Sheexaanu daanni” noota coyiꞌri gedensaanni, “Isi ane aana wolqa diafiꞌrino” yiino. (Yoh. 14:30) Yesuusi hatto yee mitte giddonni coyiꞌrinohu mayiraati? Isi mitte yannara togo yiino: “Soyinoehu ane ledo no. Woꞌmanka woyite iso hagiirsiisannore asseemmo daafira callaꞌya diagurannoe.” (Yoh. 8:29) Atino Yihowa hagiirsiisannore assittoro, isi horonta ditugannohe. Konni daafira, teeda baꞌino misilla woshshaado ikkitannohekki gede qorophi; hatto assittoro Sheexaanu woshshaado diamaddannohe.