Soqqanshote Yannara Busulla Ikke
1. Sabbankeemmo wote busulla ikka hasiissannonkehu mayiraati?
1 Yannankera Maganu soqqamaano “hiyyeeyyete mereero noo geꞌreewi gede” ikkite “shokkashshonna dawashsho ilama mereero” sabbakkanni no. (Maat. 10:16; Fil. 2:15) Dagoomu mereero kaꞌanno gaance, finqille, hattono manna qafade adhe haꞌra yannankera rosantanni hadhino; tini qolte bushuullu “bunshete aana bunshe leddanni hadhanni” noota leellishshanno. (2 Xim. 3:13) Soqqanshote yannara ‘busulla ikkate’ hiittee Qullaawa Borro amaale harunsa hasiissannonke?—Maat. 10:16.
2. Soqqanshote killile agurre fulle wolewa soqqama woyyitannohu hiittoo coyi kalaqamirooti?
2 Gowwitine Sammi Yitinoonte: Lawishsha 22:3, adagu yannara ‘goꞌline’ sayisa hayyo ikkitinota coyidhanno. Konni daafira, deseꞌe yaa agurtine qooxeessaho mayi ikkanni nooro baqqi yitine harunse! Salaametenni teense heeꞌnanni qooxeessira hedeweelcho gaance kalaqantara dandiitanno. Polise kawanna kaꞌa haꞌrama batidhinota, woyi mannu doogote hubbi hubbi yiinota laꞌinara dandiitinanni. Mito wote qole, hasaawinsoommo manchi qorophineemmo gede mitore kulankera dandaanno. Qooxeessaho ikkanni noore laꞌꞌate yine hakko taxxi yaa agurre, ranke hakkiinni haꞌranna wolewa soqqama busullete.—Law. 17:14; Yoh. 8:59; 1 Tes. 4:11.
3. Mekibibi 4:9 aana noohu xintu seeri soqqanshonkera kaaꞌlannonkehu hiittoonniiti?
3 Miilooꞌmitine Soqqamme: Mekibibi 4:9, “Mittunni lamu woyyanno” yitanno. Kageeshshi geeshsha calluwiꞌne fultine soqqamate rosi nooꞌnehanna tennera fullakkinoonniha ikkara dandaanno; ikkina xaano calla fule soqqama dancha ikkitanno? Mito bayicho dancha ikkitara dandiitanno. Wolewa kayinni hakko iso arrishsho eꞌu gedensaanni mitte rodoo callase woyi mittu wedellichu rodii callisi minunni mine haꞌre soqqama hayyo diꞌꞌikkitino. Qooxeessaho ikkannore hixamanye laꞌꞌannohu ledonke soqqamanno rodii lowonta hasiisannonketa temokkiro leellishshanno. (Mek. 4:10, 12) Kiꞌneno ledoꞌne soqqamanno roduuwi noo gara hixamanyitine laꞌꞌa deꞌinoonte. Soqqanshote killilenni fultinanni wote killilete giddo ledoꞌne soqqantannorira kullensa.
4. Songote giddo noo roduuwi baalunku keere agarate maa assa hasiissannonke?
4 Songote cimeeyye ‘lubbonke diinaggaabbe allaaltannore’ ikkitino daafira, songonsa killilera hasiisanno garinni biddishsha aate halaafinati noonsa. (Ibi. 13:17) Ninke kayinni umonke heeshshi assine insa ledo buusammeemmoha ikkiro Yihowa atoote afiꞌranke digattanno. (Mik. 6:8; 1 Qor. 10:12) Ninke Maganu soqqamaano baalunku killilenke giddo seekkine farciꞌrate jawaanto; togo assineemmo wote kayinni qoropha hamboonke.