Gudumaaleho Sabbakate Kaaꞌlitannota Haaro Doogga

1. Umi xibbi diri Kiristaani sabbakate dancha lawishsha ikkannonkehu hiittoonniiti?

¹ Umi xibbi diri Kiristaani sabbakinohu, minunni mine haꞌre calla diꞌꞌikkino. Gudumaaleho, yaano dooggatenna dikkote gedee baserano sabbakino. (Looso 20:20) Lawishshaho, lowo manni heeꞌrannota afino basera yaano beetemeqidesete haꞌre sabbakino. (Looso 5:42) Hawaariya Phaawuloosi Ateensi katamira noo wote, dikkote xaadanno mannira barru baala sabbakino. (Looso 17:17) Xaa yannara, dancha duduwo dudumbeemmoti qara doogo minunni mine haꞌne soqqammeemmo soqqanshooti. Ikkollana, mannunni xaandeemmowa baalawa lawishshaho, makeena uurrisiꞌnanniwa, paarkete, daddalu basera, mannu batiꞌranno hodhaanchora, woy wole baserano sabbankeemmo. Woꞌmanti halashshaano injaannowa baalankawa gudumaaleho sabbakkuro lowonta dancha ikkirono, gama halashshaano gudumaaleho sabbakate kaaꞌlitannote lame haaro quqquxxanno doogganni sabbakate faro afidhanno.

2. Bocaasa 2011⁠nni hiittee haaro doogonni farciꞌra jammarroonni?

² Jajjabba Katammara Gudumaaleho Farciꞌrate Kaaꞌlitannota Addi Doogo: 2013⁠nnihu Diru Maxaafira qoola 16 nna 17 aana xawinsoonninte gede, Bocaasa 2011⁠nni Niyoorkete Katamira woꞌnaale laꞌꞌate gudumaaleho baxxino garinni farciꞌra jammarroommo. Addi addi afiinni qixxaabbino borro manna laꞌꞌate baxisanno garinni kursete woy gaarete aana worre, lowo manni haꞌranno dooggara dancha bayicho worroonni. Barru baala hatte doogga widoonni lowo kume ikkanno manni saꞌꞌanno; konni manni giddo batinyu, ea fajjinannikki fooqqara heeꞌrannohonna qaensa marre anfannikkiho. Konni garinni farciꞌra lowo guma abbitino. Muli yanna giddo mittu aganira calla 3,797 metseettanna 7,986 maxaaffa elloonni. Doogo saꞌꞌannohu batinyu manni Qullaawa Maxaafa xiinxallinsansara xaꞌmiꞌrino. Wonanni qaru alaami Qullaawu Maxaafi xiinxallo jammarsiisa ikkino daafira, hasatto noonsa manni kulino teesso faana gante kaaꞌlitanno gede hakkawotenni insa qooxeessira heedhanno songuwara sonkoonni.

3. Tenne haaro soqqamate kaaꞌlitanno doogo halashshinanni heeꞌnoonnihu hiittoonniiti?

³ Konni garinni sabbaka dancha guma abbitanni noo daafira, alame woꞌmate mannu batiꞌrannote wole jajjabba katammarano tini qixxaawo halaꞌlitanno gede assinanni heeꞌnoonni. Konni garinni sabbakate hiitti katamma woyyitannoro wossantannoti sinu biirooti. Roore wote tennera injiitannoti, hodhishshu base woy lowoti loosu biiro woy mannu gamba yee heeꞌrara minnoonni fooqqa noo daafira lowo manni lekkatenni ale woro higanno baseeti. Sinu biiro katamma doortu gedensaanni, konni garinni soqqantannori ayeootiro kultanno dabdaabbe songuwate sokkanno, hattono wole hasiisanno biddishsha uyitanno. Mite mite basera kaaꞌlaano suwisaanono konni garinni soqqantara dandiitannoha ikkirono, roore wote tennera maddambanniri woꞌma yanna suwisaanootinna baxxitino suwisaanooti.

4. Jajjabba katammara gudumaaleho farciꞌnannihu hiittoonniiti?

⁴ Tenne Doogonni Farciꞌnanni Gara: Jajjabba katammara gudumaaleho sabbakate kaaꞌlitannote addite haaro doogonni farcidhara maddamboonniri mannu, borro worroonni kursewa woy basetenni base haaꞌne haꞌra dandiinannihu borrote madardariwa daa geeshsha agartanno. Mannu insawa shiqe daanno wote, baxissinonsa borro adha dandaannota kultanno. Suwisaano mannu xaꞌmannonsa xaꞌmo baalantera dawaro Qullaawu Maxaafinni dancha gede assite qoltanno. Suwisaano mittu manchi borro adhiro, umisi fajjonni woxe fushshanno qixxaawo noota dikultanno. Konni loosira woxe hiikkiinni afiꞌneemmoro xaꞌmiro kayinni, umisi fajjonni loosinkera woxe fushsha hasiꞌriro adhino borro aana kulloonni teesso widoonni soya dandaannota kula dandiitanno. Dandaamannoha ikkiro togo yite xaꞌmitanno: “Dange hasaawinsammohera hasiꞌratto?” woy “Borro aa calla ikkikkinni, Qullaawa Maxaafa mulla rosiinseemmota afootto?”

5. Mittu minaanninna minaama haaro farciꞌrate doogonni farciꞌre atoote afiꞌrinohu hiittoonniiti?

⁵ Konni garinni farciꞌra lowo atoote abbitanno. Mittu minaanninna minaama togo yee borreessino: “Borrote kursewa uurrine barru baala lowo kume ikkanno manni saꞌꞌanna laꞌꞌanke, alame woꞌmate manna baalaho dancha duduwo iillishate loonsanni heeꞌnoonniha halaꞌlado looso dhagge assiꞌneemmo gede assitinonke. Konne lowo manna laꞌne Yihowa mittu mittunku manchira mageeshshi geeshsha assaawannoro hedanke, heeshshonke giddo sabbakate looso balaxisiisate albinni roore murciꞌne kaꞌneemmo gede kaaꞌlitinonke. Yihowa danchu duduwi gabbaꞌꞌannonsa manna afate, borrote kurse muleenni saꞌꞌanno manni baalunku wodana marammaranni noohu gede assine hendeemmo. Konne looso albinni roore sokkaanote ledo gamba yine loonsanni heeꞌnoommohu gede ikke macciishshaminonke.”

6. (a) Batinye songo giddo gudumaaleho farciꞌrate kaaꞌlitara qineessinanni heeꞌnoonniti wole doogo hiitteeti? Tini doogo, jajjabba katammara gudumaaleho farciꞌrate kaaꞌlitannote addi doogonni baxxitannohu mayinniiti? (b) Songuwa gudumaaleho farcidhanno wote mimmitu ledo buusama dandiitannohu hiittoonniiti?

⁶ Songo Qineessiteenna Gudumaaleho Farciꞌra: Jajjabba katammara gudumaaleho farciꞌrate kaaꞌlitanno qixxaawono agurranna, songonnihu batinyu cimeeyyete bisi killilensa giddo gudumaaleho farciꞌnannita wole qixxaawo qineessanno gede assinanni heeꞌnoonni. Tenne qixxaawo garinni, halashshaano basetenni base haaꞌne haꞌra dandiinanniha borrote madardara horoonsidhe songonsa killile giddo lowo manni saꞌꞌannowa sabbakkanno. Tini qixxaawo, jajjabba katammara gudumaaleho farciꞌrate kaaꞌlitannote addi doogonni baxxitinote; korkaatuno, jajjabba katammara gudumaaleho farciꞌrate kaaꞌlitanno doogonni farcidhara maddambanniri addi addi songonni fultinoreeti, qoleno farcidhannohu sinu biiro doortino katammaraati.—“Mimmitu Ledo Buusama Hasiissanno” yitanno saaxine lai.

7. Hasiisannoha ikkiro, cimeeyye songonsa killile giddo gudumaaleho farciꞌnanni qixxaawo assa dandiitannohu hiittoonniiti?

⁷ Songote cimeeyye, songonsa killile giddo lowo manni saꞌꞌanno hodhaancho nooronna teꞌee buuxxanno, hattono gudumaaleho farciꞌrate qixxaawo assa hasiissannoronna teꞌee wossantanno. Lawishshaho, hodhishshu basera, gudumaaleho, paarkete, mannu haꞌrama batiꞌranno dooggara, daddalu addaraashuwara, hospitaalete, kiliniketenna jajjabba hintsuwa qooxeessira borrote kursenna borro worre doyissinanni gaare wora dandiinanni. Konni garinni farciꞌrate borro haaꞌne fullanni bayichi, barrinna yanna mitte ikkituro roore lowo horo uyitanno. Mitu bayichi, lawishshaho makeenaanchote lowo manni lekkatenni haꞌranno widiidi, borro worre doyissinannita shiima gaare haare fulate roore injaannoha ikkara dandaanno. Cimeeyye Agarooshshu Shaenna Baqqi Yiiyye! yinanni metseettanna wole borro egensiisate kaaꞌlitannota addi fayilla webisayitenke aaninni dirrisa dandiitanno. Tenne fayilla qixxeessinoonnihu gudumaaleho konni garinni farciꞌneemmo wote horoonsiꞌneemmo gedeeti. Konni garinni farcidhannori, jajjabba katammara gudumaaleho farciꞌrate kaaꞌlitannote addi doogonni farcidhannori assitanno garinni farcidhanno, hattono soqqanshote aliidi laꞌꞌaanchi aannonsa biddishsha seekkite harunsitanno. Teessosi kulinohu hasatto noosi manchi insa killilera heeꞌrannoha ikka hoogiro, Ballo Faana Gantine Kaaꞌlesi (S-43) yinanni forme rakke wonshite songote borreessaanchira aa hasiissannonsa.

8. Songote giddo gudumaaleho farciꞌrate assinoonni qixxaawo hoogguro, konni garinni farciꞌrate hiittee faro horoonsiꞌra dandiinanni?

⁸ Killileꞌne Giddo Soqqamatto Wote Gudumaalehono Farciꞌri: Mite songora borrote kurse woy borro worre doyissinanni gaare haaꞌne fulle farciꞌra hasiissanno yinanni gede assannohu lowo manni saꞌꞌanno bayichi woy hodhaancho hooggara dandiitanno. Ikkirono, tenne songuwara noo halashshaanono killilensa giddo soqqantanno wote gudumaaleho farciꞌrate hedo heedhansara hasiisanno. Killileꞌne giddo dikko woy suuqqa no? Paarke woy mannu gamba yaannowi no? Yannate kiiro dagoomu gamba yee hasaawanno bayichi no? Togoowi nooha ikkiro, atino gudumaaleho farcidhe hagiidha dandaatto.

9. Mannu noowa baalankawa sabbakate diinaggaawa hasiissannonkehu mayiraati?

⁹ Yihowa fajjo, “duuchunku gari manni gatanno gedeetinna halaalunnita gara ikkitino egenno afiꞌranno gedeeti.” (1 Xim. 2:4) Konni daafira, wolqanke assitu deerrinni goofimarchu daara albaanni lowo mannira Maganu Mangiste sokka kulate sharrammanni heeꞌnoommo. (Mat. 24:14) Lowo qooxeessira manna qaensara marre afiꞌra qarraho. Togoo manna qaensara hoongummoro wolewa anfe hasaawinseemmo faro afiꞌnammora dandiineemmo. Mitu manni dancha duduwo macciishshanno faro afiꞌrannohu gudumaaleho farciꞌniro calla ikkara dandaanno. Konnira, mannu noowa baalankawa sabbanke soqqanshonke seekkine soqqammo.—2 Xim. 4:5.

[Qoola 5 noo misile]

Mimmitu Ledo Buusama Hasiissanno

Mittu qooxeessira heedhanno songuwa giddo noo halashshaano mito wote mitte doogora, mitte makeena uurrisiꞌnanni basera, hattono mitte daddalu basera woy mitte hodhishshu basera farcidhannota kultanno rippoorte iillitinonke. Addi addi songo halashshaano mittu hintsi giddo wosinu ofollannowa, mitirira tara agadhinannite mitte basera woy woxe kaffalle uduunne hayishshiishiꞌnannite mitte basera metseetta wortinonna mitte daddalu basera sabbakkino woti no. Kuri baalunku halashshaano farcidhinohu mitte yannara ikka hoogirono, daddalu base annuwanna olluu manni tennenni caaccaawino. Konni daafira, gudumaaleho farcidhinanni wote songoꞌne killile giddonni fultinikki sabbakkiniro roore woyyate.

Halashshaano qooxeessinsara noo songo killile giddo gudumaaleho soqqama hasidhuro, songonsaha soqqanshote aliidi laꞌꞌaancho xaꞌma hasiissannonsa. Hakkiinnino isi teꞌe songoha soqqanshote aliidi laꞌꞌaancho fajjo xaꞌmanno. Addi addi afoo coyidhanno songuwa mittu qooxeessira soqqantara maddamboonniha ikkiro, olluu manni caaccaawannokki gede soqqanshote aliidi laꞌꞌaano mimmitu ledo buusama hasiissannonsa. Dancha gede buusantannoha ikkiro, baalunku coyi “garunninna amanyootunni” ikkanno.—1 Qor. 14:40.