Masaalaanote Haꞌruma Hadhe—Sofooniyaasi
1. Sofooniyaasi masaalaancho ikke soqqaminohu hiittoo yannaraati? Isi ninkera dancha lawishsha ikkinonkehu hiittoonniiti?
1 Yanna K.A. lamalki sani bociraati; hakkawaro Yihudu manni Baꞌꞌaali faajjete magansiꞌranni no. Busha Nugusa Amooni mulella shine kaꞌnoonni; hakkiinnino aju Nugusi Iyyoosiyaasi gashsha jammare no. (2 Zee. 33:21–34:1) Hatte yannara Yihowa firdete sokkasi kulanno gede Sofooniyaasi soyi. Sofooniyaasi Yihudunnite nugussate maate wido ikkikki digatino; ikkirono, Yihowa Yihudu gashshoote qaxxaasara kainota kuli wote mulluri gede asse dicoyiꞌrino. (Sof. 1:1; 3:1-4) Ninkeno Sofooniyaasinte gede worboota ikkatenna maatenke ledo noonke fiixoomi Yihowa magansiꞌneemmokki gede guficho ikkannonketa hooꞌlate sharrama hasiissannonke. (Mat. 10:34-37) Sofooniyaasi mayitanno sokka duduwino? Duduwino sokka mayi guma abbitu?
2. Yihowa hanqi barra gate saꞌꞌate maa assa hasiissannonke?
2 Yihowa Hasidhe: Yihowa hanqi barra manna gatisannohu iso umosi callaati. Konni daafira, Sofooniyaasi Yihudu manna yanna gatte heedheenna Yihowa hasidhe, keeraanchimma hasidhe, hattono shooshanqe hasidhe yee amaalino. (Sof. 2:2, 3) Yannankerano manna gatisannohu Yihowa callaati. Ninkeno Sofooniyaasinte gede mannaho Yihowa hasidhe yine kulleemmo; ikkollana ninke uminke ‘Yihowa harunsa agurre wolewa hingeemmokki’ gede murciꞌne kaꞌꞌa hasiissannonke. (Sof. 1:6) Qoleno Qullaawa Maxaafa seekkine xiinxallinenna biddishsha aannonke gede huuccatto assiꞌne Yihowa hasiꞌra hasiissannonke. Hattono amanyootenke xuru nookkiha assiꞌne keeraanchimma hasiꞌneemmota leellinsheemmo. Yihowa dirijjite uyitannonke biddishshira maahoyye yine galleemmohanna yinoonninkere keeshshinummokkinni assineemmoha ikkiro shooshanqe hasiꞌneemmota leellinsheemmo.
3. Soqqanshote noonketi dancha lao baꞌannonkekki gede assiꞌra hasiissannonkehu mayiraati?
3 Dancha Guma: Sofooniyaasi duduwinoti firdete sokka mito Yihudu manna, roorenkanni shiimu heeꞌrenni Yihowa hasiꞌra jammarinoha aja Iyyoosiyaasi loosoho kakkaꞌꞌanno gede assitino. Iyyoosiyaasi gedensaanni kaphu maganna gobbatenni hunate lowonta mixiꞌre kaino. (2 Zee. 34:2-5) Yannankerano, mitu Maganu Mangiste wixi doogote qaccera, mitu caraame uullara, woy utu mereero uwannoha ikkirono mitu kayinni danchu bushshira uwe guma laalanno. (Mat. 13:18-23) Maganu Mangiste guma diinaggaambe tuqisate sharramanke agura hoongummoro, Yihowa assineemmore maassiꞌrannota dihuluullammeemmo.—Far. 126:6.
4. ‘Yihowa agadha agura’ hasiissannonkekkihu mayiraati?
4 Mitu Yihudu manni Yihowa mittoreno diassanno yee hedino. Ikkollana, Yihowa bayiru barrisi gambise dayinota xawise kulinonsa. (Sof. 1:12, 14) Gatannohu iso golo assiꞌrinoho callaho. (Sof. 3:12, 17) Konni daafira, ‘Yihowa agadha agurrummokkinni’ ammanate roduuwinke ledo mittimmatenni bayiru Maganinkera hagiirrunni soqqammo!—Sof. 3:8, 9.