Soqqanshonke Isilanchimma Woyyeessiꞌra—Haaruudde Qajeelsa

Hasiissannohu Mayiraati? Haaruuddu Yesuusi harunsaano isi hajajinore “baalankare” agadhitanno gara rosa hasiissannonsa; togo assate halaale wolootaho farciꞌrano rosa hasiissannonsa. (Mat. 28:19, 20) Batinye haaruudde rosaano Tiokiraasennihu Soqqanshote Rosi Minira borreessamate qixxaabbinohanna maatensara woy jaallansara farciꞌra hanaffinoha ikkara dandaanno. Ikkirono, insa rosiinsanninsa roso naaddanninna Yihowa baalunku manni dancha duduwo macciishshara hasiꞌrannota buuxxanni hadhu kiiro qanchu soqqanshora soqqama hasiꞌransa digatanno. (Rom. 10:13, 14) Haaruuddu cuuantinokki halashshaano ikkitu gedensaanni dancha gede qajeelansa roore ayyaanaamittete lophitanno gedenna soqqanshote waajjitannokkire ikkitanno gede kaaꞌlitannonsa.—Luq. 6:40.

Tenne Assa Dandiinanni Gara:

Haaro halashshaano sabbakatenna rosiisate hasiissannonsa borro afidhanno gede kaaꞌlensa. Soqqanshote borsaꞌne biddi assidhinanni garanna adhitine fultinannita mitte mittenta borro horoonsidhinanni gara kullensa.
Maganu Mangiste Soqqanshonkera fulannoha hasaawu bitima doortine miteenni rosiisidhe. Haaruuddu hasaawu bitima uminsa yaattonni coyidhanno gede jawaachishshensa. Soqqanshote Rosi Mini maxaafira (Amaaru Afoo) qoola 82 noo mamiwaro giddonni qooxeessiꞌnera sumuu yitannota doortine rosiisidhe. Qoleno bikkunni uddiranna seesa hasiissannohu mayiraatiro kullensa.—2 Qor. 6:3, 4.
Sabbakate dandoonsa woyyeessidhanni hadhanno garinni qajeelsensa. Haaro halashshaanora soqqanshote qoqqowi kaarde leellishshensa, hattono minunni mine soqqammanni wote horoonsiꞌnanni woraqata horoonsidhanno gara kullensa. Qoleno hasatto noosi mancho borreessite amaddanno gara leellishshensa. Hattono jw.org nna Daga Baalate Hasiisannoha Dancha Duduwo yitanno buukileete soqqanshote horoonsidhanno gara leellishshensa. Hasatto noosi mancho hasattosi lexxitanno gede assitanno gara kullensa.—1 Qor. 3:6.
Cincitinannirenna galattinannire ikke. (Law. 25:11) Dancha lawishsha ikke. Diinaggaabbinenna manna kaaꞌlate hasatto nooꞌneta leellishanno garinni soqqamaꞌne galte hosse dancha guma abbitanno.

Konni Aganira Togo Assate Woꞌnaalle:

Minunni mine soqqantinanni wote, manna galagaltine hasaawisate woy Qullaawa Maxaafa xiinxallisate hadhinanni wote, Qullaawu Maxaafi rosaanchiꞌne ledo hadhe. Qullaawu Maxaafi rosaanchi nooꞌnekkiha ikkiro gari woꞌnaalshi noonsakki halashshaano ledo hadhe.