Qullaawu Maxaafi Roso Yaanno Maxaafira Nooha Addi Addi Gafa Danchu Garinni Horoonsidhe

Qullaawu Maxaafi rosaanchi Qullaawu Maxaafi addinta mayyee rosiisannoro rosironna rosinore loosunni leellishiro ayyaanaamittetenni lophanno hattono ayyaanu guma laalanno. (Far. 1:1-3) Qullaawu Maxaafi Roso yaanno maxaafira nooha addi addi gafa dancha gede horoonsiꞌneemmoha ikkiro, rosaanchinke ayyaanaamittetenni lophanno gede kaaꞌla dandiineemmo.

Fooliishshote Bitimira Noo Xaꞌmuwa: Mitte mittente fooliishsho hanafora hatte fooliishsho giddo dawaro qolloonni xaꞌmuwa no. Kuri xaꞌmuwa rosaanchiꞌne hatte fooliishshora noo roso rosate quqquxamanno gede assate horoonsiꞌra dandiitinanni. Woy mitte mittente xaꞌmora haranse umisi hedo coyiꞌranno gede xaꞌma dandiitinanni. Coyiꞌrino hedo gara ikka hooggurono, hakka wotenni digaraho yine kula dihasiissanno. Isi coyiꞌranno hedo, roore xawissine kula hasiissannoꞌne coyi maatiro bade afate kaaꞌlitannoꞌne.—Law. 16:23; 18:13.

Guwuursha: Qullaawu maxaafi rosaanchiꞌne rosino roso huwatinohanna ammaninoha ikkiro, rosanni noo rosi ledo xaado afiꞌrino guwuursha umisinni nabbawanno gede kultinasira dandiitinanni. Aantanno xiinxallora xaaddinanni wote, nabbawino guwuursha huwatinoronna teꞌee buuxate shiima yanna hasaawa dandiitinanni. Kayinni hasiissannoha ikkiro xiinxallissinanni yannara guwuursha mitteenni hasaawa woy guffa nabbabbine balaxxine qixxeessitinoonni xaꞌmuwa xaꞌmitinanni hasaawa dandiitinanni.

Killasu Saaxine: Mitte mittente fooliishsho jeefora nooti killasu saaxine bitimaho noo xaꞌmuwara dawaro qoltannote. Tenne saaxine giddo noo hedo rosaanchiꞌne rosinore wodanchinoro woy qara hedo xawise kula dandaannoronna teꞌee afate horoonsiꞌra dandiitinanni. Mitte mittenta hedonna hakko noota baalanta qummeeshshuwa qoonqoꞌne fushshitine mitteenni nabbabbe. Hakkiinnino, rosaanchu qummeeshshuwa horoonsiꞌre hakko noo hedo gara ikkitinohu mayiraatiro xawisanno gede xaꞌme.—Looso 17:2, 3.