Lawishsha Ikkanno Hasaawa Horoonsiꞌra Dandiinanni Gara

Arfaasa 2018nni hanafe, Kiristaanu Heeshshonna Soqqansho Xiinxallote Maxaafichora aaniidi qoolira lawishsha ikkanno hasaawi fulanni keeshshino. Lawishsha ikkanno hasaawa horoonsiꞌra dandiineemmohu hiittoonniiti?

Rosaanote Kifile Shiqinsheemmo Woyite: Lawishsha ikkanno hasaawi hunda noo xaꞌmo, qummeeshshanna wolu woyitira yaannohuwa noo xaꞌmo horoonsiꞌra hasiissannonke. Ikkirono, lawishsha ikkanno hasaawa leellishshanno viidiyo giddo noore baalare horoonsiꞌra hasiissannonke yaa diꞌꞌikkino. Lawishshaho manna hasaawinseemmo yannanna bayicho, hasaawu bitima, hasaawinseemmo garanna wolere uminkenni doodha dandiineemmo. Bande kulloonnikkiha ikkiro nafa, Rosiisate Horoonsiꞌneemmo Borro giddonni mitte borro ela dandiineemmo.

Soqqammeemmo Woyite: Lawishsha ikkanno hasaawa qixxeessinoonnihu kaaꞌlitanno hedo afiꞌneemmo gedeeti. Qaete anni hasatto noosiha ikkironna roore afa hasiꞌriro, galagalle marre hasaawinsanni woyitira qixxeessinoonni xaꞌmo horoonsidhine leddine hasaawa dandiitinanni. Lawishsha ikkanno hasaawa kiꞌnera injaanno garinni biddi assiꞌra woy gudissine soorra dandiitinanni. Qooxeessiꞌne manna roore baxisannohu sai aganira fulinoho lawishsha ikkanno hasaawaatinso wole qummeeshshaati? Mannu roore hasaawa hasiꞌrannohu haarote fultino odootinso qooxeessaho ikkinoreeti? Lawishsha ikkanno hasaawa horoonsiꞌneemmo gari ikkihano ikkiro, mixonke ‘dancha duduwo’ kulate dandiinummore baala assate.—1Qo 9:22, 23.