Yihowa Jawaachishannohe

1. Yaandeemmo gede assannonkeri maa ikkara dandaanno? Yaaddo mayine hendeemmo gede assitankera dandiitanno?

BUUTO yaachishannori iille egenninohe?b Wolootu coyidhinori woy assitinori xissiisinohe daafira yaadoottoha ikkara dandaanno. Hattono, ati umikki coyiꞌroottori woy assoottori yaachishinoheha ikkara dandaanno. Lawishshaho, mitte soꞌro loosootto daafira Yihowa horo gatona diyaannoe yite yaadoottoha ikkara dandaanno. Yaaddo waaddannoehu ammana ajjinoehuraati woy busha mancho ikkoommohuraati yite hedattoha ikkiro roore yaadattora dandaatto. Ikkina hatto yee heda garahoni?

2. Yaaddo amaddannonkehu ammana ajjinonke daafira ikkinokkita leellishshannoti Qullaawu Maxaafi giddo kulloonni lawishshuwa hiikkuriiti?

² Hanni Qullaawu Maxaafi giddo kulloonniha mito lawishsha laꞌno. Masaalaanchu Saamueeli ama Haanna kaajja ammana noose manchooti. Ikkirono, ise ginase waaddinose daafira buuto yaaddino. (1 Sam. 1:7) Soqqamaasinchu Phaawuloosino, jawaata ammana noosiha ikkirono, songuwate daafira ‘yaadino.’ (2 Qor. 11:28) Moote Daawitino kaajjado ammana noosihonna Yihowa lowo geeshsha baxannosiho. (Soq. 13:22) Ikkirono, isi cubbo loosino daafira buutote yaaddo amaddinosi. (Far. 38:4) Yihowa insa mitto mittonka jawaachishinonsa. Hanni ninke insa lawishshinni maa ronseemmoro laꞌno.

AMMANANTINO MANCHO HAANNA LAWISHSHINNI MAA RONSEEMMO?

3. Wolootu coyidhinori yaandeemmo gede assankera dandaannohu hiittoonniiti?

³ Wolootu gara ikkinokkire coyidhunkero woy assitunkero yaandammora dandiineemmo. Xissiisiꞌneemmo gede assinonkehu jaalanke woy fiixanke ikkiro isinni roore yaandammora dandiineemmo. Hakko manchi ledo noonke jaaloomi xaate baino yine yaandeemmoha ikkara dandaanno. Mito woyite mittu manchi gari garimmo laikkinni coyiꞌrinori urdete gede qasankera dandaanno. (Law. 12:18) Woy mitootu affanni heedhe xissiissankera yite qaalunni qassankera dandiitanno. Mitte wedellitte rodoora togoori iillinose. Ise togo yitino: “Boodu dirira albaanni mitte dancha jaalaꞌyaati yee hedoommati interneetete widoonni suꞌmaꞌya huntino. Tennera lowo geeshsha xissiisiꞌroomma, hattono dadilloomma. Tini ammaneemma jaalaꞌya togo xissiisannore mayira assituro diafoomma.” Aterano, jaalikki woy fiixikki xissiisannore assinoheha ikkiro Haanna lawishshinni lowore rosa dandaatto.

4. Haannara hiittoo qarri iillinose?

⁴ Haannara lowo qarri iillinose. Ise lowo diro ila hoogge keeshshitino. (1 Sam. 1:2) Israeelete budira ilaweelo mancho mannu rumantinote gede asse laꞌꞌanno. Tini Haanna lowo geeshsha saalsiissinose. (Kal. 30:1, 2) Haanna roore yaaddanno gede assinori, minaannisera ooso iltinoti Finaana yinanniti wole galte heeꞌrate. Haanna ginase Finaana ‘qussitanni caacceessitinose.’ (1 Sam. 1:6) Umi qara Haannara iillinoseri lowo geeshsha dadillisinose. Konni daafira ‘ise wiꞌlitanni ita hooggino.’ Hattono, lowo geeshsha ‘caaccaabbino.’ (1 Sam. 1:7, 10) Ikkina, Haanna shesho afidhinohu hiittoonniiti?

5. Huuccatto Haanna kaaꞌlitinosehu hiittoonniiti?

⁵ Haanna giddoseta huuccattotenni Yihowara hasaaphitino. Ise huuccatto assidhuhu gedensaanni iillinosere Kakkalaanote Biilira Eelira kuꞌlitino. Hakkiinni Eeli “Israeelete Magani huucciꞌroottare oohena, keerunni haꞌri” yiinose. Tini kaaꞌlitinoseri nooyya? Ee, Haanna “hakkiinni kaꞌe hadhe sagaleno ittu. Hakkunni gedensaanni albisera dadillu dileellino.” (1 Sam. 1:17, 18) Huuccatto Haanna wirro keere afidhanno gede kaaꞌlitinose.

6. Haanna lawishshinninna Filiphisiyusi Sokka 4:6, 7 noo hedonni huuccattote daafira maa ronseemmo?

⁶ Jaante huucciꞌnummoro wirro keere afiꞌra dandiineemmo. Haanna seeda huuccatto assidhino. (1 Sam. 1:12) Ninkeno, lowo yanna gaaꞌmine yaaddonke, waajjishinonkerenna laanfenke Yihowara hasaapha dandiineemmo. Huucciꞌneemmo woyite doorantino qaalla horoonsiꞌra hoongammora dandiineemmo. Qoleno, huucciꞌneemmo woyite heqqifantanni aaraambe coyiꞌneemmo yanna heedhara dandiitanno. Ikkirono, Yihowa daafuroommo yee huuccattonke macciishsha digiwanno. Qarrinke daafira huucciꞌneemmoha ikkirono Filiphisiyusi Sokka 4:6, 7 noo amaaleno qaaga hasiissannonke. (Qummeeshsha nabbawi.) Phaawuloosi huuccattotenni Magano galaxxa hasiissannonketa coyiꞌrino. Yihowa galaxxineemmo gede assannonkehu batinyu coyi no. Lawishshaho, heeshsho uyinonkehura, kalaqinori daafira, hattono, geedote baxillisiranna dhagge ikkitanno hexxo uyinonke daafira iso galaxxa hasiissannonke. Haanna lawishshinni wolere maa ronseemmo?

7. Haannanna minaannise duucha woyite maa assitanno?

⁷ Haannara qarrise hooꞌlinokkiha ikkirono, minaannise ledo ganyite Yihowa magansiꞌnanniwa Seelo haꞌra diagurtino. (1 Sam. 1:1-5) Kakkalaanote Biili Eeli Haanna ‘huucciꞌroottare Yihowa oohe’ yee jawaachishinosehu xaadooshshu dunkaana martinowaati.—1 Sam. 1:9, 17.

8. Gambooshshuwa kaaꞌlitannonkehu hiittoonniiti? Xawisi?

⁸ Ganyine songote gambooshshe haaꞌneemmoha ikkiro, wirro keere afiꞌra dandiineemmo. Duucha woyite gambooshshu hanafora Maganu ayyaani ledonke ikkanno gede huucciꞌneemmo. Keeru qole hakko ayyaani gumi wodooti. (Gal. 5:22) Yaande heeꞌne nafa gambooshshe haaꞌneemmoha ikkiro, Yihowanna roduuwinke jawaachishshannonke; hattono wirro giddoyidi keere afiꞌneemmo gede kaaꞌlitannonke. Yihowa jawaachishannonke doogga giddo qara huuccattotenna gambooshshuwate. (Ibi. 10:24, 25) Hanni xa Haanna lawishshinni ronseemmoha wole roso laꞌno.

9. Haanna yaachishannori dihoꞌlino yineemmohu mayiraati? Ikkirono, ise kaaꞌlinoseri maati?

⁹ Haanna yaachishannori hakkawotenni dihoꞌlino. Ise xaadooshshu dunkaaniwa Yihowa magansidhe minisera higguhu gedensaannino ginase Finaana ledo heedhino. Qullaawu Maxaafi Finaana akati soorraminota dikulanno. Hakko daafira Haanna ginase qussitannase cincite heedhinoha ikkara dandaanno. Ikkirono, Haanna wirro giddoyidi keere afidhe heedhino. Ise qarrase baala Yihowara kuꞌlituhu gedensaanni wirro diyaaddino. Haanna Yihowa sheshifachishannosenna jawaachishannose gede assidhino. Qoleno, boode yanna gedensaanni Yihowa isera ila oye maassiꞌrinose!—1 Sam. 1:19, 20; 2:21.

10. Haanna lawishshinni maa ronseemmo?

¹⁰ Yaachishannonkeri hoꞌla hoogiro nafa wirro keere afiꞌra dandiineemmo. Jaante huucciꞌneemmohanna ganyine gambooshshe haꞌneemmoha ikkiro nafa mitu qarri aaninkenni hoꞌla hoogara dandaanno. Ikkirono, Haanna lawishshinni, Yihowa dadillino wodananke sheshifachishannokkinna jawaachishannokki gede assasira dandaannori nookkita ronseemmo. Yihowa horonta dihawannonke; isi hexxo mudha hoongummoro, bayichonko woy gale hose ammanamankera maassiꞌrannonke.—Ibi. 11:6.

SOQQAMAASINCHU PHAAWULOOSI LAWISHSHINNI MAA RONSEEMMO?

11. Phaawuloosira iillinosihu yaachishannosi coyi maati?

¹¹ Phaawuloosi yaadanno gede assannori lowori no. Lawishshaho, isi baxannori ammanate roduuwisira qarru iillinonsa daafira buuto yaadino. (2 Qor. 2:4; 11:28) Phaawuloosi sabbakannota gibbannori duucha higge gantinosi, hattono usuru minira eessitinosi. Lawishshaho, isi ‘hoongenna’ wole yaachishanno coye cince heeꞌra hasiissinosi. (Fil. 4:12) Hatte taaenkura ajayi ajeenna sase higge haꞌranni noo markaawe hiqqaqqantino; tini isi lowo geeshsha yaadanno gede assitinositi dihuluullissannote. (2 Qor. 11:23-27) Phaawuloosi iillinosi qarra dandee heeꞌranno gede kaaꞌlinosiri maati?

12. Phaawuloosi duhi shaalanno gede kaaꞌlinosiri maati?

¹² Phaawuloosi ammanate roduuwisira qarru iillinonsa daafira yaadinoha ikkirono, iillinonsa qarra baala isi callu tirate diwoꞌnaalino. Phaawuloosi dhukasi afinoho. Isi songo towaata wolootu kaaꞌlitannosi gede assino. Lawishshaho, isi ammanantino roduuwira Ximootewoosiranna Tiitora lowo looso uyino. Kuri roduuwi Phaawuloosira duhasi shaashshitinoti dihuluullissannote.—Fil. 2:19, 20; Tit. 1:1, 4, 5.

13. Cimeeyye Phaawuloosi lawishsha harunsa dandiitannohu hiittoonniiti?

¹³ Woloota kaaꞌleꞌꞌe yiiyye. Xaa yannarano Phaawuloosi gede shaqqadda songote cimeeyye roduuwaho qarru iillanno woyite yaaddanno. Ikkirono mittu cimeessi callaho songo woꞌma kaaꞌla duha ikkitasira dandiitanno. Hakko daafira, dhukasi afino cimeessi ikkadda ikkitino roduuwa kaaꞌleꞌꞌe yaanno; hattono Yihowa hoshsha towaata kaaꞌlitanno gede wedella roduuwa qajeelsanno.—2 Xim. 2:2.

14. Phaawuloosi mayyee diyaadino? Ninke isi lawishshinni maa ronseemmo?

¹⁴ Sheshifachishannohu hasiisannoꞌneta ammanne. Phaawuloosi umosi heeshshi assannoha ikkino daafira, jaallasiwiinni shesho afiꞌra hasiissannosita afino. Isi wolootu jawaachishshinosi daafira mannu laafaho yaannoe yee horo diyaadino. Hatteentenni, isi Filimoonira borreessino sokkara “baxillikki lowo hagiirrenna jawaante uyinoe” yiino. (Film. 7) Phaawuloosi qarru iillisi woyite baasa jawaachishshinosire wole ledosi soqqantinoreno kulino. (Qol. 4:7-11) Ninkeno, umonke heeshshi assine jawaante hasiissannonketa ammannummoro, roduuwinke hagiirrunni kaaꞌlitannonke.

15. Phaawuloosi qarru iille noosi yannara jawaante afiꞌrinohu hiittoonniiti?

¹⁵ Maganu Qaale addaxxe. Phaawuloosi Qullaawa Borro jawaachishshannosita afino. (Rom. 15:4) Isi Qullaawa Borronni iillannosi fonqolo cince saꞌꞌate kaaꞌlitannosi hayyo afiꞌrino. (2 Xim. 3:15, 16) Phaawuloosi layinkimeeshsho Roomaho usurame noo yannara mulenni reyannoha lawinosi. Ikkina Phaawuloosi hattee qarru yannara maa assiyya? Isi Ximootewoosi Qullaawa Borro “xaaxo” haaꞌre rahe isiwa maranno gede kulinosi. (2 Xim. 4:6, 7, 9, 13) Mayira? Tini xaaxo Phaawuloosi hojju xiinxallo assiꞌrate horoonsiꞌrannota Ibiraawootu Afiita Qullaawa Borro gafa ikkitukkinni digattino. Ninkeno, Phaawuloosi gede Maganu Qaale ganyine xiinxallineemmoha ikkiro, aye geeshshi fonqoli iillinkerono, Yihowa Qullaawa Borro widoonni jawaachishannonke.

MOOTE DAAWITI LAWISHSHINNI MAA RONSEEMMO?

16. Daawiti isiniitira yaaddo abbiꞌrinohu hiittoonniiti?

¹⁶ Moote Daawiti shota ikkinokki cubbo loosino daafira tiiꞌꞌisi bushiishinosi. Isi Bersaabehi ledo foorino; hakkiinni minaannase shiishiishe loosino cubbo maaxate woꞌnaalino. (2 Sam. 12:9) Umi qara Daawiti tiiꞌꞌisi yaannosire lashshi assino. Tini ayyaanaamittesi calla ikkikkinni mannimmasinna surresino gawajjitino. (Far. 32:3, 4) Daawitira loosino cubbi abbinosi yaaddo cince saꞌꞌanno gede kaaꞌlinosiri maati? Ninkeno lowo soꞌro loonsummoro mayi kaaꞌlannonke?

17. Faarso 51:1-4 noo hedo Daawiti giddosinni maaro einota leellishshannohu hiittoonniiti?

¹⁷ Maaro afiꞌrate huuccidhe. Gedensaanni Daawiti Yihowa huucciꞌrino. Isi loosino cubbo kule giddosinni maaro eino. (Faarso 51:1-4 nabbawi.) Tini lowo geeshsha fooliishshiishshinosi! (Far. 32:1, 2, 4, 5) Kiꞌneno, shota ikkinokki cubbo loossiniro, maaxate woꞌnaaltinoonte. Hatteentenni cubboꞌne huuccattotenni Yihowara kulle. Hatto assitiniro, tiiꞌꞌiꞌne bushiishanni abbino yaaddonni gaꞌlabbo afidhinanni. Ikkirono, Yihowa ledo nooꞌne jaalooma bashshowa qolate huuccattotenni sainore assa hasiissannoꞌne.

18. Daawiti seejjinisi yannara maa assino?

¹⁸ Seejjo adhe. Yihowa masaalaanchu Naataani, Daawitira cubbosi kulanno gede soyi woyite Daawiti dimoromino woy cubbosi ajishate diwoꞌnaalino. Isi Bersaabehi minaanna calla ikkikkinni baalunkunni roore Yihowa baddalinota ammanino. Daawiti Yihowa uyinosi seejjo adhino; Yihowano maarinosi. (2 Sam. 12:10-14) Ninkeno, shota ikkinokki cubbo loonsummoro Yihowa towaattankera shoomino cimeeyyera kula hasiissannonke. (Yai. 5:14, 15) Qoleno, moroma dihasiissannonke. Uyinanninke seejjo ikkitutano ikkituro, adhine bayichonko loosunni leellinshummoro, mulenni wirro keerenna hagiirre afiꞌneemmo.

19. Maa assate murciꞌra hasiissannonke?

¹⁹ Mitte hinge loonsoommo soꞌro lende loonseemmokki gede qoropha hasiissannonke. Moote Daawiti loosino soꞌro wirro loosannokki gede Yihowa kaaꞌlo hasiissannosita afino. (Far. 51:7, 10, 12) Daawiti Yihowa maarisihu gedensaanni busha hedo hooꞌlate murciꞌrino. Hakko daafira isi wirro giddoyidi keere afiꞌrino.

20. Maarosira Yihowa galanteemmota leellisha dandiineemmohu hiittoonni?

²⁰ Maaro afiꞌrate huucciꞌneemmohanna seejjo adhineemmoha, hattono loonsoommo soꞌro lende loonseemmokki gede sharrammeemmoha ikkiro maarosira Yihowa galanteemmota leellisha dandiineemmo. Hatto assinummoro, wirro giddoyidi keere afiꞌneemmo. Shota ikkinokki cubbo loosinohu Jeemsi yinanni rodii tini halaale ikkitinota huwatino. Isi togo yiino: “Cubboꞌya cimeeyyete kuꞌlummota duhu aaniꞌyanni hoꞌlinoe. Qoleno, wirro surrete keere afiꞌroommo.” Yihowa “dadillunni hiiqqantinorira mule” noota hattono, “hexxo hoogginore” gatisannota afanke lowo geeshsha jawaachishshannonke.—Far. 34:18.

21. Yihowa jawaachishannonke gede maa assa hasiissannonke?

²¹ Goofimarchu yanna gambissanni hadhu kiiro yaandeemmo gede assannonke coyi lexxara dandaanno. Yaachishannori tuncu yiihero, keeshshittokkinni kaaꞌlannohe gede Yihowa huucciꞌri. Qullaawa Maxaafa diinaggaabbe xiinxalli. Haanna, Phaawuloosinna Daawiti lawishsha harunsi. Yaachishannohere badde afa dandaatto gede kaaꞌlahera iimi Annakki huucciꞌri. (Far. 139:23) Hakko iso wolqakkira aleenni ikkinori tuncu yaannohe woyite duhakki isi aana tuqqi. Hatto assittoro atino faarsaasinchu gede Yihowara “yaaddonna dadillu amadie yannara, sheshifachishshe, hagiirsiisoottoe” yite faarsatto.—Far. 94:19.