Yihowara Noohe Baxillinna Galati Cuuamatto Gede Assannohe

1-2. Soqqamaasinete Looso 8:27-31, 35-38 kultanno garinni Itiyophiyu manchi cuuamanno gede assinosiri maati?

CUUANTE Kiristoosi rosaancho ikka hasiꞌratto? Baxillunna galatu batinyu manni Kiristoosi rosaano ikkanno gede assinonsa. Hanni biꞌre Itiyophiyu mootittera soqqaminohu mittu manchi lawishsha laꞌno.

² Kuni manchi Qullaawa Borronni rosinore bayichonkonni loosunni leellishino. (Soqqamaasinete Looso 8:27-31, 35-38 nabbawi.) Isi hatto assanno gede kakkayisinosiri maati? Kuni manchi faradi gaaretenni haꞌranni heeꞌre, Isayaasi maxaafa nabbawasi Maganu Qaale naadannota leellishshanno. Qoleno Filiphoosi hasaawisisihu gedensaanni Yesuusi assinosire albinni roore naadino. Kuni manchi Yerusaalame haꞌranni noohu mayiraati? Yihowa baxanno daafiraati. Tenne mayinni anfeemmo? Isi Yerusaalame haꞌranni noohu Yihowa magansiꞌraraati. Kuni manchi heeshshonsa halaalaanchu Maganira sayisse uyitino gosa ledo Yihowa magansiꞌrara albi ammaꞌnosi agurikki digatino. Yihowara noosi baxilli heeshshosi Maganoho sayise oye cuuame Kiristoosi rosaancho ikkanno gede assinosi.—Mat. 28:19.

3. Mittu manchi cuuamannokki gede assasira dandaannori maati? (“Wodanikki Hiittooho?” yitanno saaxine lai)

³ Yihowara noohe baxilli cuuamatto gede kakkayisannohe. Baxillu cuuamattokki gedeno assahera dandaanno. Hiittoonni? Hanni mito lawishsha laꞌno. Ammantannokki maatekkinna jaallakki lowo geeshsha baxattohanna cuuamummoro insa gibbannoe yite yaadattoha ikkara dandaanno. (Mat. 10:37) Woy Maganu giwannota afoottoha baxatto rosicho agura qarra ikkitinoheha ikkara dandaanno. (Far. 97:10) Woy kaphu ammaꞌno ayirrissanno ayyaanna ayirrissanni lophoottoha ikkara dandaanno. Ayyaanna ayirrinsanni woyite assinannire qaagatto woyite hagiidhattoha ikkara dandaanno. Hatto ikkiro, Yihowa hagiirsiissannokki ayyaanna ayirrisa agura qarra ikkitahera dandiitanno. (1 Qor. 10:20, 21) Konnira, “Baalunkunni roorse aye woy maa baxeemmo?” yite ateneeto xaꞌma hasiissannohe.

BAALUNKUNNI ROORSITE BAXA HASIISSANNOHEHU AYETI?

4. Cuuamatto gede kakkayisannohehu qaru coyi maati?

⁴ Baxattohunna naadattohu batinyu danchu coyi no. Lawishshaho, Yihowa Farciꞌraasine ledo xiinxalla hanafattora albaanni nafa Qullaawa Maxaafa lowo geeshsha naadattoha ikkara dandaanno. Qoleno, Yesuusa baxattoha ikkara dandaanno. Xa Yihowa Farciꞌraasine affe insawa aana hanafoottoha ikkara dandaanno. Kayinni kuriuu dancha coyibba baxakki calla heeshshokki Yihowara sayisse uyite cuuamatto gede assa hooggahera dandiitanno. Cuuamatto gede assannohehu qaru coyi Yihowara noohe baxilleeti. Baalunku coyinni roorsite Yihowa baxattoha ikkiro aye coyino woy aye manchino isira soqqamattota hoolahera wodha dihasiissannohe. Yihowara noohe baxilli cuuamatto gedenna isira ammanante soqqantanni heeꞌratto gede kaaꞌlannohe.

5. Konni birxichira maa ronseemmo?

⁵ Yesuusi Yihowa woꞌmu wodaninni, woꞌma lubbonni, woꞌma hedonninna woꞌma wolqankenni baxa hasiissannonketa coyiꞌrino. (Maq. 12:30) Yihowa lowo geeshsha baxatenna ayirrisate mayi kaaꞌlahera dandaanno? Yihowa mageeshshi geeshsha baxannonkero hiincanke ninkeno iso banxeemmo gede kakkayissannonke. (1 Yoh. 4:19) Konni birxichira Yihowara noohe baxilli lexxanno gede assiꞌratenna cuuamate maa assa hasiissannohero rosatto.

6. Roomu Sokka 1:20 kultanno garinni Yihowa daafira rosattoti mitte doogo hiitteeti?

⁶ Yihowa kalaqinore laꞌe isi daafira rosi. (Roomu Sokka 1:20 nabbawi; Aju. 4:11) Isi kalaqino muronna saada hayyosi leellishshanno gara hiinci. Hattono, bisikki dhagge ikkanno garinni kalaqamino gara hedi. (Far. 139:14) Qoleno, Yihowa arrishshote uyino wolqa hedi; hattono arrishsho lowo biliyoone ikkitanno beeddahe giddo mitte calla ikkitinota qaagi.b (Isa. 40:26) Hatto assittoro Yihowa albinni roore ayirrisatto. Ikkollana, Yihowa hayyichanna wolqaataamo ikkinota afakki isi ledo noohe jaaloomira kaimaholla. Yihowa albinni roore baxate isi daafira ledde rosa hasiissannohe.

7. Yihowa albinni roore baxate maa ammana hasiissannohe?

⁷ Yihowa ate daafira hedannota ammana hasiissannohe. Iiminna uulla Kalaqaanchi afinohetanna towaatannoheta ammana qarrissannohe? Hatto ikkiro, Yihowa ‘ninkewiinni xeertiꞌrinokkiha’ ikkinota qaagi. (Soq. 17:26-28) Isi “hedokkinna halchokki baala egennino;” hattono ‘isiwa gamba yiittoro, isino atewa gamba yaannota’ kule qaale eino. (1 Dud. 28:9) Ati xa Qullaawa Maxaafa xiinxallitanni noottohu Yihowa anewa “gamba” asseemmohe yiinohe daafiraati. (Erm. 31:3) Albinni roore Yihowa assinohere baala naadittoro isira noohe baxilli lexxanni haꞌranno.

8. Yihowa baxannonke daafira ninkeno banxeemmosita leellisha dandiineemmohu hiittoonniiti?

⁸ Yihowa baxannonke daafira ninkeno banxeemmosita leellinsheemmo doogo giddo mitte huuccattotenni isi ledo hasaawate. Huluullisannohere Maganoho hasaaphattohanna assinoheri baalira galatattosiha ikkiro, isira noohe baxilli lexxanni haꞌranno. Yihowa huuccattokkira dawaro qolanno gara laꞌꞌatto woyite jaaloomiꞌne kaajjado ikkanno. (Far. 116:1) Hattono, Yihowa afinoheta ammanatto. Kayinni Yihowawa albinni roore shiqate isi hedanno gara huwata hasiissannohe. Qoleno, ati maa assattora hasiꞌrannoro afa hasiissannohe. Togoo egenno afiꞌra dandaattohu Maganu Qaale xiinxallittoro callaati.

9. Qullaawa Maxaafa baxattota leellisha dandaattohu hiittoonniiti?

⁹ Maganu Qaale ikkinoha Qullaawa Maxaafa baxi. Yihowanna isi hedinori daafira halaale kulannohehu Qullaawa Maxaafa callaho. Barru baala nabbabbenna Qullaawu Maxaafi xiinxallora qixxaabbe, hattono rosoottore loosu aana hosiisse Qullaawa Maxaafa baxattota leellisha dandaatto. (Far. 119:97, 99; Yoh. 17:17) Qullaawu Maxaafi niwaawe pirogiraame noohe? Pirogiraamete garinni barru baala nabbawatto?

10. Qullaawa Maxaafa baxxinoha assannori giddo mittu maati?

¹⁰ Qullaawa Maxaafa baxxinoha assannori giddo mittu, Yesuusi daafira mannu illensanni lainore borreessinoonniha ikkasiiti. Yesuusi atera assinoheri daafira halaale kulannohehu konne maxaafaatilla. Yesuusi coyiꞌrinorinna assinori daafira rosittoro, isi ledo jaalooma kalaqiꞌrate kaꞌꞌattora dandaatto.

11. Yihowa baxatto gede mayi kaaꞌlannohe?

¹¹ Yesuusa baxittoro Yihowara noohe baxilli lexxanni haꞌranno. Mayira? Korkaatuno Yesuusi Annisi akatta guutu garinni leellishino. (Yoh. 14:9) Konnira, Yesuusi daafira ledde rosittoro, Yihowa albinni roore afatto hattono ayirrisatto. Hanni, Yesuusi mannu woffi asse laꞌꞌannore, buxane, dhiwantinorenna wolqiweeloota mararino gara hedi. Qoleno isi aannoheta kaaꞌlitanno amaalenna tenne amaale harunsakki heeshshokki woyyeessitanno gara hedi.—Mat. 5:1-11; 7:24-27.

12. Yesuusi daafira rosakki maa assatto gede kakkayissahera dandiitanno?

¹² Cubbinkera maaro afiꞌra dandiineemmo gede Yesuusi wodote kakkalo ikkinonketa seekkite hedattoha ikkiro isira noohe baxilli lexxara dandaanno. (Mat. 20:28) Yesuusi umisi fajjonni atera yee reyinota huwatittoro, tini maaro eattoranna Yihowa cubbokki gatona yaannohe gede huucciꞌratto gede kakkayissahera dandiitanno. (Soq. 3:19, 20; 1 Yoh. 1:9) Qoleno, Yihowanna Yesuusa baxittoro insa baxanno manniwa aanakki digattanno.

13. Yihowa maa aannohe?

¹³ Yihowa baxxannore baxi. Ammantannokki maatekkinna albi jaallakki heeshshokki Yihowara sayisse aa hasiꞌroottohu mayiraatiro huwata hooggara dandiitanno. Konnira insa gibbahera nafa dandiitanno. Ikkirono, Yihowa ayyaanaamittete maate oye kaaꞌlannohe. Tenne ayyaanaamittete maate ledo mittooꞌmite heeꞌrittoro, hasiꞌratto baxillenna kaaꞌlo afiꞌratto. (Maq. 10:29, 30; Ibi. 10:24, 25) Galte hosse maatekki miilla ate ledo Yihowara soqqantannotanna biddishshasi harunsitannore ikkitara dandiitanno.—1 Phe. 2:12.

14. Umi Yohaannisi 5:3 kultanno garinni Yihowa biddishshi daafira maa rosootto?

¹⁴ Yihowa biddishsha ayirrisi hattono harunsi. Yihowa afattora albaanni umikki biddishshi garinni heeꞌrattoha ikkara dandaanno; xa kayinni Yihowa biddishshi woyyinoha ikkinota rosootto. (Far. 1:1-3; 1 Yohaannisi 5:3 nabbawi.) Hanni, Qullaawu Maxaafi minaanniranna minaamara, annuwatenna amuuwaho hattono oosote uyino biddishsha hedi. (Efe. 5:22–6:4) Tenne amaale harunsootto daafira maatekki heeshsho woyyaabbino? Yihowa, jaalla hayyotenni doodhattora uyinohe biddishsha harunsakkinni akatikki woyyaawino? Heeshshokkinni hagiirraamo ikkootto? (Law. 13:20; 1 Qor. 15:33) Kuri xaꞌmuwara dawaro ee yite qolattoha ikkara dandaanno.

15. Qullaawu Maxaafiha xintu seera loosu aana hosiisate mayi kaaꞌlahera dandaanno?

¹⁵ Mito woyite rosoottoha Qullaawu Maxaafiha xintu seera magarinni loosu aana hosiisattoro afa qarra ikkitahera dandiitanno. Konnira, Yihowa dirijjitesi widoonni bushanna dancha bade afate kaaꞌlitannoheta Qullaawu Maxaafi aana xintantino borro qixxeessanni noohe. (Ibi. 5:13, 14) Tenne borro nabbawattonna xiinxallatto woyite mitte mittente hajo daafira kaaꞌlitannohe gara huwatatto; hattono tini Yihowa dirijjitewa shiqatto gede assitahera dandiitanno.

16. Yihowa mannasi qineessinohu hiittoonniiti?

¹⁶ Yihowa dirijjite baxi hattono kaaꞌli. Yihowa mannasi songuwate giddo qineessino; Beettisi Yesuusi qole baalante songuwara umoho. (Efe. 1:22; 5:23) Yesuusi buuramino Kiristaani giddonni isi yannankera loonsara hasiꞌranno looso albisoota ikkite qineessitanno gede boode labballo shoomino. Yesuusi tenne gaamo “ammanaminohanna wodanaamo borojjicho” yiino; insa ate towaatatenna ayyaanaamittetenni agarate qoossonsa mulluri gede assite dilaꞌanno. (Mat. 24:45-47; NW) Ammanamino borojjichi atera hedannota leellishanno doogga giddo mitte towaattannohe gede ikkadda ikkitino cimeeyye shoomate. (Isa. 32:1, 2; Ibi. 13:17; 1 Phe. 5:2, 3) Songote cimeeyye ate jawaachishatenna albinni roore Yihowawa shiqatto gede kaaꞌlate dandiitannore baala assitanno. Insa baalunkunni roore wolootaho Yihowa daafira rosiisatto gede kaaꞌlitannohe.—Efe. 4:11-13.

17. Roomu Sokka 10:10, 13, 14 kultanno garinni wolootaho Yihowa daafira rosiisa hasiissannonkehu mayiraati?

¹⁷ Wolootu Yihowa daafira rossanno gede kaaꞌli. Yesuusi harunsaanosi Yihowa daafira rosiissara hajajino. (Mat. 28:19, 20) Tenne hajajo wonsha hasiissannonke daafira calla sabbankammora dandiineemmo. Ikkollana, Yihowara noohe baxilli lexxanni haꞌriro, aterano “Ninke anfoommorenna macciishshinoommore kula diagurreemmo” yite coyidhuri soqqamaasinchu Pheexiroosinna Yohaannisi gede ikke macciishshamannohe. (Soq. 4:20) Mittu manchi Yihowa baxanno gede kaaꞌlinummoro lowo hagiirre afiꞌneemmo. Hanni Wongeelaawichu Filiphoosi Itiyophiyu manchi Qullaawa Borro halaale rose cuuamanno gede kaaꞌlasinni mageeshshi geeshsha hagiidhinoro hedi! Atino, Filiphoosi lawishsha harunsattohanna Yesuusi hajajino hajajo wonshattoha ikkiro, Yihowa Farciꞌraasincho ikka hasiꞌrattota leellishatto. (Roomu Sokka 10:10, 13, 14 nabbawi.) Hatto assittoro atino Itiyophiyu manchi gede, “Cuuama hoolannoeri nooni?” yite xaꞌmattora dandaatto.—Soq. 8:36.

18. Aananno birxichira maa ronseemmo?

¹⁸ Cuuamate doodhatto doorshi wolu heeshshokki giddo doodhattori baalunkunni roorinoho. Hakko daafira, konne shota ikkinokki doorsha doodhate maa assa hasiissannohero seekkite hedi. Cuuamate daafira maa afa hasiissannohe? Cuuamattora albaanninna cuuamitto gedensaanni maa assa hasiissannohe? Aananno birxichira kuriuu xaꞌmuwara dawaro afiꞌneemmo.