XIINXALLOTE BIRXICHO 17
“Jaallaꞌya Yoommoꞌne”
“Anniꞌyawiinni macciishshoommore baala kuloommoꞌne daafira, jaallaꞌya yoommoꞌne.”—YOH. 15:15.
FAARSO 13 Kiristoosi Lawishshankeeti
GUULCHOa
1. Mittu manchi ledo jaalooma kalaqiꞌra dandiineemmohu hiittoonniiti?
DUUCHA woyite mittu manchi ledo jaalooma kalaqiꞌrate balanxe hakko manchiwa aana hasiissanno. Hakko manchi ledo giddoꞌneta mimmitoho hasaabbinanniha ikkiro jaalla ikkitinanni. Yesuusi ledo lubbote jaalla ikka kayinni shota diꞌꞌikkitannonke. Mayira?
2. Yesuusi ledo jaalooma kalaqiꞌra shota ikkitinokkihu mayiraati?
2 Qarra ikkannonkehu umi coyi Yesuusi ledo xaande diegenninoommo. Umi xibbi diro heeꞌrinohu batinyu Kiristaanino Yesuusi ledo xaade diegennino. Ikkirono, soqqamaasinchu Pheexiroosi togo yiino: “Yesuusa Kiristoosa laꞌinoonnikkiha ikkirono baxxinannisi. Xa laꞌinoonnisikkiha ikkirono, ammantinannisi.” (1 Phe. 1:8) Hakko daafira, Yesuusi ledo xaande egenninoommokkiha ikkirono, isi ledo lubbote jaalooma kalaqiꞌra dandiineemmo.
3. Yesuusi ledo jaalooma shota ikkitannonkekki gede assannohu layinki coyi maati?
3 Qarra ikkannonkehu layinki coyi Yesuusi ledo hasaambe diegenninoommo. Huuccatto assiꞌneemmo woyite hasaawinsanni heeꞌnoommohu Yihowaati. Yesuusi suꞌminni huucciꞌneemmoha ikkirono, isi ledo xaaddotenni dihasaambeemmo. Qoleno, Yesuusi iso huucciꞌnammora dihasiꞌranno. Mayira? Korkaatuno huuccatto magansiꞌrate; magansiꞌra hasiissannohu qole Yihowa callaati. (Mat. 4:10) Ikkirono, Yesuusa banxeemmota leellisha dandiineemmo.
4. Yesuusi ledo jaalooma shota ikkitannonkekki gede assannohu sayikki coyi maati? Konni birxichira maa ronseemmo?
4 Qarra ikkannonkehu sayikki coyi Yesuusi heeꞌrannohu iimaati. Hakko daafira, isi ledo hosa didandiineemmo. Yesuusiwa shinqe egenninoommokkiha ikkirono isi daafira lowore rosa dandiineemmo. Konni birxichira Yesuusi ledo noonke jaalooma kaajjishiꞌrate kaaꞌlannonkeha assa hasiissannonkeha shoole coye laꞌneemmo. Hanni balanxe Kiristoosi ledo jaalooma kalaqiꞌra hasiissannonkehu mayiraatiro laꞌno.
YESUUSI JAALLA IKKA HASIISSANNONKEHU MAYIRAATI?
5. Yesuusi jaalla ikka hasiissannonkehu mayiraati? (“Yesuusi Jaalla Ikka Yihowa Jaalla Ikkineemmo gede Kaaꞌlitannonkenna” “Yesuusi Silxaane Daafira Quwa Saꞌinokki Lao Heedhoꞌne” yitanno saaxineno lai.)
5 Yihowa ledo dancha aante heedhankera hasiꞌnummoro Yesuusi jaalla ikka hasiissannonke. Hatto yineemmohu mayira? Hanni lame korkaata laꞌno. Umihunni, Yesuusi harunsaanosira ‘Anniꞌya baxinoꞌnehu ane baxxinoonniehuraati’ yiino. (Yoh. 16:27) Isi lede “Ane widoonni ikka hoogiro, ayino Anniꞌyawa daannohu dino” yiino. (Yoh. 14:6) Yesuusi ledo jaaloommikkinni Yihowa ledo jaaloomate woꞌnaala mittu minira waalcho agurre waalchu nookki widoonni eate woꞌnaalate gedeeti. Yesuusi “ani geꞌreewu waalchooti” yee coyiꞌri woyite togoo lawishsha horoonsiꞌrino. (Yoh. 10:7) Layinkihunni Yesuusi Annisi lawishsha guutu garinni harunsino. Isi harunsaanosi “Ane afinohu annaꞌyano afino” yiino. (Yoh. 14:9) Konnira, Yihowa daafira ronseemmo doogga giddo mitte Yesuusi heeshsho xiinxallineeti. Yesuusi daafira ronsummo kiiro iso albinni roore banxeemmo. Yesuusira lubbote jaalla ikkinummoro, Yihowara noonke baxilli lexxanni haꞌranno.
6. Yesuusi ledo jaalooma hasiissannonkehu wolu korkaati maati? Lawishsha kuli.
6 Yihowa huuccattonke macciishshannohu Yesuusi jaalla ikkinummorooti. Konnira huuccatto assiꞌneemmo woyite yinoomme geeshshira calla “Yesuusi suꞌminni” yaa dihasiissannonke. Yihowa huuccattonkera dawaro qolate Yesuusa horoonsiꞌrannohu hiittoonniitiro afa hasiissannonke. Yesuusi soqqamaasinesira “suꞌmiꞌyanni huuccidhinannire baala asseemmoꞌne” yiino. (Yoh. 14:13) Huuccattonke macciishshe dawaro qolannohu Yihowa ikkirono, isi fajjosi wonshanno gede Yesuusira silxaane uyino. (Mat. 28:18) Hakko daafira, Yihowa huuccattonke macciishshe dawaro qolara albaanni balaxe Yesuusi asse yiinonkere assinoommoronna teꞌee hedanno. Lawishshaho, Yesuusi togo yiino: “Mannu sao agurtiniro, gordu Anniꞌne kiꞌne saono agurannoꞌne. Mannu sao agura hoogginiro kayinni, Anniꞌne kiꞌne saono diagurannoꞌne.” (Mat. 6:14, 15) Yihowanna Yesuusi maartannonkente gede ninkeno woloota maara hasiissannonke.
7. Yesuusiti wodote kakkalo kaaꞌlitannohu ayeooraati?
7 Yesuusiti wodote kakkalo kaaꞌlitannonkehu isi ledo danchu jaaloomi heeꞌrinkero callaati. Hatto yineemmohu mayiraati? Yesuusi ‘lubbosi jaallasira sayise aannota’ coyiꞌrino. (Yoh. 15:13) Isi uullara daara albaanni heeꞌrinohu ammanamino manni albillitte Yesuusi daafira rosanna baxa hasiissannonsa. Abirahaami, Saara, Muse, Reaabinna wolu ammanantinori Yihowa soqqamaasine reyotenni kaꞌannoha ikkirono, hegere heeshsho afiꞌrate Yesuusi ledo jaalooma hasiissannonsa.—Yoh. 17:3; Soq. 24:15; Ibi. 11:8-12, 24-26, 31.
8-9. Yohaannisi 15:4, 5 kultanno garinni Yesuusi jaalla ikkanke maa assate kaaꞌlitannonke? Yesuusi ledo noonke jaalooma geedonniha assiꞌra hasiissannonkehu mayiraati?
8 Xaa yannara Yesuusi ledo Maganu Mangisteha dancha duduwo dudumbanninna manna rosiinsanni heeꞌnoommo. Yesuusi uullate aana noo yannara rosiisaanchoho. Isi songote umo ikkino daafira, iimira haꞌrihu gedensaannino sabbakatenna rosiisate looso loosiisanni no. Yesuusi dandaamihe deerrinni lowo manni isonna Annasi afanno gede kaaꞌlate assattore laꞌꞌanno woyite lowo geeshsha hagiidhanno. Qoleno, konne looso umo fushsha dandiineemmohu Yihowanna Yesuusi kaaꞌlitunkero callaati.—Yohaannisi 15:4, 5 nabbawi.
9 Maganu Qaali Yihowa hagiirsiisa hasiꞌnummoro, Yesuusa baxanna baxillenke geedonniha assiꞌra hasiissannonketa kulanno. Hanni Yesuusi jaalla ikkate assa hasiissannonkeha shoole coye laꞌno.
YESUUSI JAALLA IKKA DANDIINEEMMOHU HIITTOONNIITI?
Yesuusi jaalla ikkate kaaꞌlannonkere: (1) Yesuusa seekke afa (2) hedonkenna assootenke Yesuusihu gedeeha assiꞌra (3) Kiristoosi roduuwa kaaꞌla hattono (4) dirijjite assitannore kaaꞌla (Gufo 10-14 lai)b
10. Yesuusi jaalla ikkate assa hasiissannonkehu umi coyi maati?
10 (1) Yesuusa seekkitine affe. Maatewoosi, Maarqoosi, Luqaasinna Yohaannisi Wongeella nabbambe Yesuusa seekkine afa dandiineemmo. Qullaawu Maxaafi Yesuusi heeshsho daafira kulannore hiincinummoro, isi manna shaqqillunni kaaꞌlino gara huwanteemmo daafira albinni roore banxeemmosi. Lawishshaho, isi rosaanosira Mooticha ikkirono, insa borojju gede asse laꞌꞌa agure giddosita hasaawinonsa. (Yoh. 15:15) Isi insa dadillitu yannara dadillino, wiꞌlitu yannara ledonsa wiꞌlino. (Yoh. 11:32-36) Diinnasi nafa sokkasi macciishshe adhino manni Yesuusi jaalla ikkinota ammantino. (Mat. 11:19) Ninkeno Yesuusi lawishsha harunsine wolootaho danchare assinummoro, mannu ledo dancha aante heedhannonke; hattono hagiirrinke bae ikkanno, Kiristoosira noonke baxillino lexxanno.
11. Yesuusi jaalla ikkate assa hasiissannonkehu layinki coyi maati? Hatto assa hasiissannonkehu mayiraati?
11 (2) Hedoꞌnenna assootiꞌne Yesuusihu gedeeha ikko. Yesuusi hedanno gara anfummoronna ninkeno hakko garinni hedate woꞌnaallummoro jaaloominke kaajjado ikkanno. (1 Qor. 2:16) Ikkina, Yesuusi lawishsha harunsa dandiineemmohu hiittoonniiti? Hanni mitto lawishsha laꞌno. Yesuusi aneti bushshu yaa agure woloota kaaꞌlanno. (Mat. 20:28; Rom. 15:1-3) Konnira, isi umisi injo aguranno hattono woloota gatona yaanno. Yesuusi mannu suꞌmasi huniro nafa hanqoho dimuddamanno. (Yoh. 1:46, 47) Isi alba soꞌro loosino manni diwoyyaawanno yee dihedino. (1 Xim. 1:12-14) Yesuusi togo yiino: “Kiꞌne kiꞌneneewa baxantiniro, ane rosaano ikkitinoonnita mannu baalu tennenni egennannoꞌne.” (Yoh. 13:35) Konnira, ateneeto togo yite xaꞌmi: “Yesuusi lawishsha harunse roduuwu ledo keerunni heeꞌrate wolqaꞌya assitu geya sharramanni noommo?”
12. Yesuusi jaalla ikkate assa hasiissannonkehu sayikki coyi maati? Hatto assa dandiineemmohu hiittoonniiti?
12 (3) Kiristoosi roduuwa kaaꞌle. Yesuusi buurantino roduuwisira assineemmore isira assinoommohu gede assa laꞌꞌanno. (Mat. 25:34-40) Buurantinore kaaꞌlineemmoti qara doogo Yesuusi Maganu Mangisteha dancha duduwo dudumbammoranna manna rosaano assinammora uyinonke looso woꞌma giddonkenni loosate. (Mat. 28:19, 20; Soq. 10:42) Kiristoosi roduuwi xaa yannara alame woꞌmate loonsanni heeꞌnoonniha sabbakate looso umo fushsha dandiitannohu “wolu geꞌreewi” kaaꞌlinsaro callaati. (Yoh. 10:16) Ati wolu geꞌreewi widootiro, konne looso loositto kiiro buurantinore calla ikkikkinni Yesuusano baxattota leellishshanni nootto.
13. Luqaasi 16:9 noota Yesuusi amaalino amaale harunsa dandiineemmohu hiittoonniiti?
13 Yihowanna Yesuusi jaalla ikkinoommota leellisha dandiineemmoti wole doogo insa loosiissanni noo looso woxunni kaaꞌlate. (Luqaasi 16:9 nabbawi.) Lawishshaho, alamete doyichora loonsanni heeꞌnoonni looso woxunni kaaꞌla dandiineemmo; roduuwu fushshitanno woxinni xeertote qooxeessira sabbakate looso loosate, Yihowa magansiꞌnanni minna minatenna gatamarate hattono dano iillitinonsa roduuwa kaaꞌlate horoonsiꞌnanni. Qoleno, songote hasiisannorira woxe fushshine kaaꞌlanna kaaꞌlo hasiissannonsa roduuwi nooha ikkiro kaaꞌla dandiineemmo. (Law. 19:17) Tenne doogganni Kiristoosi roduuwa kaaꞌlineemmo.
14. Efesooni Sokka 4:15, 16 kultanno garinni Yesuusi jaalla ikkate assa hasiissannonkehu shoolki coyi maati?
14 (4) Dirijjite assitannore kaaꞌle. Towaattankera shoomantinori ledo kaaꞌlamme songote umo ikkinohu Yesuusi ledo noonke jaalooma kaajjishiꞌra dandiineemmo. (Efesooni Sokka 4:15, 16 nabbawi.) Lawishshaho, xaa yannara noonketa Gambooshshu Addaraashuwa danchu garinni horoonsiꞌrate woꞌnaallanni heeꞌnoommo. Hakko daafira, mite songuwa wole songuwa ledo mitte ikkitanno gede assinoonni hattono soqqanshote qoqqowo hakko garinni biddi assinoonni. Tini qixxaawo dirijjite fushshitannoha lowo woxe gatissino. Konninni kainohunni mite halashshaanora haaro songonna soqqanshote qoqqowo rosa hasiissinonsa. Kuri ammanantino halashshaano albi songo giddo lowo diro soqqantinorenna roduuwu ledo lubbora jaaloontinore ikkitara dandiitanno. Xa kayinni wole songora soqqantanno gede assinoonninsa. Yesuusi, kuri ammanamino Kiristaani maahoyye yee hajajamanna laꞌꞌanno woyite lowo geeshsha hagiidhannoti dihuluullissannote.
HEGERERA YESUUSI JAALLA IKKE
15. Albillitte Yesuusi ledo lubbora jaalooma dandiineemmohu hiittoonniiti?
15 Qullaawu ayyaaninni buurantinorira iima Yesuusi ledo hegerera heeꞌrate hexxo noonsa; insa Maganu Mangiste ragidhe ledosi gashshitanno. Insa Kiristoosi ledo heedhanno, hasaabbanno hattono ledosi yanna sayissanno. (Yoh. 14:2, 3) Yesuusi uullate aana heeꞌrate hexxo noonsareno baxanno hattono towaatannonsa. Insa Yesuusa laꞌannokkiha ikkirono, hagiidhitanni hegere heeshsho heedhanno daafira isi ledo lubbora jaalooma dandiitanno.—Isa. 9:6, 7.
16. Yesuusi jaalla ikkankenni mayi atoote afiꞌneemmo?
16 Yesuusi koyishsha adhine isi jaalla ikkinummoro lowo atoote afiꞌneemmo. Lawishshaho, xaa yannara nafa isi baxillinni lowo atootenna kaaꞌlo afiꞌnanni heeꞌnoommo. Qoleno, albillitte hegere heeshsho heeꞌrate hexxo noonke. Baalunkunni roore Yesuusi jaalla ikkanke Annisi ledo lubbora jaaloommeemmo gede kaaꞌlitannonke; tini baalanta roore jirooti. Yesuusi jaalla ikkanke lowo ayirrinyeeti!
FAARSO 17 ‘Kaaꞌla Hasiꞌreemmo’
a Soqqamaasine boode diro Yesuusi ledo hasaabbanni loossino daafira isira lubbote jaalla ikkitino. Yesuusi ninkeno jaallasi ikkinammora hasiꞌranno; ikkollana Yesuusi soqqamaasine gede ninkera isi jaalla ikka shota diꞌꞌikkitannonke. Konni birxichira Yesuusi ledo jaalooma qarra ikkitanno gede assannorenna isi ledo jaalooma kalaqiꞌne heeꞌrate kaaꞌlannonkere ronseemmo.
b MISILLATE XAWISHSHA: (1) Maatete magansiꞌra yannara Yesuusi heeshshonna soqqansho daafira xiinxalla dandiineemmo. (2) Roduuwinke ledo salaametenni heeꞌrate sharrammo. (3) Diinaggaambe soqqamme Kiristoosi roduuwa kaaꞌla dandiineemmo. (4) Mite songuwa wolete ledo mitte assinanni woyite cimeeyye uyitannonke biddishsha harunsineemmo.