Nabbawaano Xaꞌmitanno Xaꞌmo

‘Ayyaanu laalo’ Galatiyu Sokka 5:22, 23 kulloonni akatta callateni?

Konni qummeeshshira kulloonniti ayyaanu laalo honsete; insano: “baxilleho, hagiirreho, keereho, cincate, shooshanqete, danchummate, [ammanate], joongilleho, meessanaa qeeꞌlate.” Ikkollana Maganu ayyaani kaaꞌlonni afiꞌneemmoti kaajja akatta kuri callaati yine heda dihasiissannonke. Mayira?

Soqqamaasinchu Phaawuloosi ayyaanu laalo kulara albaanni Galatiyu Sokka 5:19-21 togo yiino: “Maalu loosi . . . foorrete, battete, saalimale heeshshooti, kaphu maganna magansiꞌrate, baarigaarrete, ginyishamate, hinaasate, hanqate, umo baxate, gosoomate, babbaxxate, dhiibbete, manna shaate, dimbate, sirbatenna [“quwa saino qeexaalaati,” NW] woluno kore lawannoho.” Phaawuloosi “woluno kore lawannoho” yaasi baalanka maalu looso qummi assinokkita leellishshanno; lawishshaho isi, hasiꞌroommore Qolasiyaasi Sokka 3:5 noohu gedeere wole ‘maalu looso’ qummi assa dandaanno. Qoleno isi honse dancha akatta qummi assihu gedensaanni “togoore giwanno seeri dino” yiino. Konni daafira, Phaawuloosi qullaawu ayyaani kaaꞌlonni afiꞌnannita dancha akatta baalanta qummi assanni nooha diꞌꞌikkino.

Phaawuloosi Efesooni songora borreessino sokkara coyiꞌrinorino tenne leellishanno; isi “Xawaabbu addi addi danchumma, keeraanchimmanna halaale baala laalanno” yiino. (Efe. 5:8, 9) ‘Danchumma, keeraanchimmanna halaalu’ ‘xawaabbu laalo’ ikkirono, ayyaanu laalo widono ikkanno.

Hatteente gede Phaawuloosi Ximootewoosi, “keeraanchimma, ayyaanaame heeshsho, ammana, baxille, cincanna arshimma harunsi” yee amaalinosi. (1 Xim. 6:11) Kuri akatta giddo “ayyaanu laalo” ikkitinori sase callaho; insano: ammanate, baxillehonna cincate. Ikkollana Ximootewoosi kowiicho kulloonniti wole akatta yaano, keeraanchimma, arshimmanna ayyaanaame heeshsho heedhannosi gede assiꞌrateno qullaawu ayyaani kaaꞌlo hasiissannosi.—Qolasiyaasi Sokka 3:12; 2 Pheexiroosi 1:5-7 ledo heewisiisi.

Konnira, Galatiyu Sokka 5:22, 23te baalanta Kiristaanu akatta kulloonni yaa diꞌꞌikkino. Maganu ayyaani konni qummeeshshira kulloonniti honse “ayyaanu laalo” heedhannonke gede kaaꞌlannonketi egennantinote. Ikkollana, ayyaanaamittetenni gikki yaatenna “Magano lawate kalaqantinota, halaalaancho qullaawanna keeraanchimmannita haaro mannimma” uddiꞌrate wole akattano hasiissannonke.—Efe. 4:24.