Sabbaka Agurtinoonte

1-2. Rosiisaancho 11:6 Maganu Mangisteha dancha duduwo duduwate ledo mayi xaadooshshe afidhino?

MITE gobbara mannu dancha duduwo quqquxame macciishshanno. Insa hasidhanni keeshshitino halaale afidhino. Wole gobbara kayinni mannu Maganunnireno Qullaawu Maxaafireno hakkeya afa dihasiꞌranno. Ati heeꞌratto gobbarana? Mannu macciishshirono macciishsha giwirono Yihowa loosu ikkino yaa geeshsha sabbankammora hasiꞌranno.

² Yihowa murino yannara sabbakate loosi uurranno; hakkiinni “goofimarchu daanno.” (Mat. 24:14, 36) Hakka geeshsha kayinni ‘hashsha geeshsha wixate’ yaano agurrummokkinni sabbakate maa assa hasiissannonke?—Rosiisaancho 11:6 nabbawi.

3. Konni birxichira maa ronseemmo?

³ Sai birxichira ‘manna woshshaadate’ loosinni dancha guma afiꞌrate assa hasiissannonkeha shoole coye laꞌnoommo. (Mat. 4:19) Konni birxichira kayinni aye geeshshi fonqoli iillinkerono dancha duduwo jawaante duduwate assa hasiissannonkeha sase coye laꞌneemmo. Insano (1) sabbakate looso illachishate, (2) cincineemmore ikkatenna (3) ammananke kaajjishiꞌrate.

SABBAKATE LOOSO ILLACHISHSHE

4. Yihowa loonsammora uyinonke looso illachisha hasiissannonkehu mayiraati?

⁴ Yesuusi goofimarchu barruwa giddo ikkannorinna mannu ikkito, harunsaanosi sabbakate looso woꞌmunni woꞌma illachisha qarra ikkitannonsa gede assannota coyiꞌrino. Isi rosaanosi “feeffattine agadhe” yiinonsa. (Mat. 24:42) Nohi yannara mannu Maganu qorowishsha macciishshannokki gede assinonsari batinyu coyi no; kuri coyibba ninke hedono bebbeehantanno gede assitara dandiitanno. (Mat. 24:37-39; 2 Phe. 2:5) Konnira Yihowa loonsammora uyinonke looso illachisha hasiissannonke.

5. Soqqamaasinete Looso 1:6-8 sabbakate loosi halaꞌlannota leellishshannohu hiittoonniiti?

⁵ Xaa yannara Maganu Mangisteha sabbakate looso illachisha hasiissannonke. Yesuusi isi reyihu gedensaannino kuni loosi uurrannokkitanna halaꞌladunni loosamannota coyiꞌrino. (Yoh. 14:12) Yesuusi reyihu gedensaanni mite rosaanosi qulxuꞌme woshshaaxxate higgino. Isi reyotenni kaihu gedensaanni mite rosaanosi maalaletenni lowo qulxuꞌme woshshaaxxitanno gede assino. Yesuusi hakkawoyite rosaanosira manna woshshaadate loosi wolu baalunku loosinni roore hasiisannoha ikkinota luphi asse xawisino. (Yoh. 21:15-17) Isi iimira haꞌrara albaanni, rosaanosi sabbakate looso Israeelete calla ikkikkinni gobbate qacce geeshsha loossannota kulinonsa. (Soqqamaasinete Looso 1:6-8 nabbawi.) Boodu diri gedensaanni Yesuusi soqqamaasinchu Yohaannisira “Mootichu barra” ikkannore ajuujatenni leellishinosi.b Sokkaasinchu massaganna “baattote aana noo gosara, gaꞌretenna addi addi afiinni coyiꞌranno manni baalaho” hegereta “Danchu Duduwi sokka” dudumbanna laino. (Aju. 1:10; 14:6) Tini Yihowa ikkino yaa geeshsha sabbakate looso xaa yannarano loonsammora hasiꞌrannota leellishshanno.

6. Woꞌmanka woyite sabbakate looso illachisha dandiineemmohu hiittoonniiti?

⁶ Yihowa ninke kaaꞌlate assinore baala hendeemmo woyite sabbakate looso illachinsheemmo. Lawishshaho isi attammoonninna elektiroonikisete garinni qixxeessinoonnita, qoonqotenninna viidiyotenni qaddaꞌnoonnita hattono interneetete shiqqanno biroodikaaste widoonni falakkinota ayyaanaamittete sagale shiqishanni noonke. Webisayitenkera 1,000 saꞌꞌanno afiinni Qullaawu Maxaafi roso qixxeessinanni! (Mat. 24:45-47) Poletikunni, ammaꞌnotenninna miinjunni bebbeehantino alame giddo, sette miliyoone saꞌannoti Maganu soqqamaano alamete doyichohu roduuwu maamari giddo mitteenni heedhanno. Lawishshaho Arbe, Dotteessa 19, 2019nni, alamete doyichora heedhannoti Yihowa Farciꞌraasine barru qummeeshsha xawissanno viidiyo laꞌino. Hatte hawarro 20,919,041 manni Yesuusi Kiristoosi reyo Qaagooshshe ayirrisate gamba yiino. Yihowa yannankera loosanni noota tenne maalale laꞌꞌatenna tennerano ninke kaaꞌlate qoosso afiꞌranke, woꞌmanka woyite sabbakate looso illachinsheemmo gede kakkayissannonke.

7. Yesuusi lawishsha harunsa hedonke billaallitannokki gede kaaꞌlitannonkehu hiittoonniiti?

⁷ Sabbakate looso illachinsheemmo gede kaaꞌlannonkehu wolu coyi Yesuusi lawishsha harunsate. Isi ayi coyino hedosi billaallisaranna sabbakannota hoolasira diwodhino. (Yoh. 18:37) Isi Sheexaanu “alamete gashshooti ayirrinye baala” aannosita kulisita didoogamino; mannu moohisasira woꞌnaali woyiteno maahoyye diyiino. (Mat. 4:8, 9; Yoh. 6:15) Yesuusi maalaamittete jirora wojji diyiino; woy mannu giwisirono bashshi diassino. (Luq. 9:58; Yoh. 8:59) Ninkeno ammananke fonqolannori iillannonke woyite, soqqamaasinchu Phaawuloosi amaalino amaale qaaganke hedonke billaallitannokki gede kaaꞌlitannonke. Isi Yesuusi lawishsha harunsa ‘wolqa baꞌnikkinninna hexxo mudhinikkinni’ heeꞌnanni gede kaaꞌlitannota coyiꞌrino.—Ibi. 12:3.

CINCITINANNIRE IKKE

8. Cincate yaa mayyaate? Roorenkanni xaa yannara cinca hasiissannonkehu mayiraati?

⁸ Cinca mittu coyi woyyaawa geeshsha wodanaaꞌmine agadhate dandooti. Giwisaanke coyi baꞌꞌa geeshsha woy lowo yanna quqquxamme agadhinoommohu danchu coyi woꞌma geeshsha cincine agadha hasiissannonke. Masaalaanchu Imbaaqoomi Yihudaho batidhino beebba baꞌanno yanna quqquxame agadhino. (Imb. 1:2) Yesuusi rosaano Maganu Gashshooti “hakkawoyintenni leellannoha” lawinonsa daafira Roomu gashshooti gadadisannonsa gadadinni wolaphineemmo yite hexxitino. (Luq. 19:11) Maganu Mangiste bunshe huntannonna keeraanchimma woꞌmitinota haaro alame abbitanno yanna quqquxamme agadhineemmo. (2 Phe. 3:13) Ikkirono Yihowa murino yanna cincine agadha hasiissannonke. Hanni Yihowa cinca rosiisannonketa mite doogga laꞌno.

9. Yihowa cincannoha ikkinota leellishshanno lawishshuwa hiikkuriiti?

⁹ Baalunkunni roore cincatenni dancha lawishsha ikkannonkehu Yihowaati. Isi Nohi markaawe loosaranna “keeraanchimmannire” sabbakara lowo yanna uyinosi. (2 Phe. 2:5; 1 Phe. 3:20) Yihowa Soddoomunna Gomoorunnite busha katammara heedhannore hunara kaita, Abirihaami wirro wirro hige xaꞌmisi woyite cince macciishshino. (Kal. 18:20-33) Yihowa ammanantinokkire Israeelete daga lowo geya cincino. (Neh. 9:30, 31) Xaa yannarano Yihowa isiwa abbanno manni “baalunku aagintaawe higara” yanna uyinonsa; tini isi cincannoha ikkinota leellishshanno. (2 Phe. 3:9; Yoh. 6:44; 1 Xim. 2:3, 4) Yihowa lawishshi ninkeno sabbakatenna rosiisate looso loonseemmo woyite cincineemmore ikkineemmo gede assannonke. Qaalisi giddo kulloonnihu mittu lawishshino cinca rosiisannonke.

10. Yaiqoobi 5:7, 8 kultanno garinni baatto loosiꞌre galino manchi lawishshinni maa ronseemmo?

¹⁰ Yaiqoobi 5:7, 8 nabbawi. Baatto loosiꞌranno manni lawishshi cinca rosiisannonke. Hige mite muro rakke lophitanno. Ikkirono batinye muro roorenkanni guma laaltanno muro lowo yanna gedensaanni laaltanno. Hunda Israeelete gobbara gidu midote iillannohu lewu aganinniiti. Baatto loosiꞌre galino manchi gedensiise wixiriro gedensiise mixxanno. (Maq. 4:28) Ninkeno baatto loosiꞌre galino manni gede cincineemmore ikka hasiissannonke. Ikkirono hatto assa shota coye diꞌꞌikkitino.

11. Cinca soqqanshonkera kaaꞌlitannonkehu hiittoonniiti?

¹¹ Guuntete xeꞌne noonkere ikkinoommo daafira, daafurinke guma mulenni afiꞌra hasiꞌneemmo. Ikkirono, guma afiꞌra hasiꞌnummoro seekkine loosa yaano, qottisa, kaasa, shuqunanna waa hayikkisa hasiissannonke. Manna rosaano assate loosino hattooti. Rosiinseemmo manni wodanira noota manna mulla kaꞌne giwate hedo buqqise hoolatenna shaqqadda ikkitanno gede assate yanna hasiissanno. Cinca mannu macciishsha giwinkerono hexxo mudhineemmokki gede kaaꞌlitannonke. Mitu manni kulleemmonsare macciishshirono cincineemmore ikka hasiissannonke. Qullaawu Maxaafi rosaano ayyaanaamittetenni lophitanno gede xixxiiwa didandiineemmo. Yesuusi rosaano nafa isi kulinonsare rakke huwattinokki woyiti no. (Yoh. 14:9) Kaanseemmorinna waa hayikkinseemmori ninke ikkinummorono, lossannohu kayinni Magano ikkinota qaango.—1 Qor. 3:6.

12. Yihowa Farciꞌraasine ikkinokki fiixinkera farciꞌneemmo woyite cincineemmore ikka dandiineemmohu hiittoonniiti?

¹² Yihowa Farciꞌraasine ikkinokki fiixinkera farciꞌneemmo woyiteno cinca qarra ikkitankera dandiitanno. Rosiisaancho 3:1, 7te noohu xintu seeri kaaꞌlankera dandaanno. Qummeeshshu, “Sammi yaate yanna no; hasaawate yanna no” yaanno. Danchu amanyootinke fiixinke ninke macciishshanno gede assara dandaanno; ikkollana afiꞌnummo faro horoonsiꞌne farciꞌra hasiissannonke. (1 Phe. 3:1, 2) Maatenkerano ikko wolu mannira diinaggaambe sabbankeemmonna rosiinseemmoha ikkirono cinca hasiissannonke.

13-14. Cincatenni dancha lawishsha ikkitannonkeri ayeooti?

¹³ Qullaawu Maxaafi giddo kulloonnihunna yannankera noohu ammanamino manni lawishshinni cinca rosa dandiineemmo. Imbaaqoomi Yihowa bunshe hunanno yanna quqquxame agadhino; ikkirono isi “Shaete aana fule uurreemmo” yee cince agadhannota coyiꞌrino. (Imb. 2:1) Soqqamaasinchu Phaawuloosi soqqanshosi ‘gudate’ halchannota coyiꞌrino. Ikkollana “Maganu eltoha Dancha Duduwo” cince duduwino.—Soq. 20:24.

¹⁴ Hanni Giiliyaadi Rosi Mininni maassame fulino minaanninna minaama lawishsha laꞌno; insa sonkoonninsa gobbara gariti Yihowa Farciꞌraasine dino hattono hatte gobbahu rooru manni Kiristaana diꞌꞌikkino. Batinyu manni Qullaawa Maxaafa xiinxalla dihasiꞌranno. Giiliyaadi Rosi Mine ledonsa rosinori wole gobbara soqqamanno roduuwi kayinni, ayyaanaamittetenni lophitanni nooti lowoti Qullaawu Maxaafi xiinxallo noonsata kulinonsa. Kuri minaanninna minaama noo gobbara mannu hakkeya macciishsha giwirono insa cincite sabbakkino. Insa konni qoqqowira sette diro soqqamihu gedensaanni, Qullaawu Maxaafi rosaanonsa giddo mitte cuuantino daafira hagiidhino. Hunda heedhinoreno yannankera nooreno kuri Maganu soqqamaano mitto assannonsari maati? Insa ceeꞌmite sabbaka diagurtino; Yihowano cincitino daafira maassiꞌrinonsa. Ninkeno ‘ammanatenninna cincatenni kaajje Maganu hedinonsa coye ragiꞌranno manni’ lawishsha harunsino.—Ibi. 6:10-12.

AMMANAꞌNE KAAJJISHIDHE

15. Ammana sabbakate quqquxammeemmo gede assitannonkehu hiittoonniiti?

¹⁵ Sabbankeemmo sokka ammanneemmo daafira tenne sokka dandaaminke deerrinni lowo mannira kulate quqquxammeemmo. Maganu Qaali giddo noo hexxo addaxxineemmo. (Far. 119:42; Isa. 40:8) Qullaawu Maxaafi giddo kulloonni masaalo yannankera woꞌmitanna laꞌnanni heeꞌnoommo. Qoleno mannu Qullaawu Maxaafiha xintu seera harunsa hanafanno woyite, heeshshonsa woyyaabbino gara anfoommo. Tenne hendeemmo woyite baalunku manni Maganu Mangisteha dancha duduwo macciishsha hasiissannonsata huwanteemmo.

16. Faarso 46:1-3 kultanno garinni Yihowanna Yesuusa ammananke, sabbakate quqquxammeemmo gede kaaꞌlitannonkehu hiittoonniiti?

¹⁶ Sabbankeemmo sokka Anna ikkinoha Yihowano ammanneemmo; isi Mangistesira Moote asse shoominoha Yesuusano ammanneemmo. (Yoh. 14:1) Aye coyino iillinkero Yihowa woꞌmanka woyite golonkeetinna wolqankeeti. (Faarso 46:1-3 nabbawi.) Qoleno Yesuusi Yihowa uyinosi silxaane horoonsiꞌre iima heeꞌre sabbakate looso loosiisanni noota addaxxineemmo.—Mat. 28:18-20.

17. Agurrummokkinni sabbaka hasiissannonketa leellishanno lawishsha kuli.

¹⁷ Ammana Yihowa assineemmore maassiꞌrannota addaxxineemmo gede assitannonke; mito woyite isi maassiꞌrannonkehu ninke hendoommokki garinniiti. (Ros. 11:6) Lawishshaho barru baala lowo kume ikkanno manni gudumaaleho borrote gaare horoonsiꞌne sabbankanna laꞌꞌanni saꞌꞌanno. Konni garinni sabbaka kaaꞌlitinori no? Lowore kaaꞌlitino. Bocaasa 2014nnite Maganu Mangiste Soqqanshonkera mitte yuniversitete rosaancho woꞌnaalsha kulloonni; ise Yihowa Farciꞌraasine daafira xiinxallite borro borreessa hasidhino. Ise Gambooshshu Addaraashe mama nooro diaffino; ikkirono rossanno yuniversite huxxiwa xarapheessaho worroonni borro affino; hattono adhitino borro giddonni borrosera kaaꞌlitannose hedo afidhino. Ise yannate gedensaanni cuuante Yihowa Farciꞌraasincho ikkitino; xa kayinni woꞌma yanna suwisaancho ikkite soqqantanni no. Togoo woꞌnaalshi xaano Maganu Mangiste sokka macciishsha hasiꞌranno manni noota leellishanno; tini qolte sabbakate kakkayissannonke.

AGURTINIKKINNI SABBAKATE MURCIDHE

18. Sabbakate loosi Yihowa murino yannara uurranno yineemmohu mayiraati?

¹⁸ Sabbakate loosi Yihowa murino yannara uurrannota anfoommo. Nohi waro ikkinore qaango. Yihowa woꞌmanka woyite mitto coye murino yannara assannota leellishino. Isi Baote Waa abbannota murinohu 120 meddi yaanno diri albaanniiti. Lowo diri gedensaanni Yihowa Nohi markaawe seekkanno gede hajajinosi. Baote Wayi daara albaanni Nohi Yihowa uyinosi looso diinaggaawe loosino; isi konne looso 40 woy 50 diri geeshsha loosinoha ikkara dandaanno. Mannu macciishsha giwirono Yihowa saada markaawete giddora eessi yaasi geeshsha manna qorowisiisa diagurino. Hakkiinni yanna iillituta Yihowa “waalcho gobbaanni cufi.”—Kal. 6:3; 7:1, 2, 16.

19. Agurrummokkinni sabbankummoro albillitte mayi ikkanna laꞌneemmo?

¹⁹ Muli yannara Yihowa sabbakate looso uurranno gede assanno; isi Sheexaanu alamera ‘waalcho cufanno;’ hakkiinni keeraanchimma woꞌmitinota haaro alame abbanno. Hakka geeshsha kayinni Nohi, Imbaaqoominna wolootu gede agurrummokkinni sabbanko. Sabbakate looso illachinsho, cincineemmore ikkino, hattono Yihowaranna isi eino qaalira noonke ammana kaajjishiꞌno.