Maganu Baalanta Huuccatto Macciishshannokkihu Mayiraati?
Iimi Anninke Maganu Yihowa giddonkenni huucciꞌneemmo huuccatto macciishsha hasiꞌranno; hattono huuccattonke macciishsha hagiirsiissannosi. Ikkirono isi huuccattonke macciishshannokki gede assanno coyi no. Kuni coyi maati? Huuccatto assiꞌneemmo woyite dea hasiissannonkekkiri maati? Hanni tenne daafira mite Qullaawu Maxaafi hedo laꞌno.
“Huuccidhinanni woyite . . . yitinoonnita [yitinoonte].”—Maatewoosi 6:7.
Yihowa huuccatto assiꞌneemmo woyite yinoommota yinammora woy huuccattote maxaafinni nabbambammora dihasiꞌranno. Hatteentenni, isi giddonkenni huucciꞌnammora hasiꞌranno. Mittu jaalikki barru baala yiinota calla yiihero mageeshshi geeshsha caacceessannohero heda dandaatto. Dancha jaalla mimmitoho giddonsata hasaaphitanno. Ninkeno giddonketa iimi Anninkera hasaaphineemmoha ikkiro, iso jaalinke gede assine laꞌneemmota leellinsheemmo.
“Huuccidhine afidhinannikkihuno, maalu hagiirrira yitine busha hedonni huuccidhinannihuraati.”—Yaiqoobi 4:3.
Yihowa assinammora woy afiꞌnammora hasiꞌrannokki coye huucciꞌnummoro, macciishshannokkita anfoommo. Lawishshaho, mittu manchi kasaara gaꞌne woxe itate kaayyoꞌya seekkie yee huucciꞌriro, Yihowa huuccattosi macciishshanno? Yihowa hafuuraamma ikkineemmokki gedenna kaayyo layiꞌneemmokki gede qorowisiisinonke. (Isayaasi 65:11; Luqaasi 12:15) Yihowa togoo huuccatto macciishshanno yee heda ikkannokki coyeeti! Maganu huuccattonke macciishshara hasiꞌnummoro, huucciꞌneemmori isi Qullaawu Maxaafi giddo kulinori ledo sumuu yaannoha ikka hasiissannosi.
“Seerasi ayirrisannokki manchi huuccatto, Maganoho battete.”—Lawishsha 28:9.
Hundi waro Maganu seerasi ayirrisannokki manni huuccatto dimacciishshino. (Isayaasi 1:15, 16) Maganu xaano disoorramino. (Milkiyaasi 3:6) Maganu huuccattonke macciishshara hasiꞌnummoro, seerisi garinni heeꞌrate dandiinummore baala assa hasiissannonke. Ikkina alba soꞌro loonsoommohalla ikki? Hatto ikkiro Yihowa huuccattonke horo dimacciishshanno yaateni? Hatto yaa diꞌꞌikkino! Maganu loonsoommo soꞌrora gaabbine maaro eꞌnummoronna iso hagiirsiisate sharrammummoro, baxillunni gatona yaannonke.—Soqqamaasinete Looso 3:19.