“Coyiꞌratto Coyinni . . . Dancha Lawishsha” Ikkatto?

1. Coyiꞌrate dandoo afiꞌnoommohu mamiinniiti?

COYIꞌRATE dandoonke baxillaanchu Maganinke uyinonke eltooti. Umi manchi Addaami kalaqamanni heeꞌrenni iimi Annisi ledo hasaawa dandiino. Qoleno isi haaro qaalla kalaqanni coyiꞌranno qaalla lexxa dandaanno. Isi baalante saadara suꞌma fushshate tenne dandoosi horoonsiꞌrino. (Kal. 2:19) Qoleno isi mite yee mannu ledo yaano xuma minaamasi Heewani ledo hasaawi woyite lowo geeshsha hagiidhinoti dihuluullissannote!—Kal. 2:22, 23.

2. Hundi warono ikko xaa yannara mannu coyiꞌrate dandoonsa garimale horoonsiꞌrinohu hiittoonniiti?

² Mulenni mannu coyiꞌrate dandoonsa garimale horoonsiꞌrino. Sheexaanu Daawuloosi Heewanira kaphino; kuni kaphi mannu ooso cubbaataammanna guuntete xeꞌne noonsare ikkitanno gede assino. (Kal. 3:1-4) Addaami isi loosino soꞌrora Heewani wole agurina Yihowa nafa busha asse, coyiꞌrate dandoosi garimale horoonsiꞌrino. (Kal. 3:12) Qaayeeli rodoosi Aabeeli shiihu gedensaanni Yihowara kapho coyiꞌrino. (Kal. 4:9) Gedensoonni Qaayeeli sircho ikkinohu Laamehi geewino geewo yannasira noo finqille leellishshanno. (Kal. 4:23, 24) Yannankera noo mannina hiittooho? Xaa yannara poletiku massagaano beꞌe yitukkinni mannu albaanni mancaꞌꞌa coye coyidhanno. Qoleno mite busha qaalla horoonsiꞌnoonnikki filme dino yaa dandiinanni. Rosaano rosu mine hattono jajjabbu loosu bayicho mancaꞌꞌa coye coyiꞌnanna macciishshitanno. Togoo qaalla rosantinota ikkase alame amanyootunni lowo geeshsha maaeeltanni hadhinota leellishshanno.

3. Maa assineemmokki gede qoropha hasiissannonke? Konni birxichira maa ronseemmo?

³ Busha coye coyiꞌnanna macciishsha roso assiꞌnummoro, qoropha hoongummoro ninke uminke busha coye coyiꞌnammora dandiineemmo. Ninke Kiristaana ikkinoommo daafira Yihowa hagiirsiisa hasiꞌneemmo; hakko daafira busha coye coyiꞌra qorophineemmo. Qoleno tenne dhagge ikkitinota coyiꞌrate dandoonke danchu garinni yaano Maganonke guwisiꞌrate horoonsiꞌra hasiꞌneemmo. Konni birxichira, (1) soqqammeemmo woyite, (2) gambooshshunniwa hattono (3) mannu ledo hasaambeemmo woyite tenne assa dandiineemmohu hiittoonniitiro ronseemmo. Balanxe kayinni Yihowa coyiꞌrate dandoonke horoonsiꞌneemmo gara laꞌꞌannohu mayiraatiro xiinxallineemmo.

YIHOWA COYIꞌRATE DANDOONKE HOROONSIꞌNEEMMO GARA LAꞌꞌANNO

4. Milkiyaasi 3:16 kultanno garinni, Yihowa coyiꞌrate dandoonke horoonsiꞌneemmo gara laꞌꞌannohu mayiraati?

⁴ Milkiyaasi 3:16 nabbawi. Yihowa coyidhanno coyinni iso waajjitannotanna suꞌmasi ayirrissannota leellishshannore “suꞌmansa maxaafisira” borreessannohu mayira lawannohe? Coyiꞌneemmo coyi wodaninkera noori maatiro leellishanno. Yesuusi, “Mannu wodanisira woꞌme gatinoha coyiꞌranno” yiino. (Mat. 12:34) Coyiꞌneemmo coyi Yihowara noonke baxilli mageeshshihoro leellishanno. Qoleno Yihowa iso baxxannori haaro alamera hegerera hagiidhitanni heedhara hasiꞌranno.

5. (a) Coyiꞌneemmo coyi magansiꞌranke ledo xaadooshshe afiꞌrinohu hiittoonniiti? (b) Misile leellishshannonte gede coyiꞌneemmo coyinni Yihowa hagiirsiisa hasiꞌnummoro maa qoropha hasiissannonke?

⁵ Coyiꞌneemmo coyi Yihowa magansiꞌranke adhanno woy adhannokki gede assara dandaanno. (Yai. 1:26) Magano baxannokkihu mitu manni coyiꞌranno woyite hanqanno, kaajjishe coyiꞌranno hattono naaxxanno. (2 Xim. 3:1-5) Ninke insa gedeere ikka hasiꞌneemmokkiti egennantinote. Coyiꞌneemmo coyinni Yihowa hagiirsiisa hasiꞌneemmo. Ikkollana gambooshshunniwa woy soqqanshonniwa shaqqillunninna awu afiinni coyiꞌnanni, mini giddo maatenkera kaajjinshe woy ayirrinyu nookki garinni coyiꞌneemmo woyite Yihowa hagiidhanno?—1 Phe. 3:7.

6. Kimbeerlii danchu garinni coyiꞌrase mayi guma abbitino?

⁶ Coyiꞌrate dandoonke danchu garinni horoonsiꞌneemmo woyite, mannu Yihowa magansiꞌneemmore ikkinommota bade afanno. Hatto assineemmoha ikkiro, mannu Maganoho ‘soqqamannohunna soqqamannokkihu’ mereero noo badooshshe afanno gede kaaꞌlineemmo. (Mil. 3:18) Hanni Kimbeerlii yinanni rodoo woꞌnaalshi tini halaale ikkase leellishanno gara laꞌno.b Layinki dirimi rosi mine, isera mitte ledose rossanno beetto ledo mito looso loossanno gede uyinoonnise. Insa mitteenni loosihu gedensaanni, ledose rossanno rosaancho Kimbeerlii wole rosaanowiinni baxxitinota ikkitinota huwattino. Ise manna dimishshanno, shaqqillunni coyidhanno hattono dixonantanno. Kimbeerlii ledo rossanno rosaancho tenne dhagge assidhino hattono gedensoonni Qullaawa Maxaafa xiinxallate sumuu yitino. Mannu halaale macciishshanno gede assanno garinni coyiꞌneemmo woyite Yihowa lowo geeshsha hagiidhanno!

7. Maganu uyinoheta coyiꞌrate dandoo ma garinni horoonsiꞌrate murciꞌrootto?

⁷ Ninke baalunku coyiꞌneemmo coyi Yihowa ayirranno gedenna albinni roore ammanate roduuwinkewa shinqeemmo gede assannoha ikkara hasiꞌneemmo. Hakko daafira, hanni “coyiꞌneemmo coyinni . . . dancha lawishsha” ikka dandiineemmota mite doogga laꞌno.

SOQQANTINANNI WOYITE DANCHA LAWISHSHA IKKE

8. Yesuusi soqqami woyite coyiꞌrate dandoosi horoonsiꞌrino gari dancha lawishsha ikkannonkehu hiittoonniiti?

⁸ Mannu hanqisannoꞌne woyite shaqqillunninna ayirrinyunni coyidhe. Yesuusi soqqami yannara mannu iso, itonna ago baxannoho, Daawuloosi riqiwaanchooti, Sambata diayirrisannoho, wole agurina Magano xonino yee beebbate kassasinosi. (Mat. 11:19; 26:65; Luq. 11:15; Yoh. 9:16) Yesuusi kayinni hanqe coyiꞌre dirabbisiꞌirino. Mannu hanqe coyiꞌrannonke woyite rabbisiꞌra qorophine ninkeno Yesuusi lawishsha harunsineemmo. (1 Phe. 2:21-23) Togo assa shota ikkitannokkiti egennantinote. (Yai. 3:2) Ikkina mayi kaaꞌlannonkeyya?

9. Sabbankeemmo woyite gara ikkinokkire coyiꞌneemmokki gede mayi kaaꞌlannonke?

⁹ Qaete anni gara ikkinokkire coyiꞌriro hakko garinni coyiꞌranno gede assinosiri maatiro hedate woꞌnaalle. Saami yinanni rodii togo yiino: “Qaete anni halaale macciishsha hasiissannositanna heeshshosi biddi assiꞌra dandaannota hedate woꞌnaaleemmo.” Mito woyite qaete anni hanqannohu isira injiitinokki yannara marroommo daafira calla ikkara dandaanno. Luusiya yinanni rodoo hanqino manchinni xaaddanno woyite Yihowa wodanaaꞌmitanno gedenna ayirrinye xeino coye coyidhannokki gede kaaꞌlasera harancho huuccatto assidhanno. Ninkeno hanqino manchinni xaandeemmo woyite Luusiya lawishsha harunsa dandiineemmo.

10. Umi Ximootewoosi 4:13 kultanno garinni hiittoo mixo fushshiꞌra hasiissannonke?

¹⁰ Rosiisate dandookki woyyeessiꞌri. Ximootewoosi woꞌnaalshu noosi Kiristaancho ikkirono rosiisate dandoosi woyyeessiꞌra hasiissinosi. (1 Ximootewoosi 4:13 nabbawi.) Soqqammeemmo woyite albinni roore worbuulle rosiisaano ikka dandiineemmohu hiittoonniiti? Seekkine qixxaawa hasiissannonke. Worbuulle rosiisaano ikkineemmo gede kaaꞌlannonkehu addi addi uduunni noonke. Nabbawatenna Rosiisate Dandiittore Baala Assi yitanno biroshereranna Kiristaanu Heeshshonna Soqqansho Xiinxallote Maxaafichora “Soqqanshote Dandookki Woyyeessiꞌri” yaanno gafira kaaꞌlitanno amaale afiꞌra dandaatto. Konne uduunne dancha gede horoonsidhanni nootto? Soqqanshote dancha gede qixxaambummoro, waajja qeeꞌlineemmo hattono mitte giddonni coyiꞌneemmo.

11. Mitu roduuwi worbuulle rosiisaano ikkitinohu hiittoonniiti?

¹¹ Songote giddo roduuwu rosiissanno gara laꞌne hattono insawiinni ronse albinni roore worbuulle rosiisaano ikka dandiineemmo. Aleenni kullihu Saami yinanni rodii, mitu roduuwi worbuulle rosiisaano ikkitanno gede kaaꞌlinonsari maatiro hedanno. Isi insa rosiissanno gara seekke laꞌꞌanno hattono insa lawishsha harunsate woꞌnaalanno. Taaliya yinanni rodoono woꞌnaalshu noonsa roduuwi lallawo shiqishshanno gara seekkite laꞌanno. Hatto assase soqqanshonniwa duucha woyite mannu xaꞌmanno xaꞌmora dawaro qolate danchu garinni hasaawissanno gara affanno gede kaaꞌlitinose.

GAMBOOSHSHUNNIWA DANCHA LAWISHSHA IKKE

12. Mitu roduuwira maa assa qarra ikkitannonsa?

¹² Gambooshshunniwa huuronke naggi assine faarsine hattono dancha gede qixxaambe dawaro qolle gambooshshu hagiirsiisannoha ikkanno gede kaaꞌla dandiineemmo. (Far. 22:22) Mitu roduuwira mannu noowa faarsa woy dawaro qola qarra ikkitannonsa. Aterano tini qarra ikkitinohe? Hatto ikkiro wolootu waajja qeeꞌlitanno gede kaaꞌlinonsari maatiro afakki kaaꞌlitannohe.

13. Gambooshshunniwa woꞌma giddonni faarsatto gede mayi kaaꞌlahera dandaanno?

¹³ Woꞌma giddonni faarsi. Faarso faarsineemmohu qaru coyi Yihowa guwisiꞌrateeti. Saara yinanni rodoo danchu garinni faarseemma yite diheddanno. Ikkirono ise faarsotenni Yihowa guwisiꞌra hasidhanno. Hakko daafira ise gambooshsheho qixxaabbannonte gede faarsono mine qixxaawe haꞌra kaaꞌlitannota huwattino. Ise faarso rosiisidhanno woyite faarsote kiiro woy giximi gambooshshunniwa shiqanno rosi ledo mayi xaadooshshe afiꞌrinoro wodanchate woꞌnaaltanno. Ise, “Tini faarsate dandooꞌya ikkikkinni roore faarsote hedo illachisheemma gede kaaꞌlitinoe” yitino.

14. Gambooshshunniwa dawaro qola waajjattoha ikkiro, mayi kaaꞌlahera dandaanno?

¹⁴ Gambooshshunniwa ganyite dawaro qolate woꞌnaali. Mitu roduuwira gambooshshunniwa dawaro qola qarra ikkitannonsati egennantinote. Aleenni kulliti Taaliya yinanni rodoo togo yitino: “Huuroꞌya waajjoommata leellishshannokki daafira mannu afa hoogo ikkinnina, mannu noowa coyiꞌra lowo geeshsha waajjeemma. Hakko daafira gambooshshunniwa dawaro qola lowo geeshsha qarra ikkitannoe.” Ikkirono Taaliya waajjite dawaro qola diagurtino. Ise gambooshsheho qixxaabbanno woyite, umo qollanni dawaro haranchonna xaaddonnita ikka hasiissannota qaagganno. Ise togo yitino: “Qoleemma dawaro haranchonna xaaddonnita ikkiturono qarru dino yaate; mayira yiniro, massaganno rodii togoo dawaro qollara hasiꞌranno.”

15. Gambooshshunniwa qolleemmo dawaro daafira maa qaaga hasiissannonke?

¹⁵ Manna ille qasse laꞌꞌa waajjitannokki roduuwi nafa mito woyite gambooshshunniwa dawaro qola waajjitara dandiitanno. Mayira? Juuliyeti yinanni rodoo togo yitino: “Mito woyite dawaro qola waajjeemmahu qoleemma dawaro haranchotenna hakkeya kaaꞌlitannori dinoote yee hedeemma daafiraati.” Yihowa dawaro qolate dandiinummore calla assinammora hasiꞌrannota qaagi.c Mito woyite waajjineemmoha ikkirono, gambooshshunniwa dawaro qolate dandiinummore baala assineemmo woyite Yihowa lowo geeshsha hagiidhanno.

MANNU LEDO HASAABBINANNI WOYITE DANCHA LAWISHSHA IKKE

16. Hiittoo coye coyiꞌra qoropha hasiissannonke?

¹⁶ Baalunku gari “xono” qorophe. (Efe. 4:31, NW) Aleenni laꞌnummonte gede Kiristaanu horonta xonama dihasiissannonsa. Ikkollana mitu coyiꞌneemmo coyi hakkeeshshi geeshsha xono lawa hoogara dandaanno; hakko daafira qoropha hasiissannonke. Lawishshaho wolu manni budi, gaꞌrenna gobba daafira hasaambeemmo woyite, mitto woluwiinni woffi assine laꞌneemmokki gede qoropha hasiissannonke. Qoleno manna coyinni kinse koffi assa dihasiꞌneemmo. Mittu rodii noore maaxikki togo yee coyiꞌrino: “Mito woyite, busha hede ikkikkinni haariimate yee coyiꞌroommo coyi woloota koffi assinota wodanchoommo. Lowo diro minaamaꞌya iseno ikko woloota koffi assannore coyiꞌrummoro kultannoe; tini baasa kaaꞌlitinoe.”

17. Efesooni Sokka 4:29 kultanno garinni woloota dhaawa dandiineemmohu hiittoonniiti?

¹⁷ Woloota dhaawannore coyidhe. Misha woy gunguma agurre galanteemmore ikka hasiissannonke. (Efesooni Sokka 4:29 nabbawi.) Israeele galattanno gede assannonsahu duuchu coyi noonsa; insa kayinni gunguma roso assidhino. Duucha woyite gungummeemmoha ikkiro, wolootuno gunguntara dandiitanno. Tonne qotaano abbitinohu kaphu duduwi ‘Israeele gudisante, Musera  . . gungutanno’ gede assinota qaango. (Kir. 13:31–14:4) Galata kayinni woloota lowo geeshsha kaaꞌlitanno. Yoftahe beetto jaallase galattinose; tini ise uyinoonnise looso diinaggaabbe loossanno gede lowo geeshsha kaaꞌlitinoseti dihuluullissannote. (Eje. 11:40, NW) Aleenni kulliti Saara togo yitino: “Woloota galanteemmoha ikkiro, insa Yihowano roduuwuno baxxannonsata affanno gede kaaꞌlineemmonsa.” Hakko daafira woloota godowinta galattinanni faro hasidhe.

18. Faarso 15:1, 2 kultanno garinni halaale coyiꞌra hasiissannonkehu mayiraati? Halaale coyiꞌrate maa assa hasiissannonke?

¹⁸ Halaale coyidhe. Halaale coyiꞌra hoongummoro Yihowa hagiirsiisa didandiineemmo. Isi baalunku gari kapho giwanno. (Law. 6:16, 17) Xaa yannara batinyu manni kapha qarra afidhinokkihu gede asse hedannoha ikkirono, ninke kayinni tenne daafira Yihowate gedee lao heedhankera hasiꞌneemmo. (Faarso 15:1, 2 nabbawi.) Waajjo kapho kaphineemmokkiti egennantinote; ikkollana gama wido halaale gama wido kapho ikkinore coyiꞌne mannu soꞌranno gede assano qoropha hasiissannonke.

19. Wolere maa qoropha hasiissannonke?

¹⁹ Heme tareessitinannikki gede qorophe. (Law. 25:23; 2 Tes. 3:11) Aleenni kulliti Juuliyeti yinanni rodoo heme gawajjitinose gara coyidhanni togo yitino: “Heme macciishsheemma woyite dadilleemma; qoleno tini heꞌmanni noo mancho ammaꞌneemmakki gede assitannoe. Qoleno hakku manchi aneno heꞌmannoekkita mayinni afeemma?” Hasaabbinanni hasaawi hemete widira soorramiro, hasaawu dhaawannoha ikkanno gede assate woꞌnaalle.—Qol. 4:6.

20. Coyiꞌratto coyi daafira maa assate murciꞌrootto?

²⁰ Heeꞌnoommo alamera batinyu manni bushare coyiꞌranno daafira, Yihowa hagiirsiisannore coyiꞌrate sharrama hasiissannonke. Coyiꞌrate dandoonke Yihowa uyinonke elto ikkitinotanna isi coyiꞌneemmo coye laꞌꞌannota qaango. Isi soqqammeemmo woyite, gambooshshunniwa hattono mannu ledo hasaambeemmo woyite iso hagiirsiisannore coyiꞌrate assineemmore maassiꞌranno. Yihowa tenne busha alame huniro, coyiꞌneemmo coyinni isi ayirranno gede assa roore shota ikkitannonke. (Yih. 15) Hakka geeshsha kayinni, ‘afiinke qaalinni’ Yihowa hagiirsiisate murciꞌno.—Far. 19:14.