Yihowa Maarote Taalle Nookki Maganooti

1. Rosiisaancho 7:20 kultanno garinni Moote Selemooni hiikkonne halaale coyiꞌrino?

MOOTE Selemooni togo yee borreessino: “Mitte soꞌrono assikkinni, woꞌmanka woyite dancha looso calla loosannohu baattote aana mittuno dino.” (Ros. 7:20) Tini halaaleho! Ninke baalunku cubbaataammaho. (1 Yoh. 1:8) Hakko daafira, ninke baalunkura Maganunna mannu maaro hasiissannonke.

2. Lubbote jaalikki gatona yiihero mayi macciishshamannohe?

² Mitto lubbote jaalakki koffi assootto yaanna qaagattoha ikkara dandaanno. Coye biddi assanna isi ledo noohe jaalooma haaroonsiꞌra hasiꞌrootto daafira, godowinta maaro xaꞌmiꞌritto; hakkiinni gatona yiiheta mayi macciishshamihe? Dihagiidhootto? Ee lowo geeshsha hagiidhootto!

3. Konni birxichira maa ronseemmo?

³ Yihowa lubbote Jaalanke ikkara hasiꞌneemmo; ikkollana mito woyite coyiꞌneemmorinni woy assineemmorinni koffi assinammosira dandiineemmo. Ikkollana Yihowa gatona yaankera quqquxamannota huluullammeemmokkihu mayiraati? Yihowa leellishanno maaronna ninke leellinsheemmo maaro mereero noo badooshshi maati? Qoleno Yihowa maaro afidhannori ayeooti?

YIHOWA GATONA YAATE QIXXAAWINOHO

4. Yihowa gatona yaate qixxaawinoha ikkinota huluullammeemmokkihu mayiraati?

⁴ Maganu Qaali, Yihowa gatona yaate qixxaawinoha ikkinota kulanno. Yihowa Siina Ilaalira Musera ayimmasi xawisisi woyite, mittu sokkaasinchi widoonni togo yiino: “Ani Kaaliiqi maareemmohonna hanqoho muddameemmokkiho; mararaancho Maganooti; ammanamaꞌyanna bagamannokkihu baxilliꞌya batiꞌraho. Bagamannokkihu baxilliꞌya kumunni kiirranni ilamara iillanno; sao, sarxonna cubbo agureemmo.” (Ful. 34:6, 7) Yihowa shaqqadohonna maaranno Maganooti; isi cubbo loosse maaro eꞌannore gatona yaate woꞌmanka woyite qixxaawinoho.—Neh. 9:17; Far. 86:15.

5. Faarso 103:13, 14 kultanno garinni Yihowa mannu ooso daafira baalankare afasi ma assanno gede assitannosi?

⁵ Kalaqaanchonke ikkino daafira Yihowa ninke daafira baalankare afino. Hanni hedi! Isi baattote aana noohu mittu mittunku manchi daafira baalankare afino. (Far. 139:15-17) Hakko daafira annuwinkenna amuuwinkewiinni ragiꞌnoommoti guuntete xeꞌne noonketa afino. Wole agurina isi heeshshonke giddo iillinonkeri hiittoore ikkineemmo gede assinonkero afino. Yihowa mannu ooso daafira baalankare afasi ma assanno gede assitannosi? Maarannonke gede assitannosi.—Far. 78:39; Faarso 103:13, 14 nabbawi.

6. Yihowa gatona yaate quqquxamannota leellishinohu hiittoonniiti?

⁶ Yihowa gatona yaate quqquxamannota leellishino. Isi umi manchi Addaami assinorinni ninke baalunku cubbonna reyo ragiꞌnoommota afino. (Rom. 5:12) Cubbunninna reyotenni ninkeneetono ikko woloota gatisa dandiineemmo doogo dino. (Far. 49:7-9) Ikkollana baxillaanchu Maganinke mararinonke daafira, cubbuyinna reyotenni wolaphineemmo faro faninonke. Isi tenne assinohu hiittoonniiti? Yohaannisi 3:16 kultanno garinni Yihowa ninke daafira yee reyara mitto Beettosi soyino. (Mat. 20:28; Rom. 5:19) Yesuusi iso ammanannota loosunni leellishannoha baalanka cubbunninna reyotenni wolassate ninkera yee qarrame reyino. (Ibi. 2:9) Yihowa baxanno Beettisi qarramenna sholle reyanna lai woyite lowo geeshsha xissiisiꞌrinoti dihuluullissannote! Addanko, Yihowa ninke maara hasiꞌrannokkiha ikkoommero baxanno Beettisi reyara difajjanno.

7. Qullaawu Maxaafi giddo Yihowa gatona yiinonsa manni xagge leellishannohu mitu lawishshi hiikkonneeti?

⁷ Qullaawu Maxaafi giddo, Yihowa cubbonsa gatona yiino manniti batinye xagge no. (Efe. 4:32) Konni manni giddo kiꞌne aye qaagginanni? Moote Minaase qaagginanniha ikkara dandaanno. Hakku bushu manchi Yihowa albaanni jawa cubbo loosino. Isi kaphu maganna magansiꞌrino; wolootuno hatto assitanno gede jawaachishino. Minaase oososi nafa kaphu magannara kakkalo asse shiqishino. Isi wole agurina Yihowahu qullaawu mini giddo kaphu maganna misilla worino. Qullaawu Maxaafi, Minaase “Kaaliiqa hanqissannota lowo bunshe [loosinota]” kulanno. (2 Dud. 33:2-7) Ikkirono isi addinta maaro eita Yihowa maarinosi. Wole agurina Maganu isi galagale moote ikkanno gede assinosi. (2 Dud. 33:12, 13) Qoleno Moote Daawiti qaagginoonniha ikkara dandaanno; isi Yihowa albaanni jawa cubbo loosino; lawishshaho foorino hattono lubbo shiino. Ikkollana Daawiti soꞌrosi ammane addu maaro eita Yihowa isono gatona yiinosi. (2 Sam. 12:9, 10, 13, 14) Addanko, Yihowa gatona yaate quqquxamannota dihuluullammeemmo. Qoleno aanchine ronseemmonte gede Yihowa leellishanno maaro mannu leellishanno maaronni baxxitinote.

YIHOWA MAARO BAXXITINOTE

8. Yihowa baxxino daanya ikkasi maaranno gede assitannosihu hiittoonniiti?

⁸ Yihowa gobba baalate ‘gashshaanchooti’ woy Daanyaati. (Kal. 18:25) Worbu daanyi seeru mayyaannoro seekke afa hasiissannosi. Yihowa Seera kulannonkehanna Daanyanke ikkino daafira seera seekke afinoti dihuluullissannote. (Isa. 33:22) Yihowa geeshsha garanna gara ikkinokkire seekke afinohu mittuno dino. Worbu daanyi afa hasiissannosiri woluri maati? Yoo yaara albaanni halaale ikkitinota woꞌma mashalaqqe afa hasiissannosi. Yihowa woꞌmanka woyite halaale ikkinore baalankare afanno daafira isi gedee daanyi dino.

9. Yihowa mitto mancho maarannohu woy giwannohu maa afino daafiraati?

⁹ Yihowa mannu gedee daanya diꞌꞌikkino; isi baalunku coyi daafira halaale ikkinore seekke afanno. (Kal. 18:20, 21; Far. 90:8) Yihowa yoo yaannohu mannu gede lainorinni woy macciishshinorinni calla diꞌꞌikkino. Isi, mittu manchi akati, lophino garinna heeꞌranno qooxeessi hattono fayyimmasi gari, assootesi hunara woy seekkara dandaannota seekke afino. Qoleno Yihowa mannu wodanita afanno. Isi mittu mittunku manchi mitto coye assannohu mayiraatiro woꞌmunni woꞌma afanno. Yihowa albinni goꞌlannori mitturino dino. (Ibi. 4:13) Yihowa mittu manchira gatona yaannohu baalankare afino daafiraati.

10. Yihowa woꞌmanka woyite taalo yoo yaanno yineemmohu mayiraati? (Marro 32:4)

¹⁰ Yihowa woꞌmanka woyite taalo yoo yaanno. Isi horonta dimallaadanno. Yihowa mittu manchira gatona yaannohu danasi, jironna maccaha ikkasi woy dandoosi lae diꞌꞌikkino. (1 Sam. 16:7; Yai. 2:1-4) Ayino Yihowa mitto coye assanno gede xixxiiwa woy gubbo oye doga didandaanno. (2 Dud. 19:7) Isi caaccaawe woy hanqe muddame yoo diyaanno. (Ful. 34:7) Yihowa ninke daafira baalankare seekke afinohura isi gedee Daanyi dino.—Marro 32:4 nabbawi.

11. Yihowa maaro baxxitaahu mayinniiti?

¹¹ Ibiraawootunnita Qullaawa Borro borreessituri Yihowa maaro baxxitinota ikkitinota wodanchitino. Mitte borro xawissino garinni, kuri borreessaano “mite basera horoonsidhinohu Ibiraawootu Afii qaali Maganu cubbaataammaho leellishanno maaro calla kulannoho; kuni qaali mannu ooso mimmitoho leellishshannota dannu noo maaro kulannoha diꞌꞌikkino.” Cubbo loosse maaro eꞌannore woꞌmunni woꞌma gatona yaate silxaane noosihu Yihowa callaati. Ikkina Yihowa maaro kaaꞌlitannonkehu hiittoonniiti?

12-13. (a) Yihowa maaro kaaꞌlitannonkehu hiittoonniiti? (b) Yihowa maaro mageeshshite?

¹² Yihowa maarinonketa ammannummoro ‘haarooꞌmineemmo yanna’ daggannonke; hattono giddoyiidi keerenna keeraancho tiia afiꞌneemmo. Togoo maaro afiꞌneemmohu Maganu maarinkero callaati. (Soq. 3:19, 20) Yihowa gatona yiinkero cubbo loonsoommokkihu gede asse kiire, isi ledo noonke jaalooma woꞌmunni woꞌma haaroonsanno.

¹³ Yihowa mitte hige gatona yiinkehu gedensaanni, loonsoommo cubbo wirro dikayisanno woy hakko cubbira diqorichishannonke. (Isa. 43:25; Erm. 31:34) Yihowa cubbonke “Soojjaati galchimiwiinni fafinohu geeshsha . . . fafisanno.”b (Far. 103:12) Yihowa maaro mageeshshi geeshsha batiꞌratero hiincinummoro, galanteemmorenna naandeemmore ikkineemmo. (Far. 130:4) Ikkina Yihowa gatona yaannohu ayeooraati?

YIHOWA GATONA YAANNOHU AYEOORAATI?

14. Aleenni ronsummonte gede Yihowa mittu manchira gatona yaannohu woy giwannohu mayiraati?

¹⁴ Aleenni ronsummonte gede, Yihowa maarannohu cubbu deerra lae diꞌꞌikkino. Qoleno Yihowa mittu manchira gatona yaannohu woy giwannohu, Kalaqaanchonke, Seera aannonkehanna Daanyanke ikkinohura, baalankare afino daafira ikkinota ronsoommo. Yihowa mittu manchira gatona yaannohu woy giwannohu maa laeeti?

15. Luqaasi 12:47, 48 kultanno garinni, Yihowa laꞌꞌannohu mittu coyi maati?

¹⁵ Umihunni, Yihowa mittu manchi cubbo loosinohu afanni heeꞌreetinso afikkiitiro laꞌꞌanno. Yesuusi Luqaasi 12:47, 48te tenne daafira xawise kulino. (Qummeeshsha nabbawi.) Mittu manchi afanni heeꞌreenni Yihowa dadillisannoha busha coye assiro, kuni jawa cubbooti. Togoo manchi Yihowa maaro afiꞌra hoogara dandaanno. (Maq. 3:29; Yoh. 9:41) Noore coyiꞌniro kayinni mito woyite gara ikkinokkire assineemmohu anfanni heeꞌneeti. Ikkina togoo woyite Yihowa maaro afiꞌra dandiineemmo? Ee dandiineemmo! Korkaatuno Yihowa laꞌꞌannohu wolu coyino no.

16. Maaro eate yaa mayyaate? Yihowa gatona yaankera hasiꞌnummoro maaro ea hasiissannonkehu mayiraati?

¹⁶ Layinkihunni, Yihowa cubbo loosino manchi addinta maaro einoronna teꞌee laꞌꞌanno. Maaro eate yaa mayyaate? Maaro eate yaa ‘mittu manchi hedosi, akatasinna assootesi biddi assiꞌrate’ yaate. Qoleno cubbo loosino manchi loosinohu bushu coyira woy assikki gatinohu danchu coyira gaabbate woy lowo geeshsha dadillate. Maaro eino manchi dadillannohu busha coye assino daafira calla ikkikkinni, assootisi Yihowa ledo noosi jaalooma huninosi daafiraati. Moote Minaasenna Daawiti jawa cubbo loossinota qaango; kayinni insa addinta maaro eꞌino daafira Yihowa gatona yiinonsa. (1 Mot. 14:8) Ee Yihowa gatona yaate addinta maaro eꞌnoonnitanna teꞌee laꞌꞌanno. Ikkollana loonsoommo cubbira gaabba calla diꞌꞌikkitanno. Bushare agurre danchare assateno qixxaamboommore ikka hasiissannonke.c Yihowa laꞌꞌannohu wolu coyi konneeti.

17. Soorramate yaa mayyaate? Wirro cubbo loonseemmokki gede soorrama hasiissannonkehu mayiraati? (Isayaasi 55:7)

¹⁷ Yihowa laꞌꞌannohu lowo geeshsha hasiisannohu wolu coyi soorramate. Soorramate yaa busha assoote agurre Yihowa biddishshi garinni heeꞌrate yaate. (Isayaasi 55:7 nabbawi.) Cubbo loosino manchi hedosi biddi assiꞌre Yihowa hedo garinni heeꞌra hasiissannosi. (Rom. 12:2; Efe. 4:23) Isi alba hedannoha busha coyenna assootesi agurate murciꞌra hasiissannosi. (Qol. 3:7-10) Hige Yihowa gatona yaannonkehunna cubbunni keereensannonkehu Kiristoosita wodote kakkalo ammanneemmo daafiraati. Yihowa assootenke biddi assiꞌrate addinta sharrammanni heeꞌnoommota laꞌꞌanno woyite wodote kakkalo widoonni gatona yaannonke.—1 Yoh. 1:7.

YIHOWA MAARO ADDAXXE

18. Yihowa maaro daafira maa ronsoommo?

¹⁸ Hanni kageeshsha ronsoommota mite qara hedo xaphi assine laꞌno. Yihowa gatona yaate kalqete alame giddo taalle dinooho. Togo yineemmohu mayiraati? Umihunni isi woꞌmanka woyite gatona yaate qixxaawinoho. Layinkihunni isi ninke seekke egennino. Yihowa ninke daafira baalankare afino; hattono addu maaro eꞌnoommotanna teꞌee seekke afanno. Sayikkihunni Yihowa woꞌmunni woꞌma gatona yaannonke; hattono cubbo loonsoommokkihu gede asse kiiranno. Tini keeraancho tiia afiꞌneemmonna iso hagiirsiinseemmo gede assitannonke.

19. Guuntete xeꞌne noonkere ikkinoommo daafira cubbo loosanke gattannokkiha ikkirono hagiidha dandiineemmohu mayiraati?

¹⁹ Guuntete xeꞌne noonkere ikkinoommo daafira cubbo loosanke digattanno. Ikkirono, Qullaawa Borro Seekke Huwata (Ingilizete afoo) yaanno maxaafa, Xiraaze 2 qoola 771 noo hedo sheshifachishshannonke; togo yitanno hedo no: “Yihowa soqqamaanosi laanfe shaqqillunni laꞌꞌanno daafira, insa guuntete xeꞌne noonsa daafira loossino soꞌronni yaaddanni heeꞌra dihasiissannonsa. (Fa 103:8-14; 130:3) Insa Maganu hasiꞌranno garinni heeꞌrate dandiiture baala assitu geeshsha hagiidha dandiitanno! (Fil 4:4-6; 1Yo 3:19-22).” Tini jawaachishshanno hedooti!

20. Aananno birxichira maa ronseemmo?

²⁰ Yihowa loonsoommo cubbira addinta maaro eꞌnummoro, gatona yaate qixxaawinoha ikkinota afanke hagiirsiissannonke. Ikkina ninkeno gatona yaate isi lawishsha harunsa dandiineemmohu hiittoonniiti? Yihowa leellishanno maaronna mannu leellishanno maaro mereero noo xaadooshshi maati? Badooshshinsa maatiyya? Tenne bande afanke hasiissannohu mayiraati? Aananno birxichira kuri xaꞌmuwara dawaro afiꞌneemmo.