Yihowa Hexxi

1. (a) Yihowa hiittee hexxo uyinonke? (b) Yihowa hexxate yaa mayyaate? (“Harancho Xawishsha” lai.)

YIHOWA iso baxxannorira baalaho kaajja hexxo uyinonsa. Isi muli yannara dhibba, shettonna reyo hunanno. (Aju. 21:3, 4) Yihowa iso hexxannohu “shaqqaddu” manni uulla gannate assanno gede kaaꞌlanno. (Far. 37:9-11) Qoleno Yihowa ninke mittu mittunkura, xaanni roore isi ledo danchu jaaloomi heeꞌrannonke gede kaaꞌlannonke. Tini dhagge ikkitanno hexxooti! Ikkina Maganu eino qaale wonshanno yine ammanneemmo gede assannonkeri maati? Yihowa woꞌmanka woyite coyiꞌrinore wonshanno. Hakko daafira, Yihowa ‘hexxineemmo’ gede assannonkehu ikkadu korkaati noonke.b (Far. 27:14) Maganu uyinonke hexxo wonshanno yanna cincinenna hagiirrunni agadhine tenne leellisha dandiineemmo.—Isa. 55:10, 11.

2. Yihowa maa assino?

² Yihowa coyiꞌrinore wonshannota leellishino. Hanni mitto kaajja lawishsha laꞌno. Yihowa Ajuujate maxaafi giddo, yannankera addi addi gaꞌrenna gosahu hattono addi addi afoo coyiꞌranno manni mitto ikke halaalunni iso magansiꞌranno gede assannota coyiꞌrino. Xaa yannara tenne baxxitino gaamo “lowo manna” yinanni. (Aju. 7:9, 10) Tenne gaamo giddo labballu, meentunna qaaqquullu no; konni manni sirchi, budinsanna coyiꞌranno qaali addi addiha ikkirono, alamete doyichohu roduuwu maamari giddo mitto ikke salaametenni heeꞌranno. (Far. 133:1; Yoh. 10:16) Qoleno kuni lowo manni diinaggaawe sabbakanno. Insa macciishshannonsa manni baalaho, dancha alame daggannota kultanno hexxo woꞌmanka woyite kulate qixxaabbinoreeti. (Mat. 28:19, 20; Aju. 14:6, 7; 22:17) Atino konni manni wido ikkoottoha ikkiro, tenne hexxo lowori gede assite laꞌꞌattoti dihuluullissannote.

3. Sheexaanu mixo maati?

³ Daawuloosi hexxo dinoonkereeti yine hendammora hasiꞌranno. Mixosi Yihowa ninkera dihedanno hattono eino qaale diwonshanno yine hendeemmo gede assate. Sheexaanu hexxo dinoonkereeti yine hendeemmo gede assinkero, worbuulle diꞌꞌikkineemmo; wole agurina Yihowara soqqama agurrammora dandiineemmo. Aanchine ronseemmonte gede, Daawuloosi Iyyoobi hexxo dinooeho yee hedanno gedenna Yihowara soqqama aguranno gede assate woꞌnaalino.

4. Konni birxichira maa xiinxallineemmo? (Iyyoobi 1:9-12)

⁴ Konni birxichira, Sheexaanu Iyyoobi Yihowara ammaname heeꞌrannokki gede assate horoonsiꞌrinoti xagarrote hayyo maatiro ronseemmo. (Iyyoobi 1:9-12 nabbawi.) Qoleno Iyyoobi lawishshinni maa ronseemmoronna Maganu baxannonketanna eino qaale wonshannota qaaga hasiissannonkehu mayiraatiro xiinxallineemmo.

SHEEXAANU IYYOOBI HEXXO DINOOEHO YEE HEDANNO GEDE ASSATE WOꞌNAALINO

5-6. Iyyoobira shiima yanna giddo calla iillinosiri maati?

⁵ Iyyoobi dancha heeshsho heeꞌranno manchooti. Isira Yihowa ledo danchu jaaloomi noosi. Iyyoobira hagiirraame halaꞌlado maate noosi; qoleno isi lowo geeshsha dureessaho. (Iyo. 1:1-5) Kayinni isi mittu barri giddo calla noosire baalankare hoogino. Umo isi jirosi hoogino. (Iyo. 1:13-17) Hakkiinni baxanno oososi baala reyitino. Hanni Iyyoobira iillino qarra hendo. Annuwunna amuuwu oosonsa giddonni mitto nafa shiidhuro lowo geeshsha xissiisidhanno. Hakko daafira, Iyyoobinna minaamasi tonnenti oosonsa reyitino afiti, mageeshshi geeshsha masinoronna dadillinoro hattono hexxo mudhino gara heda dandiineemmo. Iyyoobi dadillunni uddanosi dare uulla uwasi dhagge diꞌꞌikkitannonke.—Iyo. 1:18-20.

⁶ Hakkiinni aanche Sheexaanu Iyyoobi buuto dhiwamannonna mannu mishannoha ikkanno gede assino. (Iyo. 2:6-8; 7:5) Hakkuyira albaanni Iyyoobi heeꞌranno dagoomi giddo mannu lowo geeshsha ayirrisannosi manchooti. Mannu amaaꞌlara isiwa daanno. (Iyo. 29:7, 8, 21) Xa kayi insa iso gibbinosi. Iso roduuwisi, muli jaallasinna minisi soqqamaano nafa gibbinosi!—Iyo. 19:13, 14, 16.

7. (a) Iyyoobi qarru iillinoehu mayiraati yee hedino? Kayinni isi maa diassino? (b) Misile leellishshannonte gede, mittu Kiristaanchira hiittoo qarri iillasira dandaanno?

⁷ Sheexaanu Iyyoobi qarru iillinoehu Yihowa dadillisoommo daafiraati yee hedara hasiꞌrino. Lawishshaho, Sheexaanu tonnenti Iyyoobi ooso mitteenni sagale ittanni heedheenna wolqaataame bubbe dagge insa noo mine diigganno gede assino. (Iyo. 1:18, 19) Qoleno isi iiminni giira dirrite Iyyoobi saadanna allaalaasinesi ittanno gede assino. (Iyo. 1:16) Bubbenna giira iiminni daggino daafira, Iyyoobi tenne assinohu Yihowaati yee hedino. Hakko daafira Iyyoobi Yihowa hanqisummokki digatoommo yee hedino. Ikkirono isi iimi Annasi dirumino. Iyyoobi lowo diro Yihowa batinye dancha coye uyinosita afino. Hakko daafira isi ‘Yihowawiinni dancha coye hagiirrunni adhummonte gede busha coyeno adha hasiissannoe’ yee hedino. Isi “Kaaliiqi suꞌmi galataminoha ikko” yiino. (Iyo. 1:20, 21; 2:10) Iyyoobi jirosi hooginoha, oososi shiiꞌrinohanna buuto dhiwaminoha ikkirono Yihowara ammaname heeꞌrino. Ikkirono Sheexaanu Iyyoobi fonqola diagurino.

8. Sheexaanu Iyyoobi gawajjate horoonsiꞌrinoti wole hayyo hiitteeti?

⁸ Sheexaanu Iyyoobi gawajjate wole xagarrono horoonsiꞌrino; Sheexaanu suꞌmita sase Iyyoobi jaalla horoonsiꞌre Iyyoobi ani ditidhoommoho yee hedanno gede assate woꞌnaalino. Insa, Iyyoobira buutote qarri iillinosihu isi lowo soꞌro loosino daafiraati yitino. (Iyo. 22:5-9) Qoleno insa Iyyoobi busha mancho ikka hoogirono, isi ‘Yihowa hagiirsiisate asseemmori waaga diafiꞌrino’ yee hedanno gede assate woꞌnaaltino. (Iyo. 4:18; 22:2, 3; 25:4) Hakko daafira, insa Iyyoobi Maganu baxannositanna towaatannosita huluullamanno gede assate woꞌnaaltino; hattono Isira soqqamaꞌya kaaꞌlitannori dino yee hedanno gede assate sharrantino. Insa coyidhinori Iyyoobi hexxo dinooeho yee hedanno gede assara dandaannoreeti.

9. Iyyoobi worbanna jawaata ikkanno gede kaaꞌlinosiri maati?

⁹ Hanni aane noore hendo. Iyyoobi buluulu aana ofolle no; iso buuto dhiwanni noosi. (Iyo. 2:8) Jaallasi isi busha mancho ikkinotanna danchare asse egenninokkita kulte bushiishshanni noosi. Isira iillinosi qarri jawu kinchi gede ayirrinosi; hattono oososi shiiꞌrino daafira manchite giddo goofino. Umi qara Iyyoobi mittoreno dicoyiꞌrino. (Iyo. 2:13–3:1) Iyyoobi jaalla Iyyoobi sammi yiinohu Yihowara badhe wodheeti yite heddinoha ikkiro lowo geeshsha sodhino. Iyyoobi hattee giddo heeꞌre “reyammo geeshsha keeraanchimmaꞌya diagureemmo” yiino; isi hatto yiinohu hattee suꞌmi jaallasi laꞌꞌanni ikkara dandaanno. (Iyo. 27:5) Iyyoobira kuni baalu qarri iillisirono worbanna jawaata ikkanno gede kaaꞌlinosiri maati? Iyyoobi lowo geeshsha dadille noo yannara nafa, baxillaanchu Maganisi qarrasi hoole fooliishshiꞌranno gede assannosita hexxa diagurino. Isi reyiro nafa Yihowa reyotenni kayisannosita afino.—Iyo. 14:13-15.

IYYOOBI LAWISHSHA HARUNSA DANDIINEEMMOHU HIITTOONNIITI?

10. Iyyoobi xaggenni maa ronseemmo?

¹⁰ Iyyoobi xaggenni Sheexaanu Yihowa agurreemmo gede giddeessankera dandaannokkitanna Yihowa iillaankere baalankare afannota ronseemmo. Iyyoobi xaggenni ronseemmohu woluno kaajju rosi no. Hanni isi xaggenni ronseemmoha mito roso laꞌno.

11. Woꞌmanka woyite Yihowa addaxxineemmoha ikkiro huluullammeemmokki coyi maati? (Yaiqoobi 4:7)

¹¹ Iyyoobi woꞌmanka woyite Yihowa addaxxineemmoha ikkiro, iillaanke qarra baala dandiine saꞌꞌanna Sheexaane giwa dandiineemmota leellishino. Tini mayi guma abbitanno? Qullaawu Maxaafi Daawuloosi ninkewiinni fafannota kulanno.—Yaiqoobi 4:7 nabbawi.

12. Kaote hexxo Iyyoobira jawaante ikkitinosihu hiittoonniiti?

¹² Kaote hexxo seekkine ammana hasiissannonke. Sai birxichira ronsummonte gede, duucha woyite Sheexaanu reyo waajjine Yihowara ammanama agurreemmo gede assate woꞌnaalanno. Sheexaanu Iyyoobi lubbosira yee baalankare wole agurina Yihowara nafa soqqama aguranno yee coyiꞌrino. Sheexaanu lowo geya soꞌrino. Iyyoobi reyaꞌya digattanno yee hedi woyite nafa Yihowara ammaname heeꞌrino. Iyyoobi Yihowa danchumma addaxxasinna isi coye baala taashshannota hexxasi cincanno gede kaaꞌlitinosi. Iyyoobi isi lubbote heeꞌreenna Yihowa coye biddi assa hoogiro nafa albillitte reyotenni kayisannosita ammanino. Iyyoobira kaote hexxora kaajjado ammana noosi. Ninkerano kaote hexxora kaajjado ammana heedhunkero shinankera waajjishiinshinkero nafa Yihowara ammanamme heeꞌra diagurreemmo.

13. Sheexaanu Iyyoobi gawajjate horoonsiꞌrino hayyo seekkine heda hasiissannonkehu mayiraati?

¹³ Sheexaanu Iyyoobi gawajjate horoonsiꞌrino hayyo seekkine heda hasiissannonke; mayira yiniro xaa yannara ninke gawajjateno hattoo hayyo horoonsiꞌranno. Sheexaanu togo yee kassasino: “Manchu [Iyyoobi calla ikkikkinni] noosire baala lubbosira yee aanno.” (Iyo. 2:4, 5) Wole yaattonni Sheexaanu Yihowa addinta banxeemmokkitanna lubbonke gatisirate yine Isira soqqama agurreemmota coyiꞌranni no. Qoleno Sheexaanu Maganu baxannonkekkitanna Iso hagiirsiisate assineemmore laꞌꞌannokkita coyiꞌranni no. Ninke Yihowa hexxineemmori Sheexaanu xagarro anfoommo daafira didogammeemmo.

14. Amadannonke qarri ninkeneeti daafira maa huwanteemmo gede kaaꞌlannonke? Lawishsha kuli.

¹⁴ Iillannonke fonqolo ninkeneeto layiꞌrate kaaꞌlitannonke faro gede assine heda hasiissannonke. Iyyoobira iillinosi fonqoli mite laanfesi afiꞌre biddi assiꞌranno gede kaaꞌlinosi. Lawishshaho, isi albinni roore umosi heeshshi assannoha ikka hasiissannosita rosino. (Iyo. 42:3) Ninkeno qarru amadannonke woyite ninkeneeti daafira lowore rosa dandiineemmo. Nikolayic yinanni rodoo buuto dhiwannosiha ikkirono usurroonnisi; isi togo yiino: “Usuru mini raajete gedeeti; mittu Kiristaanchiti giddooyidi akatta leeltanno gede assanno.” Laanfe noonketa anfummoro biddi assiꞌrate sharrama dandiineemmo.

15. Ayi yaannore macciishsha hasiissannonke? Mayira?

¹⁵ Diinnanke yitannore ikkikkinni Yihowa yaannonkere macciishsha hasiissannonke. Iyyoobi Yihowa hasaawisannasi seekke macciishshino. Maganu Iyyoobi coye heeshshi gotti asse hedanno gede kaaꞌlinosi; togo yiinosi: ‘Kalaqoommo coyinni wolqaꞌya huwatootto? Iillinohe qarra baalanka afoommo. Ate towaata dandeemmokkiha lawannohe?’ Iyyoobi umosi heeshshi asse Yihowa danchumma lowo geeshsha naadannota leellishanno garinni qolino. Isi, “Macciishshate woyite duduwokki macciishshoommo; xa kayinni illeꞌyanni afoommohe” yiino. (Iyo. 42:5) Iyyoobi tenne coyiꞌri woyiteno buluulu aana afolle nooha, bisisi madire goofe nooha hattono oososi shiiꞌrino daafira dadille nooha ikkara dandaanno. Ikkirono Yihowa Iyyoobi baxannotanna isinni hagiidhinota buuxisinosi.—Iyo. 42:7, 8.

16. Isayaasi 49:15, 16 kultanno garinni qarru amadannonke woyite maa qaaga hasiissannonke?

¹⁶ Xaa yannarano mannu xonankeranna ditidhinoommoreeti yine hendeemmo gede assankera dandaanno. Insa ninkeha woy Yihowa dirijjite suꞌma bushiishate woꞌnaaltanno; qoleno ‘kaphunni suꞌmanke huntanno.’ (Mat. 5:11) Iyyoobi xaggenni qarru iillinkerono, Yihowa isira ammanamme heeꞌneemmota addaxxannota ronseemmo. Yihowa baxannonke hattono iso hexxitannore horo tuge diaguranno. (Isayaasi 49:15, 16 nabbawi.) Maganu diinna coyidhannoha aye kaphono horo macciishshitinoonte! Maatesira buutote qarri iillinohu Turkete gobbara heeꞌrannohu Jeemisi yinanni rodii togo yiino: “Maganu manni daafira coyiꞌnanni kapho macciishsha hexxo mudhineemmo gede assitannonketa huwantoommo. Hakko daafira Maganu Mangiste hexxo illachinshoommo; hattono Yihowara diinaggaambe soqqama diagurroommo. Tini hagiirrinke baꞌꞌannonkekki gede kaaꞌlitinonke.” Iyyoobi gede Yihowa yaannore macciishshineemmo! Diinnanke kaphi hexxonke baꞌanno gede diassanno.

HEXXOKKI JAWAACHISHSHANNOHE

17. Ibiraawoota fooliishsho 11 kulloonnihu ammanamino meentinna labballi lawishshinni maa rosootto?

¹⁷ Buutote qarri amadeennasi worbanna jawaata ikke sainohu Iyyoobi calla diꞌꞌikkino. Soqqamaasinchu Phaawuloosi Ibiraawootu Kiristaanira borreessino sokkara wole batinye Maganu soqqamaasine kulino; Phaawuloosi insa ‘batiꞌru gomichi gede doyissitino naqaashshe’ yiino. (Ibi. 12:1) Insa baalanka buutote qarri amadinonsa; ikkirono Yihowara ammanante heedhino. (Ibi. 11:36-40) Cincansanna diinaggaawansa mullawa gattinoni? Digattino! Insa lubbote heedhe Maganu eino qaali baalu woꞌmanna laꞌinokkiha ikkirono Yihowa hexxa diagurtino. Qoleno Yihowa hagiirsiissinota affino daafira, Yihowa eino qaali woꞌmanna laꞌannota addaxxitino. (Ibi. 11:4, 5) Insa lawishshi Yihowa hexxa agurreemmokki gede jawaante ikkannonke.

18. Maa assate murciꞌrootto? (Ibiraawoota 11:6)

¹⁸ Xaa yannara heeꞌnoommo alame roore bushshanni hadhanni no. (2 Xim. 3:13) Sheexaanu Maganu manna fonqola diagurino. Albillitte iillannonke fonqoli ikkihano ikkiro, ‘heeshshote Magano hexxine’ isira diinaggaambe soqqamate murciꞌno. (1 Xim. 4:10) Yihowa Iyyoobira uyinori, isi “sao agurannohanna mararannoha ikkinota” leellishannota qaango. (Yai. 5:11) Ninkeno Yihowa ‘iso hasidhannorira’ baꞌraaꞌra aannota addaxxine isira ammanamme heeꞌno.—Ibiraawoota 11:6 nabbawi.