Wedella, Cuuantinihu Gedensaannino Ayyaanaamittetenni Lopha Agurtinoonte

1. Batinyu wedelli assitinohu danchu coyi maati?

DIRU kiiro lowo kume ikkanno wedelli cuuamanno. Atino cuuamootto? Hatto ikkiro tini ammanate roduuwakkinna Yihowa lowo geeshsha hagiirsiissino! (Law. 27:11) Hanni assoottoha dancha coye hedi. Haammata diro Qullaawa Maxaafa diinaggaabbe xiinxalloottoha ikkara dandaanno. Xiinxallitto yannara Qullaawu Maxaafi Maganu Qaale ikkinota ammanootto. Hatteeno agurranna Qullaawa Maxaafa borreessiisino Magano afootto hattono iso baxootto. Yihowara noohe baxilli lexxe heeshshokki isira sayisse uyite cuuamootto soqqamaanchosi ikkatto gede assinohe. Kuni lowo geeshsha dancha doorshaati!

2. Konni birxichira maa xiinxallineemmo?

² Cuuamattora albaanni ammanakki fonqolannori duuchuri iillinoheti dihuluullissannote. Ikkirono lophitanni haꞌratto woyite wolu fonqolino iillannohe. Sheexaanu Yihowa baxanna isira soqqama aguratto gede assahera woꞌnaalanno. (Efe. 4:14) Isi hatto assahera wodha dihasiissannohe. Yihowara ammanantenna heeshshokki isira sayisse uyitto woyite eootto qaale agadhite heeꞌratto gede kaaꞌlannoheri maati? Ayyaanaamittetenni agurittokkinni lophate sharrama hasiissannohe. (Ibi. 6:1) Ikkina tenne assa dandaattohu hiittoonniiti? Konni birxichira tenne hajo daafira xiinxallineemmo.

AYYAANAAMITTETENNI LOPHATE MAA ASSA DANDAATTO?

3. Baalunku Kiristaani cuuamihu gedensaanni ma assa hasiissannonsa?

³ Cuuammummohu gedensaanni ninke baalunku, soqqamaasinchu Phaawuloosi Efesooni heeꞌranno Kiristaanira kulino amaale harunsa hasiissannonke. Isi, insa “woꞌma” woy gikki yitino Kiristaana ikkitanno gede jawaachishinonsa. (Efe. 4:13) Wole yaattonni, ‘ayyaanaamittetenni lopha agurtinoonte’ yiinonsa. Phaawuloosi ayyaanaamittete lopho shiinqu qaaqqi lophanno gari ledo heewisiisino. Annunna ama ilamino qaaqqonsa lowo geeshsha baxxanno; hattono hagiidhitanno. Ikkirono iltino qaaqqinsa hegerera qaaqqo ikke diheeꞌranno. Kuni qaaqqi yannate gedensaanni ‘oosichimmate’ akata aguranno. (1 Qor. 13:11) Kiristaanu lophono hattooti. Cuuammummohu gedensaannino ayyaanaamittetenni lopha hasiissannonke. Hanni tennera kaaꞌlitannonketa mite hedo laꞌno.

4. Ayyaanaamittetenni lophatto gede kaaꞌlannoheri maati? Xawisi. (Filiphisiyusi Sokka 1:9)

⁴ Yihowara nooꞌne baxilli lexxanno gede assidhe. Wonanni Yihowa lowo geeshsha baxxinoonni. Kayinni isira nooꞌne baxilli albinni roore lexxa dandaanno. Hiittoonni? Soqqamaasinchu Phaawuloosi Filiphisiyusi Sokka 1:9te Yihowara noonke baxille lossiꞌra dandiineemmota mitte doogo kulino. (Qummeeshsha nabbawi.) Phaawuloosi Filiphisiyusi heeꞌranno Kiristaani baxilli “lede lede lophanno gede” huuccino. Hakko daafira Yihowara noonke baxille lossiꞌra dandiineemmo. “Halaalu egennonna woꞌma wodancha” heedhannonke gede assiꞌne tenne assa dandiineemmo. Yihowa albinni roore anfummo kiiro roore banxeemmosi; hattono akatasinna mitto coye assanno gara roore naandeemmo. Iso hagiirsiisate noonke hasatto lexxitanno; hattono iso dadillisannore assa horo dihasiꞌneemmo. Yihowa fajjo maatiro afatenna fajjosi ledo sumuu yaannore assate sharrammeemmo.

5-6. Yihowara noonke baxilli lexxanno gede assiꞌra dandiineemmohu hiittoonniiti? Xawisi.

⁵ Yesuusi Yihowa akatta guutu garinni leellishino; hakko daafira Yesuusa seekkine anfummo kiiro Yihowa albinni roore banxeemmo. (Ibi. 1:3) Yesuusa afa dandiineemmoti qara doogo xaggesi kulannoha shoole Wongeella xiinxallate. Qullaawa Maxaafa barru baala nabbawate rosichi noohekkiha ikkiro, xaanni Yesuusi daafira kultanno xagge nabbabbe hanafa dandaatto. Yesuusi daafira kultanno xagge nabbawatto woyite akattasi illachishi. Isi ruxxi yinikki shinqanniho; qoleno isi baxillunni, qaaqquullu isiwa dagganno gede asse hanqafinonsa. (Maq. 10:13-16) Yesuusi shaqqadohonna faasiiqaho; hattono rosaanosi isira giddonsata ruxxi yitukkinni hasaaphitanno. (Mat. 16:22) Konni garinni Yesuusi iimi Annisi lawishsha harunsino. Yihowano ruxxi yinikki shinqanniho. Iso huuccattotenni hasaawisa dandiineemmo. Qoleno huucciꞌneemmo woyite giddonketa gudinse kuꞌla dandiineemmo. Yihowa togo yaannonke yine diwaajjineemmo. Isi baxannonke hattono ninke daafira hedanno.—1 Phe. 5:7.

⁶ Yesuusi mannaho shaqqille leellishino. Soqqamaasinchu Maatewoosi togo yee borreessino: “Allaalaanchu nookki geꞌreewi gede ikke qarramenna gara hawe noo manna afe marari.” (Mat. 9:36) Yihowarana mayi macciishshamannosi? Yesuusi togo yiino: “Gordoho heeꞌrannohu Anniꞌneno kuri shiimmaaddu giddonni mittuno baꞌꞌara dihasiꞌranno.” (Mat. 18:14) Tini lowo geeshsha hagiirsiissannote! Yesuusa seekkine anfummo kiiro Yihowara noonke baxilli lexxanno.

7. Ayyaanaamittetenni gikki yiino Kiristaaniwa aana kaaꞌlitannohehu hiittoonniiti?

⁷ Songote giddo noori ayyaanaamittetenni gikki yitino roduuwiwa aante, Yihowara noohe baxilli lexxanno gede assiꞌranna ayyaanaamittetenni lopha dandaatto. Insa hagiirraamma ikkitino gara wodanchi. Qoleno Yihowara soqqamate doodhansanni digaabbitanno. Insa Yihowara soqqante afidhinoha mito woꞌnaalsha kultannohe gede xaꞌmi. Mitto shota ikkinokki doorsha doodhatto woyite insa amaaꞌli. “Malanno manni haammatiro” coyi qinaannota deꞌooti.—Law. 11:14.

8. Qullaawu Maxaafi rosiisannori halaale ikkasi huluullamittoro ma assa dandaatto?

⁸ Huluullo qeeꞌli. Gufo lamete kullinte gede Sheexaanu ammanakki kaajjishiꞌrattokki gedenna albinni roore Yihowawa shiqattokki gede assate woꞌnaalanno. Isi togo assannoti mitte doogo Qullaawu Maxaafiha mito roso huluullamatto gede assate. Lawishshaho mitu manni dangoommohu suutu soorronniiti ikkinnina Maganu kalaqeennanke diꞌꞌikkino yee ammansiisahera woꞌnaalara dandaanno. Shiimu heedhe konni rosi daafira garire afoottokkiha ikkara dandaanno; xa kayinni lophitoti konne roso rosu mine rosoottoha ikkara dandaanno. Rosiisaano suutu soorro daafira rosiissannori gara lawahera dandaanno. Ikkollana insa Kalaqaanchu noota leellishshanno taje seekkite buuxxinokkiha ikkara dandaanno. Lawishsha 18:17 nooha xintu seera qaagi; qummeeshshu, “Baarigaarisi daa geeshsha balaxe kuꞌlannohu, halaalaancho lawanno” yaanno. Rosu mine rosiinsannire sammi yite ammanantenni Qullaawu Maxaafi giddo noo halaale seekkite xiinxalli. Borruwanke horoonsidhe xiinxalli. Alba suutu soorro ammantanno roduuwa amaaꞌli. Insa baxannonke Kalaqaanchi noota ammantanno gede assinonsari maatiro xaꞌmi. Togoohu jawaachishanno hasaawi addu taje afiꞌratto gede kaaꞌlannohe.

9. Meliisa woꞌnaalshinni maa rosootto?

⁹ Meliisa yinanni rodoo kalaqamu daafira kulanno birxicho xiinxallase lowo geeshsha kaaꞌlitinose.b Ise togo yitino: “Rosu mine suutu soorro daafira rosiinsanniri gara lawanno. Umi qara konni huluullisinoe coyi daafira xiinxalla waajjoomma. Suutu soorro daafira rosiinsanni rosi garalla ikki yee waajjoomma. Kayinni Yihowa ammananke taje noota ikkitara hasiꞌrannota huwatoomma. Hakko daafira xiinxalla hanafumma. Ate Daafira Hedanno Kalaqaanchi No? (Ingilizete Afoo) yaanno maxaafa, Heeshsho Dagginohu Kalaqanteeti? (Amaaru Afoo) yitanno birosherenna Heeshshote Kaima—Dawaronsa Afa Hasiissannota Onte Xaꞌmuwa (Amaaru Afoo) yitanno biroshere nabbawoomma. Xiinxalla hasiissinoeti togoo borrooti; mayi kageeshsha keeshshummakkilla xiinxallo yee hedoomma.”

10-11. Amanyootunni xuru nookkiha ikkite heeꞌratto gede kaaꞌlannoheri maati? (1 Teselonqe 4:3, 4)

¹⁰ Amanyoote bainore gibbe. Wedellimmate yannara siimu xaadooshshi hasatto qarrissara dandiitanno; qoleno wolootu togoore assatto gede xixxiibbahera dandiitanno. Sheexaanu togoo yortora qeelamattora hasiꞌranno. Amanyootunni xuru nookkiha ikkite heeꞌratto gede kaaꞌlannoheri maati? (1 Teselonqe 4:3, 4 nna lekkaalliidi qaagiishsha nabbawi.) Huuccatto assiꞌratto woyite giddokkita Yihowara hasaaphi. Qoleno jawaante aannohe gede iso huucciꞌri. (Mat. 6:13) Yihowa ate qorichisha ikkikkinni kaaꞌlahera hasiꞌrannota qaagi. (Far. 103:13, 14) Qoleno kaaꞌlo afiꞌrate Maganu Qaale nabbawa dandaatto. Aleenni kullite Meliisara amanyoote bainore heda agura qarra ikkitinose. Ise togo yitino: “Qullaawa Maxaafa barru baala nabbawaꞌya busha yorto qeeꞌleemma gede kaaꞌlitinoe. Tini Yihowata ikkoommatanna heeshshoꞌyanni isira soqqama hasiꞌreemmata qaageemma gede assitinoe.”—Far. 119:9.

¹¹ Qarraꞌne umiꞌnenni tirate woꞌnaaltinoonte. Qarra ikkinoꞌnere anniꞌneranna amaꞌnera hasaaphe. Togoore insara hasaapha waajjishshaꞌnera dandiitanno; kayinni hatto assaꞌne kaaꞌlitannoꞌne. Meliisa togo yitino: “Worba ikkeemma gede kaaꞌlaera Yihowa huucciꞌrummahu gedensaanni qarra ikkinoere anniꞌyara hasaaphoomma. Hakkuyi gedensaanni fooliishsho afiꞌroomma. Tini Yihowa hagiirsiissinota afoomma.”

12. Gara ikkinore doodha dandiitinannihu hiittoonniiti?

¹² Qullaawu Maxaafiha xintu seera harunse. Lophitinanni hadhinanni woyite annuwiꞌnenna amuuwiꞌne mito coye umiꞌnenni doodhitinanni gede fajjitannoꞌne. Ikkirono xaano affinoonnikkihu lowo coyi no. Yihowa ledo nooꞌne jaaloomi baꞌꞌanno gede assitanno soꞌro loossinannikki gede qoropha dandiitinannihu hiittoonniiti? (Law. 22:3) Kaarii yinanni rodoo danchare doodhitanno gede kaaꞌlinoseri maatiro coyidhino. Ayyaanaamittetenni gikki yiino Kiristaanira mittu mittunku coyira seeru hasiisannonsakkita huwattino. Ise togo yitino: “Seera calla ikkikkinni Qullaawu Maxaafiha xintu seerano huwata hasiissinoe.” Qullaawa Maxaafa nabbabbinanni woyite kiꞌneneeto togo yitine xaꞌme: ‘Tini xagge Yihowa hedo daafira maa rosiissannoe? Gara ikkinore assate kaaꞌlannoeha xintu seera amaddino? Hatto ikkiro loosu aana hosiisaꞌya kaaꞌlitannoehu hiittoonniiti?’ (Far. 19:7; Isa. 48:17, 18) Qullaawa Maxaafa nabbawaꞌnenna xintu seera hiincaꞌne Yihowa hagiirsiisannore assa qarra ikkitannoꞌnekki gede kaaꞌlitannoꞌne. Ayyaanaamittetenni lophitinanni hadhinanni woyite, Yihowara mittu coyira noosi lao hiittootero affinanni daafira mittu mittunku coyira seeru hasiisannoꞌnekkita wodanchitinanni.

13. Dancha jaalla kaaꞌlitannoꞌnehu hiittoonniiti? (Lawishsha 13:20)

¹³ Yihowa baxxanno jaalla doodhe. Gufo lamalate laꞌnummonte gede dancha jaalla doodha ayyaanaamittetenni lophitinanni gede kaaꞌlitaꞌnera dandiitanno. (Lawishsha 13:20 nabbawi.) Saara yinanni rodoora hagiirrise baino. Hakkiinni ise hedose biddi assidhanno gede kaaꞌlannosere afidhino. Ise togo yitino: “Dancha jaalla hasiissannoe yannara afiꞌroomma. Mitte wedellitte rodoo ledo lamalate kiiro Agarooshshu Shae qixxaambeemmo. Wole jaalaꞌya qolte gambooshshunniwa dawaro qola hanafeemma gede kaaꞌlitinoe. Jaallaꞌya kaaꞌlitinoe daafira hojju xiinxallo assiꞌranna ganye huucciꞌra hanafoomma. Yihowa ledo nooe jaalooma kaajjishiꞌra hanafoomma; hattono galagale hagiirraame ikkoomma.”

14. Juleeni dancha jaalla kalaqiꞌrinohu hiittoonniiti?

¹⁴ Danchare assatto gede kaaꞌlitannohe jaalla afiꞌra dandaattohu hiittoonniiti? Xa songote cimeessa ikke soqqamanni noohu Juleeni yinanni rodii togo yiino: “Wedellichu noommo yannara ledoꞌya soqqansho fultannore dancha jaalla kalaqiꞌroommo. Insa diinaggaabbe soqqantannoreeti hattono soqqanshotenni afiꞌnanni hagiirre huwateemmo gede kaaꞌlitinoe. Hakko daafira woꞌma yanna soqqansho soqqamate mixo fushshiꞌroommo. Qoleno darawoꞌya calla jaalla assiꞌraꞌya batinye dancha jaalla hoogeemmo gede assitanni nooete wodanchummo. Gedensoonni Beeteeleteno dancha jaalla kalaqiꞌroommo. Insa woꞌnaalshi dancha boohaarsha doodheemmo gedenna albinni roore Yihowawa shiqeemmo gede kaaꞌlinoe.”

15. Phaawuloosi jaaloomu daafira Ximootewoosi mayyee qorowisiisinosi? (2 Ximootewoosi 2:20-22)

¹⁵ Songote giddo noohu mittu manchi dancha jaala ikkinohekkitalla huwatitto? Phaawuloosi umi xibbi diro Kiristaanu songo giddo noori mitootu ayyaanaamittetenni dancha lawishsha ikkitannokkita huwatino; hakko daafira Ximootewoosi togoo manniwiinni xeertiꞌranno gede qorowisiisino. (2 Ximootewoosi 2:20-22 nabbawi.) Yihowa ledo noonke jaaloomi ninkera muxxete. Yihowa ledo danchu jaaloomi heeꞌrannonke gede assiꞌrate lowo geeshsha sharrammoommo; hakko daafira konne jaaloomanke hunanno manna jaallanke diassiꞌneemmo.—Far. 26:4.

MIXO FUSHSHIꞌRA AYYAANAAMITTETENNI LOPHITINANNI GEDE KAAꞌLITANNOꞌNE GARA

16. Hiittoo mixo fushshiꞌra dandaatto?

¹⁶ Kaaꞌlitanno mixo fushshidhe. Ammanaꞌne kaajjitanno gede assitannotanna ayyaanaamittetenni lophitinanni gede kaaꞌlitannoꞌne mixo fushshidhe. (Efe. 3:16) Lawishshaho ganyitine hojju xiinxallo assidhinanni garanna Qullaawa Maxaafa nabbabbinanni gara woyyeessiꞌrate mixo fushshiꞌra dandiitinanni. (Far. 1:2, 3) Woy ganyitine huucciꞌranna huuccidhinanni gara woyyeessiꞌra hasiissinoꞌneha ikkara dandaanno. Qoleno doodhitinanni boohaarshinna yannaꞌne horoonsidhinanni gara lainohunni albinni roore kiꞌneneeto eemadha hasiissinoꞌneha ikkara dandaanno. (Efe. 5:15, 16) Yihowa ayyaanaamittetenni lophate sharrantinanni gara laꞌꞌanno woyite lowo geya hagiidhanno.

17. Woloota kaaꞌlinummoro mayi horo afiꞌneemmo?

¹⁷ Woloota kaaꞌlitinanni woyite albinni roore ayyaanaamittetenni gikki yitinanni. Yesuusi, “Adhannonkunni aannohu baꞌraaꞌrinoho” yiino. (Soq. 20:35) Yannaꞌnenna wedellimmate wolqaꞌne horoonsidhine woloota kaaꞌlitinanni woyite, lowo hagiirre afidhinanni. Lawishshaho songoꞌnera noore geerra roduuwanna dhuku anje noonsare kaaꞌlate mixo fushshiꞌra dandiitinanni. Qoleno dikkotenni hadhine mitore hira kaaꞌlitine woy elektirooniksete uduunnichonsa horoonsidhanno gara kultine kaaꞌla dandiitinanni. Labballu roduuwi songote soqqamaano ikkate mixo fushshiꞌra dandiitanno; tini ammanate roduuwansa albinni roore kaaꞌlitanno gede assitannonsa. (Fil. 2:4) Qoleno Yihowa Farciꞌraasine ikkinokki mannira Maganu Mangisteha dancha duduwo dudubbine baxxinanninsata leellisha dandiitinanni. (Mat. 9:36, 37) Dandiitinanniha ikkiro woꞌma yanna soqqansho soqqamate mixo fushshidhe.

18. Woꞌma yanna soqqansho ayyaanaamittetenni lophitinanni gede kaaꞌlitannoꞌnehu hiittoonniiti?

¹⁸ Woꞌma yanna soqqansho ayyaanaamittetenni lophate lowo faro fantannoꞌne. Suwisaano ikkine soqqama Maganu Mangiste Sawaakooti Rosi Mine eꞌꞌe rosate faro fantanno. Qoleno Beeteelete soqqama woy Maganu mine minate loosira kaaꞌlama dandiitinanni. Katiliini yinanniti suwisaancho rodoo togo yitino: “Woꞌnaalshu noonsa roduuwi ledo soqqamaꞌya cuuamummahu gedensaannino ayyaanaamittetenni lopheemma gede baasa kaaꞌlitinoe. Insa lawishshi Qullaawu Maxaafi egennoꞌya lexxitanno gede assiꞌreemma gedenna rosiisate dandooꞌya woyyeessiꞌreemma gede kakkayisinoe.”

19. Ayyaanaamittetenni lopha agura hoogginiro hiikkonne atoote afidhinanni?

¹⁹ Ayyaanaamittetenni lopha agura hoogginiro lowo atoote afidhinanni. Haafare shorritinanni wedellimmate yannaꞌne beebba diguxxitinanni. (1 Yoh. 2:17) Busha doorsha doodha abbitanno gawajjonni gattinanni. Assitinanniri qinaannoꞌne hattono hagiirraamma ikkitinanni. (Law. 16:3) Danchu lawishshiꞌne ajano ikko akkala ammanate roduuwaꞌne jawaachishanno. (1 Xim. 4:12) Wolu baalunkunni roore Yihowa hagiirsiinsironna isi ledo muli jaalooma kalaqiꞌniro afiꞌnanni harshammonna hagiirre afidhinanni.—Law. 23:15, 16.