‘Halaalunni Heedhe’

1. “Halaale” macciishshinoommohu hiittoonniitiro hasaawanke kaaꞌlitannonkehu ma garinniiti?

“HALAALE macciishshoottohu hiittoonniiti?” Tenne xaꞌmora dawaro duucha higge qoloottoti dihuluullissannote. Mittu ammanate rodiinke ledo egennammeemmo woyite isi umo xaꞌmannonke xaꞌmo giddo mitte tenneeti. Ammanate roduuwinke Yihowa affinohunna baxxinohu hiittoonniitiro kultannanke macciishshanna ninkeno insara halaale macciishshinoommohu hiittoonniitiro kula banxeemmo. (Rom. 1:11) Togoo hasaawi halaalu mageeshshi geya muxxe ikkinoro qaangeemmo gede assannonke. Qoleno ‘halaalunni heeꞌrate’ yaano Yihowa atoote afiꞌneemmo gede assanno garinninna iso hagiirsiisanno garinni heeꞌrate albinni roore murciꞌneemmo gede assannonke.—3 Yoh. 3.

2. Konni birxichira maa ronseemmo?

² Konni birxichira, halaale banxeemmo gede assinonke coyi giddo mito laꞌneemmo. Hakkiinni, tenne muxxe elto woꞌmanka woyite banxeemmota leellisha dandiineemmohu hiittoonniitiro ronseemmo. Tini Yihowa halaalunniwa dangeemmo gede assinonketa albinni roore naandeemmo gede assitannonketi dihuluullissannote. (Yoh. 6:44) Qoleno wolootaho halaale kulate hasattonke lexxitanno gede assitanno.

“HALAALE” BANXEEMMOHU MAYIRAATI?

3. Halaale banxeemmo gede assannonkehu qaru coyi maati?

³ Halaale banxeemmo gede assannonkehu duuchu korkaati no. Baalunkunni roore, halaalu Buicho ikkinoha Magano Yihowa lowo geeshsha banxeemmo. Qaalisi Qullaawu Maxaafi widoonni Yihowa iimanna uulla Kalaqinoha wolqaataamo Magano ikkinota calla ikkikkinni, shaqqillunni towaatannonkeha baxillaancho iimi Annanke ikkinota anfoommo. (1 Phe. 5:7) Maganinke ‘maarannoha, hanqoho muddamannokkihanna mararaancho Magano ikkinota hattono ammanamasinna bagamannokkihu baxillisi batiꞌra’ ikkinota anfoommo. (Ful. 34:6) Yihowa taashsho baxannoho. (Isa. 61:8) Isi ninke qarrammanna laꞌꞌanno woyite lowo geeshsha xissiisiꞌranno; hattono hirqino yannara qarra baala hoolate qixxaawinoho, qoleno tenne assate quqquxamanno. (Erm. 29:11) Hattee hagiirsiissanno yanna quqquxamme agadhineemmo! Yihowa lowo geeshsha banxeemmoti dihuluullissannote!

4-5. Soqqamaasinchu Phaawuloosi hexxonke mokkollichu ledo heewisiisinohu mayiraati?

⁴ Halaale banxeemmo gede assannonkehu wolu korkaati maati? Halaalu lowore kaaꞌlannonke. Hanni mitto lawishsha laꞌno. Qullaawu Maxaafi halaali albillittete hexxonke daafirano kulanno. Tini hexxo afidhino waaga kulate soqqamaasinchu Phaawuloosi togo yee borreessino: “Tini hexxo heeshshonkera milli miqqi yaannokkihu addaxxinanni mokkollichi gedeete.” (Ibi. 6:19) Mokkollichu yowolo milli miliqqi yitannokki gede kaaꞌlannonte gede, Qullaawu Maxaafi aana xintantino hexxonkeno addi addi qarri iillannonke woyite hembeelammeemmokki gede kaaꞌlitannonke.

⁵ Phaawuloosi konni qummeeshshira coyiꞌranni noohu buuramino Kiristaanira noonsate iimi hexxo daafiraati. Kayinni isi coyiꞌrino hedo gannate ikkitanno uullara hegerera heeꞌrate quqquxamanno Kiristaanirano kaaꞌlitannote. (Yoh. 3:16) Addanko hegere heeshsho hexxo daafira rosanke hagiirru noo heeshsho heeꞌneemmo gede kaaꞌlitinonke.

6-7. Ivooni albillittete hexxo daafira rosase kaaꞌlitinosehu hiittoonniiti?

⁶ Hanni Ivooni yinanni rodoo woꞌnaalsha laꞌno. Ise lophitinohu halaalu mine diꞌꞌikkino; hattono anje heedhe reyo waajjitanno. Ise mitte yannara nabbabbinota, “Gaꞌa yinanniri heeꞌrannokki yanna dagganno” yitanno yaatto hawa didandiitino. Ise togo yitino: “Tini yaatto albillittete yanna daafira hedanni goxummakkinni galeemma gede assitinoe. ‘Heeshshote yaa tenne calla dilabbinoe.’ ‘Kalaqammoommohu isi mayiraati?’ yee hedumma. Reya horo dihasiꞌreemma!”

⁷ Gedensoonni ise wedellitte heedhe Yihowa Farciꞌraasine ledo xaaddu. Ise, “Albillitte Gannate ikkitino uullara hegerera heeꞌra dandeemmata afumma” yitino. Halaale rosase rodoonke kaaꞌlitinosehu hiittoonniiti? Ise ledde togo yitino: “Xa albillittete yanna daafira woy reyote daafira yaadanni goxummakki digaleemma.” Ivooni Qullaawu Maxaafi halaale baxxannoti dihuluullissannote; ise albillittete hexxo daafira wolootaho kula lowo geya baxxanno.—1 Xim. 4:16.

8-9. (a) Yesuusi kulinohu mittu lawishshira mittu manchi afiꞌrino jiro mageeshshi geeshsha naadino? (b) Ati halaale mageeshshi geeshsha naadatto?

⁸ Qullaawu Maxaafi halaali Maganu Mangistehu danchu duduwi daafirano kulanno. Yesuusi Maganu Mangiste halaale maanxoonni jiro ledo heewisiisino. Isi Maatewoosi 13:44te togo yiino: “Gordu Gashshooti, loosu giddo maanxoonni jiro lawanno. Mittu manchi tenne jiro afiꞌre kae wirri asse maaxi. Lowo geeshsha hagiidhino daafira haꞌre noosire baala hire mare hakkonne bayicho hidhi.” Kuni manchi hattee jiro hasiꞌranni nookkita wodanche. Kayinni afiꞌri woyite tenne jiro umisita assiꞌrate lowore assino. Isinni, noosire baala hirino. Mayira? Tini jiro lowo waaga afidhinota afino. Tini jiro isi agurannoha baalanka coye roortanno.

⁹ Atino halaale konni garinni laꞌꞌatto? Konni garinni laꞌꞌattoti dihuluullissannote! Xaa yannara Yihowara soqqamme afiꞌneemmo hagiirrenna albillitte Gashshootisi hunda afiꞌneemmota hegere heeshsho hendiro tini alame uyitannohu aye coyino gariha ikkinokkita anfoommo. Yihowa ledo noonkehu muli jaaloomi tennera yine agurroommoha aye coyeno rooranno. Ninke hagiirri “woꞌmante doogonni” iso hagiirsiisate.—Qol. 1:10.

10-11. Mayikili heeshshosi giddo lowo coye biddi assiꞌranno gede kakkayisinosiri maati?

¹⁰ Ninke giddo batinyu Yihowa hagiirsiisate yine lowore agurroommo. Mitootu lowo woxe baantanninsa looso agurtino. Wolootu kayinni jiro shorra agurtino. Mitu qolte Yihowa daafira rossuti heeshshonsa woꞌmunni woꞌma biddi assidhino. Mayikili yinanni manchino hatto assino. Isi lophinohu halaalu mine diꞌꞌikkino. Wedellichu heeꞌre isi kaaraate rosino. Isi togo yiino: “Dancha manninatu uurrinsha nooe daafira hagiidheemmo. Mito woyite, ane ikkannohu dino yee hedeemmo.” Kayinni Mayikili Qullaawa Maxaafa rosa hanafiti Yihowa finqille giwannota rosino. (Far. 11:5) Isi Qullaawa Maxaafa xiinxallisinosi minaanninna minaama daafira coyiꞌranni togo yiino: “Insa sammi yite Qullaawu Maxaafi halaale rosiissinoe ikkinnina kaaraate aguri yite horo diegentinoe.”

¹¹ Mayikili Yihowa daafira rosanni haꞌrita Isira noosi baxilli lexxino. Isira Yihowa mannasi mararanno gari roore dhagge ikkinosi. Gedensoonni Mayikili heeshshosi biddi assiꞌra hasiissannosita wodanchino. Isi togo yiino: “Kaaraate agurate geeshsha qarra ikkinoeri dino. Ikkirono togo assaꞌya Yihowa hagiirsiisannota afoommo; qoleno Yihowara soqqama aguroommo coye baala roortannota ammanoommo.” Mayikili afiꞌrino halaale lowo geeshsha naadino; tini heeshshosi giddo lowo coye biddi assiꞌranno gede kakkayissinosi.—Yai. 1:25.

12-13. Qullaawu Maxaafi halaali Mayiili kaaꞌlinosehu hiittoonniiti?

¹² Qullaawu Maxaafi, halaalu afiꞌrino waaga kulate, halaale tunsichoho xawanno xawaabbi ledo heewisiisanno. (Far. 119:105; Efe. 5:8) Azeribajaanete heedhannoti Mayiili Maganu Qaali giddonni afidhino kaaꞌlo lowo geeshsha naaddanno. Ise lophitinohu ammaꞌnotenni bebbeehantino maate giddooti. Annise Isilaamaho amase Yihudu ammaꞌno harunsitannote. Ise togo yitino: “Maganu noota huluullame egennoommakkiha ikkirono kayi, huluullitannoeti lowo xaꞌmo nooe. ‘Maganu manna kalaqinohu mayiraati? Mittu manchi heeshshosi diro woꞌma qarrame kae gedensoonni hegerera sioolete giiramannohu mayiraati?’ yee hedeemma. Mannu, baalunkuri ikkannohu Maganu fajjo garinniiti yaanno daafira, ‘Maganu manna baxita assiꞌranni, mannu qarramanna laꞌꞌanni hagiidhanno yaate?’ yee hedeemma.”

¹³ Mayiili xaꞌmuwasera dawaro hasiꞌra diagurtino. Ise gedensoonni Qullaawa Maxaafa xiinxallite Yihowa Farciꞌraasincho ikkitino. Ise togo yitino: “Qullaawu Maxaafi kulannoti ammansiissanno taje hagiirraame ikkeemma gede kaaꞌlitinoe. Qoleno Maganu Qaalinni rosoommari giddoyidi keere afiꞌreemma gede assinoe.” Mayiili gede ninke baalunku tunsichunni “maalaꞌlinanni caabbichiwa [woshshinonkeha]” Yihowa guwinseemmo.—1 Phe. 2:9.

14. Halaale albinni roore baxa dandiineemmohu hiittoonniiti? (“Halaalu Ledo Heewisiinsoonniha Wole Coye” yitanno saaxineno lai.)

¹⁴ Halaalu afiꞌrino waaga kulanno lawishshi giddo kuni gamaholla. Kiꞌneno wole batinye lawishsha qaagginanniti dihuluullissannote. Halaale baxa hasiissannonkehu mayiraatiro kulannoha wole korkaata afate, hojju xiinxallo assidhe. Halaale banxummo kiiro, albinni roore halaale banxeemmota leellinsheemmo doogga afiꞌneemmo.

HALAALE BANXEEMMOTA LEELLISHA DANDIINEEMMOHU HIITTOONNIITI?

15. Halaale banxeemmota leellisha dandiineemmoti mitte doogo hiitteeti?

¹⁵ Ganyine Qullaawa Maxaafanna Qullaawu Maxaafi aana xintantino borro xiinxalline halaale banxeemmota leellisha dandiineemmo. Qoleno halaalu mine keeshshinoommo diri ikki geeshshihano ikkiro, woꞌmanka woyite rosa hasiissannonke. Umo attammoonniti Agarooshshu Shae togo yitanno: “Halaalu dubbino ishini giddo itamate shiimuri gate noohu shiimu awawi gedeeti; konne awawa afiꞌrate seekkitine hasiꞌra hasiissannoꞌne. Hasidhine afidhiniro hakko awawa adhate heeshshi yaa hasiissannoꞌne; mitto awawa calla afidhine kassi yitinoonte. Roore gamba assiꞌrate hasiꞌra agurtinoonte.” Xiinxalla shaaꞌꞌa looso diꞌꞌikkitino; kayinni kiissanno.

16. Ate kaaꞌlitinoheti xiinxallote hayyo hiitteeti? (Lawishsha 2:4-6)

¹⁶ Nabbawanna xiinxalla banxeemmori ninke baalanko yaa diꞌꞌikkino. Ikkirono Yihowa halaale seekkine huwanteemmo gede egenno ‘jawaante hasiꞌnammora’ koyisinonke. (Lawishsha 2:4-6 nabbawi.) Togo assate sharramanke woꞌmanka woyite kaaꞌlitannonke. Koori yinanni rodii Qullaawa Maxaafa nabbawanno woyite mitto mittonka qummeeshsha seekke illachishannota coyiꞌrino. Isi togo yiino: “Mitto mittonka lekkaalliidi qaagiishshanna fiixxanno hedo kultanno qummeeshshuwano laeemmo hattono lede xiinxalleemmo. . . . Konni garinni nabbawaꞌya lowo geya kaaꞌlitinoe!” Ninke xiinxallineemmohu konni garinni woy wolu garinnino ikko, yanna gaaꞌmine xiinxallate sharrammeemmoha ikkiro halaale naandeemmota leellinsheemmo.—Far. 1:1-3.

17. Halaalunni heeꞌrate yaa mayyaate? (Yaiqoobi 1:25)

¹⁷ Hige halaale xiinxalla calla ikkitannokkita anfoommo. Woꞌma horo afiꞌrate halaalunni heeꞌra yaano ronsoommore loosu aana hosiisa hasiissannonke. Halaalu addu hagiirre afiꞌneemmo gede kaaꞌlannonkehu hatto assinummoro callaati. (Yaiqoobi 1:25 nabbawi.) Halaalu giddo heeꞌnoommota buuxiꞌra dandiineemmohu hiittoonniiti? Mittu rodii, loosu aana hosiinsanni heeꞌnoommori maatironna woyyeessiꞌra hasiissannonkeri maatiro afate, ninkeneeto layiꞌra hasiissaanketa coyiꞌrino. Soqqamaasinchu Phaawuloosi tenne daafira kulanni togo yiino: “Kulloonninke garinni heeꞌnoommowiinni alba hinge qaanfo.”—Fil. 3:16.

18. ‘Halaalunni heeꞌrate’ dandiinummore baala assineemmohu mayiraati?

¹⁸ Hanni ‘halaalunni heeꞌrate’ dandiinummore baala assinummoro afiꞌneemmo horo hendo! Hatto assineemmoha ikkiro uminke heeshsho woyyaabbannoha calla ikkikkinni, Yihowanna ammanate roduuwinkeno hagiidhitanno gede assineemmo. (Law. 27:11; 3 Yoh. 3) Halaale banxeemmonna halaalunni heeꞌneemmo gede assannonkehu qaru coyi konneeti.