Nabbawaano Xaꞌmitanno Xaꞌmo

Uullate aana reyotenni kaꞌannori ayeooti? Insa hiittoo kao kaꞌanno?

Hanni Qullaawu Maxaafi tenne xaꞌmuwara qolanno dawaro laꞌno.

Soqqamaasinete Looso 24:15 ‘cubbaataammunna keeraano reyotenni kaꞌannota’ kultanno. Keeraanote yiniri reyitara albaanni Maganoho hajajantinoreeti; hakko daafira insa suꞌmi heeshshote maxaafira borreessamino. (Mil. 3:16) Cubbaataammaho yiniri giddo gamu Yihowa daafira rosate faro afidhukki reyitinoreeti; hakko daafira insa suꞌmi heeshshote maxaafira diborreessamino.

Yohaannisi 5:28, 29 Soqqamaasinete Looso 24:15 kullite lame gaamo daafira kultanno. Yesuusi “Dancha loossinori reyotenni kaꞌe lubbotenni heedhanno; busha loossinori kayinni reyotenni kaꞌeenna . . . yoo yinanninsa” yiino. Keeraano reyitara albaanni danchare assitino. Insa suꞌminsa heeshshote maxaafira borreessame noo daafira heeshshote heeꞌrate kaꞌanno. Cubbaataammu kayinni reyitara albaanni bushare assitino. Insa yoote kao kaꞌanno. Insa suꞌmi heeshshote maxaafira diborreessamino; qoleno insa reyotenni kaꞌuhu gedensaanni, dancha woy busha assitannoro laꞌne yoo yinanninsa. Hatte yannara, insa Yihowa daafira rosatenna suꞌminsa heeshshote maxaafira borreessamanno gede assiꞌrate faro afidhanno.

Yohaannisi Ajuuja 20:12, 13 reyotenni kaꞌannori baalunku ‘maxaaffate giddo borreessinoonnirira’ yaano haaro alamera uyinanninkehu haaru seerira hajajama hasiisannonsata kultanno. Konni seerira hajajantannokkiri baꞌanno.—Isa. 65:20.

Daanieeli 12:2 reyite noori giddo gamu ‘hegere heeshshora kaꞌannotanna, gamu kayinni hegere saalira’ kaꞌannota kultanno. Kuni qummeeshshi kulanni noohu reyotenni kaꞌannorira yinannite jeefote yoo daafiraati; insa jeefote “hegere heeshsho” afidhanno woy ‘hegere saala’ adhitanno. Hakko daafira 1,000 diri jeefora gamu hegere heeshsho afidhanno; gamu kayinni hegerera baꞌanno.—Aju. 20:15; 21:3, 4.

Hanni mitto lawishsha laꞌno. Reyotenni kaꞌannota lamenta gaamo, wole gobba haꞌre heeꞌra hasiꞌranno manni ledo heewisiisa dandiinanni. Keeraanote yiniri, mite horonna qoosso afiꞌrate kaaꞌlannonsaha loosu woy hatte gobbara heeꞌrate viiza afiꞌrino manni gedeeti. Cubbaataammu kayinni yannate geeshsha heeꞌrate woy daaꞌꞌatate viiza calla afiꞌrino manni gedeeti. Togoo mannira marino gobbara heeꞌranno gede fajjinannihu, hatte gobba seerira hajajamannota leellishihu gedensaanniiti. Hatteente gede, reyotenni kaꞌanno cubbaataammi Gannatete heeꞌrate Yihowa seerira hajajamanna keeraano ikka hasiissannonsa. Wole gobbanni dayino mannira umi qara uyinanni viizi ikkihano ikkiro, jeefote mitootu hatte gobba qansoota ikkitanno; woloota kayinni hatte gobbanni fushshinanni. Insa martino gobbara heedhanno woy heedhannokki gede assinannihu amanyootensanna assootensa laꞌneeti. Hatteente gede, reyotenni kaꞌannorira baalaho jeefote yoo yinannihu ammanantinore ikkansanna haaro alamera leellishshanno amanyoote laꞌneeti.

Yihowa shaqqado calla ikkikkinni taashsho baxanno Maganooti. (Mar. 32:4; Far. 33:5) Isi keeraanono cubbaataammano reyotenni kayise baxillesi leellishanno. Ikkirono, insa baalunku isi fushshino wodhora hajajantara hasiꞌranno. Haaro alamera hegerera heedhara fajjinanniri iso baxxannoreetinna isi biddishshi garinni heedhannore callaho.