“Qaalesi Guuttinannire Ikke”

1-2. Maganu soqqamaano hagiirraamma assannonsari maati? (Yaiqoobi 1:22-25)

YIHOWANNA muxxe Beettisi hagiirraamma ikkinammora hasidhanno. Faarso 119:2te borreessaanchi togo yiino: “Hajajosi wonshitannorinna, woꞌmu wodaninni iso hasidhannori baraadhinoreeti [“hagiirraammaho,” NW].” Yesuusino tenne lede buuxisanni, “Hagiirraammu Maganu qaale macciishshite hajajantannoreeti!” yiino.—Luq. 11:28.

² Yihowa magansiꞌneemmore ikkinoommo daafira ninke hagiirraamma mannaati. Mayira? Hagiidhineemmo gede assannonkehu batinyu korkaati heeꞌrirono, qaru korkaati kayinni Maganu Qaale ganyine nabbawatenna nabbamboommore loosu aana hosiisate sharramankeeti.—Yaiqoobi 1:22-25 nabbawi.

3. Maganu Qaalinni nabbamboommore loosu aana hosiisa kaaꞌlitannonkehu hiittoonniiti?

³ ‘Qaale guunteemmore ikkinummoro’ lowo doogganni horo afiꞌneemmo. Lawishshaho, Maganu Qaalinni ronsoommore loosu aana hosiinsummoro Yihowa hagiidhanno. Tini qolte hagiirraamma ikkineemmo gede assitannonke. (Ros. 12:13) Maganu Qaalinni nabbamboommore loosu aana hosiinseemmo woyite, maatenke heeshsho seekkanno; hattono ammanate roduuwinke ledo noonke jaaloomi kaajjanno. Tini halaale ikkase heeshshoꞌnenni laꞌinoonniha ikkara dandaanno. Hakkiino sae, Yihowa biddishsha harunsitannokkirira iillannonsahu lowo qarrinni ganteemmo. Ninkeno Moote Daawiti coyiꞌrino hedora sumuu yineemmo. Isi faarsosi giddo Yihowa seeri, hajajonna yoo daafira xawisihu gedensaanni jeefote, ‘Seerakki agadhaꞌyannino lowo baꞌraaꞌra afiꞌreemmo’ yiino.—Far. 19:7-11.

4. Maganu Qaale guunteemmore ikka shota ikkitannonkekkihu mayiraati?

⁴ Noore coyiꞌniro Maganu Qaale nabbawanna nabbamboommore loosu aana hosiisa shota ikkitannonkekki woyiti no. Loosu batiꞌrannonkeha ikkirono, Yihowa maa assinammora hasiꞌrannoro huwanteemmo gede, Qullaawa Maxaafa nabbawatenna xiinxallate yanna gaaꞌma hasiissannonke. Hanni Maganu Qaale ganyine nabbambeemmo gede kaaꞌlitannonketa mite hedo laꞌno. Qoleno nabbamboommore hiincineemmo gede kaaꞌlannonkeri maatironna ronsoommore loosu aana hosiisa dandiineemmohu hiittoonniitiro laꞌneemmo.

MAGANU QAALE NABBAWATE YANNA GAAꞌME

5. Roore yannanke sayinseemmohu hiikkonne looso loonsanniiti?

⁵ Rooru Yihowa mannira loosu batiꞌrannonsa. Roore yanna sayinseemmohu Qullaawu Maxaafi kulannoha addi addiha hasiisanno looso loonsanniiti. Lawishshaho, ninke giddo rooru uminkeranna maatenkera hasiisannore shiqishate maalaamittete looso loonseemmo. (1 Xim. 5:8) Batinyu roduuwi dhiwamino woy geedhino fiixansa towaaxxanno. Qoleno ninke baalunku fayyimmanke towaaxxa hasiissannonke; tenne assate yanna hasiissanno. Kuri coyibbano agurranna songote giddono loosu heeꞌrannonke. Dancha duduwo sabbaka loosa hasiissannonkeho qara loosooti. Kuni baalunku loosi heeꞌreennanni, Qullaawa Maxaafa ganyite nabbawate, nabbawoottore hiincatenna loosu aana hosiisate yanna afiꞌra dandaattohu hiittoonniiti?

6. Qullaawa Maxaafa nabbawa balaxisiisa dandaattohu hiittoonniiti? (Misileno lai.)

⁶ Kiristaana ikkinoommo daafira, ninkera ‘woyyanno coyi’ woy roore hasiisanno coyi giddo mittu Qullaawa Maxaafa nabbawate; hakko daafira Qullaawa Maxaafa nabbawa balaxisiisa hasiissannonke. (Fil. 1:10) Hagiirraamo ikkino manchi daafira kultanni faarso fooliishsho mitte togo yitanno: “Kaaliiqi Seerinni hagiidhanno; Seerasino hashshanna barra buuxanni qaaganno.” (Far. 1:1, 2) Tini hedo Qullaawa Maxaafa nabbawate yanna gaaꞌma hasiissannota leellishshannote. Qullaawa Maxaafa nabbawate roore woyyitanno yanna hiittenneeti? Mittu mittunkura woyyitannonke yanna addi addita ikkitara dandiitanno. Kayinni qaru coyi Qullaawa Maxaafa ganyine nabbawate injiitannonke yanna doodhate. Viktori yinanni rodii togo yiino: “Qullaawa Maxaafa soodo guto nabbawa baxeemmo. Soodo gute kaꞌꞌa baxeemmokkiha ikkirono, hatte yannara hedoꞌya bebbeehanno coyi diheeꞌranno. Wole coye hedeemmokki daafira nabbaweemmo coye illachisha dandeemmo.” Aterano togoo yanna injiitannoheha ikkara dandaanno. Ateneeto togo yite xaꞌmi: ‘Qullaawa Maxaafa nabbawate roore injiitannoe yanna hiittenneeti?’

NABBABBINOONNIRE HIINCE

7-8. Nabbamboommorinni woꞌma horo afiꞌneemmokki gede assannonkeri maa ikkara dandaanno? Lawishsha kuli.

⁷ Qullaawa Maxaafa nabbawate yanna gaaꞌmottooha ikkiro, qoropha hasiissannohe coyino no. Mitto coye nabbabbe kaꞌe bayichonkonni habbe egennootto? Ninke baalunkura togoo coyi tuncu yaannonke. Qullaawa Maxaafa nabbambeemmo woyiteno nabbamboommore hambammora dandiineemmo. Barru baala Qullaawu Maxaafita mite fooliishsho nabbawate pirogiraame fushshiꞌnoommoha ikkara dandaanno. Tini danchate. Mixo fushshiꞌranna fushshiꞌnoommo mixo wonshiꞌrate sharrama hasiissannonke. (1 Qor. 9:26) Ikkirono Qullaawa Maxaafa nabbawa hanafa danchate; kayinni tini hanafotella. Maganu Qaalinni nabbamboommorinni horo afiꞌra hasiꞌnummoro hakkiinni sainore assa hasiissannonke.

⁸ Hanni tenne hendo: Xeenu muꞌrote lowo geeshsha hasiisanno. Kayinni shiima yanna giddo biite xeena ganiro baatto lowo geya lixaabbanno. Togoo xeeni muꞌrote dikaaꞌlanno. Muꞌrote kaaꞌlannohu sununni gananno xeenaati; togoo xeeni bushshu giddora eanno daafira muꞌro lophitanno gede kaaꞌlanno. Hatteente gede Qullaawa Maxaafa muddammanni nabbawa dihasiissannonke; tini nabbamboommore huwanteemmokki gede assitannonke; hatto ikkiro qole nabbamboommori dikaaꞌlannonke.—Yai. 1:24.

9. Qullaawa Maxaafa iimi adda nabbawate rosichi noonkeha ikkiro maa assa hasiissannonke?

⁹ Mito woyite Qullaawa Maxaafa iimi adda rakke rakke nabbawa rakkannohe? Hatto ikkiro maa assa hasiissannohe? Sununni nabbawi. Nabbabbanni noottore woy nabbawoottore hiincate sharrami. Tenne assa qarra diꞌꞌikkitannohe. Xiinxallatto yannara xiinxallootore hiincate woy seekke hedate yanna gaaꞌma dandaatto. Woy boode qummeeshsha nabbawanna gattino yanna nabbawoottore seekke hedate horoonsiꞌra dandaatto. Aleenni qummi assinihu Viktori togo yiino: “Qullaawu Maxaafi niwaawe diseediseemmo; mitte fooliishsho calla nabbawammora dandeemmo. Soodo guto nabbaweemmo daafira nabbawoommore barra woꞌma hiinca dandeemmo.” Ati nabbawate horoonsiꞌratto hayyo ikkitutano ikkituro, nabbawoottorinni roore horo afiꞌrate taxxi yitanni nabbawa hasiissannohe.—Far. 119:97; “Heda Hasiissanno Xaꞌmuwa” yitanno saaxine lai.

10. Rosoottore loosu aana hosiisa dandaatto gara leellishanno lawishsha kuli. (1 Teselonqe 5:17, 18)

¹⁰ Qullaawa Maxaafa nabbawatto woyite nabbawoottore loosu aana hosiisa dandaatto gara hedi. Maganu Qaaliha mito gafa nabbawatto woyite ateneeto togo yite xaꞌmi: ‘Tenne amaale xa woy albillitte loosu aana hosiisa dandeemmohu hiittoonniiti?’ Hanni lawishshaho, 1 Teselonqe 5:17, 18 nabbabbanni nootto yine hendo. (Qummeeshsha nabbawi.) Tenne lamenta kiiro nabbawittohu gedensaanni, ganyite huucciꞌrattoronna giddokkinni kaꞌe huucciꞌrattoro taxxi yite heda dandaatto. Qoleno Yihowa galatatto gede assannohe coye hiinca dandaatto. Sase coye badde kulte Yihowa galata dandaatto. Shiimu daqiiqi giddo calla Maganu Qaalinni nabbawoottore illachishshe, macciishshattoha calla ikkikkinni rosoottore loosu aana hosiisattoha ikka dandaatto. Wole qummeeshsha nabbawatto woyiteno barru tuqa hatto assattoha ikkiro mageeshshi horo afiꞌrattoro hanni hedi! Addanko albinni roore Maganu Qaale guutattoha ikka dandaatto. Kayinni loosu aana hosiisa hasiissannohehu lowo coyi nootalla huwatitto?

WONSHIꞌRA DANDAATTO MIXO FUSHSHIꞌRI

11. Mito woyite hexxo mudhatto gede assannoheri maa ikkara dandaanno? Lawishsha kuli.

¹¹ Qullaawa Maxaafa nabbawatto woyitenna giddosi noo amaale loosu aana hosiisatto faro hasiꞌratto woyite mito woyite hexxo mudhattoha ikkara dandaanno. Hanni tenne hedi: Techote Qullaawu Maxaafi niwaawekki giddo manna mallaandeemmokki gede kultanno amaale no. (Yai. 2:1-8) Wolootu ledo noohe aante woyyeessiꞌra hasiissannoheta huwatootto daafira mito coye biddi assiꞌrate murciꞌritto. Tini lowo geeshsha danchate! Gaꞌa nabbawattote Qullaawu Maxaafi niwaawekki giddo qolte, coyiꞌrattore eemadha hasiissannoheta kultanno amaale no. (Yai. 3:1-12) Hakkiinni gara ikkinokkire coyiꞌrootto yanna noota wodanchitto. Hakko daafira albinni roore jawaachishannorenna dhaawannore coyiꞌrate murciꞌritto. Hakkiinni aane noo barra nabbawatto niwaawekki giddo tenne alame jaalla ikkineemmokki gede kulanno qorowishshi no. (Yai. 4:4-12) Hakko daafira boohaarsha albinni roore qorophite doodha hasiissannoheta wodanchitto. Kuri coyibba baala biddi assiꞌra hasiissannoheta afootto daafira shoolki barra hexxo mudhattoha ikkara dandaanno.

12. Qullaawa Maxaafa nabbabbanni heedhe biddi assiꞌra hasiissannohere wodanchittoro hexxo mudha hasiissannohekkihu mayiraati? (Lekkaaliidi qaagiishshano lai.)

¹² Biddi assiꞌra hasiissannohehu lowo coyi noota wodanchittoro hexxo mudhitooti. Tini danchu wodani nooheta leellishshanno. Umosi heeshshi assannohunna isonooto dogannokki manchi Qullaawa Borro nabbawannohu biddi assiꞌra hasiissannosi coye huwatateeti.a Qoleno ‘haaro mannimma uddiꞌra’ mitte hinge assine agurrannire ikkitinokkita qaagi. (Qol. 3:10) Woꞌmanka woyite Maganu Qaale guutattoha woy loosu aana hosiisattoha ikkatto gede kaaꞌlannoheri maati?

13. Rosoottore loosu aana hosiisatto gede kaaꞌlitannoheti kaajja hayyo hiittenneeti? (Misileno lai.)

¹³ Nabbawoottore baala mitte higge loosu aana hosiisate woꞌnaalantenni mitto woy lame coye doodhi. (Law. 11:2) Togo assate woꞌnaali: Biddi assiꞌra hasiissannohere borreessiꞌri; hakkiinni umo biddi assiꞌrattoha mitto woy lame coye doodhi. Gatinoha wole coye wole woyite biddi assiꞌra dandaatto. Umo maa assa dandaatto?

14. Hiittee mixokkinni hanafa dandaatto?

¹⁴ Umo, wonshiꞌrate hakkeya qarrissannohekki mixo doodhattoha ikkara dandaanno. Woy roore woyyeessiꞌra hasiissannohe coye doodhattoha ikkara dandaanno. Mixokki badde afittohu gedensaanni, lawishshaho Agarooshshu Shaeta Interneetete Layibirere woy Yihowa Farciꞌraasineta Xiinxallote Kaaꞌlitanno Borro horoonsidhe xiinxalla dandaatto. ‘Ate giddo loosannohu Magano ikkino daafira’ mixokki wonshiꞌrate hasattonna wolqa aannohe gede iso huucciꞌri. (Fil. 2:13) Hakkiinni rosoottore loosu aana hosiisate woꞌnaali. Umi mixo wonshiꞌrakki wole mixokkino wonshiꞌrate kaꞌꞌatto gede assitahera dandiitanno. Isinni heeshshokki giddo mitto coye biddi assiꞌrakki woy mitto akata woyyeessiꞌrakki wole coyibba woyyeessiꞌrano shota ikkitannohe gede assitanno.

‘MAGANU QAALI GIDDOKKI LOOSANNO GEDE ASSIꞌRI’

15. Yihowa manni Qullaawa Maxaafa nabbawannohu batinyu manniwiinni baxxannohu mayinniiti? (1 Teselonqe 2:13)

¹⁵ Mitu manni ‘Qullaawa Maxaafa duucha hinge nabbamboommo’ yaanno. Kayinni kuni manni Qullaawu Maxaafi yaannore addinta ammananno? Insa Qullaawu Maxaafi rosiisanno garinni heedhanno? Woy heeshshonsa biddi assiꞌranno? Hige ma assinayi, rooru manni Qullaawu Maxaafi amaale diharunsanno. Yihowa magansiꞌranno manni kayinni togooha diꞌꞌikkino! Umi xibbi diri Kiristaaninte gede, ninkeno Qullaawa Maxaafa ‘Maganu qaali gede assine adhineemmo.’ Addanko Maganu qaaleeti! Hakkiinni saeno Maganu Qaali heeshshonke giddo loosanno gede assiꞌrate sharrammeemmo.—1 Teselonqe 2:13 nabbawi.

16. Qaale guunteemmore ikkineemmo gede kaaꞌlannonkeri maati?

¹⁶ Maganu Qaale nabbawanna loosu aana hosiisa shota ikkitannonkekki woyiti no. Qullaawa Maxaafa nabbawate yanna afiꞌra qarra ikkitankera dandiitanno. Woy muddammanni nabbambeemmohanna nabbamboommore gari geeshsha huwanteemmokkiha ikkara dandaanno. Qoleno biddi assiꞌra hasiissannonkeri lowori noota huwanteemmo daafira hexxo mudhinammora dandiineemmo. Qarrinke ikkihano ikkiro hatto assa kayi dandiinannikkire diꞌꞌikkitino. Yihowa kaaꞌlonni qarra ikkinonkere qeela dandiineemmo. Konnira Yihowa kaaꞌlo afiꞌratenna Qaale macciishshineemmore calla ikkikkinni assineemmore ikkateno murciꞌno. Addanko Maganu Qaale nabbambummonna loosu aana hosiinsummo kiiro albinni roore hagiirraamma ikkineemmo.—Yai. 1:25.