XIINXALLOTE BIRXICHO 10
FAARSO 31 Maganu Ledo Qaafi!
Yihowanna Yesuusite Gedee Hedo Heedhannoꞌne Gede Assidhe
“Kiristoosi manninatisinni qarra adhino daafira, kiꞌneno tenne hedo olu uduunnichi gede assitine qodhe.”—1 PHE. 4:1.
GUULCHO HEDO
Soqqamaasinchu Pheexiroosi Yesuusite gedee hedo heedhannosi gede assiꞌrinohu hiittoonniitironna ninkeno hatto assiꞌra dandiineemmo gara ronseemmo.
1-2. Yihowa ma garinni baxa hasiissannonke? Yesuusi tenne leellishinohu hiittoonniiti?
“MAGANOKKI YIHOWA woꞌmu wodanikkinni, woꞌma lubbokkinni, woꞌma wolqakkinninna woꞌma hedokkinni baxi.” (Luq. 10:27) Yesuusi, Muse Seeri giddo roore hasiissanno hajajo tenne ikkitinota xawise kulino. Yihowa woꞌmu wodaninkennino baxa hasiissannonketa qaango; togo yaa halchonkenninna hasattonkenni baxa hasiissannonke yaate. Qoleno Yihowa woꞌma lubbonkenni baxa hasiissannonke; hatto yaa Maganoho galanna woꞌma wolqanke isira aa hasiissannonke yaate. Ikkirono Yihowa woꞌma hedonkennino baxa hasiissannonke; togo yaa hendeemmo garinnino iso baxa hasiissannonke yaate. Hige Yihowa hedo woꞌmunni woꞌma huwata didandiineemmo. Ikkollana “Kiristoosi hedo” maatiro afate xiinxalline Maganu hedo roore huwata dandiineemmo; korkaatuno Yesuusi Annisi hedo guutu garinni leellishanno.—1 Qor. 2:16.
2 Yesuusi Yihowa woꞌmu wodanisinni baxino. Yesuusi, Yihowa isi ma assara hasiꞌrannoro afino; qoleno Maganu hasiꞌrannore assiꞌro qarramannoha ikkirono hatto assate murciꞌrino. Yesuusi Annisi fajjo assa illachishino daafira aye coyino tenne assannota hoolasira diwodhino.
3. Soqqamaasinchu Pheexiroosi Yesuusiwiinni maa rosino? Pheexiroosi ammanate roduuwisi maa assitanno gede jawaachishino? (1 Pheexiroosi 4:1)
3 Pheexiroosinna wole soqqamaasine Yesuusi ledo lowo yanna sayisatenna isi hedo maatiro afate qoosso afidhino. Pheexiroosi qullaawu ayyaani massageennasi borreessinote umi sokkasira, Kiristaanu Yesuusi hedo olu uduunnichi gede asse qodhanno gede jawaachishino. (1 Pheexiroosi 4:1 nabbawi.) Pheexiroosi “kiꞌneno . . . olu uduunnichi gede assitine qodhe” yee borreessi woyite, olu uduunne uddidhe olaho qixxaabbino olanto xawisanno qaale horoonsiꞌrino. Hakko daafira Kiristaanu Yesuusite gedee hedo heedhannonsa gede assiꞌriro cubbunna tenne Sheexaanu gashshino alame ledo olame qeelate kaajja olu uduunne uddiꞌre qixxaawino yaa dandiinanni.—2 Qor. 10:3-5; Efe. 6:12.
4. Kuni birxichi Pheexiroosi amaale haꞌrunsineemmo gede kaaꞌlannonkehu hiittoonniiti?
4 Yesuusi hedo maatironna ninkeno isite gedee hedo heedhannonke gede assiꞌra dandiineemmo gara xiinxallineemmo. Ninke baalunku (1) mitto afoo ikkineemmo gede kaaꞌlitannonketi Yihowate gedee hedo heedhannonke gede assiꞌneemmo gara, (2) umo heeshshi assineemmore ikka dandiineemmo garanna (3) huuccattotenni Yihowa addaxxine geino wodani heeꞌrannonke gede assiꞌra dandiineemmo gara ronseemmo.
YIHOWATE GEDEE HEDO HEEDHANNOꞌNE GEDE ASSIDHE
5. Pheexiroosi mitte yannara Yihowate gedee hedo heedhannosi gede assiꞌrikki gatinohu hiittoonniiti?
5 Hanni Pheexiroosi mitte yannara Yihowate gedee hedo heedhannosi gede assiꞌrikki gatino yanna laꞌno. Yesuusi soqqamaanosira Yerusaalame haꞌra hasiissannosita, hakkiicho ammaꞌnote massagaano angara sayinse uyinannisita, beebba assiꞌnannisitanna gedensoonni shinannisita kulinonsa. (Mat. 16:21) Pheexiroosira Israeelete hexxo ikkannohanna daanno yine qaale eꞌnoonniha Buuraminoha, Yihowa shinanni gede fajjanno yee ammana qarra ikkitinosiha ikkara dandaanno. (Mat. 16:16) Hakko daafira Pheexiroosi Yesuusa qacce fushshe “Mooticha, ateneeto togoonta gadadissooti; kuni horonta diꞌꞌiillannohe” yii. (Mat. 16:22) Pheexiroosira tenne hajo daafira Yihowate gedee hedo noosikkihura hedosi Yesuusite ledo sumuu diyitino.
6. Yesuusi Yihowa hedanno garinni hedannota leellishinohu hiitte doogonniiti?
6 Yesuusi woꞌmunni woꞌma iimi Annisi hedanno garinni hedanno. Yesuusi Pheexiroosi “Sheexaane, muliꞌyanni hoꞌli! Ati mannu hedo ikkinnina Maganu hedo hedattokki daafira anera guficho ikkoottoe” yiinosi. (Mat. 16:23) Pheexiroosi hatto yiinohu danchare hede ikkara dandaanno; kayinni Yesuusi Pheexiroosi amaale giwino. Tennenni ninke ronseemmori no. Yihowa hedinohu Yesuusi qarramikkinni reyanno gede diꞌꞌikkino. Hatte yannara Pheexiroosi hedosi Maganu hedo ledo sumuu yitanno gede assiꞌra hasiisannosita rosino.
7. Pheexiroosi gedensoonni Yihowa hedanno garinni heda hasiꞌrannota leellishinohu hiittoonniiti? (Misile lai.)
7 Pheexiroosi gedensoonni Yihowa hedanno garinni heda hasiꞌrannota leellishino. Barcintinokkiri dagate wido ikkitinori Maganu manni wido ikkitanno yanna gambissino. Pheexiroosi dagate wido ikkinohura Qornelewoosira sabbakanno gede kulloonnisi; Qornelewoosi umo Kiristaana ikkituri giddo mittoho. Ayihude Yihudu wido ikkinokki manni ledo horo xaadooshshe diafidhino; hakko daafira Pheexiroosi uyinoonnisi loosira qixxaawanno gede kaaꞌlo hasiissinositi dihuluullissannote. Pheexiroosi hatte hajo daafira Maganu fajjo maatiro wodanchiti hedosi biddi assiꞌrino. Hakko daafira isi sonkisita ‘mittoreno xiixamikkinni’ haꞌrino. (Soq. 10:28, 29) Isi Qornelewoosiranna minisi mannira sabbakino; hakkiinni insa cuuantino.—Soq. 10:21-23, 34, 35, 44-48.
Pheexiroosi Qornelewoosi mine no (Gufo 7 lai)
8. Yihowa hedanno garinni hendeemmota leellisha dandiineemmohu hiittoonniiti? (1 Pheexiroosi 3:8)
8 Lowo diri gedensaanni Pheexiroosi ammanate roduuwasi “mimmitiꞌne ledo suumuu yitine heedhe” yee amaalino. (1 Pheexiroosi 3:8 nabbawi.) Yihowa manna ikkinoommo daafira Qaalisi giddo kulloonnita Yihowa hedo xiinxalline ammanate roduuwinke ledo mitte hedore ikka dandiineemmo. Lawishshaho, Yesuusi haꞌrunsaanosi Maganu Gashshoote balaxisiissanno gede amaalino. (Mat. 6:33) Hakko daafira songoꞌnera noohu mittu halashshaanchi woꞌma yanna soqqansho eꞌꞌe soqqamate hedara dandaanno. Isira hendoommoha lambe tenne mixosi soorriranno gede jawaachishantenni tenne mixo daafira dancha danchare kulanna iso kaaꞌla dandiineemmo.
UMO HEESHSHI ASSITINANNIRE IKKE
9-10. Yesuusi lowo geeshsha umo heeshshi assannoha ikkinota leellishinohu hiittoonniiti?
9 Yesuusi shinasira albaanni noo hashsha Pheexiroosiranna wole rosaanora umo heeshshi assate daafira kaajja roso rosiisinonsa. Hakkuyira albaanni Yesuusi jeefote hurbaate insa ledo itara mitore qixxeessitanno gede Pheexiroosinna Yohaannisi soyino. Pheexiroosinna Yohaannisi wosinu sagale itara albaanni lekkansa hayishshinanni gede, gawatenna fooxano qixxeessa hasiissannonsaha ikkara dandaanno. Hurbaate intanni yanna iillitanno woyite konne mannu woffi assanno looso ayi loosa ikka?
10 Yesuusi hobbi ruxxi yiikkinni lowo geeshsha umosi heeshshi assannoha ikkasi leellishino. Konne borojju loosanno looso loosita soqqamaanosi lowo geeshsha dhagge assidhinoti dihuluullissannote. Yesuusi uddanosi uulla wore, fooxa adhe halloho xaaxire, gawatete waa wore lekkansa hayishsha hanafi. (Yoh. 13:4, 5) Yesuusi 12 soqqamaasine lekka hayishshanni lowo yanna gudinoha ikkara dandaanno; isi gedensoonni kaadannosihu Yihudi lekka nafa hayishshino. Yesuusi umosi heeshshi asse konne looso loose gudino. Hakkiinni isi shaqqillunni togo yiino: “Assoommoꞌnere wodanchitini? Kiꞌne ane ‘Rosiisaancho,’ ‘Mooticha’ yitine woshshitinannie; hatto ikkoommonkalla yitinoonni daafira, yaaꞌne garankolla. Konnira ani Mootichanna Rosiisaancho ikke heeꞌrenni lekkaꞌne hayishshummo geeshsha, kiꞌneno mimmitiꞌne lekka hayishsha hasiissannoꞌne.”—Yoh. 13:12-14.
Ninkeneeti woy wolootu daafira hendeemmori umonke heeshshi assineemmoronna teꞌee leellishanno
11. Pheexiroosi umo heeshshi assa rosinota leellishinohu hiittoonniiti? (1 Pheexiroosi 5:5) (Misileno lai.)
11 Pheexiroosi Yesuusiwiinni umo heeshshi assate daafira rosino. Yesuusi iimira haꞌrihu gedensaanni Pheexiroosi ilamihunni kayise laanshawinoha mitto mancho hurse maalale loosino. (Soq. 1:8, 9; 3:2, 6-8) Tenne maalale laꞌꞌara batinyu manni Pheexiroosiwa timbiliqqi yee dayino. (Soq. 3:11) Pheexiroosi maccaha ikkanna silxaane lowori gede asse laꞌꞌanno dagoomi giddo lophinoha ikkino daafira, ayirrinye uyinasira hasiꞌrinoni? Dihasiꞌrino. Pheexiroosi umosi heeshshi asse hasiisanno ayirrinye Yihowaranna Yesuusira uyino. Isi togo yiino: “Yesuusi suꞌminninna suꞌmisira noonke ammananni laꞌinannihunna affinoonnihu kuni manchi jawaatino.” (Soq. 3:12-16) Pheexiroosi, umo heeshshi assa hasiissannota ikkitinota kulate Kiristaanaho borreessino sokkara horoonsiꞌrino yaatto, Yesuusi fooxa halloho xaaxire soqqamaasinesi lekka hayishshino yanna qaangeemmo gede assitannonke.—1 Pheexiroosi 5:5 nabbawi.
Pheexiroosi maalale loosihu gedensaanni, umosi heeshshi asse ayirrinye Yihowaranna Yesuusira uyino. Ninkeno wolootu galattannonke woy baꞌraassannonke yine agadhinummokki danchare assine umonke heeshshi assineemmore ikka dandiineemmo (Gufo 11-12 lai)
12. Pheexiroosi gede woꞌmanka woyite umonke heeshshi assineemmota leellisha dandiineemmohu hiittoonniiti?
12 Pheexiroosi lawishsha haꞌrunsine umo heeshshi assineemmore ikka dandiineemmo. Umonke heeshshi assinoommota leellishannore coyiꞌra calla guddannokkita qaango. Pheexiroosi umo heeshshi assate daafira kulate horoonsiꞌrino qaali ninkeneetina wolootu daafira hendeemmoreno leellishanno. Wolootaho danchare assineemmohu Yihowanna manna banxeemmo daafiraati ikkinnina naandankera yine diꞌꞌikkino. Assineemmore wolootu huwatturono huwata hooggurono dandiinummo doogonni Yihowaranna roduuwinkera hagiirrunni soqqammeemmoha ikkiro, addinta umo heeshshi assinoommore ikkinoommota leellinsheemmo.—Mat. 6:1-4.
“GEINO WODANI HEEꞌROꞌNE”
13. “Geino wodani heeꞌroꞌne” yaa mayyaatero xawisi.
13 “Geino wodani” noosi manchi maa maa assanno? (1 Phe. 4:7) Geino wodani noosi manchi Yihowa hedo ledo sumuu yaannoha dancha doorsha doodhate dandiire baala assanno. Togoo Kiristaanchi heeshshosi giddo Yihowa ledo noosi jaalooma saꞌꞌannori nookkita afino. Umisira gara ikkitino lao noosi hattono baalankare afinohu gede asse dihedanno. Qoleno duucha woyite umosi heeshshi asse Yihowa huucciꞌre iso addaxxannota leellishanno.a
14. Pheexiroosi mitte yannara Yihowa addaxxikki gatinohu hiittoonniiti?
14 Yesuusi reyara albaanni noohu jeefote hashsha rosaanosi togo yee qorowisiisino: “Konne hashsha kiꞌne baalunku anenni kainohunni gufidhinanni.” Pheexiroosi mitte giddonni togo yee qolino: “Atenni kainohunni wolootu baalu gufidhurono, ani horonta digufiꞌreemmo!” Hakko hashsha Yesuusi mite rosaanosi “baqqi yitine agadhe, hattono agurtinikkinni huuccidhe” yee amaalinonsa. (Mat. 26:31, 33, 41) Pheexiroosi hakkuyira albaanni tenne amaale loosu aana hosiisoommero Yesuusi rosaancho ikkinota leellishate worba ikka dandaanno. Pheexiroosi kayinni mootichasi kaadino; hakko daafira lowo geeshsha gaabbino.—Mat. 26:69-75.
15. Yesuusi uullate aana heeꞌrinohu jeefote hashsha geino wodani noosita leellishinohu hiittoonniiti?
15 Yesuusi woꞌmunni woꞌma Yihowa addaxxino. Yesuusi guuta ikkirono duucha hige huucciꞌrino. Tini, Yihowa fajjo assate worba ikkanno gede kaaꞌlitinosi. (Mat. 26:39, 42, 44; Yoh. 18:4, 5) Pheexiroosi, Yesuusi duucha hige huuccatto assiꞌranna laꞌꞌasi heeshshosi diro woꞌma kaaꞌlitinositi dihuluullissannote.
16. Pheexiroosi geino wodani heeꞌrannosi gede assiꞌrinota leellishinohu hiittoonniiti? (1 Pheexiroosi 4:7)
16 Gedensoonni Pheexiroosi huuccattotenni albinni roore Yihowa addaxxa rosino. Reyotenni kainohu Yesuusi Pheexiroosiranna wole rosaanora, insa uyinoonninsaha sabbakate looso umo fushshitanno gede qullaawa ayyaana aannonsata buuxisinonsa. Ikkirono Yesuusi insa qullaawa ayyaana adhita geeshsha Yerusaalamete keeshshitanno gede kulinonsa. (Luq. 24:49; Soq. 1:4, 5) Pheexiroosi hakka geeshsha maa assiyya? Pheexiroosinna ammanate roduuwisi ‘jawaatte huuccidhino.’ (Soq. 1:13, 14) Gedensoonni Pheexiroosi umo borreessino sokkara ammanate roduuwisi geino wodani heeꞌrannonsa gede assidhanno gedenna huuccattotenni Yihowa addaxxitanno gede jawaachishinonsa. (1 Pheexiroosi 4:7 nabbawi.) Pheexiroosi Yihowa addaxxa rosino; hattono songote heellichote gede assine laꞌnanniha ikkino.—Gal. 2:9.
17. Noonke dandoo ikkitutano ikkituro woꞌmanka woyite maa assa hasiissannonke? (Misileno lai.)
17 Geino wodani heeꞌrannonke gede assiꞌrate woꞌmanka woyite huuccattotenni Yihowawa shiqa hasiissannonke. Noonke dandoo ikkitutano ikkituro woꞌmanka woyite Yihowa huucciꞌra hasiissannonketa anfoommo. Hakko daafira roorenkanni shaaꞌꞌa ikkinokki doorsha doodhineemmo woyite Yihowa ninkera woyyannore afinota addaxxine massagannonke gede iso huucciꞌno.
Pheexiroosi huuccattotenni Yihowa addaxxa rosino. Ninkeno roorenkanni lowo geya hasiisanno doorsha doodhineemmo woyite kaaꞌlannonke gede Yihowa huucciꞌne geino wodani noonkere ikka dandiineemmo (Gufo 17 lai)b
18. Hedonke albinni roore Yihowate gedeeta ikkitanno gede assiꞌra dandiineemmohu hiittoonniiti?
18 Yihowa isi akatta leellisha dandiineemmo gede asse kalaqinonke daafira lowo geeshsha galaxxineemmosi. (Kal. 1:26) Hige Yihowa lawishsha guutu garinni haꞌrunsa didandiineemmo. (Isa. 55:9) Kayinni Pheexiroosi gede albinni roore hedonke Yihowate gedeeta ikkitanno gede assiꞌra dandiineemmo. Woꞌmanka woyite Yihowa hedanno garinni hende, umonke heeshshi assine hattono geino wodani heeꞌrannonke gede assiꞌne tenne assa dandiineemmo.
FAARSO 30 Annaꞌya, Maganoꞌyanna Jaalaꞌya
a ‘Geino wodana woy fayyo surre’ yaa mayyaatero ledde afate, jw.org aana woy JW Layibirerera “Qullaawu Maxaafi Qummeeshshuwanna Tironsa” yaannohu hunda “2 Ximootewoosi 1:7—‘Maganu Waajjillu Ayyaana Diuyinonke’” yaanno birxichira nooha “Fayyo Surre” (Amaaru Afoo) yaannoha lai.
b MISILETE XAWISHSH: Mitte rodoo loosoho qaalu xaꞌmo xaꞌminasera marte heedhe wodanisenni huuccatto assidhanni no.